Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO JULI 2015

Antikristus oye lyelye?

Antikristus oye lyelye?

Ofilima imwe opo ya di ko itilifa okwa li i na oshipalanyole Antikristus.

Ongudu imwe yovashiki veengalo ya shiivika nawa oya luka imwe yomee-Album dayo Antichrist Superstar.

Omufilosofi umwe oo a li ko mefelemido 19 Friedrich Nietzsche, okwa li a luka imwe yomoilonga yaye Antikristus.

Eehamba novapangeli vOmomafelemido Opokati luhapu okwa li hava ifana ovapataneki vavo ooantikristus.

Martin Luther, omuwiliki Omundowishi, okwa luka ovapapa vongeleka yaKatolika kaRoma ooantikristus.

MOLWAASHI outumbulilo “antikristus” owa kala hau longifwa wa yukifwa koinima oyo twa dja nokutumbula, oshi li pandunge okupula kutya: Antikristus oye lyelye? Mbela outumbulilo oo owe tu kuma kunena? Opo tu mone oushili u na sha noutumbulilo antikristus otu na oku u konga mOmbibeli, omo wa holoka lwoikando itano.

ANTIKRISTUS TA HOLOLWA KUTYA OYE LYELYE

Omuyapostoli Johannes oye ashike omushangi wOmbibeli a longifa outumbulilo “antikristus.” Ongahelipi a yelifa outumbulilo oo? Didilika eevelishe odo di li monhumwafo yaye yotete, a ti: “Ovamwange, paife efimbo laxuuninwa. Ngaashi onye mwa udile antikristus te uya, hano paife ooantikristus ovahapu va holoka yo. Opo tuu otwe shi shiiva nokutya, paife efimbo laxuuninwa. Vo ova dja mufye, ndelenee kava li ve noukumwe nafye . . . Omunaipupulu hano olyelye, ke fi ou te likale ta ti, Jesus ke fi Kristus? Ou te likale Xe nOmona, oye tuu antikristus.” — 1 Johannes 2:18, 19, 22.

Omuyapostoli Johannes okwa li e shii kutya ooantikristus ovovo hava tandaveleke omapukifo e na sha naJesus Kristus nomahongo aye

Oshike hatu lihongo meevelishe odo? Johannes okwa tumbula kutya “ooantikristus ovahapu,” tau ulike kutya antkristus ke shi umwe ndele ovahapu. Ovanhu ile omahangano ove li ooantikristus molwaashi ohava tandavelifa oipupulu, hava a nye okwiitavela kutya Jesus oye Kristus ile Messias nohava kendabala okuholeka ekwatafano olo li li pokati kaKalunga nOmona Jesus Kristus. Ooantikristus ohave limonikifa va fa ovo Kristus ile ovakalelipo vaye, ashike molwaashi “ova dja mufye,” ova twalwatwalwa kokule nomahongo ashili Ombibeli. Natango Johannes eshi a shanga onhumwafo ei ongudu oyo opo ya li pefimbo opo, “efimbo laxuuninwa,” tashi ulike pefimbo lexulilo lovayapostoli.

Oshike vali Johannes a popya shi na sha na antikristus? Eshi a li ta popi kombinga yovaprofeti ovanaipupulu, okwa londwela a ti: “Omhepo yaKalunga mwe i shiiva: keshe omhepo tai hepaulula Jesus Kristus kutya, e uya mombelela oyo yomuKalunga; ndele keshe omhepo itai hepaulula Jesus Kristus, oyo inai dja muKalunga; oyo omhepo yaantikristus, oye ou mwe mu uda te uya, oye oku li paife nokuli mounyuni.” (1 Johannes 4:2, 3) Johannes okwa endulula vali oshitwa osho monhumwafo yaye onhivali a ti: “Ovahongauli vahapu ova ya nounyuni, ovovo ihava hepaulula Jesus Oye Kristus, Oye ou kwa li e nokuuya mombelela. Omunhu e li ngaha oye omuhongauli munene naantikristus.” (2 Johannes 7) Osha yela kutya, Johannes okwa li e udite ko nawa kutya ooantikristus ovovo hava tandaveleke owina omahongo oipupulu omalongelokalunga e na sha naJesus Kristus nomahongo aye.

 “OVAPROFETI OVANAIPUPULU” NOSHO YO “OMUNHU WOULUNDE”

Jesus okwa li a popya kutya ovaprofeti ovanaipupulu otave ‘ke uya moikafa yeedi’

Fimbo Johannes i na shanga kombinga yovaprofeti ovanaipupulu, Jesus Kristus okwa hangwa nale a lombwela ovashikuli vaye a ti: “Lungameni ovaprofeti ovanaipupulu, ava have uya kunye moikafa yeedi, ndele meni lavo ovo omambungu haa [lyana].” (Mateus 7:15) Omuyapostoli Paulus naye okwa li a londwela Ovakriste vomuTessalonika a ti: “Inamu efa mu pukifwe nande komunhu opanghedi yasha, osheshi eliteeko li nokuuya tete, nomunhu woulunde e nokuholoka, omona wekano.” — 2 Ovatessaloniki 2:3.

Okudja mefelemudo lotete, ovaprofeti ovanaipupulu novashunimonima ova hangwa nale tava pukifa nova kala tava kendabala okunghundipaleka eongalo lopaKriste. Aveshe ovo va li va tandavelifa oipupulu nomapukifo e na sha naJesus Kristus nomahongo aye ova kwatelwa moutumbulilo oo wa longifwa kuJohannes, “antikristus.” Jehova okwa li a holola etaleko laye eshi Paulus a li e va popya kutya ove li ‘ovana vekano.’

HENUKA OMAHONGO OKUNENA OOANTIKRISTUS

Ongahelipi kunena? Ovanhu nomahangano natango ove li ooantikristus molwaashi ove li omhinge naKristus nomahongo aye. Ohava tandavelifa oipupulu nomapukifo nelalakano va pukife ovanhu vaha shiive eyooloko pokati kaTate, Jehova Kalunga nOmona waye, Jesus Kristus. Otu na omatomheno a femba okuhenuka omapukifo omalongelokalunga a tya ngaho. Natu tale koihopaenenwa ivali.

Oule womido omafele, eengeleka oda kala tadi tandavelifa ehongo loukwatatu, hadi ti kutya Xe nOmona omunhu umwe. Oda pukifa nokuholeka oshili i na sha neyooloko pokati kaJehova Kalunga naJesus Kristus. Oda imba ovanamitimadiwa vaha shikule oshihopaenenwa shaJesus Kristus novaha dule okweehena popepi naKalunga ngaashi Ombibeli ye va ladipika va ninge. — 1 Ovakorinto 11:1; Jakob 4:8.

Eengeleka oda pukifa yo ovanhu eshi hadi xumifa komesho okulongifa omatoloko Ombibeli omo edina laKalunga, Jehova, la kufwa mo. Ova ninga ngaho nonande edina Jehova otali holoka lwoikando 7 000 momishangwa dikulu dOmbibeli. Oshidjemo? Ova holeka filufilu oshili i na sha naKalunga kashili.

Kakele kaasho, okushiiva edina laKalunga, Jehova, okwa kwafela ovanamitimadiwa vahapu va ehene popepi naye. Richard oo naye a li monghalo ya tya ngaho, ota dimbuluka eenghundafana daye nEendombwedi daJehova mbali. Okwa ti: “Oda li da ulikila nge okudja mOmbibeli kutya edina laKalunga kashili, oJehova.” Okwa weda ko a ti: “Osha li yo sha kumwifa nge okuuda kutya Kalunga oku na edina, osho inandi uda nande onale.” Okudja opo, okwa li a ninga omalunduluko monghalamwenyo opo a kale metwokumwe nomafinamhango Ombibeli nokuhafifa Jehova. Okwa ti yo: “Eshi nde lihonga edina laKalunga osha kwafela nge ndi kulike ekwatafano lopofingo naye.”

Antikristus okwa kala nokutula ovanhu omamiliyona momilaulu dopamhepo oule womido omafele. Onghee hano, ngeenge otwa konakona Eendjovo daKalunga, Ombibeli, ohatu ka dula okudidilika mo antikristus nohatu ka manguluka ko koipupulu nomapukifo aye. — Johannes 17:17.

Lihonga shihapu

Olyelye ta pangele lelalela ounyuni?

Enyamukulo lOmbibeli otashi dulika li ku kumwife. Mona kutya omolwashike sha fimana okumona enyamukulo notashi ti shike shi na sha nonakwiiwa.

Mbela Kalunga oku na ngoo edina?

Kalunga oku na omadinafimaneko mahapu, ngaashi Omunaenghono adishe, Omushiti nosho yo Omwene. Ashike edina laKalunga ola holoka mOmbiibeli lwoikando i dulife po 7 000.