Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) AUGUSTE 2015

Lilongekidila paife oku ka kala mounyuni mupe

Lilongekidila paife oku ka kala mounyuni mupe

‘Vo nava longe ouwa, opo va mone omwenyo waalushe.’ — 1 TIMOTEUS 6:18, 19.

OMAIMBILO: 125, 40

1, 2. (a) Owa teelela nodjuulufi oku ka ninga shike mOparadisa? (Tala efano pehovelo loshitukulwa.) (b) Oshike tashi ke tu etela ehafo linene mounyuni mupe?

OTWA teelela nodjuulufi oku ka kala “nomwenyo waalushe,” oo wa popiwa komuyapostoli Paulus. (Lesha 1 Timoteus 6:12, 19.) Kuvahapu, osho osha hala kutya otava ka kala nomwenyo fiyo alushe mOparadisa kombada yedu. DiIadila kutya otashi ka kala ngahelipi okupenduka ongula keshe u na oukolele, wa hafa nowa wanenwa. (Jesaja 35:5, 6) Diladila yo kunghee tashi ka kala shiwa oku ka kala pamwe novapambele voye nosho yo ookaume, mwa kwatelwa ovo tava ka nyumunwa. (Johannes 5:28, 29; Oilonga 24:15) Oto ka kala u na efimbo lokulihonga oinima ipe noto ka xwepopala mokuninga oinima oyo u hole. Pashihopaenenwa, otashi dulika to ke lihonga shihapu kombinga younongononi. Ile tashi dulika u ke lihonge okudana oishikomwa yomusika ile nghee to dulu okunduluka eumbo loye mwene.

2 Nonande otwa teelela nodjuulufi oinima aishe oyo iwa, okulongela Jehova oko taku ke tu etela ehafo linene. Diladila kunghee onghalamwenyo tai ka kala eshi ovanhu aveshe tava ka kala va  fimaneka edina laJehova liyapuki nove mu tambula ko e li Omupangeli wavo. (Mateus 6:9, 10) Ohatu ka kala twa hafa eshi edu tali ka kala li yadi ovanhu va wanenena, ngaashi ashike Kalunga a li a lalakanena. Diladila vali kunghee tashi ka kala shipu okupameka oukaume wetu naJehova eshi mokweendela ko kwefimbo hatu ka kala twa wanenena. — Epsalme 73:28; Jakob 4:8.

3. Otu na okulilongekidila shike paife?

3 Otwe lineekela kutya Jehova ota ka wanifa po oinima aishe oyo iwa, molwaashi “iha nyengwa kusha.” (Mateus 19:25, 26) Ngeenge otwa hala oku ka kala nomwenyo fiyo alushe mounyuni mupe, otu na okuulika paife kutya ohatu lilongekidile oku ka ‘mona’ omwenyo waalushe. Otu shii kutya exulilo oli li poduka, onghee hano, natu kaleni nonghedi yokukalamwenyo oyo tai ulike kutya otwa teelela exulilo li uye efimbo keshe. Otu na okuninga keshe osho hatu dulu paife tu lilongekidile oku ka kala mounyuni mupe. Natu ka taleni nghee hatu dulu okulilongekida.

NGHEE TU NA OKULILONGEKIDA

4. Ongahelipi hatu dulu okulilongekidila paife oku ka kala mounyuni mupe? Yandja oshihopaenenwa.

4 Ongahelipi hatu dulu okulilongekidila paife oku ka kala mounyuni mupe? Natu tye nee ngeno ohatu ningi omalongekido okutembukila koshilongo shimwe. Otashi dulika tu na okuninga oinima yonhumba opo tu lilongekidile oku ka kala koshilongo sha tya ngaho. Pashihopaenenwa, otashi dulika tu hovele okulihonga elaka neputuko lovanhu ovo hava kala moshilongo osho. Otashi dulika yo tu lole oikulya yavo. Sha faafana, ohatu dulu okulilongekidila paife oku ka kala mounyuni mupe mokukala twa fa nale omo tu li. Natu ka konakoneni eenghedi dimwe omo hatu dulu oku shi ninga.

5, 6. Ongahelipi okulihonga okudulika kewiliko olo hali di kehangano laJehova taku tu kwafele tu lilongekidile oku ka kala mounyuni mupe?

5 Satana okwa hala ovanhu va diladile kutya otava dulu okuninga keshe osho va hala mounyuni ou. Vahapu ove udite kutya osha fimana okukala nomhepo yemanguluko noinava pumbwa okudulika kuKalunga. Osho osha etifa oidjemo ilipi? Osha etifa okumona oixuna kuhapu nokuhe na ehafo. (Jeremia 10:23) Ashike Jehova Omupangeli omunahole. Onghalamwenyo itai ka kala tuu iwa mounyuni mupe eshi keshe umwe ta ka dulika kuye!

6 Mounyuni mupe, ohatu ka shikula nehafo ewiliko okudja kehangano laJehova olo tali ke tu kwafela tu lundululile edu eli moparadisa iwa nokuhonga ovo tava ka nyumunwa. Jehova ota ka kala e tu nine oilonga ihapu. Ndele mbela ongahelipi ngeenge ovo tava kwatele komesho ove tu lombwele tu ninge oshinima shonhumba osho tuhe hole? Mbela ohatu ka dulika ngoo? Mbela ohatu ka ninga ngoo ngaashi hatu dulu opo tu wanife po nehafo oshilonga osho twa pewa? Opo tu lilongekidile oku ka kala nomwenyo waalushe mounyuni mupe, otwa pumbwa okukala hatu dulika paife kewiliko olo hali di kehangano laJehova.

7, 8. (a) Omolwashike tu na okulongela kumwe naavo tava kwatele komesho? (b) Omalunduluko elipi a ningwa po shi na sha nOvakriste vamwe? (c) Ohatu dulu okukala noushili ulipi shi na sha nounyuni mupe?

7 Opo tu lilongekidile oku ka kala mounyuni mupe, otwa pumbwa okulihonga okukala twa wanenwa nokukala hatu longele kumwe nehangano laJehova nosho yo navamwe. Pashihopaenenwa, ngeenge otwa pewa oshilonga shipe, natu shi tambule ko nehalo liwa nokuninga ngaashi hatu dulu opo tu kale twa hafa notwa wanenwa. Ngeenge otwe lihongo okukala hatu longele kumwe naavo tava kwatele komesho paife, ohatu ka ninga sha faafana mounyuni mupe. (Lesha Ovaheberi  13:17.) Eshi Ovaisrael va li va ya mEdu lEudaneko, ova li va pewa apa ve na okukala. (Numeri 26:52-56; Josua 14:1, 2) Katu shii kutya openi keshe umwe womufye tashi dulika a ka pewe a kale mounyuni mupe. Ndele ngeenge otwe lihongo okulongela kumwe, ohatu ka kala twa hafa okulonga ehalo laJehova keshe apa hatu ka kala.

8 Diladila koufembanghenda munene oo hatu ka kala tu na wokulongela Kalunga mounyuni mupe koshi yepangelo lOuhamba! Nomolwaasho, oshiwa okulongela kumwe nehangano laJehova paife nokuwanifa po oshilonga keshe osho twa pewa tu longe. Ashike omafimbo amwe otashi dulika tu pewe oilonga imwe i lili. Pashihopaenenwa, Ovabetel vamwe vokOilongo ya Hangana ova tuminwa momapya. Omolwomido ile eenghalo dimwe vali, vamwe ovo va li nale ovapashukili ovaendi paife ova ninga ovakokolindjila ve likalekelwa. Ovamwatate va tya ngaho otava hafele oilonga yavo ipe, na Jehova ote va nangeke noupuna. Ngeenge otwa ilikana kuJehova e tu kwafele, hatu ningi ngaashi hatu dulu opo tu mu longele nokulihonga okukala twa wanenwa koshilonga keshe osho twa pewa, ohatu ka kala twa hafa naJehova ote ke tu nangeka noupuna. (Lesha Omayeletumbulo 10:22.) Ongahelipi ngeenge mounyuni mupe otwa ka kala twa hala okukala ponhele yonhumba, ndele ehangano laJehova tali tu pula tu tembukile kuimwe i lili? Pefimbo opo, ohatu ka kala twa pandula eshi tu li mounyuni mupe, kashi na nee mbudi kutya otu li peni ile ohatu longo shike. — Nehemia 8:10.

9, 10. (a) Omolwashike tashi dulika twa pumbwa oku ka kala ovalididimiki mounyuni mupe? (b) Ongahelipi hatu dulu okuulika paife kutya otu li ovalididimiki?

9 Otashi dulika mounyuni mupe hatu ka kala twa pumbwa elididimiko omafimbo amwe. Pashihopaenenwa, otashi dulika tu ude kutya vamwe ova hafa neenghono molwaashi ovapambele nookaume kavo ova nyumunwa. Ashike fye otashi dulika tu na okuteelela efimbo lonhumba opo ovaholike vetu va nyumunwe. Ngeenge osho osha ningwa, mbela ohatu ka hafa ngoo pamwe naavo va hafa nokuteelela nelididimiko? (Ovaroma 12:15) Ngeenge otwe lihongo okuteelela nelididimiko Jehova a wanife po omaudaneko aye paife, otashi ke tu kwafela tu ka kale nelididimiko nomounyuni mupe. Omuudifi 7:8.

10 Ohatu lilongekidile yo ounyuni mupe mokukala nelididimiko ngeenge pa ningwa omalunduluko e na sha neudeko letu loshili yOmbibeli. Mbela ohatu konakona ngoo ouyelele oo mupe nokulididimika ngeenge katu u udite ko nawa? Ngeenge osho, otashi ka kala shipu kufye mounyuni mupe okukala ovalididimiki efimbo keshe Jehova te tu pe omalombwelo mape. — Omayeletumbulo 4:18; Johannes 16:12.

11. Omolwashike tu na okulihonga okudimina po vamwe paife, nongahelipi osho tashi ke tu kwafela mounyuni mupe?

11 Onghedi imwe vali omo hatu dulu okulilongekidila oku ka kala mounyuni mupe oyo okulihonga okudimina po vamwe. Pefimbo lEpangelo laKristus lOmido Eyovi, otashi ka kufa efimbo opo keshe umwe a ka kale a wanenena. (Oilonga 24:15) Mbela ohatu ka ulika  ngoo ohole nokudimina po vamwe? Ngeenge otwe lihongo okukala hatu dimine po vamwe paife nokukala tu na ekwatafano liwa navo, otashi ka kala shipu kufye okuninga ngaho mounyuni mupe. — Lesha Ovakolossi 3:12-14.

Mounyuni mupe ohatu ka pumbwa okukala nomaukwatya a faafana naao Jehova te tu hongo tu ulike paife

12. Omolwashike tu na okulilongekidila paife oku ka kala mounyuni mupe?

12 Otashi dulika mounyuni mupe haalushe hatu ka kala tu na osho twa hala ile tashi dulika tu na okuteelela efimbo lonhumba opo tu shi pewe. Ohatu ka pumbwa okukala nolupandu notwa wanenwa monghalo keshe omo tu li. Kakele kaasho, ohatu ka pumbwa okukala nomaukwatya a faafana naao Jehova te tu hongo tu ulike paife. Onghee hano, mokulihonga okuulika omaukwatya oo paife, ohatu ulike kutya otwa halelela oku ka kala mounyuni mupe nonokutya ohatu lilongekidile omwenyo waalushe. (Ovaheberi 2:5; 11:1) Natango, ohatu ka ulika kutya otwa halelela oku ka kala mounyuni omo keshe umwe ta ka dulika kuJehova.

YANDJA ELITULEMO KOKULONGELA JEHOVA

Udifa onghundana iwa nouladi

13. Oshike hatu ka pitifa komesho mokukalamwenyo kwetu mounyuni mupe?

13 Mounyuni mupe ohatu ka kala tu na keshe osho twa pumbwa opo tu hafele onghalamwenyo. Ndele ehafo letu linenenene otali ka dja mokukala tu na ekwatafano lopofingo naJehova. (Mateus 5:3) Ohatu ka kala twe lipyakidila moilonga yaJehova nohatu ka hafela oku mu longela. (Epsalme 37:4) Onghee hano, natu kaleni twa pitifa komesho Jehova paife mokukalamwenyo kwetu, nokungaho ohatu lilongekidile oku ka kala mounyuni mupe. — Lesha Mateus 6:19-21.

14. Omalalakano elipi ovanyasha tava dulu okulitulila po moilonga yaJehova?

14 Ongahelipi hatu dulu okuhafela okulongela Jehova shi dulife nale? Onghedi imwe omo hatu dulu oku shi ninga omokulitulila po omalalakano. Ngeenge ou li omunyasha, diladila wa mana mo kombinga yanghee to dulu okulongifa onghalamwenyo yoye mokulongela Jehova. Omolwashike ito ningi omapekapeko  moishangomwa yetu e na sha nomaludi e lili noku lili oilonga yefimbo li yadi? Oto dulu okulalakanena imwe yomuyo. * (Tala eshangelo lopedu.) Popya navamwe ovo va kala tava longele Jehova efimbo li yadi oule womido dihapu. Oto ka mona edeulo la denga mbada ngeenge owa longifa onghalamwenyo yoye mokulongela Jehova. Osho otashi ke ku kwafela u ka longele Jehova mounyuni mupe.

Litulila po omalalakano moilonga yaJehova

15. Omalalakano vali elipi hatu dulu okulitulila po moilonga yaJehova?

15 Ope na omalalakano mahapu oo hatu dulu okulitulila po moilonga yaJehova. Pashihopaenenwa, ohatu dulu oku shi ninga elalakano okulihonga eenghedi dipe dokuudifa moilonga yomomapya. Ile tu kendabale okuxwepopaleka eudeko letu lomafinamhango Ombibeli nokulihonga nghee hatu dulu oku a tula moilonga mokukalamwenyo kwetu. Ohatu dulu yo okuxwepopaleka onghedi yetu yokulesha moipafi ile onghedi omo hatu yandje oipopiwa nosho yo omatyekosha etu pokwoongala. Oshitwa osheshi kutya: Ngeenge owe litulile po omalalakano moilonga yaJehova, otashi ke ku kwafela u kale u na ouladi nou lilongekidile oku ka kala mounyuni mupe.

ONGHEDI YA DENGA MBADA YOKUKALAMWENYO PAIFE

Kala u na olupandu loinima aishe oyo Jehova e ku pa

16. Omolwashike okulongela Jehova ku li onghedi ya denga mbada yokukalamwenyo?

16 Eshi hatu longifa efimbo letu mokulilongekidila ounyuni mupe waKalunga, mbela osha hala kutya itatu hafele onghedi yokukalamwenyo ya denga mbada kunena? Hasho nandenande! Okulongela Jehova oko onghedi ya denga mbada yokukalamwenyo. Ihatu mu longele molwaashi twa fininikwa kuumwe ile molwaashi ashike twa hala oku ka xupa poudjuu munene. Ngeenge otwa kala tu na ekwatafano liwa naJehova, ohatu kala nonghalamwenyo iwa notwa hafa. Osho osho e tu shita tu kale. Okukala tu holike kuKalunga noku tu pa ewiliko monghalamwenyo yetu oshi li xwepo shi dulife keshe shimwe.  (Lesha Epsalme 63:2-4.) Atusheni ohatu dulu okumona ehafo olo hali di mokulongela Jehova nomutima aushe. Vamwe ovo ve mu longela oule womido dihapu otava dulu okutya lela oyo oyo onghedi ya denga mbada yokukalamwenyo. — Epsalme 1:1-3; Jesaja 58:13, 14.

Konga ewiliko mOmbibeli

17. Omalihafifo nosho yo oinima oyo tu hole otai ka dana onghandangala ilipi mOparadisa?

17 MOparadisa, ohatu ka hafela okulongifa efimbo letu limwe moinima oyo tu na ohokwe muyo nomomalihafifo. Komesho yaaishe, Jehova oye e tu shitila omahalo okulihafifa nokwe tu udanekela kutya ota ka wanifa po “omahalo oinima aishe i na omwenyo.” (Epsalme 145:16, yelekanifa no-NW; Omuudifi 2:24) Otwa pumbwa okulihafifa nokufuwa, ndele oinima oyo ohatu ke i hafela unene tuu ngeenge otwa kala twa pitifa komesho ekwatafano letu naJehova. Osho osho yo hatu ka ninga nomounyuni mupe. Onghee hano, oshi li pandunge ‘okukonga tete Ouhamba waKalunga’ nokuyandja elitulemo komanangekonoupuna oo hatu mono mokulongela Jehova. — Mateus 6:33.

Ngeenge otwa kala tu na ekwatafano liwa naJehova ohatu kala nonghalamwenyo iwa notwa hafa

18. Ongahelipi hatu dulu okuulika kutya ohatu lilongekidile oku ka kala mOparadisa fiyo alushe?

18 Onghalamwenyo mounyuni mupe otai ka kala iwa neenghono shi dulife pwaasho hatu diladila. Natu ulikeni kutya otwa halelela oku ka kala mo mokulilongekidila “omwenyo waalushe” paife. Natu kulikeni omaukwatya oo Jehova te tu hongo tu ulike nokuudifa nouladi onghundana iwa. Natu kaleni twa hafa eshi twa pitifa komesho okulongela Jehova mokukalamwenyo kwetu. Otu na elineekelo filufilu kutya mounyuni mupe, Jehova ota ka wanifa po oinima aishe oyo a udaneka. Onghee hano, natu kaleni nonghedi yokukalamwenyo oyo tai ulike kutya otwa fa nale omo tu li!

^ okat. 14 Tala embo etivali Young People Ask—Answers That Work, epandja 311-318.