Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO JULI 2015

Nghee to dulu okukala wa hafa moukulupe

Nghee to dulu okukala wa hafa moukulupe

OHO kala u udite ngahelipi ngeenge to diladila shi na sha noukulupe? Ovanhu vahapu ohava kala ve na oshisho nohava kala va tila. Ohava ningi ngaho, molwaashi oukulupe ohau etelele oinima ii, ngaashi okukala nolutu la fipatela, li na eengadji, okudimbwa nokukwatwa komikifi doshinamenena.

Oshoshili kutya omalutu ovanhu inaa faafana monghedi omo haa kulupa. Vamwe ohava kala ve na oukolele muwa palutu nopamadiladilo. Omolwexumokomesho lopaunamiti, osha ningifa ovanhu va dule okupanga vakwao nokukelela omikifi doshinamenena. Oshidjemo, moilongo imwe ovanhu vahapu ohava kala nomwenyo efimbo lile ve na oukolele.

Kakele kaasho, kutya nee owa shakeneka omaupyakadi oo haa hange ovakulupe ile hasho, ovanhu vahapu ova hala okukala va hafa moukulupe. Ongahelipi hatu dulu okukala twa hafa moukulupe? Osho oshe likolelela koikala, kehalo nokokudula kwetu opo tu tambule ko onghalamwenyo oyo ipe. Natu taleni komafinamhango Ombibeli taa longo oo taa dulu oku tu kwafela meenghalo odo.

KALA OMULININIPIKI: “Ounongo tau kala puava ve lininipika.” (Omayeletumbulo 11:2) Moshikundafanwa eshi, ‘ovalininipiki’ otava dulu okuyukifwa kovanamido ovo va dimina kutya itava dulu vali okuninga keshe shimwe ngaashi nale. Charles womido 93, wokoBrasilia, oku na oushili moshinima osho, eshi a ti: “Ngeenge oto kala efimbo lile, ou na ashike okukulupa. Ku na fiku vali u shune kounyasha.”

Kakele kaasho, okukala omulininipiki inashi hala kutya otu na okukala netaleko lii okukala tu udite kutya, “Ame onda kulupa, kandi na vali osho handi dulu okuninga.” Etaleko la tya ngaho otali tu teya ashike omukumo. Omayeletumbulo 24:10 okwa ti: “Ngenge wa monika wa fya ounye, efiku loluhepo eenghono doye tadi ka ninipala.” Ponhele yaasho, omunhu oo e na elininipiko oha kala e na etaleko liwa noha kendabala okuninga ngaashi ta dulu.

Corrado wokuItali oo e na omido 77, okwa popya pandunge a ti: “Ngeenge to kulupa, ino pumbwa vali okukala ho ningi oinima neendelelo.” Eshi to kulupa owa pumbwa okuninga omalunduluko. Corrado nomukulukadi waye ova kala ve na ondjele moilonga yakwalukeshe, hava landula elandulafano lomalipyakidilo lavo li li pandjele opo va henuke okukala va loloka pexulilo lefiku. Marian wokoBrasilia oo e na omido 81, naye okwa kala ha longo fiyo nakemutwaalele eshi a ninga omunamido. Okwa ti: “Onde lihonga okukala ndi na ondjele.  Ohandi kufa okafudo kanini pokati koilonga opo sha pumbiwa. Ohandi kala omutumba ile ndi nangale po, handi lesha ile ndi pwilikine komusika. Onda dimina kutya itandi dulu okulonga vali keshe shimwe ngaashi nale.”

Kala u na ondjele

KALA U NA ONDJELE: “Ovakainhu nava djale oikutu tai wapala eenghedi diwa nokuliwapeka noshishohoni noukoshoki.” (1 Timoteus 2:9) Outumbulilo ‘oikutu tai wapalele’ otau ulike kokukala tu na ondjele nohatu monika nawa. Barbara, womido 74, wokoKanada okwa ti: “Ohandi kendabala okukala nda yela. Inandi hala okumonika nda dedaukila molwaashi nda kulupa; noihandi lipula kutya ohandi monika ngahelipi.” Fern, womido 91, wokoBrasilia okwa ti: “Ohandi lilandele oikutu ipe lwoikando opo ndi liudife nawa.” Mbela ongahelipi shi na sha novalumenhu ovanamido? Antônio, womido 73, wokoBrasilia okwa ti: “Ohandi kendabala okumonika nawa, handi djala oikutu ya yela noi li momoode.” Shi na sha noukoshoki, okwa ti: “Ohandi likosho nokulikulula efiku keshe.”

Kakele kaasho, osha fimana okuhenuka okukala hatu lipula unene shi na sha neholokepo letu ndele hatu dopa ‘okuliwapeka noshishohoni noukoshoki.’ Bok-im, womido 69, wokoSouth Korea oo e na etaleko li li pandjele li na sha nomidjalo okwa ti: “Paife onda mona kutya inashi wapala kwaame okudjala oikutu imwe oyo nda li handi dja kounyasha.”

Kala u na etaleko liwa

KALA U NA ETALEKO LIWA: “Omafiku aeshe omufininikwa omaii, ndelenee omutima tau hafe, otau dana oshivilo alushe. (Omayeletumbulo 15:15) Eshi to ende to kulupa, otashi dulika u kwate komadiladilo mai ngeenge owa kala ho diladila kefimbo lounyasha woye nokoinima ihapu oyo kwa li ho dulu okuninga. Osho oshi shi okuudiwa ko. Kakele kaasho, ou na okukendabala opo u kondjife omadiladilo oo mai. Okudiladila konakudiwa otashi ke ku polimaneka ashike noku ku teya omukumo mwaashi to dulu okuninga paife. Joseph, womido 79, wokoKanada okwa diladila pandunge a ti: “Ohandi kendabala okuhafela oinima oyo handi dulu okuninga paife noihandi lipula vali noinima oyo nda li handi ningi nale ndele paife ihandi i dulu vali.”

Okulesha nokulihonga otaku dulu yo oku ku kwafela u kale u na etaleko liwa la mbwalangadja. Onghee hano, konga eemhito dokulesha nokulihonga oinima ipe ngaashi to dulu. Ernesto, womido 74, wokoFilippine oha i kongulumambo a ka leshe omambo oo mahokwifa. Okwa ti: “Ohandi a hafele yo ngeenge ndi li momalweendo shi dulife ngeenge ndi li meumbo.” Lennart, womido 75, wokoSweden okwa katuka onghatu tai kumwifa yokulihonga elaka lipe.

Kala ho yandje

KALA HO YANDJE: “Yandjeni, nanye yo otamu ka pewa.” (Lukas 6:38) Kala ho longifa efimbo loye nokutukulilafana oiniwe yoye navamwe. Osho otashi ke ku kwafela u kale wa wanenwa nowa hafa. Hosa, womido 85, wokoBrasilia oha kendabala okukwafela vamwe nonande oku na omangabeko opalutu. Okwa ti: “Ohandi dengele ookaume ovo tava vele ile ovo va teka omukumo noku va shangela eenhumwafo. Omafimbo amwe ohandi va tumine omaano manini. Ondi hole yo okutelekela  omusha ovo tava vele ile oku va ningila oikuki.”

Ngeenge owa kala ho yandje nehalo liwa, otashi ke linyengifa yo vamwe va kale hava yandje. Jan, womido 66, wokoSweden okwa ti: “Ngeenge owa ulikile vamwe ohole, otashi ke ve linyengifa yo navo ve ku ulikile ohole.” Onghee hano, omunhu oo ha yandje oha xumifa komesho omhepo youmwainafana noha dimine kutya vakwao ohava mono ehafo.

KALA U NA OUKAUME: “Ou te litukula, ota kongo omahalo aye mwene. Neenghono adishe ta kondjifa osho shi neendunge.” (Omayeletumbulo 18:1) Nonande ope na omafimbo amwe ho kala wa hala okulikalela, henuka okulitongola ko. Innocent, womido 72, wokoNigeria oha hafele okukala pamwe nookaume kaye. Okwa ti: “Ohandi hafele okweendafana novanhu vomapupi aeshe.” Börje, womido 85 wokoSweden naye okwa ti: “Ondi hole okukala novanyasha. Ngeenge ndi li navo, ohashi ningifa nge ndi kale ndi udite nda nyashuka.” Kala ho katuka eenghatu u shive ookaume lwoikando. Han-sik, womido 72 wokoSouth Korea okwa ti: “Ame nomukulukadi wange otu hole okushiva ookaume vomapupi aeshe, ovakulunhu novanyasha opo tu uhale ile tu lye ouvalelo pamwe.”

Kala u na oukaume

Okukala u na oukaume osha hala kutya ou na okukala ho popi navakweni nokupwilikina kuvo. Kala ho ulike kutya ou na ko nasha navakweni. Helena, womido 71 wokoMozambique, okwa ti: “Ondi na ohamu nohandi ungaunga navakwetu nefimaneko.” Ohandi pwilikine kwaasho tava ti opo ndi mone osho tava diladila naasho ve hole.” José, womido 73 wokoBrasilia, okwa ti: “Ovanhu ohava kala va hafa ngeenge ve li novanhu ovo hava pwilikine, hava ulike oukwao wananghali, ve na ko nasha navo, have va pandula pefimbo liwa nokuyola pamwe.”

Ngeenge to holola omadiladilo oye, popya eendjovo “da fingala omongwa.” (Ovakolossi 4:6) Kala u na onghenda nokutwa vamwe omukumo.

KALA U NA OLUPANDU: “Kaleni mu shi kupandula.” (Ovakolossi 3:15) Ngeenge pe na umwe e ku kwafela, kala ho pandula. Okukala ho pandula otashi ku kwafele u kulike ekwatafano liwa navamwe. Marie-Paule, womido 74 wokoKanada, okwa ti: “Ame nomushamane wange otwa li twa tembukila kokafeleta. Ookaume ketu vahapu ova li ve uya oku tu kwafela. Ashike ka twa li twa dula oku va ulikila olupandu la wana. Otwa li twe va tumina oukalata volupandu, navamwe otwa li twe va shiva tu lye omusha pamwe navo.” Jae-on, womido 76 wokoSouth Korea, okwa li ha ulike olupandu eshi ha twaalelwa kOlupale lOuhamba. Okwa ti: “Onda pandula unene shi na sha nekwafo alishe olo, nohandi yandje ashike okamaliwa komahooli. Omafimbo amwe ohandi longekida omaano manini pamwe nokamukanda kolupandu.”

Komesho yoinima aishe, kala ho ulike olupandu li na sha nomwenyo. Ohamba inaendunge Salomo oya popya ya ti: “Ombwa i nomwenyo i dule onghoshi ya fya.” (Omuudifi 9:4) Onghee hano, ohatu dulu okukala twa hafa moukulupe ngeenge otwa kala netaleko liwa lokutambula ko eenghalo odo nehalo liwa.

Kala u na olupandu