Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) SEPTEMBA 2015

Oto lalakanene ngoo oukulunhu opo u fike mewano laKristus?

Oto lalakanene ngoo oukulunhu opo u fike mewano laKristus?

‘Ninga omukulunhu a kula, u fike mewano louyadi waKristus.’ — OVAEFESO 4:13.

OMAIMBILO: 69, 70

1, 2. Omukriste keshe oku na okulalakanena shike? Yandja oshihopaenenwa.

NGEENGE omukulukadi ta ka landa oiimati kofitola, oshike ta ka tala kusho opo a lande oiimati iwa? Nopehe nomalimbililo ita ka tala kounene ile kombilixa. Ponhele yaasho, ota ka tala kwaayo i na edimba liwa, i li monghalo iwa notai dulu okuliwa. Ota ka hoolola oiimati oyo ya pya nawa noya kola.

Omukriste a pyokoka oha ningi alushe omapekapeko a konge omafinamhango Ombibeli oo tae mu kwafele a shiive osho shi li mondjila naasho sha puka

2 Konima shimha omunhu e lihongo kombinga yaJehova nokuninga etokolo a ninginifwe, ekwatafano laye naJehova ohali twikile okupama. Oha lalakanene okukala e li Omukriste omukulunhu. Oukulunhu wa tya ngaho itau ulike keedula domunhu. Otau ulike koukulunhu wopamhepo, okukala nekwatafano lopofingo naJehova. Omuyapostoli Paulus okwa li a hala Ovakriste vomuEfeso va kule pamhepo. Okwa li e va ladipika va kale va hangana meitavelo nokukala tave lihongo kombinga yaJesus opo va ‘ninge ovakulunhu, va kule va fike mewano louyadi waKristus.’ — Ovaefeso 4:13.

3. Ongahelipi eongalo lokuEfeso tali yelekwa noshiwana shaJehova shokunena?

 3 Eshi Paulus a shangela eongalo lOvaefeso, ola hangwa la kala po nale oule womido. Vahapu vomeongalo olo ova hangwa nale ve li Ovakriste va pyokoka. Ashike natango opa li vamwe ovo va li va pumbwa okupameka ekwatafano lavo naJehova. Sha faafana nokunena, ovamwatate novamwameme vahapu ova kala tava longele Jehova efimbo lile nova ninga Ovakriste va pyokoka. Ashike vamwe inava fika natango poshitwa osho. Pashihopaenenwa, ovanhu omayovi ohava ninginifwa omudo keshe, nomolwaasho vamwe ove na natango okukula pamhepo. Ongahelipi shi na sha naave? — Ovakolossi 2:6, 7.

ONGAHELIPI OMUKRISTE TA DULU OKUKULA PAMHEPO?

4, 5. Ovakriste va pyokoka ova yoolokafana ngahelipi, ndele oshike osho aveshe ve na sha faafana? (Tala efano pehovelo loshitukulwa.)

4 Ngeenge to tale oiimati mofitola oyo ya pya, oho mono kutya inai faafana naanaa. Ashike ohai kala i na oukwatya wonhumba wa yukila kumwe oo tau ulike kutya oya pya. Osho osha faafana nOvakriste ovo va pyokoka pamhepo. Ihava kala va faafana filufilu. Ova dja moilongo nomomaputuko a yoolokafana. Ove na omido da yoolokafana nove hole oinima ya yoolokafana. Ashike Ovakriste aveshe va pyokoka ove na omaukwatya onhumba a faafana oo haa ulike kutya ova pyokoka. Amwe omomaukwatya oo oelipi?

‘Mbela onda pumbwa okuninga omalunduluko onhumba opo ndi hopaenene Jesus filufilu?’

5 Omukriste a pyokoka oha hopaenene Jesus noha shikula “oshikoti shaye.” (1 Petrus 2:21) Jesus okwa ti kutya osha fimanenena opo omunhu a kale e hole Jehova nomutima waye aushe nomwenyo waye aushe neendunge daye adishe noku kale yo e hole mukwao ngaashi e lihole mwene. (Mateus 22:37-39) Omukriste a pyokoka oha kendabala okudulika komayele oo. Onghedi yaye yokukalamwenyo ohai ulike kutya ekwatafano laye naJehova nosho yo navamwe ola fimanenena kuye.

Ovakriste ovanamido otava dulu okuhopaenena elininipiko laJesus mokuyambidida ovamwatate ovanyasha ovo tava kwatele komesho paife (Tala okatendo 6)

6, 7. (a) Omaukwatya amwe vali elipi oo Ovakriste va pyokoka ve na? (b) Oshike tu na okulipula?

6 Ohole oyo imwe yomomaukwatya mahapu oo Omukriste a pyokoka ha ulike. (Ovagalati 5:22, yelekanifa no-NW.) Oha ulike yo omaukwatya ngaashi engungumano, elipangelo nelididimiko. Omaukwatya a tya ngaho otaa dulu oku mu kwafela e lididimikile eenghalo didjuu nopehe na okukenyanana nokukala ta ungaunga nomaliudo mai nopehe na okukanifa eteelelo. Ngeenge Omukriste  a pyokoka ta konakona paumwene, oha ningi omapekapeko a konge omafinamhango Ombibeli oo tae mu kwafele a shiive osho shi li mondjila naasho sha puka. Opo nee eshi ta ka longifa eliudo laye la deulwa kOmbibeli, ota ka dula okuninga omatokolo e li pandunge. Molwaashi Omukriste a pyokoka omulininipiki, okwa itavela kutya ewiliko nomifikamhango daJehova oda denga mbada di dule daye. * (Tala eshangelo lopedu.) Oha udifa onghundana iwa nouladi noha ningi keshe osho ta dulu opo a kwafele eongalo li kale la hangana.

7 Kashi na nee mbudi kutya otwa kala hatu longele Jehova efimbo li fike peni, keshe umwe ota dulu okulipula kutya: ‘Mbela ohandi dulu okuninga po omalunduluko onhumba opo ndi hopaenene Jesus filufilu? Mbela ope na eenghedi donhumba omo ndi na okuxwepopala?’

‘EENDJA DA PAMA ODAAVA VA KULA’

8. Jesus okwa li e shii noku udite ko Omishangwa shi fike peni?

8 Jesus Kristus okwa li e shii nokwa li e udite ko nawa Omishangwa. Nokuli naashi a li e na omido 12, okwa li a longifa Omishangwa eshi a li ta kundafana novahongi motembeli. Ombibeli oya ti: “Aveshe ovo ve ka  uda ova kuminwa eendunge dako nomanyamukulo ako.” (Lukas 2:46, 47) Lwanima eshi a li ta udifa, okwa li a longifa Eendjovo daKalunga noukeka a mweneke ovatondi vaye. — Mateus 22:41-46.

9. (a) Omukriste a pyokoka ohe litulile po elandulafano lokukonakona lilipi? (b) Omolwashike hatu konakona Ombibeli?

9 Omunhu oo a hala okukala Omukriste a pyokoka pamhepo oha hopaenene Jesus noha kala a halelela okuuda ko Ombibeli ngaashi ta dulu. Oha konakona Omishangwa pandjikilile opo a ude ko oshili moule, molwaashi oku shii kutya ‘eendja da pama odaava va kula.’ (Ovaheberi 5:14) Omukriste a pyokoka okwa hala a kale e na ‘eshiivo’ lashili lOmbibeli. (Ovaefeso 4:13) Onghee hano, lipula kutya: ‘Ohandi lesha ngoo Ombibeli efiku keshe? Onde litulila po ngoo elandulafano lokukonakona paumwene? Ohandi ningi ngoo elongelokalunga loukwaneumbo oshivike keshe?’ Ngeenge to konakona Ombibeli, konga omafinamhango oo tae ku kwafele u shiive nghee Jehova ha diladila noku udite. Opo nee longifa omafinamhango oo ngeenge to ningi omatokolo. Osho otashi ke ku kwafela u ehene popepi elela naJehova.

10. Omukriste a pyokoka oha kala e uditile ngahelipi omayele nomifikamhango daKalunga?

10 Omukriste a pyokoka oku na okuninga shihapu shihe fi ashike okushiiva osho Ombibeli tai ti. Oku na okukala e hole omayele nomafinamhango aKalunga. Nohole oyo ohe i ulike mokukala a halelela okulonga ehalo laJehova ponhele yehalo laye mwene. Oha lundulula nokuli onghedi yaye yokukalamwenyo, yokudiladila nosho yo eenghatu daye. Pashihopaenenwa, oha hopaenene Jesus noha djala ounhu mupe oo a ‘shitwa a fa Kalunga mouyuki nomouyapuki woshili.’ (Lesha Ovaefeso 4:22-24.) Osha fimana okudimbuluka kutya Kalunga okwa li a longifa omhepo yaye iyapuki a wilike ovashangi vOmbibeli. Onghee hano, ngeenge Omukriste ta konakona Ombibeli, omhepo iyapuki ohai mu kwafele a mone eshiivo lihapu, a kale omunahole noku kale e na ekwatafano la kola naJehova.

XUMIFA KOMESHO OUKUMWE

11. Jesus okwa li meenghalo dilipi eshi a li kombada yedu?

11 Jesus okwa li omunhu a wanenena. Ashike eshi a li kombada yedu okwa li mokati kovanhu inava wanenena. Ovadali vaye novamwaina aveshe kava li va wanenena. Nokuli novashikuli vaJesus ovo a li ha kala navo ova li hava ulike omaukwatya ngaashi ounhwa nokuliholamwene. Pashihopaenenwa, moufiku oo wa tetekela efyo laye, ovahongwa vaye ova li tava tu eemhata kutya “olyelye womokati kavo e nokutalwa omunene e dule vakwao.” (Lukas 22:24) Nonande ovahongwa vaJesus kava li va wanenena, okwa li e shii kutya ove li pokukula pamhepo nova tunge po eongalo li na oukumwe. Moufiku oo tuu oo, Jesus okwa li e va ilikanena opo va kale ve na oukumwe. Okwa li e va ilikanena kuXe womeulu opo va kale moukumwe, eshi a ti: ‘Ngaashi ove Tate, u li muame naame ondi li muove.’ Okwa weda ko vali a ti: ‘Opo va kale umwe ngaashi fye umwe.’ — Johannes 17:21, 22.

12, 13. (a) Oshike osho hatu lalakanene tu li Ovakriste? (b) Ongahelipi omumwatate umwe a li e lihonga okuxumifa komesho oukumwe?

12 Omukriste oo a pyokoka oha xumifa komesho oukumwe meongalo. (Lesha Ovaefeso 4:1-6, 15, 16.) Tu li Ovakriste, otwa lalakanena  ‘okutulwa kumwe,’ sha hala kutya, okulongela kumwe tu li moukumwe. Opo Omukriste a xumife komesho oukumwe wa tya ngaho, oku na okukala omulininipiki. Nomolwaasho, nokuli nongeenge a piyaanekwa kokuhawanenena kwavamwe, Omukriste a pyokoka oha longo noudiinini opo a xumife komesho oukumwe meongalo. Onghee hano, lipula kutya: ‘Ohandi linyenge ngahelipi ngeenge omumwatate ile omumwameme a ninga epuko? Ohandi kala ndi udite ngahelipi ngeenge umwe a udifa nge nai? Mbela ohandi kala inandi hala vali okupopya nomunhu a tya ngaho? Ile ohandi kendabala opo ndi tungulule ekwatafano letu naye?’ Omukriste a pyokoka oha kandula po omaupyakadi ponhele yokukala oye ta etele vamwe omaupyakadi.

13 Natu ka taleni koshihopaenenwa shaUwe. Nale Uwe okwa li ha efa okuhawanenena kwovamwatate novamwameme ku mu handukife. Opo nee okwa li a tokola a longife Ombibeli nosho yo embo Insight on the Scriptures a konakone onghalamwenyo yaDavid. Omolwashike a li a hala okukonakona onghalamwenyo yaDavid? Omolwaashi David naye okwa li a shakeneka omaupyakadi pokati kaye novapiya vaKalunga vamwe. Pashihopaenenwa, ohamba Saul oya li tai kendabala okudipaa David, ovanhu vamwe ova li va hala oku mu denga nomamanya, nomukulukadi waye okwa li e mu sheka noku mu yola. (1 Samuel 19:9-11; 30:1-6; 2 Samuel 6:14-22) Ndele kashi na nee mbudi kutya vamwe ova li ve mu ningila shike, David okwa li e hole Jehova nokwa li e mu lineekela. David okwa li yo e na onghenda. Uwe okwa li a dimina kutya naye okwa pumbwa oukwatya wa faafana. Eshi a konakona Ombibeli okwe lihonga kutya okwa pumbwa okulundulula etaleko laye li na sha nokuhawanenena kwovamwaxe. Okwa li e na okweefa po okudimbuluka omapuko avo nokuxumifa komesho oukumwe meongalo. Mbela naave osho to lalakanene okuninga?

HOOLOLA OOKAUME MOKATI KAAVO TAVA LONGO EHALO LAKALUNGA

14. Jesus okwa li a hoolola ngahelipi ookaume kaye?

14 Jesus Kristus okwa li ha pange oukaume novanhu. Ovalumenhu novakainhu, ovanyasha novakulunhu, nokuli nounona ova li hava kala ve udite ouumbo okukala naJesus. Ashike okwa li ha hoolola ookaume kopofingo pandunge. Okwa li a lombwela ovayapostoli vaye a ti: “Onye ookaume kange, [ngeenge] tamu ningi eshi handi shi mu lombwele.” (Johannes 15:14) Jesus okwa li a hoolola ookaume kopofingo mokati kovashikuli vaye ovadiinini ovo va li ve hole nohava longele Jehova. Oho hoolola ngoo ookaume ovo ve hole Jehova nomutima wavo aushe? Omolwashike osho sha fimana?

Oho hoolola ngoo ookaume ovo ve hole Jehova nomutima wavo aushe

15. Ongahelipi ovanyasha tava dulu okumona ouwa mokupanga oukaume nOvakriste va pyokoka?

15 Oiimati ihapu ohai pi ngeenge tai dengwa keenhe detango. Sha faafana, ohole ya xwama yokuhola ovamwatate novamwameme otai dulu oku ku kwafela u ninge Omukriste a pyokoka. Mbela ou li omunyasha to kendabala okuninga etokolo langhee to ka longifa onghalamwenyo yoye? Ngeenge  osho, oshi li pandunge okuhoolola ookaume ovo va kala tava longele Jehova oule wefimbo lile nohava xumifa komesho oukumwe meongalo. Otashi dulika navo va li ve na omaupyakadi monghalamwenyo yavo nove lididimikila omashongo eshi tava longele Jehova. Otava dulu oku ku kwafela u hoolole onghedi yokukalamwenyo oyo ya denga mbada. Ngeenge owa kala ho kala navo efimbo, otave ke ku kwafela u ninge omatokolo e li pandunge nou ninge Omukriste a pyokoka. — Lesha Ovaheberi 5:14.

16. Ongahelipi ovo va pyokoka meongalo va li va kwafela omumwameme umwe eshi a li omunyasha?

16 Helga ota dimbuluka kutya momudo waye waxuuninwa mofikola, vahapu vomongudu yavo ova li hava kala tava popi kombinga yomalalakano avo omonakwiiwa. Vahapu vomuvo ova li va hala okuya kounivesiti opo va kale ve na eifano tali pondola. Ashike Helga okwa li a popya nookaume kaye vomeongalo ovo va pyokoka. Okwa ti: “Vahapu vomuvo ova li va kula kwaame nova li va kwafela nge neenghono. Ova li va ladipika nge ndi ye moilonga yefimbo li yadi. Lwanima onda ka kala omukokolindjila oule womido nhano. Paife opa pita omido dihapu ndele onda hafa eshi handi longifa ounyasha wange moilonga yaJehova. Kandi na etomheno lokulipa oushima eshi nda ninga ngaho.”

17, 18. Ongahelipi hatu dulu okulongela Jehova monghedi ya denga mbada?

17 Ngeenge hatu hopaenene Jesus, ohatu ka kula nokukala Ovakriste va pyokoka. Ohatu ka ehena popepi naJehova, nehalo letu loku mu longela tali ka hapupala. Omunhu oha longele Jehova monghedi ya denga mbada ngeenge okwa kula pamhepo. Jesus okwa li a ladipika ovashikuli vaye ta ti: ‘Ouyelele weni nau minikile moipafi yovanhu, va mone oilonga yeni iwa nova hambelele Xo yeni meulu.’ — Mateus 5:16.

18 Otwe lihonga nghee Omukriste a pyokoka ta dulu okuyambidida eongalo. Onghedi omo Omukriste ha longifa eliudo laye oha i ulike yo kutya okwa pyokoka. Ongahelipi eliudo letu tali tu kwafele tu ninge omatokolo e li pandunge? Nongahelipi hatu dulu okuulika kutya otwa fimaneka eliudo lavamwe? Ohatu ka nyamukula omapulo oo moshitukulwa tashi landula.

^ okat. 6 Pashihopaenenwa, omumwatate omunamido nokwa pyokoka otashi dulika a pulwe a yandje po oshinakuwanifwa shaye noku kwafele ovamwatate ovanyasha ovo ve shi pewa.