Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) OKTOBA 2015

“Tu wedela eitavelo”

“Tu wedela eitavelo”

“Kwafa okuhaitavela kwange.” — MARKUS 9:24.

OMAIMBILO: 81, 135

1. Ongahelipi eitavelo la fimana? (Tala efano pehovelo loshitukulwa.)

OWE lipulile ngoo nale kutya, ‘Mbela Jehova okwa hala ngoo oku ka xupifa nge poudjuu munene?’ Omuyapostoli Paulus okwa ti kutya eitavelo olo oukwatya umwe wa fimanenena oo twa pumbwa opo tu ka xupe. Okwa ti: “Kape na ou ta dulu okuwapalela Kalunga, ngenge kape neitavelo.” (Ovaheberi 11:6) Eendjovo odo otadi monika da fa danafangwa, ashike oushili oyou kutya “eitavelo kali fi lomunhu keshe.” (2 Ovatessaloniki 3:2) Omishangwa odo mbali otadi tu kwafele tu ude ko nghee sha fimana okupameka eitavelo letu.

2, 3. (a) Ongahelipi eitavelo letu la fimana? (b) Oshike hatu ka kundafaneni paife?

2 Omuyapostoli Petrus okwa popya kombinga ‘yokuyelekwa’ kweitavelo. (Lesha 1 Petrus 1:7.) Oudjuu munene ou li popepi elela, notwa hala okukala ‘neitavelo eemwenyo detu di xupifwe.’ (Ovaheberi 10:39) Onghee hano, otwa hala okulonga noudiinini opo tu pameke eitavelo letu. Otwa hala oku ka kala mokati kaavo tava ka pewa ondjabi eshi Ohamba yetu, Jesus Kristus, tai ka pangela ombada yedu. Ngaashi omulumenhu oo a pula Jesus e mu wedele eitavelo, nafye ohatu dulu okutya: “Kwafa okuhaitavela kwange.” (Markus 9:24) Ile ngaashi ovayapostoli, ohatu dulu yo okutya: “Tu wedela eitavelo.” — Lukas 17:5.

 3 Moshitukulwa eshi, ohatu ka kundafana oitwa tai landula: Nghee hatu dulu okutunga eitavelo letu, nghee hatu dulu okuulika kutya otu na eitavelo la pama nomolwashike hatu dulu okukala noushili kutya Kalunga ote ke tu nyamukula ngeenge otwe mu pula e tu wedele eitavelo.

KALUNGA OHA KALA A HAFA NGEENGE HATU TUNGU EITAVELO LETU

4. Oihopaenenwa yoolyelye tai dulu oku tu linyengifa tu pameke eitavelo letu?

4 Molwaashi eitavelo ola fimanenena, Jehova okwe tu pa oihopaenenwa yopaMbibeli ihapu yaavo va li ve na eitavelo. Oihopaenenwa oyo oya “shangelwa elongo letu.” (Ovaroma 15:4) Oshihopaenenwa shaAbraham, Sara, Isak, Jakob, Moses, Rahab, Gideon, Barak, navakwao vahapu, otashi dulu oku tu linyengifa tu pameke eitavelo letu. (Ovaheberi 11:32-35) Kakele koihopaenenwa yopefimbo lonale, otu na yo oihopaenenwa ikumwifi yeitavelo lovamwatate novamwameme kunena. * (Tala eshangelo lopedu.)

Otu na oihopaenenwa ikumwifi yeitavelo lovamwatate novamwameme kunena

5. Ongahelipi Elia a li a ulika kutya oku na eitavelo la pama muJehova, noshike tu na okulipula?

5 Natu ka taleni koshihopaenenwa shopaMbibeli shomuprofeti Elia. Eshi to dilonga koshihopaenenwa shaye, didilika eenghalo dopatano omo a ulika elineekelo la kola muJehova. (1) Eshi Elia a lombwela ohamba Ahab kutya Jehova ota ka eta oshikukuta, okwa popya nomukumo a ti: “Oshili, ngaashi Omwene Kalunga kaIsrael e nomwenyo naame handi kala ofika koshipala shaye, momido edi itamu ka kala nande [omume] ile odula.” (1 Eehamba 17:1) (2) Elia okwa li a itavela kutya Jehova ote ke mu pa nosho yo vamwe osho va pumbwa pefimbo loshikukuta. (1 Eehamba 17:4, 5, 13, 14) (3) Elia okwa li yo e na oushili kutya Jehova ota ka nyumuna omonamati womufiyekadi. (1 Eehamba 17:21) (4) Ka li yo e na omalimbililo kutya Jehova okwa li ta ka tuma omundilo u lungwinife po omayambo aye komhunda yaKarmel. (1 Eehamba 18:24, 37) (5) Nokuli nofimbo odula ya li inai hovela okuloka, Elia okwa lombwela Ahab e na omukumo a ti: ‘Fikama, lya nokunwa, osheshi oshihomo shodula tashi udika.’ (1 Eehamba 18:41) Onghee hano, konima eshi twa konakona oimoniwa oyo, ohatu dulu okulipula kutya, ‘Ondi na ngoo eitavelo la pama la fa laElia?’

OSHIKE TU NA OKUNINGA OPO TU TUNGE EITAVELO LETU?

6. Otu na okupula Jehova e tu pe shike opo tu tunge eitavelo letu?

6 Molwaashi itatu dulu okutunga eitavelo letu kufye vene, otwa pumbwa okupula Jehova e tu pe omhepo yaye iyapuki. Omolwashike mbela? Omolwaashi eitavelo oli li oshitukulwa shoiimati yomhepo iyapuki. (Ovagalati 5:22) Oshi li pandunge okudulika komayele aJesus nokwiilikana tu pewe omhepo iyapuki. Jesus okwa udaneka kutya Jehova ota ka ‘yandja omhepo iyapuki kuava tave mu indile.’ — Lukas 11:13.

Oshi li pandunge okudulika komayele aJesus e na sha nokwiilikana tu pewe omhepo iyapuki

7. Hokolola nghee hatu dulu okukaleka eitavelo letu la pama.

 7 Ngeenge otwa pameke eitavelo letu muKalunga, otu na oku li kaleka po. Ohatu dulu okufaafanifa eitavelo nomundilo. Ngeenge otwa tema omundilo, otau dulu okukala wa tema nawa pehovelo. Ashike ngeenge itatu weda po oikuni, xuuninwa otau ka dima ndele tapa kala ashike omute. Mepingafano naasho, ngeenge otwa kala hatu weda po oikuni, otau kala wa tema. Osho osha faafana neitavelo letu. Ngeenge ohatu twikile okulesha nokukonakona Eendjovo daKalunga efiku keshe, ohole yetu yokuhola Ombibeli nosho yo Jehova otai ka xwama. Oshidjemo, ohatu ka kaleka po nokupameka eitavelo letu.

8. Oshike tashi ke ku kwafela u tunge nou kaleke po eitavelo loye?

8 Ino pumbwa ashike okukala wa wanenwa koinima oyo we lihonga ofimbo wa li ino ninginifwa. (Ovaheberi 6:1, 2) Pashihopaenenwa, okukonakona omaxunganeko Ombibeli oo a wanifwa nale otashi ke ku kwafela u tunge nou kaleke po eitavelo loye. Oto dulu yo okulongifa Eendjovo daKalunga u tale ngeenge eitavelo loye ola pama tuu. — Lesha Jakob 1:25; 2:24, 26.

9, 10. Eitavelo letu ohali pamekwa ngahelipi (a) kookaume vawa? (b) kokwoongala kweongalo? (c) kokuudifa?

9 Omuyapostoli Paulus okwa ti kutya Ovakriste otava dulu ‘okuhekelekafana’ meitavelo. (Ovaroma 1:12) Mbela osho osha hala kutya shike? Ngeenge ohatu kala efimbo novamwatate novamwameme, kungaho ohatu tungafana meitavelo. Osho oshoshili unene tuu ngeenge ohatu kala efimbo naavo ve na eitavelo la ‘yelekwa.’ (Jakob 1:3) Ookaume vai ohava nyono po eitavelo letu, ashike ookaume vawa ohave li tungu. (1 Ovakorinto 15:33) Nomolwaashi hatu ladipikwa tu kale hatu ongala pandjikilile. Pokwoongala opo hatu ‘twaafana omukumo.’ (Lesha Ovaheberi 10:24, 25.) Shikwao vali, omalombwelo oo hatu pewa pokwoongala ohaa pameke eitavelo letu. Ombibeli oya ti kutya “eitavelo ohali di mokuuda.” (Ovaroma 10:17) Onghee hano, lipula kutya, ‘Ohandi i ngoo kokwoongala kwopaKriste pandjikilile?’

10 Ohatu pameke yo eitavelo letu ngeenge hatu hongo nokuudifila vamwe onghundana iwa okudja mOmbibeli. Ngaashi Ovakriste votete, ohatu lihongo okulineekela muJehova noku mu popila nouladi monghalo keshe. — Oilonga 4:17-20; 13:46.

11. Omolwashike Kaleb naJosua va li ve na eitavelo la pama, nongahelipi hatu dulu oku va hopaenena?

11 Eitavelo letu muJehova ohali kulu ngeenge twa mona nghee te tu kwafele nonghee ta nyamukula omailikano etu. Osho osho sha ningilwa Kaleb naJosua. Ova ulika eitavelo muJehova eshi va lava Edu lEudaneko. Mokweendela ko kwefimbo, eitavelo lavo ola ka pama efimbo keshe eshi ve wete nghee Jehova te va kwafele. Josua okwa li a lombwela Ovaisrael ta ulike kutya okwa tomhwa, a ti: “Kape na nande ondjovo imwe yomeendjovo adishe diwa Omwene Kalunga keni e mu tonga ya kala inai wanifwa.” Lwanima okwa ti  vali: “Tileni hano paife Omwene noku mu longela mouyuki nomoshili.” Opo nee okwa weda ko ta ti: “Ame neumbo lange hatu ka longela Omwene.” (Josua 23:14; 24:14, 15) Ngenge otwe lineekele muJehova nokumona nghee he tu kwafele pauhandimwe, eitavelo letu otali ka pama. — Epsalme 34:9.

NGHEE HATU DULU OKUULIKA EITAVELO LETU

12. Ohatu ulike ngahelipi kutya otu na eitavelo la pama?

12 Ongahelipi hatu dulu okuulika kutya otu na eitavelo la pama? Omuhongwa Jakob okwa ti: ‘Ame ohandi ku ulikile eitavelo lange noilonga yange.’ (Jakob 2:18) Eenghatu detu odo hadi ulike kutya otu na eitavelo la kola ile hasho. Natu ka taleni kutya omonghedi ilipi.

Ovo hava ningi keshe osho tava dulu moukalele ohava ulike kutya ove na eitavelo la pama (Tala okatendo 13)

13. Ohatu ulike ngahelipi eitavelo letu ngeenge hatu udifa?

13 Okuudifa oku li onghedi ya denga mbada yokuulika eitavelo letu. Omolwashike mbela? Omolwaashi ngeenge hatu udifa, ohatu ulike kutya otwa itavela kutya exulilo oli li popepi ‘noitali ka tokelwa.’ (Habakuk 2:3, NW) Opo tu shiive kutya eitavelo letu ola pama, ohatu dulu okulipula kutya: ‘Oilonga yokuudifa oya fimana kwaame shi fike peni? Mbela ohandi ningi ngoo ngaashi handi dulu opo ndi lombwele vamwe kombinga yaKalunga? Ohandi kongo ngoo eemhito ndi longe shihapu moilonga yaJehova?’ (2 Ovakorinto 13:5) Natu ulike kutya eitavelo letu ola pama ‘mokuhepaulula nokanya exupifo,’ sha hala kutya, okuudifa onghundana iwa. — Lesha Ovaroma 10:10.

14, 15. (a) Ongahelipi hatu dulu okuulika eitavelo letu mokukalamwenyo kwetu kwakeshe efiku? (b) Hokolola oshimoniwa osho tashi ulike okukala neitavelo la pama.

14 Ohatu ulike yo eitavelo letu muJehova ngeenge hatu lididimikile omashongo onghalamwenyo mounyuni ou. Ngeenge  hatu vele, twa teka omukumo, twa polimana, tu li moluhepo ile tu na omaupyakadi amwe vali, otu na okukala tu na eitavelo kutya Jehova naJesus otave ke “tu kwafa pefimbo liwa.” (Ovaheberi 4:16) Ohatu ulike eitavelo muJehova ngeenge hatu mu pula e tu kwafele. Jesus okwa ti kutya ohatu dulu okupula Jehova e tu pe “omungome wetu womafiku aeshe.” (Lukas 11:3) Omahokololo oo e li mOmbibeli otaa ulike kutya Jehova ota dulu oku tu pa keshe osho twa pumbwa. Pashihopaenenwa, pefimbo londjala inene muIsrael, Jehova okwa li a pa Elia oikulya nomeva. Ombibeli oya ti kutya ‘omakola e mu etela ongula keshe omungome nombelela nokwa nwa mokamulonga.’ (1 Eehamba 17:3-6) Otu na eitavelo kutya Jehova ote ke tu pa yo osho twa pumbwa.

Ohatu ulike kutya otu na eitavelo ngeenge hatu lididimikile omashongo onghalamwenyo mounyuni ou (Tala okatendo 14)

15 Otu na elineekelo kutya ngeenge ohatu tula moilonga omafinamhango Ombibeli, ohatu ka dula okuwanifa po eemhumbwe domaukwaneumbo etu. Omumwameme umwe oo a hombolwa wedina Rebecca wokoAsia okwa hokolola nghee ye noukwaneumbo wavo va tula moilonga efinamhango olo li li muMateus 6:33 nosho yo mOmayeletumbulo 10:4. Okwa ti omushamane waye okwa li e udite kutya oilonga yaye otai tula moshiponga ekwatafano laye naJehova. Onghee hano, omushamane okwa li a efa po oilonga. Ndele molwaashi ova li ve na ounona vane ovo va li ve na okufila oshisho,  ova li va hovela ongeshefa yokulandifa oikulya. Omolwoilonga yavo youdiinini, ova li hava mono alushe oshimaliwa sha wana shokufila oshisho eemhumbwe doukwaneumbo wavo. Okwa ti: “Otwa li tu udite kutya Jehova ke na efiku e tu efe. Katu na fiku twa kalele inatu lya.” Mbela naave ou na oshimoniwa sha yukila oko osho sha tunga eitavelo loye?

Otu na elineekelo kutya ngeenge ohatu tula moilonga omafinamhango Ombibeli, ohatu ka dula okuwanifa po eemhumbwe domaukwaneumbo etu

16. Oshike tashi ka ningwa po ngeenge otwe lineekela muKalunga?

16 Natu kale tu na oushili kutya ngeenge otwa landula ewiliko laJehova, ote ke tu kwafela. Paulus okwa tofa meendjovo daHabakuk eshi a ti: “Omuyuki ota kala e nomwenyo keitavelo.” (Ovagalati 3:11; Habakuk 2:4) Nomolwaasho twa pumbwa okukala tu na eitavelo la pama Mwaao te tu kwafele shili. Paulus okwe tu dimbulukifa kutya Kalunga “oye tuu ou ta dulu okulonga shihapuhapu kombada yaai hatu i indile nohatu i diladila paenghono odo tadi longo mufye.” (Ovaefeso 3:20) Ovapiya vaJehova ohava ningi ashishe osho tava dulu opo va wanife po ehalo laye, ashike ove shii yo kutya ove na omangabeko. Otwa pandula neenghono eshi Kalunga e li pamwe nafye nota nangeke noupuna eenghendabala detu adishe.

OMAINDILO E NA SHA NEITAVELO A NYAMUKULWA

17. (a) Jesus okwa li a nyamukula ngahelipi ovayapostoli? (b) Omolwashike hatu dulu okukala nelineekelo kutya Jehova ota nyamukula omaindilo etu e na sha nokuwedelwa eitavelo?

17 Mokutala kwaasho twa konakona, ohatu dulu okukala tu udite ngaashi ovayapostoli va li ve udite eshi va pula Jesus tava ti: “Tu wedela eitavelo.” (Lukas 17:5) Jesus okwa li a nyamukula ovayapostoli vaye monghedi ye likalekelwa pOpentekoste yomo 33, eshi va pewa omhepo iyapuki nova li va dula okuuda ko moule elalakano laKalunga. Osho osha pameka eitavelo lavo. Oshidjemo osha li shike? Ova li va hovela oshikonga shinenenene shokuudifa pefimbo opo. (Ovakolossi 1:23) Mbela ohatu dulu ngoo okuteelela omaindilo etu e na sha nokuwedelwa kweitavelo a nyamukulwe? Jehova okwe tu udanekela kutya ohatu dulu ‘ngeenge ohatu mu indile pahalo laye.’ — 1 Johannes 5:14.

18. Ongahelipi Jehova ha nangeke noupuna ovo hava tungu eitavelo lavo?

18 Ngeenge otwe lineekela filufilu muJehova, ota ka kala e tu hokwa. Ota ka nyamukula omaindilo etu e na sha nokuwedelwa kweitavelo, neitavelo letu otali ka kala la pama nohatu ka kala twa “wapalela ouhamba waKalunga.” — 2 Ovatessaloniki 1:3, 5.

^ okat. 4 Opo u mone oihopaenenwa imwe, tala ehokololo longhalamwenyo yaLillian Gobitas Klose (o-Awake! yo 22 Juli 1993), yaFeliks Borys (o-Awake! yo 22 Februali 1994), noyaJosephine Elias (o-Awake! yaSeptemba 2009).