Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO MEI 2015

 OSHIPALANYOLE SHOKOMBADA | JESUS OKWE TU XUPIFA KOSHIKE?

Omolwashike twa pumbwa okuxupifwa?

Omolwashike twa pumbwa okuxupifwa?

“Omunhu a dalwa komwalikadi, ta kala po omafiku manini ndee ta kuta oupyakadi, ota kulu ngaashi onhemo ndee ta lembe. Ta faduka po ngaashi omudidimbe, ita kalelele.” — Job 14:1, 2.

Okudja nalenale, ovanhu ova kala nokudiladila shi na sha nanghee tashi kala shiwa ngeno okukala noukolele nowa nyashuka fiyo alushe. Mupya munene, oushili oyoo kutya: Ovanhu aveshe ohava fi. Nonande eendjovo daJob odo di li pombada oda popiwa omido 3 000 nasha da pita, otadi wanifwa nokunena.

Ovanhu mounyuni aushe ova halelela okukala fiyo alushe. Ombibeli oye tu yelifila kutya Kalunga okwa tula momitima detu oukwaalushe nehalo lokuuda ko nokudiladila kutya okukala nomwenyo waalushe osha hala okutya shike. (Omuudifi 3:11) Ngeenge osho shili ngaho, mbela oshi li ngoo pandunge okwiitavela kutya Kalunga omunahole okwe tu shita nehalo olo itali dulu okuwanifwa? Ngeenge oto ti ahowe, ou li mondjila. Ombibeli oya popya kutya efyo oli li omutondi noya udaneka kutya otali ka “hanaunwa po.” — 1 Ovakorinto 15:26.

Kape na omalimbililo kutya efyo oli li omutondi wetu nokaku na omunhu omunaendunge a hala okufya. Ngeenge tu wete oshiponga ohatu kendabala oku shi henuka, oku shi hondama ile oku shi faduka po nokuli. Ngeenge hatu vele, ohatu kongo ouhaku. Ohatu kendabala ngaashi hatu dulu opo tu henuke keshe osho tashi tu etele efyo.

Mbela ope na etomheno tali koleke oushili kutya omutondi oo mukulu ota ka hanaunwa po? Heeno, ope na. Jehova Kalunga, Omushiti, ina shita ovanhu nelalakano va kale ashike nomwenyo omido dinini nokufya. Efyo kali fi oshitukulwa shelalakano laye lopehovelo. Okwa li a shita ovanhu nelalakano lokukala fiyo alushe kombada yedu, nomalalakano aye ohe a wanifa po. — Jesaja 55:11.

Ongahelipi efyo tali ka hanaunwa po? Ondjokonona otai ulike kutya ovanhu ova kala nokukendabala okuxulifa po efyo, ashike inava pondola. Kunena onghee ngoo natango tava twikile. Ovanongononi ova nduluka po eevenda nomiti dokuhakula odo da ninipika omikifi dimwe. Ova ninga omapekapeko e na sha nokutungwa po kwoinima i na omwenyo. Kunena, moilongo ihapu ovanhu ohava kala nomwenyo efimbo lile shi dulife mefelemido la pita. Ashike nande ongaho, inava finda efyo. Ngaashi Ombibeli ya popya, ‘aveshe otava shuna mondwi.’ — Omuudifi 3:20.

Onghundana iwa oyo ei kutya inatu pumbwa okulikolelela kounongo wopanhu opo tu kandule po efyo. Jehova Kalunga okwa ninga nale omalongekido opo e tu xupife mefyo, naJesus Kristus oye ta dana onghandangala yakula melongekido olo.