Inda koshikalimo

Inda kelandulafano etivali

Inda koshikalimo

Eendombwedi daJehova

Oshikwanyama

Oshungonangelo  |  Januali 2015

 OSHIPALANYOLE SHOKOMBADA | OTO DULU OKWEEHENA POPEPI NAKALUNGA

Edina laKalunga ou li shii ngoo noho li longifa tuu?

Edina laKalunga ou li shii ngoo noho li longifa tuu?

Mbela oto dimbuluka kaume koye kopofingo umwe oo uhe shii edina laye? Hasho nandenande. Ngaashi sha popiwa komukainhu omuBulgaria wedina Irina, “Itashi shiiva u ehene popepi naKalunga ngeenge ku shii edina laye.” Lao linene, moshitukulwa sha tetekela omwa tumbulwa kutya Kalunga okwa hala u ehene popepi naye. Onghee hano, okwe ku lihololela okupitila mOmbibeli eshi a ti: “Aame Jehova. Olo edina lange.” — Jesaja 42:8NW.

Kalunga okwe ku hololela edina laye okupitila mOmbibeli eshi a ti: “Aame Jehova. Olo edina lange.” — Jesaja 42:8NW.

Mbela osha fimana ngoo kuJehova okukala u shii edina laye noho li longifa ile hasho? Diladila kwaashi: Edina laKalunga oha li shangwa neendada nhee dOshiheberi hadi ifanwa o-Tetragrammaton, nola holoka mOmishangwa dOshiheberi lwoikando 7 000 lwaapo. Oli dule kokule omadina makwao oo a tumbulwa mOmbibeli. Osho otashi yandje oumbangi kutya Jehova okwa hala tu shiive edina laye notu li longife. *

Oukaume luhapu ohau tameke pokati kovanhu vavali tava lombwelafana omadina. Mbela ou shii edina laKalunga?

Vamwe ohava kala ve udite kutya molwaashi Kalunga omuyapuki nomunaenghono adishe, itashi ka ulika efimaneko okulongifa edina laye. Oshoshili kutya inashi yuka okulongifa edina laKalunga monghedi inai wapala, ngaashi naanaa ihatu dulu okulongifa nai omadina ookaume ketu kopofingo. Kakele kaasho, Jehova okwa hala ovo ve mu hole va fimaneke edina laye noku li shiivifa. (Epsalme 69:31, 32; 96:2, 8) Dimbuluka kutya Jesus okwa honga ovashikuli vaye va ilikane tava ti: “Tate yetu ou u li meulu! Edina loye nali yapulwe.” Ohatu dulu okukufa ombinga mokuyapulifa edina laKalunga moku li shiivifa, naasho otashi ke tu ehenifa popepi naye. — Mateus 6:9.

Ombibeli otai ulike kutya Kalunga oha yandje elitulemo le likalekelwa kwaavo ‘hava fimaneke edina laye.’ (Malakia 3:16) Jehova okwa udanekela ovanhu va tya ngaho a ti: ‘Onda hala ndi va amene, osheshi ova shiiva edina lange. Ngeenge tava ifana nge, Ame ohandi va udu; ohandi liameke kuvo moudjuu wavo.’ (Epsalme 91:14, 15) Ngeenge otwa hala okuhafela ekwatafano lopofingo naJehova, otu na okushiiva edina laye noku li longifa.

^ okat. 4 Shi nyikifa oluhodi, nonande edina laKalunga ola holoka lwoikando mOmishangwa dOshiheberi, odo hadi ifanwa Etestamenti Likulu, ovatoloki vahapu vOmbibeli ova dopa oku li tula mo. Ponhele yaasho, ove li pingena po nomadinafimaneko ngaashi “Omwene” ile “Kalunga.” Opo u mone ouyelele muhapu u na sha noshikundafanwa eshi, tala pepandja 195-197 lembo Ombibeli otai hongo lela shike? la nyanyangidwa kEendombwedi daJehova.