Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO JULI 2015

OMBIBELI OHAI LUNDULULA ONGHALAMWENYO YOVANHU

Onde lihonga kutya Jehova omunanghenda noha dimine po

Onde lihonga kutya Jehova omunanghenda noha dimine po
  • ODULA OMO A DALWA 1954

  • OSHILONGO OMO A DALELWA KANADA

  • ONAKUDIWA ONDA LI HANDI KENGELELE NOKUNDOMBOLA

ONGHALAMWENYO YANGE YONALE:

Onda kulila moshitukulwa sha hepa modoolopa yaMontreal. Tate okwa fya eshi nda li ndi na eemwedi hamano nokwa li a fiila meme oinakuwanifwa aishe youkwaneumbo. Otwa dalwa vahetatu, naame aame onghelo.

Eshi nda kula, onda li nda hovela okulongifa oingangamifi, okundobola, okulongifa eenghono nokweendafana novalongi vominyonena. Eshi nda li ndi na omido omulongo, onda li nda hovela okulongela nokukala handi tumwa keembwada nokwaavo veengeshefa domikuli ovo hava nyokoma ovanhu. Onda kala handi popi oipupulu nonda kala yo handi hafele okukengelela ovanhu monghedi keshe handi dulu. Osha li sha pika nge neenghono.

Eshi nda li ndi na omido 14, onda li kapyoko mokukengelela ovanhu. Pashihopaenenwa, onda li handi lande exwata leevili doshingoli, outenda vokoikesho neelinga, noku di denga oshihako shedidiliko loshingoli sho-14-carat, noku di landifa po mepandavanda nosho yo meepakinga deenhele domangeshefelo. Onda li handi likola oimaliwa noupu. Oshikando shimwe onda li nda likola mefiku eedola daKanada $10 000 (N$93 804-79).

Eshi nda li ndi na omido 15, onda li nda tewa mo mofikola nokanda li ndi na onhele yokukala. Onda li handi nangala momapandavanda, meeparka nomomaumbo ookaume kange ovo ashike hava nangeke nge fiku olo.

Onda kala handi pulwapulwa kopolifi omolwoukengeleledi. Kanda li handi i modolongo molwaashi kanda li handi landifa oinima ya vakwa. Ashike, onda li handi futu oimaliwa ihapu omolwoukengeleledi nomolwokulandifa ndihe na epitikilo. Onda li yo handi yandje omikuli ame handi pula oishoshela ihapu. Osha li sha nyika oshiponga, nopeemhito dimwe onda li handi kala nondjebo. Onda li handi longo yo nongudu yovalongi vominyonena.

NGHEE OMBIBELI YA LUNDULULA ONGHALAMWENYO YANGE:

Onda li nda uda etumwalaka lOmbibeli oshikando shotete eshi nda li ndi na omido 17. Efimbo olo onda li handi kala nohonda yange eshi ya hovela okukonakona Ombibeli nEendombwedi daJehova. Molwaashi onda li ndi li omhinge nomifikamhango dopaenghedi dOmbibeli, onda li nde i fiya po nonda ka kala vali nomukainhu umwe, oo twa li hatu endelafana naye.

 Opa li pa ningwa omalunduluko a fimana eshi omukainhu oo twa li hatu endelafana naye, naye a li a hovela okukonakona Ombibeli nEendombwedi. Okwa li a ninga omalunduluko monghalamwenyo, nosha kumwifa nge eshi a ninga omunambili nomulididimiki. Onda li nda shivwa kOlupale lOuhamba lEendombwedi daJehova nonda li nda ya. Onda li nda tambulwa ko kovanhu ovo ve na eenghedi diwa novenonghenda. Elihumbato olo kala li tuu la yooloka ko kwaalo lounyuni! Inandi diladila nale okukala ndi holike koukwaneumbo wetu; onda kala ndi udite nda pumbwa okuulikilwa ohole nonghenda okudja kounona wange. Ohamu oyo nda mona kEendombwedi daJehova oyo naanaa nda kala nda halelela. Eshi Eendombwedi da pula nge ndi konakone Ombibeli nado, onda li nda dimina nehafo.

Nopehe na omalimbililo, osho nde lihonga mOmbibeli osha li sha xupifa omwenyo wange. Onda hangika ashike opo twa pangela omhangela yoku ka nyeka twa homata nookaume kange vavali opo tu dule okufuta eendjo dange dokundobola di dule peedola daKanada $50 000 (N$469 574-24). Kanda li tuu nda hafa eshi nda li nda ninguluka! Ookaume kange ova li va twikila nomhangela yetu. Umwe womuvo okwa li a tulwa modolongo, ofimbo umwe a dipawa.

Eshi nda twikila okukonakona Ombibeli, onda li nda didilika kutya ondi na okuninga omalunduluko onhumba. Pashihopaenenwa, onda li nde lihonga osho Ombibeli ya popya mo 1 Ovakorinto 6:10, ya ti: “Ovalunga novanalwisho neengholwe novasheki novanyeki ovo itava fyuulula ouhamba waKalunga.” Eshi nda lesha ovelishe oyo, onda li nda nyika oluhodi okutala monghalo omo ndi li. Onda mona kutya onda pumbwa okuninga omalunduluko monghalamwenyo lelalela. (Ovaroma 12:2) Onda li handi longifa eenghono, omuhandunhu nokupopya oipupulu shimwe to nyengwa.

Kakele kaasho, onde lihonga mOmbibeli kutya Jehova omunanghenda noha dimine po. (Jesaja 1:18) Onda li nda ilikana kuJehova da mana mo, a kwafele nge ndi efe po onghedi yokukalamwenyo yonale. Kekwafo laye, kanini nakanini onda enda handi lundulula omaukwatya ange. Onda li yo nda katuka onghatu ya fimanenena eshi twa hombola paveta nomukainhu wange.

Molwaashi ohandi tula moilonga omafinamhango Ombibeli osha kwafela nge ndi kale ndi li momwenyo

Onda li ndi na omido 24 eshi twa hombola notwa li tu na ounona vatatu. Onda li ndi na okukonga oilonga tai wapalele. Ashike kanda li naanaa nda mona ehongo nokanda li ndi na owino washa. Natango onda li nda ilikana kuJehova nda mana mo. Opo nee onda li nda ka konga oilonga. Onda li nda lombwela ovayandji voilonga kutya onda hala okulundulula onghedi yange yokukalamwenyo nokukala handi longo oilonga youyuki. Omafimbo amwe onda li handi va yelifile kutya ohandi konakona Ombibeli, nonda halelela okukala omunhu muwa. Ovayandji voilonga vahapu ova li va anya okukuta nge. Lwanima, onda ka pulwapulwa vali komuyandji woilonga umwe, naashi nda popya oupyakadi wange womonakudiwa, omuyandji woilonga okwa ti: “Ope na sha shimwe she linyengifa nge ndi ku kute, ashike nghi shii kutya oshike.” Onda li nda mona kutya Jehova okwa nyamukula omailikano ange. Mokweendela ko kwefimbo, ame nomukulukadi wange otwa li twa ninginifwa tu li Eendombwedi daJehova.

OUWA OO NDA MONA:

Molwaashi ohandi tula moilonga omafinamhango Ombibeli nokukala metwokumwe nonghedi yokukalamwenyo yopaKriste, osha kwafela nge ndi kale momwenyo fiyo opaife. Paife ondi na oukwaneumbo wa hafa. Onda tomhwa kutya Jehova okwa dimina nge po, nonda hafa eshi ndi na eliudo la koshoka.

Paife opa pita omido 14 ndi li omukokolindjila wondjikilile, handi kwafele ovanhu ve lihonge osho Ombibeli tai hongo. Inapa pita efimbo lile, omukulukadi wange naye okwa waimina nge moilonga yefimbo li yadi. Omido di dule 30 da ka lupuka, onda mona ehafo eshi nda kwafela ovanailonga pamwe naame 22 va longele Jehova. Nopaife ohandi i keenhele domalandifilo, ndele hanelalakano lokukengelela ovanhu ngaashi nale. Paife onda hala oku va pa sha: oku va lombwela eteelelo loku ka kala mounyuni mupe omo itamu ka kala vali ovakengeleledi. — Epsalme 37:10, 11.