Inda koshikalimo

Inda koshikalimo

Eendombwedi daJehova

Hoolola elaka Oshikwanyama

 OSHIPALANYOLE SHOKOMBADA | ETALEKO LAKALUNGA LI NA SHA NOKUSHILA OMAKAYA

Oupyakadi oo u li mounyuni aushe

Oupyakadi oo u li mounyuni aushe

Okushila omakaya onghee ngoo taku twikile nokudipaa ovanhu.

  • Okwa twaalela eemwenyo dovanhu 100 000 000 momukokomoko womido efele da pita.

  • Momudo keshe ohaku twaalele eemwenyo dovanhu 6 000 000 lwaapo.

  • Ohaku dipaa omunhu umwe meesekonde hamano keshe lwaapo.

Kape na osho tashi ulike kutya onghalo ya tya ngaha otai ka xwepopala.

Omapangelo otaa tengeneke kutya ngeenge onghalo ya tya ngaho otai twikile, mo 2030, omuvalu wovanhu ovo hava fi momudo keshe komakaya otau ka londa neenghono u dule 8 000 000. Otava tengeneke yo kutya okushila omakaya otaku ka twaalela eemwenyo dovanhu 1 000 000 000 pexulilo lefelemido 21.

Ovo hava shili omakaya havo ashike hava ningi oihakanwa yao. Omwa kwatelwa yo oilyo yomaukwaneumbo oyo hai fyaala po tai mono oixuna pamaliudo, pashimaliwa nosho yo ovanhu 600 000 ovo ihava shili omakaya hava fi omudo keshe omolwokufudila mo omwifi womakaya okudja kwaavo hava shili omakaya. Osho osha ninga omutengi ku keshe umwe molwaashi osha ningifa ouhaku u kale u na ondilo.

Mepingafano nomikifi odo eendokotola hadi kala tadi kondjo opo di di monene epango, ekandulepo loupyakadi ou oli shiivike nawa. Omundokotola Margaret Chan, omuwilikindjai wEhangano lOukalinawa mOunyuni, okwa ti: “Oupyakadi womakaya ohau etwa kovanhu filufilu, notau dulu okukelelwa ngeenge omapangelo novakwashiwana ova ningi eenghendabala da mana mo.”

Oilongo mounyuni oya kala nokukondjifa oupyakadi oo wa kuma oukolele wovanhu neenghono. Ngaashi muAuguste 2012, oilongo 175 lwaapo oya li ya udafana opo i kelele elongifo lomakaya. * Ndele nande ongaho, ope na eenghono dinene tadi xwaxwameke odo itadi dulu okukelelwa. Omudo keshe, eefabulika domakaya ohadi longifa eedola omabiliyona mokuninga omashiivifo opaipindi opo di nane ovalandi, unene tuu ovakainhu nosho yo ovanyasha ovo ve li moilongo oyo opo tai putuka. Molwaashi omakaya ohaa piki ovanhu, oshi li shidjuu kovanhu emiliyona limwe ovo va pikwa nale oku a efa po. Efyo otali ka londa pombada neenghono moule womido 40 tadi shikula ko, okuninga shapo ovo hava shili omakaya tave a efa.

Omashiivifo nokupikwa komakaya okwa twala ovanhu vahapu momwiyo oo tava diladila ngeno okudja mo muo. Naoko naye okwa li monghalo ya tya ngaho. Okwa hovela okushila omakaya fimbo a li mepupi lokamukondapweyu. Okwa kala ha hopaenene onghedindjikilile oyo hai ulikwa moikundaneki nokwa kala e udite a putuka. Nonande ovadali vaye aveshe ova fya moipafi yaye komukifi wokankela yokomapunga, okwa twikila okushila omakaya, nokuli nofimbo a li ta tekula ovanakadona vavali. Okwa ti: “Onda kala nokulipula shi na sha nokukwatwa kokankela yokomapunga nosho yo noukolele wounona vange, ashike kanda li natango nda efa po okushila omakaya. Okwa li handi diladila kutya kandi na fiku nandi ke a efe po.”

Ashike, paife okwa efa po okushila omakaya. Okwa mona etwomukumo olo le mu kwafela a efe po onghedindjikilile yaye yokushila omakaya olo la dja kodjo ya faafana naayo ya kwafela ovanhu omamiliyona va dje moupika wokushila omakaya. Odjo oyo oilipi? Oto indilwa u i leshe.

^ par. 11 Eenghatu oda li da kwatela mo okuhonga ovanhu shi na sha noshiponga shokushila omakaya, okwiindika eefabulika dokulandifa omakaya, okulondeka oishoshela nokutota po eeprograma dokukwafela ovanhu va efe po okushila omakaya.