Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO MEI 2015

 ONDJOKONONA YONGHALAMWENYO

Jairo oha longifa omesho aye a longele Kalunga

Jairo oha longifa omesho aye a longele Kalunga

Diladila ashike ito dulu okupangela olutu loye kakele ashike komesho! Omumwainamati wange Jairo oku li monghalo idjuu ya tya ngaho. Ndele nande ongaho, ota hafele onghalamwenyo tai ti sha lela. Fimbo inandi hokolola kutya omolwashike a mona kutya onghalamwenyo yaye oi na eityo, nandi mu hokololele kombinga yondjokonona yaye.

Jairo okwa dalwa noludi lomukifi womouluvi (cerebral palsy) hau ifanwa spastic quadriplegia. * Omukifi oo ohau mu ningifa aha dule okupangela konyala olutu laye alishe. Ouluvi waye ihau longele kumwe neenhumba, nomolwaasho omatwikinino omakipa aye ohaa tifukile keembinga adishe nopehe na elipangelo. Omafimbo amwe Jairo ohe liyahameke eshi ta fangaula nonande hasho a hala. Ovanhu ovo hava kala popepi naye navo otashi dulika e va yahameke ngeenge inava lungama. Shinyikifa oluhodi, luhapu omaoko nomaulu aye ohaa kala a mangelwa kokatemba opo ku kelelwe oipongo ya tya ngaho.

OUYAHAME OO A PITA MUWO ESHI TA KULU

Eshi Jairo ta ende ta kulu okwa kala ta yahama neenghono. Ofimbo a li e na eemwedi nhatu, okwa tameka okukala ha fi oshinhona osho sha li hashi mu ningifa a kale ehe shii apa e li. Luhapu meme okwa li ha kala e mu kwete e mu diinina noku mu twala diva koshipangelo ta diladila kutya okwa fya.

Omolwokukala ta fangaula, omakipa aye okwa ka lemana. Eshi a li e na omido 16, omakipa aye opeenho okwa li a dja ponhele nokwa li a pumbwa etando la kwata moiti. Ohandi dimbuluka eshi a li ta kwena mokule kouyahame onguloshi keshe konima yetando.

Omolwounghundi oo wa kwata moiti, Jairo oha kala e likolelela filufilu kuvamwe ve mu yambidide keshe efiku ngaashi oku mu pa oikulya, oku mu djaleka noku mu nangeka. Luhapu meme natate ovo have mu yambidida. Nonande Jairo okwa pumbwa ekwafo efimbo keshe, ovadali vetu ohave mu dimbulukifa alushe kutya onghalamwenyo yaye inai likolelela ashike kovanhu ndele nokuKalunga yo.

ONGHEDI IPE YOKUKWATAFANA NA-JAIRO

Ovadali vetu Eendombwedi daJehova nova kala hava leshele Jairo omahokololo Ombibeli okudja kounona. Ove shii kutya omunhu ota dulu ashike okukala nonghalamwenyo tai ti sha ngeenge e na ekwatafano liwa naKalunga. Nonande Jairo oku na olutu inali kola olo hali kindjike alushe, okwa li ta dulu okukala e na eteelelo la twa nola kola. Kakele kaasho, ovadali vetu okwa li hava kala tave lipula ngeenge Jairo ota dulu ngoo okushiiva Ombibeli.

Efiku limwe eshi Jairo a li okaana, tate okwe mu lombwela a ti: “Jairo, popya naame.” Opo nee tate okwa weda ko vali a ti: “Ngeenge ou hole nge shili, oto shi ningi!” Eshi tate e mu pula a tumbule nande oshitya ashike shimwe, Jairo okwa li a hovela okukengela  omahodi. Nonande okwa li a kendabala okupopya kombinga yomaliudo aye ta longifa oitya, okwa li ashike ta domokotola. Osha li sha udifa nai tate eshi a kwenifa Jairo. Ashike elinyengo olo ola ulika kutya Jairo okwa uda ko osho tate e mu lombwela. Oupyakadi ou li ashike opo kutya iha dulu okupopya.

Konima yefimbo linini, ovadali vetu ova ka didilika kutya Jairo omafimbo amwe ohe linyengifa omesho aye nelalakano lokuyelifa omadiladilo nomaliudo aye. Okwa li hashi mu nyemateke eshi ovanhu omafimbo amwe vali ihava udu ko osho a hala okutya. Ashike eshi ovadali vetu ve lihonga okukala hava lesha omesho aye noku mu pa osho a hala, okwa li ha kala a hafa unene. Oyo oyo onghedi yaye yokuulika kutya okwa pandula.

Omunawino wokukwafela ovanhu ovo ve na ounghundi wokupopya okwa li e tu lombwela kutya opo tu kale hatu kundafana nawa, otu na okukala hatu yelula pombada omake aeshe ngeenge hatu mu pula a tye heeno ile ahowe. Eke lokolulyo otali ti heeno omanga lokolumosho tali ti ahowe. Kungaho, okwa li ta dulu okuyukifa omesho aye keke olo li li mondjila.

ONGHATU YA FIMANENENA MONGHALAMWENYO YA-JAIRO

Eendombwedi daJehova ohadi ningi oyoongalele inini naayo yakula lutatu momudo opo hapa yandjwa oipopiwa. Jairo okwa li ha kala alushe a hafa pefimbo loshipopiwa sheninginifo. Efiku limwe, eshi a li e na omido 16, tate okwa li e mu pula a ti: “Jairo, owa hala okuninginifwa?” Divadiva okwa li a tala keke lokolulyo latate, tashi ulike kutya okwa li a hala okukatuka onghatu oyo. Tate okwe mu pula vali a ti: “Owa udanekela ngoo Kalunga meilikano u mu longele onghalamwenyo yoye aishe?” Divadiva okwa li vali a tala keke lokolulyo latate. Osho okwa li tashi ulike kutya Jairo okwa li e liyapulila Jehova.

Konima yeenghundafana dopaMbibeli, okwa li sha yela mo kutya Jairo okuudite ko eityo leninginifo lopaKriste. Onghee hano, mo 2004 okwa li a nyamukula epulo olo la fimanenena tali ti: “Mbela owe liyapulila Jehova u longe ehalo laye?” Jairo okwa li a nyamukula epulo olo mokuyelula omesho aye pombada, osho sha li onghedi yaye yokutya heeno. Kungaho, okwa li a ninginifwa e li Ondombwedi yaJehova eshi a li e na omido 17.

OMESHO A YANDJA ELITULEMO KOINIMA YOPAMHEPO

Mo 2011, Jairo okwa li a mona onghedi ipe yokukwatafana novanhu, okombiyuta hai wilikwa komesho. Okombiyuta oyo ohai tale omalinyengo omuni yeisho opo i dule okuhoolola oufano ovo ve li kokombiyuta. Ngeenge owa pakuma ile wa konenene pokafano konhumba ongaashi ashike omunhu ta findi kokamhuku (mouse) kokombiyuta. Okombiyuta oyo oi na  omafano oo haa tolokwa moitya ile momatumbulo opo a kwafele Jairo a kwatafane navamwe. Ngeenge okwa pakuma pukamwe komoufano ovo, okombiyuta ohai fatulula efano olo meendjovo dokupwilikinwa dopaelektronika.

Jairo okwa li a halelela okukwafela vamwe pamhepo eshi eudeko laye lopaMbibeli tali hapupala. Pekonakonombibeli loukwaneumbo wetu lokoshivike, luhapu oha tale kwaame nokokombiyuta yaye lwoikando. Oyo oyo onghedi yaye ha dimbulukifa nge ndi shange omatyekosha oo ta ka yandja pokwoongala kwopaKriste keongalo pefimbo leenghundafana domapulo nomanyamukulo.

Ngeenge ta yandje etyekosha pokwoongala, oha tale kokombiyuta yaye opo a finde pokafano oko ke li mondjila, opo nee ewi lopaelektronika ohali udika kwaaveshe. Oha kala te limemesha ngeenge a twa omukumo oilyo yeongalo nomatyekosha aye. Alex, umwe womookaume kaJairo, okwa ti, “Ohandi kala alushe nda kumwa ngeenge Jairo ta yandje omatyekosha.”

Jairo oha longifa okombiyuta yaye oyo hai wilikwa komesho noi na ewi lopaelektronika opo a yandje omatyekosha pokwoongala nokulombwela vamwe kombinga yeitavelo laye

Jairo oha longifa yo omesho aye opo a lombwela vamwe kombinga yeitavelo laye. Onghedi imwe omo he shi ningi omokufinda kamwe komoufano ovo va fanekwa oshikunino shi na oinamwenyo novanhu vomomihoko adishe tava hafele onghalamwenyo. Ngeenge okwa findi pokafano oko, ewi lokokombiyuta yaye ohali ti: “Ombibeli oya udaneka kutya edu otali ka ninga oparadisa omo itamu ka kala ouyahame nefyo, Ehololo 21:4.” Ngeenge omupwilikini okwa ulike ohokwe, Jairo oha findi vali kokombiyuta yaye ndele tai ti, “Mbela ino hala okukonakona Ombibeli naame?” Shihokwifa, tatekulu okwa li a tambula ko ekonakonombibeli. Oshihafifa okumona nghee Jairo ta hongo tatekulu Ombibeli pamwe nOndombwedi ikwao. Tatekulu okwa li a ninginifwa poshoongalele shoshitukulwa muAuguste 2014 muMadrid.

Okulongela Kalunga kwaJairo okwa didilikwa mo yo kovahongi vokofikola yavo. Rosario, omunawino oo he mu kwafele shi na sha nounghundi waye wokupopya, okwa ti: “Ngeenge onda ka hala fiku limwe okuya melongelokalunga lonhumba, ohandi ka ninga umwe womEendombwedi daJehova. Onda mona nghee eitavelo laJairo le mu kwafela a kale nonghalamwenyo i na elalakano lashili nonande oku li monghalo idjuu.”

Jairo oha kala a hafa unene ngeenge handi mu leshele eudaneko lOmbibeli olo tali ti: “Oshingudu otashi ka nuka ngaashi omenye nelaka laau ha kokoma, otali imbi nokukuwilila.” (Jesaja 35:6) Nonande omafimbo amwe oha kala a teka omukumo, luhapu oha kala a hafa molwaashi oha kala e lipyakidila noinima yopamhepo noha kala nOvakriste vakwao. Etaleko liwa neitavelo laye la pama otali ulike kutya okulongela Jehova oko ashike taku dulu okuningifa onghalamwenyo i kale tai ti sha.

^ okat. 5 Outumbulilo Cerebral palsy (CP) luhapu ohau longifwa kokuulika kouluvi wa yahamekwa oo hau piyaaneke elinyengo lolutu. Ohau dulu yo okuningifa omunhu a kale ta fi oshinhona, e na oupyakadi wokulya nokukala iha popi nawa. Omukifi wo-Spastic quadriplegia ou li oludi lomukifi wo-CP oo wa kwata moiti nohau dulu okuningifa omatwikinino aeshe omakipa a kale a kukuta nofingo ye liefa.