Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) JULI 2015

Kala omudiinini kOuhamba waKalunga

Kala omudiinini kOuhamba waKalunga

“Kave fi vomounyuni.” — JOHANNES 17:16.

OMAIMBILO: 63, 129

1, 2. (a) Epambafano lilipi li li pokati kokukala omudiinini kuJehova nokuhakufa ombinga momalipumomumwe ounyuni ou? (Tala efano pehovelo loshitukulwa.) (b) Ovanhu vahapu ovadiinini kushike, ndele osho ohashi etifa oidjemo ilipi?

OVAPIYA vaJehova ihava yambidida oinima oyo hai tukaula ovanhu, ngaashi oukwashiwana, oukwamuhoko ile eputuko. Omolwashike mbela? Omolwaashi otu hole Jehova, tu li ovadiinini kuye nohatu dulika kuye. (1 Johannes 5:3) Kashi na nee mbudi kutya otu li peni ile otwa dja peni, ohatu wilikwa komifikamhango daKalunga. Okukala ovadiinini kuJehova nokOuhamba waye osho sha fimanenena shi dule keshe shimwe. (Mateus 6:33) Nomolwaasho hatu dulu okutya katu fi oshitukulwa ‘shounyuni.’ — Lesha Johannes 17:11, 15, 16; Jesaja 2:4.

2 Ovanhu vahapu mounyuni kunena ove li ovadiinini koilongo yavo, komuhoko, keputuko ile nokuli keespana davo domaudano. Shi nyikifa oluhodi, osho osha ningifa vahapu va kwatwe komhepo yefiyafanepo, va kale ve tondafane nomafimbo amwe otashi dulika nokuli va dipae ovo ve li ovadiinini kongudu oyo ve li omhinge nayo. Nonande ihatu kufa ombinga momalipumomumwe a tya ngaho, otaa dulu oku tu kuma nosho yo okukuma ovapambele  vetu, notashi dulika tu mone oixuna omolwokuhenouyuki. Oto dulu okukufa ombinga noupu ngeenge omapangelo otaa ningi omatokolo ehe li pauyuki, molwaashi Kalunga okwe tu shitila oukwatya wokushiiva osho shi li pauyuki naasho shihe li pauyuki. (Genesis 1:27; Deuteronomion 32:4) Oho kala u udite ngahelipi ngeenge pa ningwa sha shihe li pauyuki? Oto dulu ngoo okukala ino kufa ombinga?

Ovakriste vashili ihava diladila kutya oshitukulwa shonhumba shounyuni waSatana oshi li xwepo shi dule ikwao

3, 4. (a) Omolwashike ihatu ame ombinga ngeenge pa holoka omalipumomumwe? (b) Oshike hatu ka kundafana moshitukulwa eshi?

3 Ngeenge pa holoka omalipumomumwe, ovanhu vahapu ohava ame ombinga molwaashi omapangelo okwe va tomha kutya osho osho omukwashiwana washili e na okuninga. Ashike fye ohatu shikula Jesus. Onghee hano, ihatu kufa ombinga moinima yopapolotika noihatu i moita. (Mateus 26:52) Ovakriste vashili ihava diladila kutya oshitukulwa shonhumba shounyuni waSatana oshi li xwepo shi dule ikwao. (2 Ovakorinto 2:11) Inatu hala okukufa ombinga nandenande momalipumomumwe omounyuni ou. — Lesha Johannes 15:18, 19.

4 Molwaashi inatu wanenena, vamwe vomufye otashi dulika natango tu na outondwe novanhu ovo va yooloka ko kufye. (Jeremia 17:9; Ovaefeso 4:22-24) Moshitukulwa eshi, ohatu ke lihonga omafinamhango oo tae tu kwafele tu lwife nokufinda oikala ya tya ngaho oyo hai tukaula ovanhu. Ohatu ka kundafana yo nghee hatu dulu okukala ovadiinini kOuhamba nokulideula tu kale hatu diladila ngaashi Jehova naJesus.

OMOLWASHIKE IHATU KUFA OMBINGA MOMALIPUMOMUMWE NOMOMASHILAFANO OUNYUNI?

5, 6. Eshi Jesus a li kombada yedu okwa li a tala ko ngahelipi ovanhu vomaludi a yoolokafana, nomolwashike?

5 Ngeenge oho mono shidjuu okuhakufa ombinga, lipula kutya, ‘Ngeno Jesus okwa ninga po shike?’ Eshi Jesus a li kombada yedu, pokati kOvajudea, Ovagalilea nOvasamaria opa li hapa kala omalipumomumwe nokuhaudafana. Diladila koihopaenenwa ei: Ovajuda nOvasamaria kava li hava popi. (Johannes 4:9) Ovafarisai nOvasadukai kava li hava tu kumwe moinima ihapu. (Oilonga 23:6-9) Ovajuda ovo va li ve lihonga Omhango ova li hava diladila kutya ove li xwepo ve dule ovo vehe i shii. (Johannes 7:49) Natango, vahapu ova li ve tonde ovafendelifi nosho yo Ovaroma. (Mateus 9:11) Ashike Jesus ka li a kufa ombinga momalipumomumwe a tya ngaho. Nonande okwa kala alushe ha popile oshili kombinga yaJehova nokwa li e shii kutya Ovaisrael ova li oshiwana shaKalunga she likalekelwa, ka li a honga ovahongwa vaye kutya ove li xwepo ve dule vamwe. (Johannes 4:22) Ponhele yaasho, okwe va honga va kale ve hole ovanhu aveshe. — Lukas 10:27.

Jehova naJesus ihava diladila kutya omuhoko, oukwashiwana ile elaka lonhumba oli li xwepo li dule makwao

6 Omolwashike Jesus a li ina tala ko ovanhu vonhumba ve li xwepo ve dule vakwao? Omolwonghedi omo ye naXe va tala ko ovanhu. Jehova okwa shita ovanhu opo va yadife edu nomihoko di lili noku lili. (Genesis 1:27, 28) Onghee hano, Jehova naJesus ihava diladila kutya omuhoko, oukwashiwana ile elaka lonhumba oli li xwepo li dule makwao.  (Oilonga 10:34, 35; Ehololo 7:9, 13, 14) Otu na okushikula oshihopaenenwa shavo sha wanenena. — Mateus 5:43-48.

7, 8. (a) Otwa ama kombinga yalyelye, nomolwashike? (b) Oshike tu na okudimbuluka kombinga yekandulepo lomaupyakadi ovanhu?

7 Omolwashike ihatu yambidida epangelo nande olimwe lopanhu? Omolwaashi otwa ama kombinga yaJehova noye Omupangeli wetu. Satana okwa popya moshikunino shaEden kutya Jehova ke fi omupangeli muwa wovanhu. Satana okwa li a hala ovanhu va itavele kutya onghedi yaye yokuninga oinima oya denga mbada i dule yaKalunga. Jehova okwa efa opo tu tokole kufye vene kutya otwa hala okwaama kombinga yalyelye. Ndele mbela ongahelipi shi na sha naave paumwene? Mbela oho dulika ngoo kuJehova molwaashi wa itavela kutya onghedi yaye yokuninga oinima oya denga mbada i dule yoye? Mbela owa tomhwa ngoo kutya Ouhamba waye oo ashike tau ka kandula po omaupyakadi etu? Ile oto diladila kutya ovanhu otava dulu okulipangela vo vene nomupondo nopehe na ekwafo laKalunga? — Genesis 3:4, 5.

8 Pashihopaenenwa, ngeenge umwe okwe ku pula kutya oho kala u uditile ngahelipi ongudu yonhumba yopapolotika, ongudu yonhumba tai ningi ekangha ile ehangano lonhumba la yukila oko, oto ka nyamukula ngahelipi? Eengudu dimwe domwaado otashi dulika da halelela shili okukwafela ovanhu. Ashike otu shii kutya Ouhamba waJehova oo ashike tau dulu okukandula po omaupyakadi ovanhu nokukufa po okuhenouyuki akushe. Ohatu landula yo ewiliko olo Jehova te tu pe okupitila meongalo, ponhele yakeshe umwe a ninge osho ta diladila kutya osho sha denga mbada. Nomolwaasho omaongalo a hangana.

9. Ovakriste vamwe vomefelemudo lotete ova li ve na oupyakadi ulipi, noshike va li va pumbwa okuninga?

9 Mefelemudo lotete, Ovakriste vamwe vomuKorinto ova li tava patafana tava ti: ‘Ame owaPaulus, nomukwao: ame owaApollos, ile: ame owaKefas, navali: ame owaKristus.’ Paulus okwa li a kumwa eshi a didilika mo oshinima sha tya ngaho. Osho osha li oupyakadi wa kwata moiti, molwaashi osha li tashi nyono po ombili yeongalo. Onghee hano, Paulus okwa li a pula ovamwaxe ta ti: “Mboli Kristus okwa tukaulwa?” Okwe va pa omayele a ti: “Ohandi mu kumaida, ovamwatate, omolwedina lOmwene wetu Jesus Kristus, amushe mu kale kumwe mu nondaka imwe, nye mu ha kale mwa tukauka mokati keni, ndelenee mu kale hamu udafana meendunge dimwe nomokudiladila shimwe.” Osho osha faafana kunena. Meongalo kamu na okukala etukauko. — 1 Ovakorinto 1:10-13; lesha Ovaroma 16:17, 18.

10. Paulus okwa li a dimbulukifa shike Ovakriste, noshike hatu lihongo mwaasho?

10 Paulus okwa li a dimbulukifa Ovakriste ovavaekwa kutya oukwashiwana wavo owomeulu nokave na okuyandja elitulemo koinima “yopadu.” (Ovafilippi 3:17-20) * (Tala eshangelo lopedu.) Ovavaekwa ove li ovatumwa  ile ovakalelipo vaKalunga naKristus. Ngeenge omukalelipo e li moshilongo osho shihe fi shavo, iha kufa ombinga moinima yopapolotika nomomalipumomumwe oshilongo osho. Monghedi ya faafana, itashi ka kala sha yuka kovavaekwa okukufa ombinga moinima yopapolotika nomomalipumomumwe ounyuni ou. (2 Ovakorinto 5:20) Ovo ve na eteelelo lokukala nomwenyo fiyo alushe kombada yedu navo ovadiinini kOuhamba noihava kufa ombinga momalipumomumwe ounyuni ou.

LIDEULA U KALE ALUSHE OMUDIININI KOUHAMBA WAJEHOVA

11, 12. (a) Oikala ilipi tu na okuhenuka ngeenge otwa hala okukala ovadiinini kOuhamba waKalunga? (b) Omumwameme umwe okwa li ha kala e uditile ngahelipi ovanhu vamwe, noshike she mu kwafela a lundulule?

11 Moitukulwa ihapu younyuni, ovanhu ohava kala va nanenwa unene tuu kwaavo ve na onakudiwa ya faafana, eputuko nohava popi elaka limwe. Luhapu ohava kala ve udite etumba neenghono omolwonhele apa va dja. Ashike katu na okweefa oikala ya tya ngaho i tu nwefe mo. Ponhele yaasho, otu na okulundulula onghedi yetu yokudiladila notwa pumbwa okudeula eliudo letu opo tuha kale tu na ombinga nande omushimwe shomoinima oyo. Ongahelipi hatu dulu okuninga ngaho?

12 Pashihopaenenwa, Mirjeta * (tala eshangelo lopedu) okwa dalelwa moshilongo osho sha li hashi ifanwa nale Yugoslavia. Moshitukulwa omo a kulila, ovanhu ove tonde Ovaserbia. Eshi e lihonga kombinga yaJehova, okwa li a didilika kutya Jehova ina lenga omuhoko wonhumba komesho yadikwao nosho yo kutya Satana oye a hala ovanhu va kale ve tondafane. Onghee hano, Mirjeta okwa li a ninga eenghendabala da mana mo opo a lundulule etaleko laye. Ndele eshi oita ya li ya tukuluka pokati komihoko di lili noku lili moshitukulwa omo a li hadi, okwa li a hovela okukala vali e tonde Ovaserbia. Ka li nokuli a hala oku va udifila. Molwaashi okwa li e shii kutya osha puka, okwa li a pula Jehova e mu kwafele a efe po oikala ya tya ngaho. Okwa li yo a pula Jehova e mu kwafele a hovele okukokola ondjila. Mirjeta okwa ti: “Onda li nda didilika kutya okuyandja elitulemo koukalele oko onghedi ya denga mbada oyo ya kwafela nge. Ngeenge ndi li moukalele, ohandi kendabala okuhopaenena oukwatya waJehova wohole, nonda ka mona omaliudo okukala ndi tonde vamwe taa kana po.”

13. (a) Oshike sha li sha ningilwa Zoila, nokwa li e linyenga ngahelipi? (b) Oshike hatu lihongo moshimoniwa shaZoila?

13 Omumwameme wedina Zoila wokoMexico okwa li a tembukila koEurope. Meongalo lavo omu na ovamwatate novamwameme va dja koshitukulwa shimwe vali shaLatin America. Zoila okwa ti kutya vamwe vomuvo ova li hava sheke oshilongo oko a dja, eputuko lasho nosho yo eemusika dasho. Molwaashi okwa li ha kala a handuka, okwa ilikana kuJehova e mu kwafele aha handuke vali. Mbela ngeno otwe linyenga ngahelipi, ngeno otwa li monghalo yaye? Ovamwatate novamwameme vamwe natango otava kondjo nokupangela omaliudo avo ngeenge ova udu vamwe tava popile mowii onhele apa va dja. Onghee hano, inatu hala nande okutya sha ile okuninga sha osho tashi ulike kutya otwa tala ko ovanhu vamwe ve li xwepo ve dule vakwao. Inatu hala okweeta etukauko meongalo ile pamwe pe li li. — Ovaroma 14:19; 2 Ovakorinto 6:3.

Pula Jehova e ku kwafele u kale u na etaleko la fa laye li na sha novanhu

14. Oshike tashi dulu oku ku kwafela u kale u na etaleko la fa laJehova li na sha novanhu?

14 Atusheni otu shii kutya ovapiya vaJehova ove li oshiwana sha hangana, onghee hano,  inatu kala tu udite kutya onhele ile oshilongo shimwe oshi li xwepo shi dule shikwao. Ashike otashi dulika ovapambele voye naavo wa putuka navo ve ku nwefe mo u kale u hole onhele apa wa dja. Onghee hano, otashi dulika natango u kale u tonde ovanhu vomoiwana imwe, veputuko, velaka ile vomuhoko umwe. Oshike tashi dulu oku ku kwafela u ninge omalunduluko? Dilonga kunghee Jehova ha kala e uditile ovanhu ovo have litangele oilongo yavo ile ovo hava diladila kutya ove li xwepo ve dule vakwao. Ninga omapekaapeko a wedwa po e na sha noshikundafanwa osho pefimbo lekonakono loye lopaumwene ile pelongelokalunga loukwaneumbo. Opo nee pula Jehova e ku kwafele u kale u na etaleko la fa laye li na sha novanhu. — Lesha Ovaroma 12:2.

Opo tu kale ovadiinini kuJehova, otu na okudulika kuye kashi nee mbudi kutya ovanhu vamwe otava ti shike (Tala okatendo 15, 16)

15, 16. (a) Vamwe otave ke linyenga ngahelipi molwaashi twa yooloka ko kuvo? (b) Ongahelipi ovadali tava dulu okukwafela ovana vavo va kale ovadiinini kuJehova?

15 Molwaashi otwa hala okulongela Jehova tu na eliudo liwa, ope na omafimbo amwe twa pumbwa okuulika kutya otwa yooloka ko filufilu kovanailonga pamwe nafye, ovanafikola vomongudu yetu, ovashiinda ile ovapambele. (1 Petrus 2:19) Jesus okwe tu londwela kutya vamwe otava ka kala nokuli ve tu tonde molwaashi twa yooloka ko kuvo. Dimbuluka kutya ovanhu vahapu ovo have tu pataneke kave shii sha kombinga yOuhamba waKalunga. Onghee hano, kave udite ko kutya omolwashike sha fimana kufye okukala ovadiinini kOuhamba ponhele yokukala ovadiinini komapangelo opanhu.

16 Opo tu kale ovadiinini kuJehova, otu na okukala hatu dulika kuye kashi na nee mbudi  kutya vamwe otava ningi shike ile otava ti ngahelipi. (Daniel 3:16-18) Ovanyasha ovo unene tashi dulika va mone shidjuu okukala va yooloka ko kuvamwe. Ovadali, kwafeleni ovana veni va kale ve na ouladi kofikola. Ovana veni otashi dulika va kale va tila okwaanya okusalutila epandela ile okwaanya okukufa ombinga momadano amwe vali opashiwana. Otamu dulu okukonakona pefimbo lelongelokalunga loukwaneumbo weni nghee Jehova e uditile oinima ya tya ngaho. Va honga nghee ve na okuyelifa kombinga yeitavelo lavo monghedi ya yela nonefimaneko. (Ovaroma 1:16) Nongeenge osha pumbiwa, kwafela ovana voye mokupopya novahongi vavo noku va yelifila osho ovana voye va itavela.

HAFELA ESHITO LAJEHOVA ALISHE

17. Otu na okuhenuka omadiladilo elipi, nomolwashike?

17 Luhapu ohatu hafele oikulya, okupopya elaka, omudingonoko nosho yo eenghedindjikilile daapo twa kulila. Ndele mbela ohatu kala tu udite kutya osho tu hole alushe oshiwa shi dulife osho shi holike kuvamwe? Jehova okwa hala tu hafele oinima i lili noku lili oyo a shita. (Epsalme 104:24; Ehololo 4:11) Onghee hano, omolwashike u na okukomangela kutya onghedi yonhumba yokuninga oinima oyo ya denga mbada i dule dikwao?

Jehova okwa hala ovanhu aveshe va ka kale nomwenyo fiyo alushe

18. Omolwashike shiwa kufye okukala twa tala ko vamwe monghedi omo Jehova he va tale ko?

18 Jehova okwa hala ovanhu aveshe ve lihonge kombinga yaye, ve mu longele nova ka kale fiyo alushe. (Johannes 3:16; 1 Timoteus 2:3, 4) Onghee hano, ngeenge ovamwatate ove na omaetepo a yooloka ko kwaao etu, otu na okukala tu na ehalo okupwilikina kuvo, shimha ashike omaetepo avo ehe li omhinge netaleko laJehova. Ngeenge otwa ningi ngaho, onghalamwenyo yetu otai ka kala ihokwifa noihafifa, nohatu ka kala twa hangana novamwatate novamwameme. Ngaashi twa kundafana metetekelo, ihatu kufa ombinga momalipumomumwe ounyuni ou molwaashi otu li ovadiinini kuJehova nokOuhamba waye. Otu tonde omhepo younhwa noyefiyafanepo yomounyuni waSatana. Inatu hafa tuu eshi Jehova e tu honga tu kale tu hole ombili notwe lininipika! Otu udite ngaashi Omupsalme oo a ti: “Taleni, oshiwa nosha wapala shi fike peni, ovamwatate ngenge tava kala kumwe nombili.” — Epsalme 133:1.

^ okat. 10 Vamwe ovo va li meongalo muFilippi otashi dulika va li ve na oukwashiwana waRoma nomolwaasho va li ve na oufemba wokuninga oinima yonhumba ve dule ovamwaxe ovo va li vehe u na.

^ okat. 12 Omadina amwe hao ovanhu ovo lelalela.