Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) NOVEMBA 2015

Jehova oKalunga kohole

Jehova oKalunga kohole

“Kalunga Oye ohole.” — 1 JOHANNES 4:8, 16.

OMAIMBILO: 18, 91

1. Oukwatya waKalunga ulipi wa tongomana, nokushiiva kombinga yao otaku ku kwafele u kale u mu uditile ngahelipi?

OMBIBELI oye tu lombwela kutya “Kalunga Oye ohole.” (1 Johannes 4:8) Ndele mbela osho osha hala okutya lela shike? Ohole kai fi ashike imwe yomomaukwatya aJehova mahapu mawa, ndele oi li oukwatya waye wa tongomana. Kai fi ashike oukwatya oo e na, ndele ye mwene oye ohole. Ohole oyo hai wilike keshe osho ta ningi. Inatu pandula tuu eshi Jehova e linyengifwa kohole a shite oinima aishe mevalelwa noinima aishe i na omwenyo!

2. Elineekelo lilipi ohole yaKalunga tai tu pe? (Tala efano pehovelo loshitukulwa.)

2 Jehova oku na olukeno noku hole oishitwa yaye. Ohole yaye yoku tu hola otai tu kwafele tu kale tu na elineekelo kutya elalakano laye li na sha novanhu otali ka wanifwa po monghedi ya denga mbada. Naasho otashi ka etela ovo hava dulika kuye ehafo lashili. Pashihopaenenwa, omolwohole, Jehova okwa tula po “efiku lokutokola ounyuni, eshi te u tokolifa ouyuki komulumenhu tuu oo, Ye mwene okwe mu hoolola,” Jesus Kristus.  (Oilonga 17:31) Otu na elineekelo kutya etokolo olo otali ka ningwa shili. Osho otashi ka etela ovanhu ovaduliki onakwiiwa yaalushe ikumwifi.

ONDJOKONONA OYA ULIKA SHIKE?

3. Ngeno Kalunga ka li e hole ovanhu, mbela ngeno onghalamwenyo otai kala ya tya ngahelipi?

3 Mbela ngeno ohole hayo ya li oukwatya waKalunga wa tongomana, ngeno onakwiiwa yovanhu oya tya ngahelipi? Ngeno ovanhu otava twikile ashike nokupangelafana nokunwefwa mo kukalunga ehe nohole noku na outondwe, Satana. (2 Ovakorinto 4:4; 1 Johannes 5:19; lesha Ehololo 12:9, 12.) Ngeno Jehova ka li e tu hole, ngeno onakwiiwa otai kala inyanyalifa.

4. Omolwashike Jehova a efa ovanashibofa va tukulile ounamapangelo waye oshibofa?

4 Eshi Satana a tukululila oshibofa eenghonopangelo daKalunga, okwa li yo a nwefa mo ovadali vetu votete navo va ninge ovanashibofa. Okwa li a tula momalimbililo oufemba waKalunga wokukala Omunamapangelo weshito alishe. Satana okwa ti kutya ota dulu okupangela nawa e dule Kalunga. (Genesis 3:1-5) Jehova okwa ninga oshinima shi li pandunge eshi a efela po Satana oule wokafimbo opo a ulike ngeenge osho a popya oshoshili ngoo. Ashike oidjemo oya ulika sha yela kutya kashi na nee mbudi kutya ovanhu ile oSatana, itava dulu okukala ovapangeli vawa.

Jehova ina shitila ovanhu okudula ile oufemba wokulipangela nopehe na ewiliko laye

5. Ondjokonona yovanhu oya nyaneka pomutenya oushili ulipi?

5 Kunena ounyuni onghee ngoo tau naipala. Ovanhu ve dulife pomamiliyona 100 ova kanifila eemwenyo davo moita moule womido 100 da pita. Ombibeli oya ti kutya “momafiku axuuninwa” ‘ovanhu vai novakengeleledi otava ka ehena komesho mowii.’ (2 Timoteus 3:1, 13) Ombibeli oya ti yo kutya: “Ondi shi shii nokutya, ondjila yomunhu ihai kala mepangelo laye mwene, ile mepangelo lomulumenhu, nhumbi ta ende, nhumbi ta yukifa eenghatu daye.” (Jeremia 10:23) Ondjokonona oya ulika sha yela oushili weendjovo odo. Jehova ina shitila ovanhu okudula ile oufemba wokulipangela nopehe na ewiliko laye.

6. Omolwashike Kalunga a efa oukolokoshi u kale po?

6 Mokweefa oukolokoshi u twikile oule wefimbo, Jehova okwa ulika yo kutya okupangela kwaye oko akuke taku pondola. Monakwiiwa, Kalunga ota ka hanauna po oukolokoshi aushe. Nokonima yaasho, Kalunga ota ka katukila onghatu diva keshe tuu ou ta ka tula momalimbililo onghedi yaye yokupangela pahole. Ota ka longifa ondjokonona yovanhu onga oumbangi wokuulika kutya ounashibofa wa tya ngaho ou na okukombwa po diva noukolokoshi itau ka efuwa vali u kale po.

KALUNGA OKWA ULIKA NGAHELIPI OHOLE YAYE?

7, 8. Ongahelipi Jehova a ulika kutya omunahole?

7 Jehova okwa ulika ohole yaye inene meenghedi dihapu. Diladila ashike kounene nokewapalo leshito alishe. Ola fikama po momihalavili omabiliyona, nomuhalavili keshe ou  na eenyofi neepulaneta omabiliyona. Imwe yomeenyofi odo di li momuhalavili wetu oo hau ifanwa Milky Way oyo etango. Nopehe na etango, kombada yedu itaku dulu okukala oinima i na omwenyo. Eshito alishe olo otali yandje oumbangi kutya Jehova oye Omushiti wetu notali holola yo omaukwatya aye, ngaashi eenghono, ounongo nohole. Heeno, omaukwatya aKalunga ‘ehe wetike, kokutya eenghono daye daalushe noukalunga waye, otai monika nawa moilonga yaye okudja keshito lounyuni.’ — Ovaroma 1:20.

Ovanhu noinamwenyo ohava mono ouwa moinima aishe oyo Jehova a shitila kombada yedu

8 Jehova okwa shita edu monghedi omo taku dulu okukala oinima i na omwenyo. Ovanhu noinamwenyo ohava mono ouwa moinima aishe oyo ya shitilwa kombada yedu. Kalunga okwa li a tula ovanhu moshikunino sha wapala va kale mo nokwe va pa yo omalutu nomadiladilo a wanenena nelalakano lokukala fiyo alushe. (Lesha Ehololo 4:11.) Shimwe vali, ‘oha palula oinamwenyo aishe, osheshi ouwanghenda waye [“ohole i na oudiinini,” NW] tau kala po alushe.’ — Epsalme 136:25.

9. Nonande Jehova oKalunga omunahole, oshike osho e tonde?

9 Jehova oKalunga kohole, noku tonde osho shii. Pashihopaenenwa, Epsalme 5:5-7 ola popya shi na sha naJehova la ti: ‘Ove ku fi Kalunga ha hokwa oulunde. Omunawii ke nokukala puove.’ Oku tonde yo ovanhu “ovadipai novanekonda.”

EXULILO LOUKOLOKOSHI OLI LI POPEPI

10, 11. (a) Oshike tashi ka ningilwa ovakolokoshi? (b) Ongahelipi Jehova ta ka pa ondjabi ovanhu ovaduliki?

10 Jehova ota ka xulifa po oukolokoshi meshito alishe pefimbo la wapala molwaashi oku li Kalunga kohole noku tonde osho shii. Eendjovo daKalunga oda udaneka da ti: “Ovaningi vowii otava ka kombololwa po, ndelenee ava tava teelele Omwene, otava ka nangala oshilongo [edu, NW]. Ngenge pa pita okafimbo kaningholi, omuhenakalunga ita kala po vali.” Ovatondi vaJehova otava ka kana “po ngaashi omwifi.” — Epsalme 37:9, 10, 20.

11 Eendjovo daKalunga oda udaneka yo da ti: “Ovayuki, vo otava ka fyuulula oshilongo ndee tava kala mo alushe.” (Epsalme 37:29) Ovanhu ovadiinini otava “ka hafela ombili inene.” (Epsalme 37:11) Omolwashike mbela? Omolwaashi Kalunga ketu omunahole oha ningile alushe ovapiya vaye ovadiinini osho sha denga mbada. Ombibeli oye tu lombwela ya ti: “Ota feta po omahodi momesho avo, nefyo itali kala po vali ile oluhodi ile okulila ile ouyahame itau kala po vali, osheshi eshi shotete osha xula po.” (Ehololo 21:4) Oyo kai fi tuu onakwiiwa itunhula kovanhu ovaduliki ovo ve na olupandu lohole yaKalunga!

12. Olyelye e li ‘omuyuki’?

12 Ombibeli oya ti: “Lilonga komunghaya, tala kovayuki, osheshi efimbo lokomesho tali ka kala lomulumenhu omunambili. Ndelenee ovanyonauni otava hanaunwa po, nefimbo lokomesho lovahenakalunga otali ka tetwa po sheke.” (Epsalme 37:37, 38) ‘Omuyuki’  okwa shiiva Jehova nOmona noha dulika kehalo laKalunga. (Lesha Johannes 17:3.) Okwa itavela kutya “ounyuni otau xulu po pamwe nokahalu [kao]; ndelenee ou ta longo ehalo laKalunga, oye ta kala alushe.” (1 Johannes 2:17) Molwaashi exulilo lounyuni oli li popepi, osha endelela ‘okuteelela Omwene, ove u lambalale ondjila yaye.’ — Epsalme 37:34.

EULIKO LINENENENE LOHOLE YAKALUNGA

13. Kalunga okwa longa oshilonga shinenenene shilipi shohole?

13 Nonande inatu wanenena, ohatu dulu okudulika kuKalunga. Ohatu dulu yo okukala nekwatafano lopofingo naJehova omolwekuliloyambo laJesus olo li li euliko linenenene lohole yaKalunga. Jehova okwa yandja ekulilo opo ovanhu ovaduliki va mone omhito yokumangululwa mo moulunde nefyo. (Lesha Ovaroma 5:12; 6:23.) Jesus okwa kala omudiinini kuKalunga oule wefimbo lile meulu, onghee hano Jehova okwa kala e na elineekelo kutya Omona waye ota ka kala omudiinini kombada yedu. E li Xe omunahole, Jehova okwa li a yahama neenghono eshi a mona nghee Omona waye ta ungaungiwa naye nai. Ashike Jesus okwa kala ta yambidida noudiinini oufemba waKalunga wokupangela nokwa ulika kutya omunhu a wanenena ota dulu okukala omudiinini kuKalunga nonande oku li meenghalo didjuu.

Omolwohole, Kalunga okwa tuma Omona waye (Tala okatendo 13)

14, 15. Efyo laJesus ola yeululila ovanhu omhito ilipi?

14 Nonande opa li omayeleko a kwata moiti, Jesus okwa kala omudiinini nokwa li ha yambidida oufemba waJehova wokupangela. Inatu hafa tuu eshi Jesus a yandja ekulilo olo la pa ovanhu omhito yoku ka kala fiyo alushe mounyuni mupe waKalunga! Omuyapostoli Paulus okwa hokolola ohole oyo ya ulikwa kuJehova naJesus okupitila mekuliloyambo eshi a ti: “Osheshi fye fimbo twa li oingone, Kristus okwa fila ovahenakalunga pefimbo la wapala. Walyee nee, ngenge taku monika ou te liyandje mokufya omolwomuyuki; heeno kashiimba ku na tuu ou e nouladi a file ou muwa. Ndelenee Kalunga okwe tu hololela ohole yaye oku tu hola, Kristus eshi e tu fila fimbo twa li natango  ovalunde.” (Ovaroma 5:6-8) Omuyapostoli Johannes okwa shanga a ti: “Omo tuu omo ohole yaKalunga ye tu hololelwa, Kalunga eshi a tuma Omona waye Ewifa mounyuni, opo tu kale tu nomwenyo muye. Opo tuu opo pe nohole—haopo, fye eshi twa kala tu hole Kalunga, ndelenee Oye a kala e tu hole nokwa tuma Omona waye a ninge ekulilo lomatimba etu.” — 1 Johannes 4:9, 10.

15 Jesus okwa ti: “Osho Kalunga a kala e hole ounyuni, Oye a yandja Omona waye Ewifa, opo keshe ou te mu itavele a ha kane, ndelenee a kale e nomwenyo waalushe.” (Johannes 3:16) Nonande osha li shiyahameka, Jehova okwa yandja Omona waye e li ekulilo. Osho otashi ulike kutya Jehova oku hole ovanhu neenghono. Nohole ya tya ngaho otai kalelele. Paulus okwa shanga a ti: ‘Ondi shi shii shili, haefyo ile omwenyo, havaengeli ile ovapangelinghono, haai yopaife ile ei yokomesho, haenghono, haule wopombada ile oule woposhi, hashishitwa nande shimwe tashi dulu oku tu tukula mohole yaKalunga yomuJesus Kristus, Omwene wetu.’ — Ovaroma 8:38, 39.

OUHAMBA WAKALUNGA PAIFE OTAU PANGELE

16. Ouhamba wopaMessias oshike, na Jehova okwa hoolola lyelye a ninge Omupangeli wao?

16 Epangelo laKalunga olo li li Ouhamba wopaMessias, nalo oli li oumbangi wohole yaKalunga yokuhola ovanhu. Ngahelipi mbela? Jehova okwa hoolola nale Omupangeli oo e hole ovanhu nokwa wana okupangela, Jesus Kristus. (Omayeletumbulo 8:31) Shikwao vali, okwa hoolola yo ovanhu 144 000 va ka pangele pamwe naKristus meulu. Ngeenge ova nyumunwa, otava i ve shii nghee shi li okukala omunhu kombada yedu. (Ehololo 14:1) Eshi Jesus a li kombada yedu, Ouhamba oo wa li enenediladilo lehongo laye, nokwa honga ovahongwa vaye va ilikane tava ti: “Tate yetu ou u li meulu! Edina loye nali yapulwe; ouhamba woye nau uye; ehalo loye nali wanifwe kombada yedu yo ngaashi meulu.” (Mateus 6:9, 10) Otwa teelela nodjuulufi eshi eilikano olo tali ka wanifwa po, eshi Ouhamba waKalunga tau ka etela ovanhu omanangekonoupuna mahapu.

17. Popya eyooloko olo li li pokati kokupangela kwaJesus nokupangela kwovanhu.

17 Ope na eyooloko la kula pokati kepangelo laJesus lopahole nepangelo lopanhu. Okupangela kwovanhu okwa twala fiyo omoita oyo ya twaalela eemwenyo dovanhu omamiliyona. Ashike Omupangeli wetu, Jesus, oku tu hole shili noha hopaenene omaukwatya mawa aKalunga, unene tuu ohole. (Ehololo 7:10, 16, 17) Jesus okwa ti: “Ileni kuame, nye amushe hamu longo nomwa lolokifwa, Ame ohandi mu pe etulumuko. Litwikeni ondjoko yange nye mu lilonge kuame, osheshi Aame omunambili momutima onde lininipika; ndee tamu limonene etulumuko. Osheshi ondjoko yange iwa nomutengi wange omupu.” (Mateus 11:28-30) Olo kali fi tuu eudaneko lopahole!

18. (a) Oshike sha kala tashi ningwa okudja mo 1914? (b) Ohatu ka kundafana shike moshitukulwa tashi landula?

18 Ombibeli oya ulika kutya Ouhamba waKalunga owa hovela okupangela meulu mo 1914. Okudja opo, okwa kala taku ongelwa oilyo yaxuuninwa yaavo tava ka pangela pamwe naJesus meulu nosho yo “ongudu inene” yovanhu ovo tava ka xupa pexulilo longhalelo ei nokuya mounyuni mupe. (Ehololo 7:9, 13, 14) Ongudu inene oi fike peni kunena? Kalunga okwa teelela i ninge shike? Oshitukulwa tashi landula ko otashi ka kundafana omapulo oo.