Inda koshikalimo

Inda kelandulafano etivali

Inda koshikalimo

Eendombwedi daJehova

Oshikwanyama

OSHUNGONANGELO SEPTEMBA 2015

 OSHIPALANYOLE SHOKOMBADA | OKU NA NGOO SHILI ENYUMUKO?

Ongahelipi hatu dulu okukala noushili kutya oonakufya otava ka nyumuka?

Ongahelipi hatu dulu okukala noushili kutya oonakufya otava ka nyumuka?

Vamwe ohava diladila kutya oonakufya itava ka kala vali nomwenyo. Ashike, omuyapostoli Paulus hasho a li a diladila ngaho. Okwa shanga eendjovo da nwefwa mo a ti: “Hano [ngeenge] twa tula eteelelo muKristus mokukalamwenyo oku akuke, ofye omapongo unene tu dulike kovanhu aveshe, ndelenee paife Kristus okwa nyumuka movafi, Oye wotete [waavo] va kofa mo.” (1 Ovakorinto 15:19, 20) Paulus okwa li a tala ko enyumuko li li oshinima sholela, nenyumuko laJesus oli li oumbangi waasho. * (Oilonga 17:31) Paulus okwa ifana Jesus “wotete,” molwaashi oye wotete a nyumukila omwenyo waalushe. Ngeenge Jesus oye wotete a nyumuka, osha yela kutya ope na yo vamwe.

Job okwa popya kombinga yaKalunga a ti: “Ove ho djuulukwa oshilonga shomake oye.” — Job 14:14, 15

Apa otapa landula etomheno likwao olo tali tu kwafele tu kale tu na eteelelo lenyumuko. Jehova oKalunga kashili, ‘iha fufya.’ (Titus 1:2) Iha popi oipupulu nandenande. Mbela okwa udaneka enyumuko, nokuulika kutya ota ka nyumuna ovanhu, ndele ite ke shi ninga? Ita dulu okuninga ngaho!

Omolwashike Jehova a tula po elongekido li na sha nenyumuko lomonakwiiwa? Okwe shi ninga omolwohole yaye. Job okwa pula a ti: ‘Omunhu ngeenge ta fi, ota ka nyumuka tuu vali? Ove ngeno u ifane, ame nohandi ku nyamukula, Ove ho djuulukwa oshilonga shomake oye.’ (Job 14:14, 15) Job okwa li a tomhwa kutya Xe womeulu omunahole okwa halelela oku ke mu nyumuna. Mbela Kalunga okwa lunduluka? Ombibeli oya ti, “Ame Omwene ihandi lunduluka.” (Malakia 3:6) Natango Kalunga okwa halelela okwaalulila oonakufya momwenyo, ve na oukolele nova hafa. Osho otashi dulu okufaafanifwa nomudali omunahole nghee ha kala a halelela omona oo a fya. Eyooloko oli li ashike apa kutya, Kalunga  oku na eenghono dokuninga osho a hala. — Epsalme 135:6.

Efyo oli li oupyakadi munene, ashike Kalunga ota dulu oku u kandula po filufilu

Jehova ota ka nghonopaleka Omona waye a ka etele ovo va nyika oluhodi omolwefyo lovaholike vavo ehafo linene. Jehova oku uditile ngahelipi enyumuko? Jesus fimbo ina nyumuna Lasarus, okwa li a tala nghee ovamwainakadona vaLasarus nookaume kaye va li va nyika oluhodi neenghono ndele ta hovele ‘okulila.’ (Johannes 11:35) Pomhito imwe, Jesus okwa li a shakeneka omufiyekadi wokuNain, oo a li a filwa omonamati waye ewifa. Jesus eshi e mu mona “okwe mu [udila] olukeno ndele okwa tya kuye: ‘Ino lila.’” Diva okwa nyumuna omonamati. (Lukas 7:13) Jesus oku tonde efyo nokutala ovanhu va nyika oluhodi. Ita ka kala tuu a hafa neenghono eshi ta ka pingena po oluhodi nokweetela ovanhu ehafo mounyuni aushe!

Mbela naave owa kumwa kefyo? Otashi dulika u udite kutya efyo oupyakadi oo itau dulu okukandulwa po. Ashike, ope na ekandulepo, enyumuko olo Kalunga ta ka ninga okupitila mOmona waye. Dimbuluka kutya Kalunga okwa hala u mone ekandulepo olo. Okwa hala u ka kale po opo u ka hambelele ovaholike voye. Kala wa fa mu liwete tamu lilongekidile pamwe onakwiiwa yaalushe nopehe na ou ta fi vali.

Lionel oo a tumbulwa metetekelo okwa ti: “Mokweendela ko kwefimbo, onde lihonga kombinga yenyumuko. Pehovelo kasha li shipu oku shi itavela, nokanda li nde lineekela omunhu oo a lombwela nge kombinga yalo. Eshi nde shi konakona mOmbibeli onda mona kutya oshoshili. Onda teelela nodjuulufi oku ka mona vali tatekulu wange.”

Mbela owa hala okushiiva shihapu? Eendombwedi daJehova otadi ka kala da hafa oku ku ulikila mOmbibeli yoye kutya omolwashike da itavela menyumuko lomonakwiiwa. *

^ okat. 3 Opo u mone oumbangi kutya Jesus okwa nyumuka, tala epandja 78-86 lembo The Bible— God’s Word or Man’s?, la nyanyangidwa kEendombwedi daJehova.

^ okat. 9 Tala yo etukukwa 7 lembo Ombibeli otai hongo lela shike? la nyanyangidwa kEendombwedi daJehova.

Lihonga shihapu

OSHUNGONANGELO (OSHIFO SHOKUKONAKONWA)

Lididimikila efyo lakaume koye kopahombo

Ouyahame oo hau etifwa kokufilwa kaume kopahombo ou nyikifa oluhodi nohau kwata efimbo lile. Lihonga nghee eteelelo lenyumuko olo tali hangwa mOmbibeli li li odjo yehekeleko.

Ombibeli otai hongo lela shike?

Eteelelo lashili kovaholike voye ovo va fya

Mbela owa kanifa omuholike woye mefyo? Oto ke va mona ngoo vali? Lihonga kutya Ombibeli otai hongo shike kombinga yenyumuko.