Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO MEI 2015

 EENGHUNDAFANA NOMUNEUMBO

Omolwashike hatu dimbuluka efyo laJesus?

Omolwashike hatu dimbuluka efyo laJesus?

Eenghundafana tadi landula otadi ulike kunghee Eendombwedi daJehova hadi kundafana navamwe. Natu tye nee ngeno Ondombwedi yedina Megan otai kundafana nomuneumbo wedina Shirley.

“SHI NINGENI OKUDIMBULUKWA NGE”

Megan: Wa lele po Shirley! Onda li nda hafa oku ku mona kEdimbuluko lefyo laJesus Kristus oshivike sha dja ko. * Okwoongala okwa li kwa enda ngahelipi?

Shirley: Onda li nda hafela okukala po, ashike nande ongaho, kanda li naanaa ndi udite ko oinima aishe pauyadi. Ovanhu ohava dana edalo laJesus pOkrismesa nosho yo enyumuko laye pOpaasa, ashike inandi uda nande onale umwe ta dana Edimbuluko lefyo laye.

Megan: Osho naanaa, Okrismesa nOpaasa ohai danwa apeshe mounyuni. Ashike fye tu li Eendombwedi daJehova otu wete sha fimana okudimbuluka efyo laJesus. Ngeenge ou na po okafimbo, ohandi dulu oku ku ulikila omatomheno kutya omolwashike.

Shirley: Heeno, ondi nefimbo.

Megan: Eendombwedi daJehova ohadi dimbuluka efyo laJesus molwaashi okwa lombwela ovashikuli vaye ve shi ninge. Diladila kwaasho sha li sha ningwa po moufiku oo wa tetekela efyo laJesus. Mbela owa udile nale shi na sha nOuvalelo we likalekelwa oo a lya pamwe novashikuli vaye ovadiinini?

Shirley: Oto popi kombinga yOuvalelo waxuuninwa?

Megan: Osho naanaa. Ohau ifanwa yo Ouvalelo wOmwene. Pefimbo louvalelo oo, Jesus okwa li a pa ovashikuli vaye omalombwelo a yela. Kwafele nge u leshe eendjovo daye odo di li muLukas 22:19.

Shirley: Eewa. “Opo nee Ye okwa kufa omungome a pandula, ndee te u pambula, ndele okwe u va pa ndee ta ti: Eshi olutu lange tali yandjwa molweni, shi ningeni okudimbulukwa nge.”

Megan: Tangi kokulesha. Didilika elombwelo laJesus petumbulo laxuuninwa lovelishe oyo, olo tali ti: “Shi ningeni okudimbulukwa nge.” Ndele manga ine va pa elombwelo loku mu dimbuluka, okwe va yelifila kutya oshike ve na okudimbuluka. Okwa popya kutya omwenyo waye ote u yandjele ovashikuli vaye. Jesus okwa li a popya ediladilo la faafana naalo, ngaashi sha popiwa muMateus 20:28. Ovelishe oyo otai ti: ‘Omona wOmunhu ine uya okuyakulwa, ndele okuyakula nokuyandja omwenyo waye u ninge oikulila yavahapu.’ Oku shi yelifa pauxupi, osho osho hashi linyengifa Eendombwedi daJehova di ongale lumwe momudo mefiku olo Jesus a file opo di dimbuluke ekuliloyambo olo a yandja. Omolwefyo laye ovanhu ovaduliki otava dulu okumona omwenyo.

OMOLWASHIKE EKULILOYAMBO LA LI LA PUMBIWA?

Shirley: Ohandi udu ovanhu tava popi kutya Jesus okwe tu fila opo tu kale nomwenyo. Ashike okupopya oshili, kandi udite ko nande kutya osho osha hala okutya shike.

Megan: Haave auke Shirley. Oshikundafanwa shi na sha nekuliloyambo laJesus oshinima shomoule. Ndele oshi li yo shimwe shomeeshili dihokwifa odo  tadi hangwa mEendjovo daKalunga. Shitiwa, ou na ngoo natango efimbo ile pamwe natu xulile apa?

Shirley: Ondi na po ngoo linini.

Megan: Osho oshiwa neenghono. Opo ashike nda lesha oshitukulwa shi na sha nekulilo, nohandi ka kendabala oku shi yelifa monghedi i li paunafangwa.

Shirley: Eewa.

Megan: Opo tu ude ko ekulilo, tete otwa pumbwa okuuda ko onghalo oyo ya etifwa po kuAdam naEva eshi va nyona moshikunino shaEden. Opo tu ude ko shi na sha nonghalo oyo, natu leshe Ovaroma 6:23. Oto dulu okukwafela nge u leshe ovelishe oyo.

Shirley: Eewa. Otai ti: “Ondjabi youlunde oyo efyo, ndelenee oshalinghenda yaKalunga oyo omwenyo waalushe muKristus Jesus, Omwene wetu.”

Megan: Tangi unene. Natu konakone omautumbulilo oo a longifwa movelishe oyo. Tete, didilika kutya oya hovela tai ti: “Ondjabi youlunde oyo efyo.” Oo oo omulandu u li paunafangwa oo Kalunga a li a tula po pehovelo londjokonona yovanhu, kutya ondjabi youlunde efyo. Oshoshili kutya pehovelo kapa li omunhu omulunde. Adam naEva ova li va shitwa va wanenena, novana vavo aveshe ova li tava ka dalwa va wanenena, novanhu ngeno ihava fi. Adam naEva nosho yo oludalo lavo alishe ova li ve na eteelelo lokukala nomwenyo waalushe va hafa. Ashike ngaashi tu shishi, oinima hasho vali ya ka enda ngaho, ile osho?

Shirley: Ahowe, hasho ya li ya enda. Adam naEva ova lya oshiimati osho va shilikwa.

Megan: Osho naanaa. Eshi va lya oshiimati osho, Adam naEva ova hoolola okuhadulika kuKalunga nova ninga ovalunde, inava wanenena. Ehoololo olo inali etela ashike Adam naEva oilanduliko inyikifa oluhodi, ndele noludalo lavo alishe.

Shirley: Owa hala okutya ngahelipi?

Megan: Pamwe nandi longife hano efaneko. Nandi ku pule, ou hole okumbaka?

Shirley: Ee! Ondi hole okumbaka.

Megan: Natu tye nee ou na oshipana shiwa shipe shokumbaka eemboloto. Fimbo nokuli ino shi longifa nande olumwe, oshe lidenga pedu ndele tashi ningi embodokela la kula. Ndele mbela oshike tashi ka ningilwa omboloto keshe oyo to teleke moshipana osho? Mbela nado itadi ka kala di na embodokela?

Shirley: Otadi di mo di na embodokela.

Megan: Sha faafana, eshi Adam naEva va hoolola okuhadulika kuKalunga, ova ningwa embodokela lopafaneko koulunde nokokuhawanenena. Molwaashi ova ninga ovalunde fimbo inava dala nande okaana kamwe, ovana vavo aveshe ova ka dalwa ve na embodokela la faafana. Ovana vavo aveshe ova dalwa moulunde. MOmbibeli, oshitya “oulunde” inashi yukifa ashike elitulemo koilonga, ndele osha yukifa yo konghalo oyo twa fyuulula. Oshidjemo osheshi kutya nonande ame naave inatu ninga sha sha puka, nokatwa li twa dalwa pefimbo opo, eshi Adam naEva va nyona, ove tu landifa po koulunde nokokuhawanenena oko haku twala mefyo mwa kwatelwa oludalo lavo alishe nosho yo oludalo letu. Ngaashi hatu lesha mOvaroma 6:23, ondjabi youlunde efyo.

Shirley: Ashike osho itashi monika shi li pauyuki. Omolwashike ovanhu aveshe ve na okumona oixuna fiyo alushe molwoulunde waAdam naEva?

Megan: Ou li mondjila, itashi monika shi li pauyuki. Ashike ope na shihapu shihe fi ashike osho. Omolwouyuki waye wa wanenena, Kalunga okwa tokola opo Adam naEva va fye omolwoulunde wavo, ndele fye tuli oludalo lavo otu na eteelelo. Kalunga okwa ninga elongekido opo tu dje mo monghalo oyo idjuu. Nonghalo oyo oya ningifa ekuliloyambo laJesus li kale la pumbiwa. Tala vali mOvaroma 6:23. Konima eshi ovelishe oyo ya popya kutya “ondjabi youlunde oyo efyo,” oya popya vali kutya, “ndelenee oshalinghenda yaKalunga oyo omwenyo waalushe muKristus Jesus, Omwene wetu.” Onghee hano, efyo laJesus ole shi ninga tashi shiiva opo tu manguluke mo moulunde nefyo. *

 EKULILO OLI LI OSHALI INENENENE YA DJA KUKALUNGA

Megan: Natango movelishe oyo omu na vali oshitwa shimwe osho nda hala tu yandje elitulemo kusho.

Shirley: Shilipi po osho?

Megan: Didilika kutya ovelishe oya ti: ‘Oshalinghenda yaKalunga oyo omwenyo waalushe muKristus Jesus, Omwene wetu.’ Ngeenge Jesus oye a mona oixuna noku tu fila, a yandja omwenyo waye molwetu, omolwashike ovelishe tai ti kutya ekulilo oli li “oshalinghenda yaKalunga”? Omolwashike inai tya “oshali oyo Jesus a yandja”? *

Shirley: Hmm. Kandi shi shii.

Megan: Kalunga okwa shita Adam naEva, nova nyona kuye eshi inava dulika moshikunino shaEden. Oku na okukala a li a yahama neenghono eshi ovana vaye vavali votete vopanhu ve mu tukulila oshibofa. Ndele Jehova okwa li a mona ekandulepo lomukundu oo meendelelo. * Okwa li a lalakanena opo umwe womoishitwa yaye yopamhepo e uye kombada yedu, e li omunhu a wanenena, noxuuninwa okuyandja omwenyo waye u li ekuliloyambo. Onghee hano, elongekido lekulilo oli li oshali ya dja kuKalunga. Natango ope na onghedi imwe omo ekulilo li li oshali ya dja kuKalunga. Owa diladila ngoo nande onale nghee Kalunga a li e udite eshi Jesus ta dipawa?

Shirley: Ahowe, inandi diladila naanaa kombinga yasho.

Megan: Ondi wete poshivelo sheumbo leni pe na oudanaukifo. Onde lineekela ou na ounona.

Shirley: Heeno, ondi na vavali, okamati nokakadona.

Megan: U li omudali, diladila ashike nghee Xe yaJesus womeulu, Jehova Kalunga, a li e udite efiku olo Jesus a fya. Mbela okwa li e udite ngahelipi eshi ta tale okudja meulu Omona waye omuholike a kwatwa po, ta shekwa nokudengwa neengonyo? Xe omudali okwa li e udite ngahelipi eshi ta tale Omona ta valelwa komuti womahepeko, nokufiwa ko a fye efyo li udifa omwenyo munyenye?

Shirley: Oku na okukala a li e udite nai neenghono. Inandi diladila nande onale kwaasho.

Megan: Osho naanaa, ashike nande ongaho, itatu dulu okuufa filufilu nghee Kalunga a li e udite efiku olo. Ashike otu shii kutya oku na omaliudo notu shii yo kutya omolwashike a efa oinima aishe oyo i ningwe. Naasho osha yelifwa nawa momushangwa oo u shiivike nawa, Johannes 3:16. Oto dulu oku u lesha?

Shirley: Heeno, otau ti: “Osho Kalunga a kala e hole ounyuni, Oye a yandja Omona waye Ewifa, opo keshe ou te mu itavele a ha kane, ndelenee a kale e nomwenyo waalushe.”

Megan: Tangi unene. Tala vali pehovelo lovelishe oyo. Oya ti: “Osho Kalunga a kala e hole ounyuni.” Osha yela kutya ohole oyo ye linyengifa Kalunga a tume Omona waye kombada yedu, a fye ponhele yetu. Onghee hano, ekuliloyambo oli li euliko linenenene lohole yaye. Nomolwaasho Eendombwedi daJehova hadi ongala pamwe lumwe omudo keshe opo di dimbuluke efyo laJesus. Mbela ouyelele oo twa konakona owe ku kwafela ngoo?

Shirley: Heeno, owa kwafela nge. Onda pandula eshi wa longifa efimbo u kundafane naame ouyelele oo.

Mbela ou na oshikundafanwa shonhumba shopaMbibeli osho ho lipula nasho? Mbela oho kala wa limbililwa shi na sha neitavelo ile oilonga yopalongelokalunga yEendombwedi daJehova? Ngeenge osho, ino ongaonga okupula umwe womEendombwedi daJehova. Ota ka kala a hafa okukundafana naave oshinima osho.

^ okat. 5 Eendombwedi daJehova ohadi ongala pamwe lumwe momudo opo di dimbuluke efyo laJesus. Neudo, Edimbuluko otali ka kala ko mEtitano, 3 Aprili.

^ okat. 32 Oshitukulwa tashi ka landula ko shomoitukulwa ei ya pambafana, otashi ka kundafana nghee ekuliloyambo laJesus le tu mangulula moulunde nosho yo kutya oshike tu na okuninga po opo tu mone ouwa mekuliloyambo olo.

^ okat. 36 She likolelela kOmbibeli, Kalunga naJesus ovanhu vavali va yoolokafana. Opo u mone ouyelele muhapu, tala etukulwa 4 lembo Ombibeli otai hongo lela shike? la nyanyangidwa kEendombwedi daJehova.

^ okat. 38 Tala Genesis 3:15.

Ekuliloyambo oli li euliko linenenene lohole yaKalunga

Lihonga shihapu

Ekulilo—oshali inenenene ya dja kuKalunga

Ekulilo oshike? Ongahelipi to dulu okumona ouwa mulo?

Omolwashike Jesus a hepekwa nokudipawa?

Ongahelipi hatu dulu okumona ouwa omolwefyo laye?