Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) NOVEMBA 2015

Deula okaana koye opo ka longele Jehova

Deula okaana koye opo ka longele Jehova

‘Omulumenhu waKalunga ne tu longe nhumbi tu nokuninga nokaana okamati aka taka ka dalwa.’ — OVATOKOLIPANGELI 13:8.

OMAIMBILO: 88, 120

1. Manoah okwa li a ninga po shike eshi a uda kutya ota ka ninga omudali?

MANOAH nomukulukadi waye ova li va xupula kutya itava ka dala vali ounona. Opo nee efiku limwe omweengeli waJehova okwa li a lombwela omukulukadi waManoah kutya ota ka dala okaana okamati. Osho kasha li tuu oshinima shitunhula kuvo! Eshi Manoah a lombwelwa onghundana oyo komukulukadi waye, okwa li a hafa neenghono. Ashike okwa li yo ta diladila moule shi na sha naasho Jehova a teelela a ninge e li xe omudali. Ongahelipi ye nomukulukadi waye va li tava ka deula omonamati a kale e hole Jehova noku mu longela ngeenge ovanhu vahapu muIsrael ova li hava longo oilonga ii? Manoah okwa li a indila Jehova a tume vali omweengeli waye, eshi a ti: “Akutu Omwene, omulumenhu waKalunga, ou we mu tuma, ne uye vali lumwe kufye, opo ye e tu longe nhumbi tu nokuninga nokaana okamati aka taka ka dalwa.” — Ovatokolipangeli 13:1-8.

2. Oshike wa pumbwa okuhonga ovana voye, nongahelipi to dulu oku shi ninga? (Tala yo oshimhungu “ Ovakonakonimbibeli voye va fimanenena.”)

2 Ngeenge ou li omudali, otashi dulika to ka uda ko nghee Manoah a li e udite. Naave ou na oshinakuwanifwa shokukwafela ovana voye va shiive Jehova nokukala ve mu hole. (Omayeletumbulo 1:8)  Oto dulu okukala ho va kwafele pelongelokalunga loukwaneumbo va kale have lihongo kombinga yaJehova nosho yo Ombibeli. Ndele owa pumbwa okuninga shihapu shihe fi ashike okukonakona Ombibeli novana voye oshivike keshe. (Lesha Deuteronomion 6:6-9.) Oshike vali tashi ke ku kwafela u deule ovana voye va kale ve hole Jehova noku mu longela? Moshitukulwa eshi ohatu ka kundafana oshihopaenenwa shaJesus. Nonande Jesus ka li omudali, oto dulu okulihonga konghedi omo a li ha hongo nokudeula ovahongwa vaye. Okwa li e va hole nokwa li omulininipiki. Okwa li e na eudeko lomoule li na sha nanghee va li hava kala ve udite nokwa li e shii nghee e na oku va kwafela. Paife natu ka taleni nghee hatu dulu okuhopaenena Jesus.

KALA U HOLE OVANA VOYE

3. Ovahongwa vaJesus ova li ve shi shii ngahelipi kutya oku va hole?

3 Jesus okwa kala ha lombwele alushe ovahongwa vaye kutya oku va hole. (Lesha Johannes 15:9.) Okwa li yo ha kala navo efimbo lihapu. (Markus 6:31, 32; Johannes 2:2; 21:12, 13) Jesus ka li ashike omuhongi wavo, ndele okwa li kaume kavo. Ova li ve na oushili kutya oku va hole. Oshike to dulu okulihonga koshihopaenenwa shaJesus?

4. Ongahelipi to dulu okuulikila ovana voye kutya ou va hole? (Tala efano pehovelo loshitukulwa.)

4 Kala ho lombwele ovana voye kutya ou va hole, noku va ulikila kutya owe va lenga. (Omayeletumbulo 4:3; Titus 2:4) Samuel wokuAustralia okwa ti: “Eshi nda li omunyasha, tate okwa kala ha leshele nge Embo lange lomahokololo Ombibeli onguloshi keshe. Okwa li ha nyamukula omapulo ange, ha papatele nge, nokuxupita nge eshi handi ka nangala. Ashike onda ka kumwa eshi nda ka uda kutya tate ina putukila moukwaneumbo hau ningi ngaho. Ndele nande ongaho, okwa kala ha ningi eenghendabala opo a ulikile nge kutya oku hole nge. Osho osha kwafela nge ndi kale ndi na ekwatafano  lopofingo naye nonda kala ndi udite nda wanenwa nonda amenwa.” Kwafela ovana voye va kale ve udite sha faafana mokukala ho va lombwele kutya, “Ondi ku hole.” Kala ho va papatele noku va xupita. Kala navo efimbo opo mu popye, mu lye pamwe nokudanauka pamwe navo.

5, 6. (a) Jesus okwa li ha ningi shike omolwohole yokuhola ovahongwa vaye? (b) Ongahelipi u na oku pa ovana voye outekuduliko?

5 Jesus okwa ti: “Aveshe ava ndi va hole, ohandi va handukile ndee handi va tekula nedengo.” * (Tala eshangelo lopedu.) (Ehololo 3:19) Pashihopaenenwa, ovahongwa vaye ova li hava tu eemhata lwoikando kutya olyelye a fimana e dule vakwao. Jesus ka li e lipwililikila oupyakadi oo. Ponhele yaasho, okwa kufa efimbo opo e va kwafele lwoikando noikando nelididimiko. Okwa li alushe omunalukeno nokwa li ha kongo efimbo nonhele tai wapalele opo e va pukulule. — Markus 9:33-37.

Hoolola efimbo nonhele ya wapala u yandje outekuduliko kovana voye ndele shi ninga nolukeno

6 Molwaashi ou hole ovana voye, ou na okukala ho va pe outekuduliko. Omafimbo amwe owa pumbwa ashike okuyelifa kutya oshinima shonhumba osha puka ile oshi li mondjila. Ndele ongahelipi ngeenge natango itava dulika? (Omayeletumbulo 22:15) Lihonga koshihopaenenwa shaJesus. Twikila oku va pa outekuduliko nelididimiko moku va wilika, oku va deula noku va pukulula. Konga efimbo nonhele tai wapalele opo u va pukulule, ndele shi ninga nolukeno. Omumwameme umwe womoSouth Africa wedina Elaine ota dimbuluka onghedi omo ovadali vaye va li have mu pe outekuduliko. Ova li have mu yelifile alushe kutya oshike va teelela a ninge. Ngeenge ove mu lombwele kutya ota ka pewa ehandukilo eshi ina dulika, ova li have shi ningi shili. Omumwameme oo okwa ti: “Ovadali vange kava li hava pe nge outekuduliko va handuka ile inava yelifila nge kutya omolwashike handi u pewa.” Osho oshe mu ningifa a kale alushe e wete kutya ovadali vaye ove mu hole.

KALA OMULININIPIKI

7, 8. (a) Ovahongwa vaJesus ove lihonga shike meilikano laye? (b) Ongahelipi omailikano oye taa dulu okukwafela ovana voye va kale ve lineekela Kalunga?

7 Eshi Jesus a li pokukwatwa nokudipawa, okwa li a pula Xe a ti: ‘Abba, Tate, aishe oto i dulu, kufe nge eholo eli. Ndele hangaashi Ame nda hala, ndele ngaashi Ove wa hala.’ * (Tala eshangelo lopedu.) (Markus 14:36) Diladila kunghee ovahongwa vaJesus va li ve udite eshi va uda ta ilikana ile ve ke lihonga kombinga yeilikano olo. Ova li va mona kutya nonande Jesus okwa wanenena, okwa li ha pula ekwafo kuXe. Onghee hano, ove lihonga kutya navo ove na okukala ovalininipiki nove lineekela Jehova.

Ngeenge ovana voye ove ku udu to indile Jehova e ku kwafele, navo otave ke lihonga okukala ve lineekela Jehova

8 Ovana voye otava dulu okulihonga shihapu momailikano oye. Oshoshili kutya iho ilikana molwaashi wa hala ashike oku va honga. Ngeenge tava pwilikine eshi to ilikana, kungaho  otave lihongo okukala ve lineekela Jehova. Eshi to ilikana, ino indila ashike Jehova a kwafele ovana voye, ndele indila yo naave e ku kwafele. Ana wokuBrazil okwa ti: “Ngeenge pa li pe na oupyakadi, pashihopaenenwa ngaashi ngeenge meekulu ile tatekulu ta vele, ovadali vange ova kala hava pula Jehova e va pe eenghono ve lididimikile onghalo noku va pe ounongo opo va ninge omatokolo e li pandunge. Nokuli nongeenge va li moupyakadi wa kwata moiti, ova li have u efele momake aJehova. Osho osha kwafela nge ndi kale nde lineekela Jehova.” Ngeenge ovana voye ove ku udu to indile Jehova e ku pe ouladi wokuyandja oundombwedi tashi dulika komushiinda shoye ile wokupula omuhona woye e ku pe efudo opo u ye koshoongalele, otava ka mona kutya owe lineekela shili mekwafo laJehova, nokungaho navo otava ka ninga sha faafana.

9. (a) Ongahelipi Jesus a honga ovahongwa vaye va kale ovalininipiki novehe lihole vo vene? (b) Oshike to hongo ovana voye ngeenge owe lininipika noku na oukwatya wokuliholamwene?

9 Jesus okwa lombwela ovahongwa vaye va kale ovalininipiki nokukala vehe lihole vo vene, nokwa li yo e va tulila po oshihopaenenwa shi na sha naasho. (Lesha Lukas 22:27.) Ovayapostoli vaye ova li va mona kutya Jesus okwa li ha ningi omaliyambo opo a longele Jehova nokukwafela vamwe, nokungaho ova li ve lihonga okuninga sha faafana. Naave oto dulu okuhonga ovana voye moku va tulila po oshihopaenenwa. Debbie oo e na ounona vavali okwa ti: “Kape na fiku nda twile ondubo molwaashi omushamane wange ha longifa efimbo lonhumba mokukala navamwe e li omukulunhuongalo. Ondi shii kutya ngeenge twa pumbwa elitulemo laye tu li oukwaneumbo, ohe li tu pe.” (1 Timoteus 3:4, 5) Ongahelipi oshihopaenenwa  shaDebbie nomushamane waye Pranas sha kuma oukwaneumbo wavo? Omushamane okwa ti kutya ovana vavo ova li alushe hava kala ve na ehalo okukwafela poyoongalele. Ova li va hafa, hava pange oukaume nova li hava kala va hala okukala novamwatate novamwameme. Paife oukwaneumbo wetu aushe ou li moilonga yefimbo li yadi. Ngeenge owe lininipika noku na oukwatya wokuliholamwene, kungaho oto hongo ovana voye va kale ve na ehalo okukwafela vamwe.

KALA HO NONGELE

10. Ongahelipi eudeko lomoule la li la kwafela Jesus a didilike mo omalinyengotomheno ovanhu vamwe vomuGalilea ovo va li ve uya oku mu konga?

10 Jesus okwa li e na eudeko lomoule. Ka li ashike ha yandje elitulemo kwaasho ovanhu va ninga ndele oketomheno kutya omolwashike ve shi ningila. Okwa li ha dulu okulesha omitima davo. Pashihopaenenwa, opa li omhito imwe opo ovanhu va li ve uya oku mu konga kuGalilea. (Johannes 6:22-24) Jesus okwa li a didilika kutya kava li tave mu kongo molwaashi va hala okupwilikina shili kwaasho a li ta hongo, ndele omolwaashi ashike va li va hala oikulya. (Johannes 2:25) Okwa li e shii omalinyengotomheno avo. Opo nee, okwa li e va pukulula nelididimiko noku va yelifila kutya openi va pumbwa okuninga omalunduluko. — Lesha Johannes 6:25-27.

Kwafela ovana voye va hafele oukalele (Tala okatendo 11)

11. (a) Ongahelipi to dulu okuuda ko nghee ovana voye ve uditile oilonga yokuudifa? (b) Ongahelipi to dulu okukwafela ovana voye va kale hava hafele oukalele?

11 Nonande ito dulu okutala momitima dovanhu, naave oto dulu okukala u na eudeko lomoule. Pashihopaenenwa, oto dulu okukendabala okuuda ko nghee ovana voye ve uditile oukalele. Oto dulu okulipula kutya: ‘Mbela ohava kala va hala moukalele molwaashi ve shii kutya otashi dulika hatu ka kufa okafimbo kokufuda po nokulanda sha shokulya nokunwa?’ Ngeenge owa didilike kutya ovana voye ihava hafele lela oukalele, kendabala u ninge po sha osho tashi va kwafele va kale ve u hokwa. Va pa va ninge oinima yonhumba moukalele oyo tava dulu opo va kale ve wete kutya ove na oshilonga.

12. (a) Jesus okwa li a londwela ovahongwa vaye kombinga yashike? (b) Omolwashike ovahongwa vaJesus va li va pumbwa okulondwelwa?

12 Omonghedi ilipi vali Jesus a li a longifa eudeko laye lomoule? Okwa li e shii kutya epuko limwe otali dulu okutwala kulikwao ile nokuli menyono la kwata moiti, nokwa li a londwela ovahongwa vaye shi na sha naasho. Pashihopaenenwa, ovahongwa ova li ve shii kutya oluhaelo ola puka. Ndele Jesus okwa li e va londwela shi na sha naasho tashi dulu okutwala melihumbato inali koshoka. Okwa ti: “Okeshe tuu ou ta tale omukainhu nokahalu, oye okwe mu haela momutima waye. Eisho loye lokolulyo ngenge tali ku hongaula, li kolola mo, ove u li ekeleshi.” (Mateus 5:27-29) Ovahongwa vaJesus ova li mokati kOvaroma ve na elihumbato inali koshoka ovo va li ve hole okutala omaudano a kwatela mo oinima ya nyika omilele nomapopyo inaa koshoka. Nomolwaasho Jesus okwa li a londwela pahole ovahongwa vaye va henuke keshe osho tashi shi ningifa shidjuu kuvo okulonga osho sha yuka.

13, 14. Ongahelipi to dulu okukwafela ovana voye va henuke omalihafifo inaa koshoka?

13 U li omudali, oto dulu okulongifa eudeko loye lomoule opo u amene ovana voye kokuninga oinima oyo itai hafifa Jehova. Shinyemateka, kunena nounona vanini ove li moshiponga shokutala omafano oipala nosho yo oinima imwe vali inai koshoka. Oshoshili kutya ou na okulombwela ovana voye kutya osha puka okutala oinima inai koshoka. Ashike ope na shihapu osho to dulu okuninga opo u  va amene. Lipula kutya: ‘Mbela ovana vange ove shii ngoo kutya omolwashike sha nyika oshiponga okutala omafano oipala? Oshike osho tashi dulika hashi va ningifa va kale va hala okutalala omafano a tya ngaho? Mbela ohandi shi ningi ngoo shipu kuvo opo va lombwele nge kombinga yakeshe shimwe opo va dule okupula nge ekwafo nokuli nongeenge va yelekwa va tale omafano oipala?’ Ounona nande ovanini, oto dulu oku va lombwela kutya: “Shimha ngoo ndele mwa mona oshinima kointaneta osho tashi mu ningifa mu kale mwa hala okutala oinima ya nyika omilele, omu uya mu lombwele nge. Inamu tila ile mu fye ohoni okulombwela nge opo ndi mu kwafele.”

14 Ngeenge to hoolola omalihafifo opaumwene, kala yo ho diladila noukeka nghee to dulu okutulila po ovana voye oshihopaenenwa shiwa. Pranas, oo a popiwa metetekelo okwa ti: “Oto dulu okupopya shihapu kombinga yoinima ihapu, ashike ovana voye ohava tale kwaasho ho ningi ndee tave ku hopaenene.” Ngeenge oho hoolola alushe eemusika, omambo neemuvi da koshoka, otashi dulu okukwafela ovana voye va ninge sha faafana. — Ovaroma 2:21-24.

JEHOVA OTE KE KU KWAFELA

15, 16. (a) Omolwashike to dulu okukala noushili kutya Jehova ote ke ku kwafela u deule ovana voye? (b) Oshike hatu ka kundafana moshitukulwa tashi landula?

15 Oshike sha li sha ningwa po eshi Manoah a pula Jehova e mu kwafele a kale omudali muwa? Ombibeli oya ti: “Kalunga okwa uda ondaka yaManoah.” (Ovatokolipangeli 13:9) Ovadali, Jehova ota ka pwilikina yo komailikano eni note ke mu kwafela mu deule ovana veni. Ote ke mu kwafela mu va ulikile ohole, mu lininipike nomu kale mu na eudeko lomoule.

16 Ngaashi ashike Jehova te mu kwafele mu deule ovana veni fimbo vanini, osho ngoo te ke mu kwafela mu va deule eshi ve na omido omulongo nasha. Moshitukulwa tashi landula, ohatu ka kundafana nghee oshihopaenenwa shaJesus shohole, shelininipiko nosheudeko lomoule tashi dulu oku ku kwafela u deule omona woye womido omulongo nasha a longele Jehova.

^ okat. 5 Ombibeli otai hongo kutya outekuduliko owa kwatela mo ewiliko, edeulo, epukululo, nefimbo limwe nokuli ehandukilo. Ovadali ova pumbwa okukala ve na olukeno eshi tava yandje outekuduliko, ndele kave na oku shi ninga ngeenge va handuka.

^ okat. 7 Pefimbo laJesus, ounona ova li hava ifana ooxe Abba. Outumbulilo oo ou li pahole notau fimaneke. — The International Standard Bible Encyclopedia.