Inda koshikalimo

Inda kelandulafano etivali

Inda koshikalimo

Eendombwedi daJehova

Oshikwanyama

Oshungonangelo  |  Marsa 2015

 EENGHUNDAFANA NOMUNEUMBO

Omolwashike twa pumbwa okukonakona Ombibeli?

Omolwashike twa pumbwa okukonakona Ombibeli?

Eenghundafana tadi landula otadi ulike nghee Eendombwedi daJehova hadi kundafana navamwe. Natu tye nee ngeno Ondombwedi yedina Brian otai kundafana nomulumenhu wedina Eric.

OMBIBELI OI NA ONDJOKONONA I LI PAUSHILI

Eric: Ame nghi na naanaa ohokwe momalongelokalunga. Onghee ondi wete kutya katu na okupopya sha kombinga yaasho.

Brian: Tangi eshi wa yelifila nge ngaho. Shitiwa, edina lange aame Brian. Edina loye?

Eric: Aame Eric.

Brian: Onda hafa eshi twa shakena, Eric.

Eric: Eewa.

Brian: Mbela owa kulila moukwaneumbo u hole oinima yopakalunga?

Eric: Heeno. Ndele eshi nda ka ya kounivesiti kanda li vali handi i kelongelokalunga.

Brian: Oo. Oshike to lihongele kounivesiti?

Eric: Okunongonona edu nonghalamwenyo nosho yo ondjokonona. Onda kala alushe ndi hole ondjokonona, unene tuu i na sha neputuko lovanhu.

Brian: Ondjokonona oshinima shihokwifa. Otashi dulika u shii kutya Ombibeli embo londjokonona. Mbela nayo oho i longifa ngoo ngeenge to ningi omapekapeko?

Eric: Ahowe. Ondi shii kutya Ombibeli embo liwa, ashike ihandi i tale ko i li embo londjokonona.

Brian: Ondi wete kutya oto monika wa fa wa hala okuuda shihapu. Ngeenge ou na okafimbo, onda hala oku ku ulikila oihopaenenwa inini yopandjokonona i li paushili tai hangwa mOmbibeli.

Eric: Eewa. Ashike nghi na nee Ombibeli.

Brian: Oshili nawa. Ohandi dulu oku ku ulikila mOmbibeli yange. Oshihopaenenwa shotete otashi hangwa mo 1 Omafimbo 29: 26, 27. Eevelishe odo otadi ti: “Osho ngaha hano David yaIsai okwa li ohamba yOvaisrael aveshe. Nomafiku a pangela Ovaisrael a li omido 40. Okwa pangela muHebron omido 7 nomuJerusalem omido 33.”

Eric: Omeityo lilipi oshihopaenenwa osho tashi ulike kutya Ombibeli oi na ondjokonona i li paushili?

Brian: Ovakembauli pomhito imwe okwa li va itavela kutya ohamba David kaya li ko nandenande.

Eric: Omolwashike va li tave lipula shi na sha naasho?

Brian: Omolwaashi kapa li naanaa oumbangi we lixwapo oo wa li tau ulike kutya David okwa li omunhu wolela, kakele kOmbibeli. Ndele mo 1993, ongudu yovalafululi voikulunima ova li va mona emanya likulukulu olo la shangwa “Eumbo laDavid.”

Eric: Osho oshihokwifa shili.

Brian: Omunhu umwe vali oo ovanhu va li va limbililwa ngeenge oko a li, ohamba Pontius Pilatus, oo a li ta pangele pefimbo laJesus. Okwa tumbulwa muLukas 3:1 pamwe novanambelewa vakwao vahapu vopefimbo laye.

Eric: Osho, ondi shi wete. Ovelishe oya ti: “Pontius Pilatus eshi kwa li omupangeli waJudea, naHerodes omupangeli woshitine muGalilea.”

Brian: Osho naanaa. Oule womido, ovahongwanhu vamwe ova li tave lipula ngeenge Pontius Pilatus  oko ngoo a li shili. Konima yomido 50 lwaapo da pita, opa li pa monika emanya kOushilo woPokati la shangwa edina laye.

Eric: Hmm. Inandi uda nale ouyelele oo.

Brian: Onda hafa eshi twa kundafana naave kombinga youyelele ou.

Eric: Doshili onda kala ashike nda tala ko Ombibeli i li embo la shangwa kovahongwanhu ndele kanda li ndi shii ngeenge oi na ouyelele wa fimana pefimbo letu. Nonande oi na ondjokonona i li paushili, kandi wete i na omayele taa longo kunena.

OMBIBELI EMBO LIKULU NDELE INALI KWISHA

Brian: Ovanhu vahapu ova itavela kutya itali longo kunena. Ashike ame onda itavela shimwe shi lili. Etomheno ololo kutya: Okudja peshito fiyo okunena eemhumbwe dovanhu inadi lunduluka. Pashihopaenenwa, alushe ohatu kala twa pumbwa oikulya, oikutu nonhele yokukala. Ohatu kala twa hala okukundafana navakwetu nokukala noukwaneumbo wa hafa. Mbela kashi fi shoshili kutya atusheni otwa lenga oinima oyo?

Eric: Ou li mondjila.

Brian: Ombibeli otai dulu oku tu kwafela meembinga adishe odo. Nomolwaasho hatu dulu kutya embo likulu ndele inali kwisha.

Eric: Owa hala kutya ngahelipi?

Brian: Nandi shi popye vali monghedi ei: Ombibeli oi na omafinamhango a fimanenena oo taa longo yo kunena ngaashi ashike a li taa longo momafelemido a pita eshi opo ya shangwa.

Ombibeli oi na omafinamhango a fimanenena oo taa longo yo kunena ngaashi ashike a li taa longo momafelemido a pita eshi opo ya shangwa

Eric: Eewa. Omeembinga dilipi?

Brian: Ombibeli otai dulu oku tu wilika ngeenge tashi uya poinima ngaashi okukala netaleko li li pandjele li na sha noimaliwa, okukala noukwaneumbo wa hafa ile okukala kaume muwa. Ombibeli otai dulu oku tu kwafela tu pondole monghalamwenyo. Pashihopaenenwa, mbela ito dimine kutya oshi li eshongo kunena okukala omushamane u li omutwe woukwaneumbo ha pondola?

Eric: Heeno, ohandi tu kumwe naave. Ame nomukulukadi wange paife otwa kala mohombo hanga oule womudo, ndele haalushe hatu kala tu uditafane.

Brian: Osho naanaa. Ashike, Ombibeli oi na omafinamhango oo taa longo e li pandjele. Pashihopaenenwa, tala Ovaefeso etukulwa 5. Natu leshe ovelishe 22, 23 nosho yo 28. Oto dulu okulesha eevelishe odo.

Eric: Eewa. Otadi ti: “Ovakainhu, dulikeni kovalumenhu veni [ngaashi] kOmwene. Osheshi omulumenhu oye omutwe womukainhu, ngaashi Kristus yo Oye omutwe weongalo, Ye omuxupifi wolutu.” Ovelishe 28 otai ti: “Osho ngaha novalumenhu ve nokuhola ovakainhu vavo ngaashi omalutu avo vene; oye ou e hole omukainhu waye, oye oku lihole ye mwene.”

Brian: Tangi unene. Mbela kashi fi shoshili kutya ngeenge ovalihomboli ova kendabala okutula moilonga omayele oo e li pandjele otashi ka xwepopaleka ehafo loukwaneumbo wavo?

Eric: Ondi wete kutya osho. Ndele oshipu oku shi popya ashike oshidjuu oku shi tula moilonga.

Brian: Osho naanaa; kape na oo a wanenena. Metukulwa olo tu olo, omu na ovelishe tai tu ladipike tu kale tu na ondjele. * Mekwatafano keshe, ovanhu ova pumbwa okukala ve na ondjele nohava tifuka. Ame nomukulukadi wange otwa mona kutya Ombibeli otai dulu oku tu kwafela tu kale tu na ondjele.

Eric: Osho otashi ti sha lela.

Brian: Eendombwedi daJehova odi na o-Web site oyo i na ouyelele wa denga mbada u na sha nohombo nosho yo nomaukwaneumbo. Ngeenge ou na okafimbo, ohai dulu oku ku ulikila osho shi li ko.

Eric: Eewa. Ohai dulu oku ku pa okafimbo kanini.

Brian: Oshili nawa. Ondjukifi yo-Web site yetu o-www.jw.org/kj. Eli olo epandja letu lopehovelo.

Eric: Oli na omafano mawa shili.

Brian: Omafano oo otaa ulike oilonga yetu oyo hatu longo mounyuni aushe. Apa ope na oshipalanyole “Oishangomwa.” Koshi yoshipalanyole osho oku na okapalanyole “Omambo nOumbo.” Momambo noumbo otamu hangwa oitukulwa i na sha nanghee ovalihomboli tava dulu okuungaunga neenghalo di lili noku lili odo va taalela. Pashihopaenenwa, natu tale  mokambo aka ke na oshipalanyole “Onghundana iwa ya dja kuKalunga!” oshileshwa 9, epulo 2 olo tali ti “Omushamane nomukulukadi ove na okukalafana ngahelipi?”

Eric: Osho oshikundafanwa shihokwifa shili!”

Brian: Didilika omatumbulo avali axuuninwa a popiwa mokatendo aka. Eric oto dulu okulesha po.

Eric: Eewa. Oka ti: “Ovashamane novakulukadi ove na okukala ve holafane nohava fimanekafana. Ndele molwaashi ovashamane novakulukadi aveshe inava wanenena, osha fimanenena okulihonga okudiminafana po opo va kale va hafa meehombo davo.” Hmm, ondi hole onghedi oyo va yelifa.

Brian: Tangi eshi wa lesha po. Oto dulu okulesha Ovaefeso 5:33 ovo va etwa mo.

Eric: Eewa. Otai ti: “Keshe womunye na kale yo e hole omukainhu waye mwene ngaashi e lihole ye mwene, ndele omukainhu na fimaneke omulumenhu waye.”

Brian: Owa didilika ngoo kutya omushangwa oo otau divilike kutya osha fimana okuningila kaumwe koye kopahombo oinima oyo wa hala okuningilwa?

Eric: Nghi udite naanaa kutya owa hala kutya ngahelipi.

Brian: Mbela kashi fi shoshili kutya omulumenhu oha kala a hala okufimanekwa komukulukadi waye? Mepingafano naasho, mbela omukulukadi iha kala a hala okushilipalekwa alushe komushamane waye kutya oku mu hole shili?

Eric: Osho. Ohandi tu kumwe nasho.

Brian: Ngeenge omushamane okwa kala ha kongo eenghedi dokuulikila omukulukadi waye ohole, mbela itashi ka kala shipu komukulukadi e mu fimaneke?

Eric: Ondi wete kutya osho osha fa ngoo tashi ka longa.

Brian: Onghee hano, nonande ovelishe oyo oya shangwa konyala omido 2 000 da pita, oya popya eemhumbwe dovalihomboli noya yandja omayele taa longo. Ngeenge ove a tula moilonga otae ke va kwafela shili.

Eric: Onda dimina kutya mboli Ombibeli oi na shihapu shi dulife pwaasho nda li hai diladila.

Brian: Onda hafa okuuda ngaho. Ongahelipi ngeenge otwa ka shakena vali ponhele ei opo ndi ude ka kutya oshike wa hafela mouyelele oo u li koshi yepulo etitatu “Ngeenge kamu na ehafo mohombo yeni, mbela ou na okufiya po kaume koye kopahombo?” *

Eric: Oshili nawa. Ohatu ke li kundafana nomukulukadi wange.

Mbela ope na oshikundafanwa shonhumba shopaMbibeli osho ho lipula nasho? Mbela oho kala wa limbililwa shi na sha neitavelo ile noilonga yopalongelokalunga yEendombwedi daJehova? Ngeenge osho, ino ongaonga okupula umwe womEendombwedi daJehova. Ota ka kala a hafa okukundafana naave oshinima osho.

^ okat. 43 Tala Ovaefeso 5:17.

^ okat. 63 Opo u mone ouyelele wa wedwa po, tala etukulwa 14 lembo Ombibeli otai hongo lela shike? la nyanyangidwa kEendombwedi daJehova.

Lihonga shihapu

Onghundana iwa ya dja kuKalunga!

Ongahelipi omafinamhango Ombibeli hae tu etele ouwa?

Jesus okwa yelifa kutya omolwashike twa pumbwa ewiliko nomafinamhango Ombibeli avali elipi a fimanenena.

Ino hala ekonakonombibeli loshali?

Omolwashike u na okukonakona Ombibeli?

Ombibeli otai kwafele ovanhu omamiliyona mounyuni aushe va mone omanyamukulo omapulo oo a fimanenena monghalamwenyo. mbela ino hala okukala umwe womuvo?