Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) MEI 2015

Omapulo a dja kovaleshi

Omapulo a dja kovaleshi

Gog yaMagog oo a tumbulwa membo laHesekiel olyelye?

Oule womido dihapu, oishangomwa yetu oya kala tai yelifa kutya Gog yaMagog edina laSatana olo a lukwa konima eshi a umbwa mo meulu. Omolwashike mbela? Omolwaashi embo lEhololo ola popya kutya Satana ota ka kwatela komesho okuponokelwa kwoshiwana shaKalunga mounyuni aushe. (Ehololo 12:1-17) Onghee hano, otwa li tu udite kutya Gog oli na ashike okukala edina limwe laSatana.

Ndele lwanima otwa ka didilika kutya eyelifo olo ola fa inali yela nawa. Diladila kwaashi: Eshi Jehova a popya kombinga yokuhanaunwa po kwaGog okwa ti kutya ote ke mu yandja a ninge ‘eendja keenhwa, oinamavava i lili nai lili nokoilyani yomomufitu.’ (Hesekiel 39:4) Opo nee Jehova okwa weda ko vali ta ti: “Mefiku tuu olo Ame ohandi ka pa Gog onhele yombila muIsrael.” (Hesekiel 39:11) Ndele ongahelipi Satana oo e li oshishitwa shopamhepo ihashi monika ta dulu okulika po keedila nokoilyani yomofuka? Ongahelipi ta dulu okupakwa kombada yedu? Ombibeli otai ulike kutya Satana ota ka umbilwa mombwili, omo ta ka kala oule womido 1 000. Ita ka lika po ile a pakwe. — Ehololo 20:1, 2.

Ombibeli oya ti kutya lwopexulilo lomido 1 000, Satana ota ka kufwa mo mombwili nota “ka hongaula oiwana yokeembinga nhe dedu, Gog naMagog, e va shivile oita.” (Ehololo 20:8) Ndele ngeenge Satana oye Gog, osho osha hala okutya ote ke lihongaula ye mwene. Onghee hano, osha yela kutya “Gog” oo a popiwa membo laHesekiel ile lEhololo ita ulike kuSatana.

Hano olyelye Gog yaMagog? Opo tu mone enyamukulo kepulo olo, otwa pumbwa okukonakona Ombibeli tu mone kutya olyelye ta ka ponokela oshiwana shaKalunga. Ombibeli oya popya eponokelo ‘laGog yaMagog,’ eponokelo ‘lohamba yokonoorde,’ ile tu tye, yokolundume nosho yo eponokelo ‘leehamba dopedu.’ (Hesekiel 38:2, 10-13; Daniel 11:40, 44, 45; Ehololo 17:14; 19:19) Mbela omaponokelo oo okwa yoolokafana? Hasho naanaa. Ombibeli oya fa tai longifa omadina a yoolokafana taa ulike keponokelo limwe. Omolwashike hatu tile ngaho? Omolwaashi Ombibeli oya ti kutya oiwana aishe kombada yedu otai ka kufa ombinga meponokelo olo laxuuninwa opo tapa ka hovela oita yaHarmagedon. — Ehololo 16:14, 16.

 Eshi twa yelekanifa omishangwa adishe dOmbibeli odo da popya kombinga yokuponokelwa lwaxuuninwa kwoshiwana shaKalunga, oda ulika kutya Gog yaMagog ke fi Satana. Ponhele yaasho, Gog yaMagog ota ulike kongudu yoiwana. Mbela ‘ohamba yokonoorde’ oyo tai ka kwatela komesho ongudu oyo? Katu na oushili. Ashike eyelifo olo otali ulike li li metwokumwe naasho Jehova a popya kombinga yaGog a ti: ‘Ove to ka dja mo monhele yoye koxulo yokunoorde, oove noiwana ihapu pamwe naave, vo aveshe ovalondi veenghambe, eemhunga dinene domatanga e neenghono.’ — Hesekiel 38:6, 15.

Sha faafana, omuprofeti Daniel, oo naye a li ko pefimbo limwe naHesekiel okwa popya kombinga yohamba yokonoorde a ti: “Eenghundana dokoushilo nokonoorde otadi ke i halukifa, onghee yo otai ka fikama nehandu linene a hanaune po nokuyapulila enyonauko ovanhu vahapu. Ndele yo otai ka dika otenta youhamba wayo pokati kefuta nomhunda iyapuki yotembeli. Ndelenee exulilo layo otali i hange, ndele kape na ou te i kwafa.” (Daniel 11:44, 45) Osho osha faafana naasho sha popiwa membo laHesekiel kutya osho osho tashi ka ningwa kuGog. — Hesekiel 38:8-12, 16.

Oshike tashi ka ningwa po konima yeponokelo laxuuninwa? Daniel okwa ti: “Mefimbo tuu olo Mikael [Jesus Kristus], omwengeli omukulunhu munene, ou ha popile ovana voshiwana shoye, ota ka fikama [puHarmagedon]. Ndele efimbo olo tali ka kala efimbo lidjuu [oudjuu munene] inali kala ko shito, nghee tuu ovanhu va kala fiyo kefimbo olo. Ndelenee mefimbo tuu olo oshiwana shoye tashi ka xupifwa, keshe umwe ou a shangelwa membo.” (Daniel 12:1) Ehololo 19:11-21 nalo ola popya eendjovo da faafana di na sha naasho Jesus ta ka ninga.

Ndele mbela ‘Gog naMagog’ oo a tumbulwa mEhololo 20:8 olyelye? Edina olo ola yukifwa kwaaveshe ovo tava ka tukulila Jehova oshibofa notava ka ponokela oshiwana shaye pefimbo leyeleko laxuuninwa pexulilo lomido 1 000. Otava ka kala ve na oikala youtondwe ya faafana naayo yaGog yaMagog, oiwana oyo tai ka ponokela oshiwana shaKalunga pexulilo loudjuu munene. Ngaashi ashike oiwana oyo tai ka hanaunwa po puHarmagedon, Gog naMagog naye ota ka hanaunwa po. (Ehololo 19:20, 21; 20:9) Onghee hano, osha fa sha yukila ko eshi aveshe ovo tava ka tukula oshibofa pexulilo lomido 1 000 tava ifanwa “Gog naMagog.”

Tu li ovakonakoni vOmbibeli ovanekeka, otwa halelela okumona kutya olyelye ta ka kala ‘ohamba yokonoorde’ monakwiiwa i li popepi. Ndele kashi na nee mbudi kutya olyelye ta ka wilika oiwana eshi tai ka ponokela oshiwana shaKalunga, otu na oushili woinima ei ivali: (1) Gog yaMagog nomatangakwaita aye ota ka findwa nokuhanaunwa po. (2) Ohamba yetu Jesus Kristus otai ka xupifa oshiwana shaKalunga noku shi twala mounyuni mupe wombili noweameno lashili. — Ehololo 7:14-17.