Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) JULI 2015

Ei onhele yetu yelongelokalunga

Ei onhele yetu yelongelokalunga

“Ouladi omolwongulu yoye otau li nge.” — JOHANNES 2:17.

OMAIMBILO: 127, 118

1, 2. (a) Monakudiwa ovapiya vaJehova ova kala have mu longele peni? (b) Jesus okwa li e uditile ngahelipi otembeli yaJehova yomuJerusalem? (c) Oshike hatu ka kundafana moshitukulwa eshi?

OVAPIYA vaKalunga vonale nosho yo vokunena ove na eenhele dokulongela Kalunga. Pashihopaenenwa, eshi Abel a li a ningila Kalunga eyambo, otashi dulika a li a tunga oaltari. (Genesis 4:3, 4) Noa, Abraham, Isak, Jakob naMoses navo ova li va tunga eealtari. (Genesis 8:20; 12:7; 26:25; 35:1; Exodus 17:15) Jehova okwa li a lombwela Ovaisrael va tunge etwali. (Exodus 25:8) Lwanima okwe ke va lombwela va tunge otembeli. (1 Eehamba 8:27, 29) Konima eshi oshiwana shaKalunga sha aluka moukwatwa waBabilon, osha kala hashi ongala alushe meeshinagoga. (Markus 6:2; Johannes 18:20; Oilonga 15:21) Ovakriste vomefelemudo lotete ova kala hava ongala momaumbo. (Oilonga 12:12; 1 Ovakorinto 16:19) Kunena, oshiwana shaJehova mounyuni aushe ohashi ongala mOmalupale Ouhamba omayovi omilongo, omo have lihongo kombinga yaJehova noku mu longela.

2 Jesus okwa kala a fimaneka neenghono otembeli yaJehova oyo ya li muJerusalem. Ohole yaJesus yokuhola otembeli oya li ya dimbulukifa ovahongwa vaye eendjovo domupsalme odo tadi ti: ‘Ouladi wokukondjela ongulu yoye wa mana nge eenghono.’ (Epsalme 69:10; Johannes 2:17) Olupale lOuhamba kali fi “ongulu yOmwene”  ngaashi otembeli yomuJerusalem ya li. (2 Omafimbo 5:13; 33:4) Ashike otu na okukala twa fimaneka neenghono eenhele detu delongelokalunga. Moshitukulwa eshi ohatu ka kundafana omafinamhango Ombibeli oo tae tu hongo nghee tu na okulihumbata ngeenge tu li pOmalupale Ouhamba, nghee tu na oku a fila oshisho nonghee hatu dulu okukwafela moku a futila. * — Tala eshangelo lopedu.

OTWA FIMANEKA OKWOONGALA KWETU

3-5. Olupale lOuhamba oshike, nongahelipi tu na okukala tu uditile okwoongala kwetu?

3 Olupale lOuhamba olo onhele ya fimana opo ovanhu hava ongala opo va longele Jehova. Okwoongala oku li oshali ya dja kuKalunga, nohaku tu kwafele tu pameke ekwatafano letu naye. Ohatu tuwa omukumo pokwoongala kwetu nokupewa ewiliko olo twa pumbwa, okudja kehangano laye. Oshi li oufembanghenda munene eshi Jehova nOmona ve tu shiva tu lye “koshililo shOmwene” oshivike keshe. (1 Ovakorinto 10:21) Inatu dimbwa nande kutya eshivo olo ole likalekelwa neenghono.

4 Jehova ote tu lombwele sha yela kutya okwa hala tu kale hatu ongala opo tu mu longele notu twaafane omukumo. (Ovaheberi 10:24, 25) Molwaashi otwa fimaneka Jehova, itatu ka faula okwoongala omolwomatomheno ahafele. Ohatu ulike kutya otu na olupandu lokwoongala kwetu moku ku lilongekidila noku ka kufa ombinga muko. — Epsalme 22:23.

5 Onghedi omo hatu lihumbata pokwoongala nomonghedi omo hatu file oshisho Olupale lOuhamba, otai ka ulika kutya otwa fimaneka Jehova shi fike peni. Otwa hala elihumbato letu li fimanekife edina laJehova olo luhapu hali kala la shangwa kOlupale lOuhamba. — Yelekanifa 1 Eehamba 8:17.

6. Ovanhu vamwe ova popya shike shi na sha nOlupale letu lOuhamba nosho yo ovo hava kala pokwoongala? (Tala efano pehovelo loshitukulwa.)

6 Ngeenge ohatu ulike kutya otwa fimaneka Olupale letu lOuhamba, vamwe navo otave ke shi didilika. Pashihopaenenwa, omulumenhu umwe wokuTurkey okwa ti: “Onda li nda kuminwa oukoshoki nelandulafano olo nda mona pOlupale lOuhamba. Ovanhu ova li va djala nawa, tave limemesha nova li va popifa nge nohamu. Osho osha kumwifa nge neenghono.” Omulumenhu oo okwa li a hovela okuya kokwoongala nokonima yefimbo lixupi okwa li a ninginifwa. Moshilando shimwe shomuIndonesia, ovamwatate ova li va shiva ovashiinda shavo, omukulunhu woshilando novakwanambelewa vamwe vali, va ka tale Olupale lOuhamba lipe. Omukulunhu woshilando okwa li a kuminwa ongushu yetungo, onghedi omo la ndulukwa nosho yo oshikunino shiwa osho shi li po. Okwa ti: “Oukoshoki wolupale eli otau ulike kutya ohamu tula moilonga osho hamu udifa.”

Onghedi omo hatu lihumbata otai dulu okuulika kutya inatu fimaneka Kalunga (Tala okatendo 7, 8)

7, 8. Ongahelipi hatu dulu okuulika kutya otwa fimaneka Jehova ngeenge tu li pOlupale lOuhamba?

7 Jehova oye e tu shiva kokwoongala, nomolwaasho oku na ko nasha neholokepo letu nosho yo onghedi omo hatu lihumbata ngeenge tu li po. Onghee hano, otu na okukala tu na ondjele. Ngeenge tu li pokwoongala, Ihatu lihumbata nokudja monghedi yefimaneko la pitilila unene noihatu ulike emanguluko la pitilila unene nokudjala twa fa tu li meumbo. Oshoshili kutya Jehova okwa hala fye nosho yo ovo hatu shivi kOlupale lOuhamba tu kale po tu udite ouumbo. Ashike inatu hala nande okuulika okuhenefimaneko lokwoongala monghedi yonhumba. Nomolwaasho pokwoongala ihatu djala oikutu i li omuxwanaxwanena ile tu djale twa fa tu li meumbo. Ohatu henuka yo okukala hatu tumu nokulesha omatumwalaka opangodi, okukala hatu popi, hatu li ile  hatu nu pefimbo lokwoongala. Ovadali ove na okuhonga ovana vavo vaha kale hava tondauka nokudanauka mOlupale lOuhamba. — Omuudifi 3:1.

8 Eshi Jesus a li a mona ovanhu tava landifile oinima motembeli yaKalunga, okwa li a handuka ndele te va taataa mo. (Johannes 2:13-17) POmalupale Ouhamba opo hatu lihongo kombinga yaJehova noku mu longela. Onghee hano, inashi yuka okukala hatu ungaunga noinima yeengeshefa pefimbo opo tu li pOlupale. — Yelekanifa naNehemia 13:7, 8.

OHATU KWAFELE MOKUTUNGA OMALUPALE OUHAMBA

9, 10. (a) Ongahelipi oshiwana shaJehova hashi tungu Omalupale Ouhamba, naasho osha etifa po shike? (b) Ongahelipi ehangano laJehova la kwafela omaongalo oo itaa dulu okutunga kuo vene Omalupale Ouhamba?

9 Oshiwana shaJehova mounyuni aushe ohashi longo noudiinini mokutunga Omalupale Ouhamba. Omalupale a tya ngaho ohaa ndulukwa, haa tungwa nohaa wapekululwa kovaliyambi ihava futwa. Oshidjemo, moule womido 15 da ka lupuka, otwa tunga Omalupale Ouhamba mawa e dulife po 28,000 mounyuni aushe, ile tu tye, efiku keshe otwa tunga Omalupale Ouhamba atano lwaapo.

10 Ehangano laJehova ohali longifa ovaliyambi nosho omayambidido opo ku tungwe Omalupale Ouhamba keshe opo a pumbiwa. Ohatu dulika kefinamhango lOmbibeli olo tali ufa kutya ovo ve na shihapu otava dulu okukwafela ovo vehe na. (Lesha 2 Ovakorinto 8:13-15.) Mbela osho osha pondola ngoo? Opa tungwa Omalupale Ouhamba mahapu a tungilwa omaongalo oo itaa dulu okutunga kuo vene.

11. Ovamwatate vamwe ova ti shike shi na sha nOmalupale Ouhamba avo mape, naasho ou shi uditile ngahelipi?

11 Ovamwatate vokeongalo limwe lokuCosta Rica ova ti: “Ngeenge tu li pOlupale lOuhamba otwa fa ashike hatu tu ondjodi. Katwa li hatu shi itavele molwaashi Olupale letu liwa ola pwa okutungwa filufilu momafiku ashike ahetatu. Osho osha ningifwa tashi shiiva omolwomanangekonoupuna aJehova, omalongekido oo a ningwa kehangano laye nomolweyambidido lovamwatate ovaholike. Onhele ei yokulongela Kalunga oi li shili omaano e na ondilo, oshinima shiwa osho Jehova e tu pa. Otwe shi pandula neenghono.” Ohashi tu hafifa shili okuuda ovamwatate novamwameme tava pandula Jehova omolwaasho e va ningila. Otwa hafa yo eshi ovamwatate mounyuni aushe tava mono Omalupale Ouhamba avo vene. Osho osha yela kutya Jehova ota nangeke noupuna oilonga yokutunga Omalupale Ouhamba, molwaashi shimha ashike a tungwa, ovanhu vahapu ohava hovele okuuya kokwoongala ve lihonge kombinga yaJehova. — Epsalme 127:1.

12. Ongahelipi to dulu okukwafela mokutunga Omalupale Ouhamba?

12 Ongahelipi to dulu okukwafela mokutunga Omalupale Ouhamba? Otashi dulika naave to dulu okuliyamba u kwafele moilonga ya tya  ngaho. Nakeshe umwe womufye ota dulu okuyambidida pashimaliwa okutungwa kwOmalupale Ouhamba. Ngeenge hatu ningi keshe osho hatu dulu opo tu yambidide oilonga ya tya ngaho, ohatu mono ehafo olo hali di mokuyandja, naasho sha fimanenena, ohatu tumbalekifa Jehova. Ohatu shikula oshihopaenenwa shoshiwana shaKalunga shopefimbo lOmbibeli osho sha li hashi yambidida nouladi okutunga eenhele dasho delongelokalunga. — Exodus 25:2; 2 Ovakorinto 9:7.

OHATU KALEKE OLUPALE LOUHAMBA LA KOSHOKA

13, 14. Oshike hatu lihongo mOmbibeli osho tashi ulike kutya otu na okukaleka Olupale letu lOuhamba la koshoka nokukaleka oinima melandulafano?

13 Jehova oKalunga a koshoka nomuyapuki. Oye Kalunga kelandulafano. Nomolwaasho hatu kaleke olupale letu la koshoka nokukaleka oinima melandulafano. (Lesha 1 Ovakorinto 14:33, 40.) Opo tu kale twa koshoka notuvayapuki ngaashi Jehova, otu na okukaleka elongelokalunga letu, okudiladila, eenghatu nosho yo omalutu etu a koshoka. — Ehololo 19:8.

14 Ngeenge ohatu kaleke Olupale lOuhamba la koshoka noinima i li melandulafano, ohatu ka kala tu udite etumba eshi hatu shivi ovanhu kokwoongala kwetu. Ovanhu otava ka mona kutya ohatu tula shili moilonga osho hatu udifa kombinga younyuni mupe wa koshoka. Otava ka mona yo kutya ohatu longele Kalunga omuyapuki nomukoshoki oo ta ka ninga edu eli oparadisa iwa. — Jesaja 6:1-3; Ehololo 11:18.

15, 16. (a) Omolwashike ihashi kala alushe shipu okukaleka Olupale lOuhamba la koshoka, ndele omolwashike tu na alushe oku li kaleka la koshoka? (b) Oilonga yokuwapaleka Olupale leni lOuhamba ohai unganekwa ngahelipi, naatusheni otu na oufembanghenda washike?

15 Ovanhu ohava kala ve na omaetepo a yoolokafana e na sha nokuwapaleka. Omolwashike shi li ngaho? Otashi dulika omolwonghedi omo va putuka. Shikwao vali, vamwe ohava di meenhele di yadi ondwi ile mu na omapandavanda a kaka neenghono nohaa kala e yadi eenhata. Vamwe kave na omeva a wana ile oiwapalekifo. Ashike kashi na nee mbudi kutya ohatu di peni ile ovanhu vomoshitukulwa shetu ova tala ko ngahelipi oukoshoki, otu na okukaleka Olupale lOuhamba la koshoka noinima i li  melandulafano. Olupale oli li onhele opo hatu longele Jehova. — Deuteronomion 23:14.

16 Ngeenge otwa hala Olupale lOuhamba li kale la koshoka ngaashi tashi dulika, otwa pumbwa okuliunganeka nawa. Ovakulunhuongalo ohava ningi elandulafano leongalo nokushilipaleka kutya ope na alushe oiwapalekifo noilongifo ya wana. Ohava unganeke yo oilonga opo i pwe okulongwa. Oinima imwe ohai pumbwa okuwapalekwa alushe konima yokwoongala keshe, ndele imwe inai pumbwa. Atusheni otu na oufembanghenda wokukufa ombinga mokuwapaleka Olupale letu lOuhamba.

OHATU FILE OSHISHO OLUPALE LETU LOUHAMBA

17, 18. (a) Oshike hatu lihongo monghedi omo oshiwana shaJehova shopefimbo lonale sha kala hashi file oshisho otembeli? (b) Omolwashike tu na okufila oshisho Olupale letu lOuhamba?

17 Ohatu kaleke yo Olupale letu monghalo iwa mokuwapekulula opo sha pumbiwa. Osho osho ovapiya vaJehova vopefimbo lonale va li va ninga. Pashihopaenenwa, pefimbo lokupangela kwohamba Joas yaJuda, ovanhu ova li va yandja omayambidido opashimaliwa kotembeli. Ohamba oya li ya lombwela ovapristeri va longife oimaliwa oyo mokuwapekulula otembeli opo sha pumbiwa. (2 Eehamba 12:4, 5) Lwanima omido di dulife po 200, ohamba Josia nayo oya li ya longifa omayambidido oo a yandjwa kotembeli opo i fute omolwewapekululo. — Lesha 2 Omafimbo 34:9-11.

18 Eekomitiye dOitaimbelewa dimwe oda didilika kutya ovanhu moilongo yavo inava ikilila okukaleka omatungo ile oilongifo monghalo iwa. Otashi dulika omolwaashi moilongo omo omu na ashike ovanhu vanini ve shii okulonga oilonga ya tya ngaho. Ile tashi dulika vehe na oimaliwa ya wana yokuwapekululifa. Ashike ngeenge ihatu wapekulula Omalupale Ouhamba ngeenge sha pumbiwa, otaa ka kala taa monika nai novanhu otave ke shi didilika mo. Itae ke va pa oundombwedi muwa. Ponhele yaasho, ngeenge atusheni otwa ningi keshe osho hatu dulu tu file oshisho Omalupale Ouhamba, ohatu ka fimanekifa Jehova noitatu ka hepeka oimaliwa oyo ovamwatate hava yambidida.

Otu na okukaleka Olupale lOuhamba letu la yela noli li monghalo iwa (Tala okatendo 16, 18)

19. Oshike to ka ninga po opo u ulike kutya owa fimaneka onhele opo ho longele Jehova?

19 Olupale lOuhamba etungo olo la yapulilwa Jehova. Kali fi lomunhu ile leongalo lonhumba. Ngaashi twa kundafana moshitukulwa eshi, omafinamhango Ombibeli otae ke tu kwafela tu kale tu na oikala ya yuka i na sha nonhele opo hatu longele Kalunga. Molwaashi otwa fimaneka Jehova, ohatu ulike efimaneko li na sha nokwoongala kwetu nosho yo Olupale lOuhamba. Ohatu yandje omayambidido opashimaliwa nehafo opo ku tungwe Omalupale Ouhamba, nohatu longo noudiinini tu a kaleke monghalo i li nawa nokwa koshoka. Ngaashi Jesus, ohatu ulike ouladi wetu nosho yo efimaneko lonhele opo hatu longele Jehova. — Johannes 2:17.

^ okat. 2 Oshitukulwa eshi otashi yukifa unene elitulemo kOmalupale Ouhamba. Ashike omayele oo okwa yukifwa yo kOmalupale Oyoongalele neenhele vali dikwao opo hapa longelwa Jehova.