Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) JUNI 2015

Okwa li e hole ovanhu

Okwa li e hole ovanhu

“Nda nyakukilwa ovana vovanhu.” — OMAYELETUMBULO 8:31.

1, 2. Ongahelipi Jesus a ulika kutya oku hole ovanhu nohole yomoule?

OMONA waKalunga woshiveli oku li oshihopaenenwa sha denga mbada shounongo waJehova itau yelekwa nasha nokwa kala naXe e li “omunongoelela.” Jesus ka li tuu a hafa eshi Xe a “longekida eulu” nokwa “pameka omakanghameno edu”! Moinima aishe oyo Xe a shita, Jesus okwa li unene ha “nyakukilwa ovana vovanhu.” (Omayeletumbulo 8:22-31) Osha yela kutya Jesus okwa kala e hole ovanhu okudja pehovelo.

2 Lwanima, Jesus okwa ka ulika oudiinini nohole yokuhola Xe nokuulikila yo ovanhu aveshe ohole yomoule eshi a li a dja meulu nehalo liwa nokuuya kombada yedu e li omunhu. Ohole oyo ya li ye linyengifa Jesus a ninge ngaho opo a yandje omwenyo waye u ninge “oikulila yavahapu.” (Mateus 20:28; Ovafilippi 2:5-8) Eshi Jesus a li kombada yedu, Kalunga okwa li e mu pa eenghono opo a longe oikumwifilonga. Oikumwifilonga ya tya ngaho oya ulika ohole yaJesus yokuhola ovanhu nosho yo oinima iwa oyo te ke va ningila mafiku.

3. Oshike hatu ka kundafana moshitukulwa eshi?

3 Eshi Jesus a li kombada yedu okwa udifa ‘evangeli lOuhamba waKalunga.’ (Lukas 4:43) Okwa li e shii kutya Ouhamba  otau ka yapulifa edina laXe notau ka kandula po omaupyakadi ovanhu fiyo alushe. Eshi a kala ta udifa, okwa longa oikumwifilonga ihapu. Oikumwifilonga oyo oya ulika kutya oku na ko nasha shili novanhu aveshe. Omolwashike osho sha fimana kufye? Omolwaashi osho a ninga otashi tu kwafele tu kale twa teelela onakwiiwa tu na omukumo. Natu ka kundafaneni oikumwifilonga yaJesus ine.

‘EENGHONO ODA LONGA MOKUVELULA OVANAUDU’

4. Oshike sha li sha ningwa po eshi Jesus a shakena nomulumenhu e na oshilundu?

4 Pefimbo loukalele waye, Jesus okwa li a ya koshitukulwa hashi ifanwa Galilea. Mushimwe shomoilando yako, okwa li a shakeneka mo omulumenhu e na oudu woshilundu wa kwata moiti. (Markus 1:39, 40) Omulumenhu oo okwa li ta vele neenghono, na Lukas oo a li ndokotola okwa popya shi na sha naye a ti kutya oku “yadi oshilundu.” (Lukas 5:12) Ombibeli oya ti kutya, eshi omulumenhu a mona Jesus ‘okwa wila poshi koshipala shaye ndele okwe mu indila: Omwene, ngeenge wa hala, Ove oto dulu okuyelifa nge.’ Omulumenhu okwa li e shii kutya Jesus oku na eenghono doku mu velula, ashike okwa li a hala okushiiva ngeenge Jesus okwa hala ngoo oku mu velula. Omolwashike mbela? Omolwaashi omulumenhu oo okwa li ashike a ikilila Ovafarisai ovo va dina ovanashilundu. Ndele mbela Jesus okwa li ta diladila shike? Mbela okwa li ta ka ungaunga ngahelipi nomulumenhu oo tashi dulika a lemanekwa neenghono koshilundu? Ngeno oove ngeno owa ninga po shike?

5. Omolwashike Jesus a li a hala okuvelula omunashilundu?

5 Osha fa shi li ngaha kutya, omulumenhu oo a li ta vele ka li a ingida kutya: “Omunashilundu! Omunashilundu!” ngaashi Omhango yaMoses ya li tai pula. (Leviticus 13:43-46) Ashike Jesus ka li e mu handukila. Ponhele yaasho, okwa li e na ko nasha nomulumenhu oo nokwa li a hala oku mu kwafela. Katu shii lelalela kutya Jesus okwa li ta diladila shike, ashike otu shii nghee a li e udite. Okwa li a etela onghenda neenghono omulumenhu oo, ndele ta longo oshikumwifilonga. Okwa li a kuma omulumenhu oo, oshinima osho paha li vali oo ta hale oku shi ninga. Jesus okwa li a popya nomufindo nonolukeno ta ti: “Onda hala, yela. Opo pefimbo tuu olo oshilundu osha dja mo muye.” (Lukas 5:13) Osha yela kutya, Jehova oye a li a pa Jesus eenghono a longe oshikumwifilonga osho shinene nokuulika kutya oku hole shili ovanhu. — Lukas 5:17.

6. Oshike shididilikwedi shi na sha noikumwifilonga oyo Jesus a longa notai ulike shike?

6 Jesus okwa li a longa oikumwifilonga ihapu keenghono daKalunga. Ina velula ashike ovanashilundu, ndele okwa li a velula yo ovanhu ve na omaudu e lili noku lili. Ombibeli oye tu lombwela kutya ovanhu ova li va kumwa eshi “ovafitamatwi tava udu, noingudu ya veluka, noilema ya enda, novapofi ova twikuluka.” (Mateus 15:31) Ngeenge Jesus a li ta velula omunhu, ka li ha pumbwa okulongifa oitukulwa yolutu yavamwe ovo ve na oukolele. Osho ine shi ninga, molwaashi Jesus okwa li e na eenghono dokuvelula oitukulwa yolutu oyo tai vele. Okwa li a velula ovanhu mepakumo leisho, nokuli navamwe ovo va li kokule naye. (Johannes 4:46-54) Mbela oihopaenenwa oyo ikumwifi otai ulike shike? Otai ulike kutya Ohamba yetu, Jesus Kristus, oi na eenghono noya hala okuxulifa po omikifi adishe fiyo alushe. Eshi hatu lihongo nghee Jesus a li a ungaunga novanhu, otashi tu kwafele tu  kale tu na elineekelo kutya mounyuni mupe ota ka udila “omuxupi nohepele olukeno.” (Epsalme 72:13) Jesus ota ka velula aveshe ovo tava mono oixuna molwaashi okwa halelela oku shi ninga.

“FIKAMA, KUFA OLUTALA LOYE U ENDE”

7, 8. Hokolola kutya oshike sha li sha ningwa po fimbo Jesus ina shakena nomulumenhu oshingudu petale laBetesda.

7 Eemwedi donhumba konima eshi Jesus a velula omunashilundu, okwa li a enda okudja kuGalilea a yuka kuJudea oko a ka twikila okuudifa kombinga yonghundana iwa yOuhamba waKalunga. Ope na okukala pa li ovanhu omayovi ovo va uda etumwalaka laJesus nova li ve linyengifwa kohole yaye yoku va hola. Jesus okwa li a hala okuhekeleka eehepele novafininikwa nokupa ovanhu va tya ngaho eteelelo. — Jesaja 61:1, 2; Lukas 4:18-21.

8 Momwedi wOshijuda Nisan, Jesus okwa li a ya molweendo lokuya kuJerusalem a ka dane Opaasa. Oshilando osha li she lipyakidila molwaashi ovanhu ova li tave uya mo koshivilo osho she likalekelwa. Jesus okwa li a shakena nomulumenhu oshingudu petale hali ifanwa Betesda olo la li kolundume lotembeli.

9, 10. (a) Omolwashike ovanhu va li hava i ketale laBetesda? (b) Oshike osho Jesus a li a ninga petale, naasho otashi tu hongo shike? (Tala efano pehovelo loshitukulwa.)

9 Eengudu dovanaudu oda li hadi i kuBetesda. Omolwashike da li hadi i ko? Omolwaashi ova li va itavela kutya ngeenge omunaudu okwa i metale omo eshi omeva tae linyenge, ota veluka pashikumwifilonga. Diladila ashike kunghee ovanhu va tya ngaho va hala okuveluka va li va lyalyakana, va lulilwa, ve na oshisho novehe na eteelelo. Mbela omolwashike Jesus oo a wanenena noka li a pumbwa okuvelulwa a li a ya petale opo? Ohole yokuhola ovanhu oyo ye mu linyengifa a ye po. Naapo opo nee a li a shakeneka omulumenhu oo a kala ta vele oule wefimbo li dulife olo Jesus a kala kombada yedu. — Lesha Johannes 5:5-9.

Jesus okwa li ha kongo ovo va pumbwa ekwafo

10 Jesus okwa li a pula omulumenhu oo ngeenge okwa hala okukala vali ha ende. Diladila ashike kutya omulumenhu oo oku na okukala a li a nyemata eshi a lombwela Jesus kutya okwa hala okuveluka ndele ke na nghee molwaashi kape na oo a li a hala oku mu twala metale. Jesus okwa li e mu lombwela a ninge oshinima osho sha li sha fa itashi shiiva. Okwa li e mu lombwela a kufe olutala laye noku ende a ye. Opo nee omulumenhu okwa kufa olutala laye ndele ta hovele okweenda. Oshikumwifilonga osho oshi li oumbangi udidilikwedi waasho Jesus ta ka ninga mounyuni mupe. Otashi ulike yo ohole yomoule yaJesus yokuhola ovanhu. Okwa li ha kongo ovo va pumbwa ekwafo. Oshihopaenenwa shaJesus oshi na oku tu twa omukumo tu twikile okukonga ovanhu moshitukulwa shetu ovo va wililwa po omolwoinima ii oyo tai ningwa mounyuni.

“OLYELYE A KUMA KOSHIKUTU SHANGE?”

11. Ongahelipi Markus 5:25-34 ta ulike kutya Jesus oku hole shili ovo tava vele?

11 Lesha Markus 5:25-34. Omukainhu umwe okwa kala ta hepekwa koudu u fifa ohoni oule womido 12. Oudu waye owa li wa kuma onghalamwenyo yaye aishe mwa kwa telwa okulongela Kalunga kwaye. Okwa kala ha i keendokotola dihapu nokwa longifa  oimaliwa ihapu mokukonga ouhaku ndele nande ongaho oudu waye owa naipala ashike. Efiku limwe omukainhu oo okwa li a pangela omhangela imwe i lili opo a veluke. Onghee hano, okwa li a pita mengafifi lovanhu ndele ta ka kwata koshikutu shaJesus. (Leviticus 15:19, 25) Eshi Jesus a didilika kutya muye omwa dja eenghono, okwa li a pula kutya olyelye e mu kuma. Omukainhu okwa li “a tila ndee ta kakama” nokwa ‘wila komesho yaye, ndee te mu hepaululile oshili aishe.’ Jesus okwa li e shii kutya Jehova oye a velula omukainhu oo, onghee okwa li a popya nolukeno a ti: “Omumwangekadona, eitavelo loye ole ku velula. Inda nombili, ove u kale wa veluka koudu woye.”

Oikumwifilonga oyo Jesus a longa oya ulika kutya oku na ko nasha shili nafye nohe tu udile oukwao wananghali omolwomaupyakadi oo tu na (Tala okatendo 11, 12)

12. (a) Oshike twe lihonga shi na sha naJesus? (b) Oshihopaenenwa shilipi Jesus e tu tulila po?

12 Otashi hekeleke neenghono okumona nghee Jesus a ulikila ovanhu ohole, unene tuu ovo va li tava vele. Mepingafano naasho, Satana ota kendabala oku tu itavelifa kutya katu na oshilonga nokape na oo e tu hole. Ashike oikumwifilonga yaJesus oi li oumbangi kutya oku na ko nasha nafye shili nohe tu udile oukwao wananghali omolwomaupyakadi oo tu na. Inatu pandula tuu eshi tu na Ohamba nOmupristeri Omukulunhu omunahole! (Ovaheberi 4:15) Otashi dulika shi kale shidjuu kufye okuuda ko omaliudo aumwe oo a kala ta vele oule wefimbo lile, naunene tuu ngeenge itatu vele. Ashike diladila shi na sha naJesus. Okwa kala ha kenukile ovo tava vele nonande ye shidalelwe a vele. Natu kendabale ngaashi hatu dulu tu hopaenene oshihopaenenwa shaye shopahole. — 1 Petrus 3:8.

“JESUS OKWA LILA”

13. Enyumuko laLasarus otali holola shike kombinga yaJesus?

13 Jesus okwa li e linyengifwa neenghono omolwouyahame wavamwe. Pashihopaenenwa, eshi kaume kaye Lasarus a fya, Jesus okwa li a “tukuluka momhepo” ndele “ta kwatwa kolukaka” eshi a mona ovapambele vaLasarus nookaume va nyika oluhodi neenghono. (Lesha Johannes 11:33-36.) Nonande okwa i e shii kutya ota ka nyumuna Lasarus, okwa li a lila. Ka li a tila vamwe va mone  omaliudo aye. Jesus okwa li a longifa eenghono daKalunga opo a alulile Lasarus momwenyo molwaashi okwa li e hole Lasarus neenghono nosho yo ovapambele vaye. — Johannes 11:43, 44.

14, 15. (a) Oshike tashi ulike kutya Jehova okwa hala okukufa po okumona oixuna kwovanhu? (b) Oshike hatu lihongo moutumbulilo, “eembiladimbuluko”?

14 Ombibeli oya hokolola Jesus ya ti okwa fa Xe Jehova filufilu. (Ovaheberi 1:3) Oikumwifilonga yaJesus otai ulike kutya Jehova naye okwa hala okuxulifa po omaudu, ouyahame nosho yo efyo. Mafiku, Jehova naJesus otava ka alulila ovanhu vahapu momwenyo. Jesus okwa ti: “Efimbo tali uya, opo aveshe ava va kala [meembiladimbuluko, NW]” otava ka nyumunwa. — Johannes 5:28, 29.

15 Jesus okwa longifa outumbulilo ‘eembiladimbuluko,’ tau ulike kutya omadiladilo aKalunga okwa kwatelwa mo. Kalunga Omunaenghono, Omushiti weshito alishe, ota ka dimbuluka okanima keshe ke na sha noonakufya vetu ovaholike, mwa kwatelwa omaukwatya avo. (Jesaja 40:26) Jehova ita ka dimbuluka ashike oonakufya molwaashi ta dulu, ndele omolwaashi a hala oku shi ninga. Omanyumuko oo a hokololwa mOmbibeli oku li oihopaenenwa itunhula i na sha naasho tashi ka ningwa mounyuni mupe.

OSHO HATU LIHONGO MOIKUMWIFILONGA YAJESUS

16. Omhito ilipi ovapiya vaKalunga vahapu ve na?

16 Ngeenge otwa kala ovadiinini, otashi dulika tu kale tu na omhito yokumona oshikumwifilonga shimwe osho sha kula neenghono inashi monika nale, shokuxupa poudjuu munene. Diva konima yaHarmagedon, ohatu ka mona oikumwifilonga ihapu. Pefimbo opo, omunhu keshe ota ka kala noukolele we lixwa po. (Jesaja 33:24; 35:5, 6; Ehololo 21:4) Kala nee ngeno wa fa u wete ovanhu tava kupulashi omakende okomesho, eenhondje, omamhango, outemba nosho yo oikwafifi yokuuda ko. Jehova oku shi shii kutya aveshe ovo tava ka xupa puHarmagedon otava ka kala va pumbwa eenghono noukolele molwaashi otava ka longa oilonga ihapu. Ovo tava ka lundululila edu alishe moparadisa iwa. — Epsalme 115:16.

17, 18. (a) Omolwashike Jesus a longa oikumwifilonga? (b) Omolwashike u na okuninga keshe osho sha pumbiwa opo u ka kale mounyuni mupe waKalunga?

17 Kunena “ongudu inene” ohai tuwa omukumo ngeenge tai lesha kombinga yanghee Jesus a velula ovanaudu. (Ehololo 7:9) Oikumwifilonga oyo oya pameka eteelelo letu likumwifi loku ka velulwa filufilu monakwiiwa. Otai ulike yo kohole oyo Omona waKalunga woshiveli e hole nayo ovanhu. (Johannes 10:11; 15:12, 13) Olukeno linene laJesus ola ulika ohole yaJehova yomoule yokuhola ovapiya vaye aveshe. — Johannes 5:19.

18 Ounyuni kunena ou yadi ouyahame, okumona oixuna nefyo. (Ovaroma 8:22) Nomolwaasho twa pumbwa ounyuni mupe waKalunga. Ovanhu aveshe ovo tava ka kala mo otava ka mona oukolele wa wana po oo Kalunga a kala e va udanekela. Omushangwa waMalakia 4:2 otau tu pe eteelelo kutya ohatu ka ‘nuka ngaashi eenhanguda, da dja moshinyongo,’ twa hafa notwa tunhukwa molwaashi otwa velulwa notwa mangululwa mokuhawanenena. Olupandu letu lokupandula Jehova nosho yo eitavelo letu momaudaneko aye nai tu linyengife tu ninge keshe osho sha pumbiwa tu ye mounyuni mupe. Itashi tu tuu omukumo okushiiva kutya oikumwifilonga yaJesus oyo a longa otai ulike kwaasho ovanhu tava ka hafela fiyo alushe mafiku pefimbo lokupangela kwaye.