Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO JULI 2015

OSHIPALANYOLE SHOKOMBADA

Mbela exulilo oli li poduka?

Mbela exulilo oli li poduka?

Kalunga mbela ota ka pitika ovanhu va twikile okulipangela nokunyona po onakwiiwa yavakwao? Hasho, ngaashi twe shi mona, ota ka ya mo olunyala eshi ta ka xulifa po omaupyakadi aeshe oo a kala a nyikifa ovanhu oluhodi oule womido. Kalunga oo a shita ovanhu nosho yo edu okwa hala u shiive kutya mafiku ota ka katuka onghatu. Ongahelipi a holola eshiivo olo la fimana?

Diladila kefaneko eli: Ngeenge to i molweendo nohauto, otashi dulika u na okukonga tete ouyelele u na sha nonhele oyo kointaneta, mouwaalita ile u konge omalombwelo a shangwa. Opo nee, ngeenge wa mono omadidiliko omeendjila naao opaushitwe kutya otaa tu kumwe naako wa finda, oho kala u na elineekelo kutya ou li popepi nokufika konhele oko wa finda. Sha faafana, Kalunga okwe tu pa Eendjovo daye, odo da popya omalunduluko oo e li mounyuni a didilikwedi. Ngeenge tu wete omadidiliko okuwanifwa kwoiningwanima, ohatu kala twa tomhwa kutya exulilo oli li popepi elela.

Ombibeli oya yelifa kutya mounyuni aushe otamu ka ningwa oiningwanima ididilikwedi oyo tai ka tetekela exulilo. Otamu ka monika oiningwanima neenghalo di lili noku lili odo inadi monika nale mondjokonona yovanhu. Natu ka taleni koiningwanima imwe oyo ya tumbulwa mEendjovo daKalunga.

1. OMALUNDULUKO OO TAA NINGWA MOUNYUNI AUSHE Exunganeko olo li li muMateus etukulwa 24 ola tumbula omusholondodo woiningwanima oyo tai ningwa kombada yedu i li oshitukulwa shedidiliko. Oshitukulwa shedidiliko osho otashi ulike ‘exulilo lefimbo lounyuni’ notashi twala fiyo osheshi “taku uya exulilo.” (Ovelishe 3, 14) Oiningwanima oyo oya kwatela mo oita, ondjala, omakakamo edu keembinga neembinga, ehapupalo loukolokoshi, ovanhu vehe nohole nosho yo ovawiliki vomalongelokalunga tava pukifa ovanhu. (Ovelishe 6-26) Oshoshili kutya oiningwanima ya tya ngaho oya kala tai ningwa oule womido. Ashike, eshi exulilo tali ehene popepi aishe otai holoka oshita pefimbo loudjuu. Oiningwanima oyo otai ka waiminwa yo komadidiliko atatu taa londwele taa landula.

2. EENGHEDI DOVANHU Ombibeli oya ti kutya ‘omafiku axuuninwa,’ momukakena wefimbo olo tali twala pexulilo eenghedi dovanhu otadi ka xutuka. Oya ti yo: ‘Ovanhu otava ka kala nokulihola vo vene, ovanalwisho voimaliwa, ovalitangi, novalinenepeki novasheki, vehe neduliko kovakulunhu, vehe shii kupandula, vehe neitavelo, vehe nohole, vehe nombili, ovalundili, ovahenalidiliko, ovakwanyanya, ovatondi vouwa, ovakengeleledi, ovahayavala, ovafulalali, ohole yavo yokuhola ouhalu mwii i dule ei yokuhola Kalunga.’ (2 Timoteus 3:1-4) Oshoshili kutya okuhe na eenghedi okwa kala ko nale, ndele ‘momafiku axuuninwa’ omo unene kwa lunda pombada nomolwaasho taa ifanwa “omafimbo madjuu” okukaliwa muwo. Mbela naave owa didilika kutya eenghedi dovanhu oda xutuka?

3. OKUNYONAUNWA KWEDU Ombibeli oya ti Kalunga ota ka ‘nyonauna po ovo hava nyono edu.’ (Ehololo 11:18) Omeenghedi dilipi ovanhu hava nyono edu? Ohava nyono edu ngaashi pefimbo laNoa: “Edu la nyonauka koshipala shaKalunga. Nedu la yada oukolokoshi. Opo nee Kalunga okwa tala edu, ndele lo la nyonauka.” Opo nee Kalunga okwa ti: “Ndele ame ohandi ke va hanauna po.” (Genesis 6:11-13) Mbela owa mona oumbangi wa yela oo tau ulike kutya oukolokoshi otau lundu pombada? Kakele kaasho, ovanhu ova hanga oshitwa she likalekelwa mondjokonona yovanhu osho kutya: Otava dulu okunyona po edu, mokuhanauna po ovanhu aveshe. Ove na oilwifo momake avo. Edu ohali nyonwa vali monghedi imwe. Oinima oyo hai tu yambidida opo tu kale nomwenyo, ngaashi omhepo oyo hatu fudile mo, oinamwenyo nomiti nosho yo efuta, oya nyonaunwa molwaashi ovanhu ihave i longifa nawa.

 Lipula kutya: ‘Omido efele lwaapo da pita, ovanhu mbela ova kala ngoo ve na eenghono dokweeta ehanauno?” Kunena ovanhu ohava nyonauna omidingonoko eshi hava longifa eenghono davo opo va ninge exumokomesho mokunduluka oilwifo. Omolwexumokomesho mouteknologi olo tali endelele, ovanhu otava monika va fa tava dulu okuuda ko ile okuxulifa po oilanduliko. Onghee hano, ovanhu havo ve na okupangela edu. Fimbo oinamufudo aishe inai hanaunwa ko kedu, Kalunga ota ka katuka onghatu a hanaune po ovo hava nyono edu. Naasho osho a udaneka!

4. OILONGA OYO TAI UDIFWA MOUNYUNI AUSHE Oshitukulwa shimwe vali shedidiliko lexulilo osha xunganeka kutya otapa ka longwa oilonga ididilikwedi. Ombibeli oya ti: “Evangeli eli louhamba otali udifilwa ounyuni aushe li ningile oiwana aishe ondombwedi, opo nee taku uya exulilo.” (Mateus 24:14) Oshikonga eshi shokuudifa osha kala sha yooloka ko monghedi ya tongomana komaudifo omalongelokalunga mahapu oo a kala nokuudifa oule womido dihapu. Momafiku aa axuuninwa, etumwalaka lokondadalunde ola kala nokudivilika, “evangeli eli louhamba.” Mbela ou shii elongelokalunga limwe olo hali divilike etumwalaka olo? Nonande omalongelokalunga amwe ohaa monika a fa taa udifa etumwalaka olo, mbela ohaa udifa ashike momudingonoko wavo ile ohaa tandavelifa onghundana iwa ‘mounyuni aushe i ningile oiwana aishe ondombwedi’?

Ouhamba waKalunga otau udifwa mounyuni aushe momalaka omafele

O-Web site yo-www.jw.org otai divilike “evangeli eli louhamba” ile tu tye onghundana iwa yOuhamba. Oku na oishangomwa tai yelifa etumwalaka olo momalaka e dule 700. Mbela ou shii onghedi ikwao oyo tai divilike onghundana iwa yOuhamba monghedi ya tya ngaho? Nale fimbo o-Web site yo-www.jw.org inai totwa po, Eendombwedi daJehova oda kala da shiivika nawa omolweenghendabala dado dokutandavelifa onghundana iwa i na sha nOuhamba waKalunga. Okudja mo 1939, kombada yoshifo keshe shOshungonangelo okwa kala ku na outumbulilo, “Tai shiivifa Ouhamba waJehova.” Embo limwe lomomalongelokalunga ola ti kutya oilonga yokuudifa yEendombwedi daJehova oya kala “nokutamunuka mo neenghono noitai dulu okuyelekwa na sha.” Oundombwedi wa tya ngaho otau divilike onghundana iwa oyo kutya mafiku ‘exulilo otali ke uya’ eshi Ouhamba waKalunga tau ka katuka onghatu.

EFIMBO LIDIDILIKWEDI MONDJOKONONA

Mbela owa didilika kutya omalondwelo omaxunganeko aeshe ane opaMbibeli oo a popiwa moshitukulwa eshi okwa kala nokuwanifwa moipafi yoye? Moule womido di dulife pefele, ovaleshi  voshifo eshi ova kala nokumona ouyelele u na sha noiningwanima yomounyuni oo tau va kwafele pauhandimwe va mone kutya exulilo oli li popepi. Ovakembauli vamwe inave shi dimina, ova itavela kutya oushili nomavalulo oo oshinima shopaumwene notashi dulu okuningwa kovanhu. Ova ti yo okudja eshi omakwatafano omounyuni aushe taa ende nokuhapupala, neenghalo dounyuni onghee ngoo tadi naipala. Kakele kaasho, ope na oumbangi inau monika nale tau ulike kutya otu li mefimbo la xuuninwa lididilikwedi mondjokonona yovanhu.

Ovanawino vamwe ove wete kutya otwa teelela okumona omalunduluko manene kombada yedu. Pashihopaenenwa, mo 2014, ovanongononi vamwe okwa li va popya molaporta yavo shi na sha noshiponga shinene osho tashi ka xulifa po ovanhu. Ovanongononi ovo ova ti: “Eshi twa konakona noukeka oiningwanima younyuni otwa mona kutya eemwenyo dovanhu odi li monghuwo i na onghambe.” Ovanhu vahapu ova tomhwa filufilu kutya otu li pefimbo lididilikwedi mondjokonona. Ovanyanyangidi voshifo eshi nosho yo ovaleshi vahapu vasho ova tomhwa kutya efimbo eli lididilikwedi otali ulike kutya otu li momafiku axuuninwa nonokutya exulilo oli li popepi. Ndele ponhele yokukala wa tila onakwiiwa, oto dulu okukala wa hafela exulilo. Omolwashike hatu tile ngaho? Omolwaashi oto dulu okuxupa pexulilo.