Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO JULI 2015

 OSHIPALANYOLE SHOKOMBADA | MBELA EXULILO OLI LI PODUKA?

“Exulilo”— oshike?

“Exulilo”— oshike?

Oshike hashi uya momadiladilo oye ngeenge wa udu taku tiwa “exulilo oli li popepi”? Mbela oho diladila okuuya kwaMessias a twale ovayuki meulu nokutula ovakolokoshi moheli? Ile oho diladila kutya exulilo ongeenge ashike omunhu a fi? Okudiladila kwa tya ngaho okwa ningifa vamwe va kale tave lipula shi na sha nexulilo, ofimbo vamwe va limbililwa ile va hafa.

Ombibeli oya ti: ‘Otaku uya exulilo.’ (Mateus 24:14) Exulilo ohali ifanwa yo ‘efiku linene laKalunga’ ile “Harmagedon.” (Ehololo 16:14, 16) Ope na omahongo mahapu ehe shiivike noinaa yela nawa oo taa xwaxwamekwa komalongelokalunga nokwa etifa po engwangwano lihapu kombinga yexulilo. Kakele kaasho, Ombibeli oya popya sha yela kombinga yexulilo, notai tu kwafele tu mone ngeenge exulilo oli li popepi. Ndele komesho yaaishe, otai tu hongo nghee hatu dulu oku ka xupa. Tete natu taleni kombinga yomataleko a puka e na sha nexulilo nosho yo osho Ombibeli tai ti. Ombibeli oya ti ngahelipi shi na sha ‘nexulilo’?

 EXULILO INASHI HALA KUTYA

  1. EHANAUNO LINENE LEDU.

    Ombibeli oya ti: ‘Kalunga edu okwe li shitila keengudi dalo, lo liha tengauke nande fiyo alushe.’ (Epsalme 104:5) Omushangwa oo nosho yo dikwao otadi ulike kutya Kalunga ke na fiku a hanaune po edu ile a pitike li hanaunwe po fiyo alushe. — Omuudifi 1:4; Jesaja 45:18.

  2. EXULILO KALI FI OSHININGWANIMA OSHO TASHI KA HOLOKA OMBADILILA.

    Ombibeli oya popya kutya exulilo otali ke uya, na Kalunga okwa tula po efiku lokondadalunde. Oya ti: “Ndele efiku olo, ile otundi ei kaku na ou e i shii, nande ovaengeli meulu ile Omona, Tate Oye aeke. Kaleni mwa lungama, pashukeni nye mu ilikane, osheshi inamu shiiva efimbo olo onaini tali uya.” (Markus 13:32, 33) Osha yela kutya, Kalunga (“Tate”) oku shii “efimbo” olo exulilo tali ke uya.

  3. EXULILO ITALI KA ETWA KOVANHU ILE KOITANDU YOMAMINIKILO.

    Oshike tashi ka eta exulilo? Ehololo 19:11 otali ti: “Opo nee nda mona eulu la yeuluka, ndee tala, onghambe itoka, nomulondi wayo okwa lukwa Omudiinini nOmunashili.” Ovelishe 19 oya ti: “Ndele nda mona oshilyani neehamba dopedu neengudu dovakwaita vado da ongala di ka lwife ou a londa konghambe nongudu yaye.” (Ehololo 19:11-21) Nonande eevelishe odo oda longifa oitya imwe yopafaneko, otadi dulu oku tu kwafela tu mone kutya Kalunga ota ka tuma ovaengeli va hanaune po ovatondi vaye.

Osho Ombibeli ya popya shi na sha nexulilo oshi li onghundana iwa

EXULILO OSHA HALA KUTYA

  1. EXULILO LOMAPANGELO OPANHU.

    Ombibeli oya ti: “Kalunga ou komeulu ota ka dika ouhamba [epangelo] itau ka teka po fiyo alushe, nepangelo lawo itali ka yandjwa koshiwana shimwe. Ndele owo otau ka nyanyaula notau ka teyaula  omauhamba aeshe noku a xulifa po, ndelenee owo vene tau ka kala fiyo alushe.” (Daniel 2:44) Ngaashi sha tumbulwa moitwa 3 yopehovelo, otapa ka kala ehanauno ‘leehamba dopedu neengudu dovakwaita vado,’ odo tadi ka “ongala di ka lwife ou a londa konghambe nongudu yaye.” — Ehololo 19:19.

  2. EXULILO LOITA, ELONGIFO LEENGHONO NOKUHENOUYUKI.

    Ombibeli otai ti: ‘Kalunga ota ka xulifa po oita fiyo okeengaba dedu.’ (Epsalme 46:10) ‘Ovanashili otava ka nangala oshilongo, naava vehe noshipo tava ka kala mo. Ndelenee ovahenakalunga tava ka dudwa mo moshilongo, novaliteeki tava ka kufwa mo musho.’ (Omayeletumbulo 2:21, 22) “Tala, aishe ohandi i shitukifa i ninge ipe.” — Ehololo 21:4, 5.

  3. EXULILO LOMALONGELOKALUNGA OO EHE HOLE KALUNGA NOVANHU.

    ‘Ovaprofeti otava xunganeke oipupulu novapristeri ohava pangele pahalo lavo. Ndelenee hauxuninwa [ngeenge exulilo le uya] otamu ka ninga ngahelipi?’ (Jeremia 5:31) “Efiku olo vahapu otava ti kuame: Omwene, Omwene, hafye tuu ovo twa xunganekele medina loye notwa [ta] mo eendemoni medina loye notwa longa oilonga ihapu yeenghono medina loye? Ndelenee Ame ohandi va lombwele: Inandi mu shiiva nandenande; djeni po puame, onye ovakolokoshi!” — Mateus 7:21-23.

  4. EXULILO LAAVO HAVA XWAXWAMEKE NOHAVA YAMBIDIDA EENGHALO DOUNYUNI KUNENA.

    Jesus Kristus okwa ti: “Ndelenee etokolo oleli: ouyelele we uya mounyuni, ndelenee ovanhu va li ve hole omulaulu komesho youyelele, osheshi oilonga yavo oii.” (Johannes 3:19) Ombibeli oya popya exulilo lounyuni wopefimbo lomulumenhu omudiinini Noa. “Ounyuni winya wonale wa nyonaukila meyelu lao. Ndelenee eulu lopaife nedu eli ola tuvikililwa omundilo okeendjovo tuu odo fiyo kefiku letokolo nolekano lovanhu ve he na Kalunga.” — 2 Petrus 3:5-7.

Didilika kutya ‘efiku letokolo’ ola yelekanifwa nehanauno ‘lounyuni’ wopefimbo laNoa. Oshike sha li sha hanaunwa po? Edu ola li la xupa ndele eshi sha hanaunwa po ‘ovahenakalunga,’ ovatondi vaKalunga ovo va “nyonaukila” ile tu tye va hanaunwa po. Sha faafana, eshi efiku laKalunga “letokolo” tali ke uya, ovatondi vaKalunga otava ka hanaunwa po. Ndele oshiwana shaKalunga otashi ka xupa ngaashi ashike Noa noukwaneumbo waye. — Mateus 24:37-42.

Kala nee ngeno wa fa u wete nghee edu tali ka kala la wapala eshi Kalunga ta ka xulifa po owii aushe! Osha yela kutya, osho Ombibeli ya popya shi na sha nexulilo oshi li onghundana iwa. Otashi dulika natango u lipule kutya: Mbela Ombibeli oye tu lombwela kutya exulilo otali uya naini? Mbela oli li popepi? Ongahelipi handi dulu okuxupa?