Inda koshikalimo

Inda kelandulafano etivali

Inda koshikalimo

Eendombwedi daJehova

Oshikwanyama

Oshungonangelo — Oshifo shokukonakonwa  |  Aprili 2015

Nghee ovakulunhuongalo hava deula vamwe opo va kale va pyokoka

Nghee ovakulunhuongalo hava deula vamwe opo va kale va pyokoka

“Osho wa uda kuame . . . , shi yandja kovalumenhu ve shi kulineekelwa.” — 2 TIMOTEUS 2:2.

1. (a) Ovapiya vaKalunga ova kala va shiivikila shike shi na sha nokudeula vamwe, naasho otashi longo ngahelipi kunena? (b) Oshike hatu ka kundafana moshitukulwa eshi?

OSHIWANA shaKalunga osha kala alushe shi shii kutya okudeula vamwe ohaku eta oidjemo iwa. Pashihopaenenwa, Abraham okwa li a unganeka ‘ovalumenhu vaye’ va deulwa, ovo va li va pondola mokulwa opo va xupife Lot. (Genesis 14:14-16) Ovaimbi vopefimbo laDavid ova li va deulwa ile ‘va hongwa’ okwiimba omaimbilo oo taa tange Jehova. (1 Omafimbo 25:7) Kunena otu na okulwifa Satana nounyuni waye. (Ovaefeso 6:11-13) Ohatu longo yo noudiinini opo tu tange Jehova mokulombwela vamwe kombinga yedina laye. (Ovaheberi 13:15, 16) Ngaashi ovapiya vaKalunga vonale, opo tu pondole, otu na okudeulwa. Jehova okwa yandja oshinakuwanifwa kovakulunhuongalo meongalo shokudeula vamwe. (2 Timoteus 2:2) Eenghedi dilipi ovakulunhuongalo vamwe va longifa opo va deule ovamwatate va file oshisho oshiwana shaJehova?

PAMEKA OHOLE YOMUDEULWA YOKUHOLA JEHOVA

2. Oshike osho omukulunhuongalo ta dulu okuninga fimbo ina honga sha omudeulwa, nomolwashike?

2 Omukulunhuongalo ota dulu okufaafanifwa nomunepya.  Fimbo ina kuna eembuto, omunepya otashi dulika a pumbwa okuweda mo oushosho medu opo oimeno i kule nawa. Monghedi ya faafana, fimbo omukulunhuongalo ina honga omudeulwa oinima ipe, otashi dulika e mu pule va leshe omafinamhango Ombibeli onhumba oo taa ka kwafela omudeulwa a kale e lilongekida okutula moilonga osho te lihongo. — 1 Timoteus 4:6.

3. (a) Ongahelipi tashi dulika eendjovo daJesus odo tadi hangwa muMarkus 12:29, 30 tadi dulu okulongifwa eshi taku kundafanwa nomudeulwa? (b) Ongahelipi eilikano lomukulunhuongalo tali dulu okukuma omudeulwa?

3 Osha fimana okuuda ko nghee oshili ya kuma omadiladilo nomaliudo omudeulwa. Opo u ninge ngaho, otashi dulika wa pumbwa okupula kutya okuliyapulila kwaye Jehova okwa kuma ngahelipi omatokolo aye monghalamwenyo. Epulo la tya ngaho otali dulu okushingila eenghundafana koshitwa shanghee hatu dulu okulongela Jehova nomutima wetu aushe. (Lesha Markus 12:29, 30.) Otashi dulika nokuli wa pumbwa okwiilikana pamwe nomumwatate u pule Jehova e mu pe omhepo yaye iyapuki oyo a pumbwa eshi ta deulwa. Ngeenge omumwatate okwa udu to mu ilikanene, otashi ke mu ladipika opo a ninge shihapu.

4. (a) Yandja oihopaenenwa yomahokololo opaMbibeli oyo tai dulu okukwafela omuhongwa a ninge exumokomesho. (b) Ovakulunhuongalo ove na okukala ve na elalakano lilipi eshi tava deula vamwe?

4 Ngeenge owa hovele okudeula umwe, oshiwa okukundafana naye omahokololo onhumba Ombibeli oo tae ke mu kwafela a mone kutya osha fimana okukala e na ehalo okukwafela, e shii okulineekelwa nomulininipiki. (1 Eehamba 19:19-21; Nehemia 7:2; 13:13; Oilonga 18:24-26) Omaukwatya oo okwa fimana komuhongwa ngaashi ashike edu la pumbwa oushosho. Otae ke mu kwafela a kule, sha hala okutya, a ninge exumokomesho meendelelo. Omukulunhuongalo wokoFrance wedina Jean-Claude okwa ti kutya elalakano laye ngeenge ta deula vamwe oku va kwafela va ninge omatokolo opandunge e likolelela komafinamhango Ombibeli. Okwa ti: “Ohandi kongo eemhito opo tu dule okulesha omushangwa pamwe naao handi deula opo ndi ‘pashukife omesho’ aye a mone ‘oikumwifa,’ oyo i li mEendjovo daKalunga.” (Epsalme 119:18) Omeenghedi vali dilipi taku dulu okupamekwa ohole yaao ta deulwa?

NINGA OMAETEPO OMALALAKANO OO TA DULU OKULITULILA PO NONOKUTYA OMOLWASHIKE

5. (a) Ongahelipi sha fimana okukundafana nomudeulwa shi na sha nomalalakano aye moilonga yaJehova? (b) Omolwashike ovakulunhuongalo ve na okudeula ovo ve li natango ovanyasha? (Tala eshangelo lopedu.)

5 Pula omuhongwa kutya okwe litulila po omalalakano elipi moilonga yaJehova. Ngeenge ine litulila po omalalakano, mu kwafela e litulile  po olo ta dulu okuhanga. Popya nexwamo ngeenge to mu lombwele shi na sha nelalakano olo wa li we litulila po, nonghee wa li u udite eshi we li hanga. Onghedi oyo oya fa yanafangwa ashike ohai pondola. Omukulunhuongalo omukokolindjila umwe womuAfrika wedina Victor okwa ti: “Eshi nda li omunyasha, omukulunhuongalo umwe okwa li a pula nge omapulo onhumba shi na sha nomalalakano ange. Omapulo oo okwa li a kwafela nge ndi diladile nda mana mo shi na sha noukalele wange.” Ovakulunhuongalo va pyokoka ova ti kutya osha fimana okudeula ovamwatate fimbo ve li ovanyasha, tashi dulika fimbo ve li mepupi lomido omulongo nasha. Oto dulu oku va pa oilonga yonhumba meongalo she likolelela komido davo. Ngeenge ovamwatate ova deulwa fimbo ve li ovanyasha, otashi dulu oku va kwafela va kale tava yandje elitulemo komalalakano avo nokuli nofiyo osheshi va kula nove na omaimbo mahapu. — Lesha Epsalme 71:5, 17. * (Tala eshangelo lopedu.)

Yelifila omumwatate kutya omolwashike oshilonga osho we mu pa shi na okulongwa, noku mu pandula omolweenghendabala daye (Tala okatendo 5-8)

6. Onghedi ya fimana ilipi Jesus a li a longifa eshi ta deula vamwe?

6 Opo u ladipike omuhongwa a yakule, owa pumbwa okuninga shihapu shihe fi ashike oku mu lombwela osho e na okuninga. Ou na yo oku mu yelifila kutya omolwashike sha fimana oku shi ninga. Omuhongi Munene, Jesus, okwa li a  lombwela ovayapostoli vaye va udife. Ashike tete okwa li e va lombwela etomheno kutya omolwashike ve na okudulika. Okwa ti: “Ame onda pewa eenghono adishe meulu nokombada yedu. Indeni hano ka ningeni ovanhu aveshe ovalongwa vange.” (Mateus 28:18, 19) Ongahelipi to dulu okuhopaenena onghedi yaJesus yokudeula?

7, 8. (a) Ongahelipi ovakulunhuongalo kunena tava dulu okuhopaenena onghedi yaJesus yokudeula? (b) Ongahelipi sha fimana okupandula omuhongwa? (c) Omaetepo elipi taa dulu okukwafela ovakulunhuongalo va deule vamwe? (Tala oshimhungu, “ Nghee u na okudeula vamwe.”)

7 Ngeenge oto lombwele omumwatate a longe oshilonga shonhumba, mu yelifila okudja mOmbibeli kutya omolwashike oshilonga osho sha fimana. Mokuninga ngaho, oto mu hongo a kale ta ningi oinima omolwomafinamhango Ombibeli ndele hamolweemhango ashike. Pashihopaenenwa, ngeenge owa lombwele omumwatate a kale ha wapaleke poshivelo shOlupale lOuhamba opo pa dule okweendwa noupu, oto dulu oku mu leshela Titus 2:10. Mu yelifila kutya ongahelipi oshilonga shaye tashi ka ningifa etumwalaka lOuhamba li kale lihokwifa. Shikwao vali, pula omuhongwa a diladile shi na sha novanamido ovo ve li meongalo nonghee okulonga oshilonga osho tashi ke va kwafela. Eenghundafana da tya ngaho, otadi ke mu deula a kale ha diladila unene kovanhu ndele hakeemhango ashike. Eshi ta ka mona nghee ovamwatate novamwameme tava mono ouwa omolwoilonga yaye, ota ka kala a hafa eshi ta yakula vamwe.

8 Kala yo ho pandula omuhongwa omolwokutula moilonga omaetepo oye. Osho osha fimana ngahelipi? Ngaashi ashike omeva haa kwafele oshimeno shi kule noshi kale sha hafa nawa, okupandula omuhongwa otaku mu kwafele a ninge exumokomesho moilonga yaye yokulongela Jehova. — Yelekanifa naMateus 3:17.

OUPYAKADI UMWE VALI

9. (a) Omolwashike tashi dulika shi kale shidjuu kovakulunhuongalo ovo ve li moilongo ya hepuluka okudeula vamwe? (b) Omolwashike ovamwatate vamwe ovanyasha inava pitifa komesho monghalamwenyo yavo okulongela Kalunga?

9 Ovakulunhuongalo ovo ve li moilongo oyo ya hepuluka otashi dulika va mone shidjuu okuladipika ovamwatate ovo va ninginifwa nove li pomido 20 nasha ile 30 nasha va ninge shihapu meongalo. Ovakulunhuongalo va pyokoka vomoilongo i fike 20 lwaapo, ova popya kutya omolwashike ovamwatate vamwe ovanyasha ihava longo shihapu meongalo. Vahapu vomuvo ova ti kutya, eshi ovamwatate vamwe va li ovanyasha, ovadali vavo inave va ladipika ve litulile po omalalakano moilonga yaJehova. Nongeenge ovamwatate vamwe ovanyasha va hala okulonga shihapu, ovadali vavo ohave va ladipike ve litulile po omalalakano okuya kehongo lopombada ile eifano lonhumba mounyuni. Onghee hano, ihava pitifa komesho okulongela Jehova monghalamwenyo yavo. — Mateus 10:24.

10, 11. (a) Ongahelipi omukulunhuongalo ta dulu okukwafela kanini nakanini omumwatate a lundulule onghedi yaye yokudiladila? (b) Omishangwa dilipi omukulunhuongalo ta dulu okulongifa opo a ladipike omumwatate, nomolwashike? (Tala eshangelo lopedu.)

10 Ngeenge omumwatate ota monika a fa ehe na ohokwe mokulonga shihapu meongalo, otashi ka pula oilonga ihapu nelididimiko opo a lundulule okudiladila kwaye, ashike ota dulu okulundulula. Omunepya ota dulu okukwafela oshimeno shi kule nawa sha yukilila mokutula sha pusho osho tashi yambidida efina lasho. Sha faafana, oto dulu okukwafela kanini nakanini omumwatate a mone kutya okwa pumbwa okulundulula oikala yaye i na sha nokutambula oinakuwanifwa ya wedwa po meongalo. Ndele mbela osho otashi ningwa ngahelipi?

11 Konga efimbo lokupanga oukaume nomumwatate.  Mu kufila ko kutya eongalo ole mu pumbwa. Opo nee mokweendela ko kwefimbo, kala naye omutumba nokutomhafana naye to longifa omishangwa odo tadi dulu oku mu kwafela a diladile shi na sha nokuliyapulila kwaye Jehova. (Omuudifi 5:3; Jesaja 6:8; Mateus 6:24, 33; Lukas 9:57-62; 1 Ovakorinto 15:58; 2 Ovakorinto 5:15; 13:5) Kendabala oku mu pula omapulo oo taa hange omutima waye, ngaashi: ‘Oshike wa udanekela Jehova eshi we mu liyapulila onghalamwenyo yoye? Oto diladila kutya Jehova okwa li e udite ngahelipi eshi wa ninginifwa?’ (Omayeletumbulo 27:11) ‘Satana okwa li e udite ngahelipi?’ (1 Petrus 5:8) Omishangwa da tya ngaho otadi dulu okukala di na eenghono notadi dulu okukuma omutima womumwatate. — Lesha Ovaheberi 4:12. * (Tala eshangelo lopedu.)

OVAHONGWA, KALENI OVADIININI

12, 13. (a) Elisa okwa li a ulika oikala ilipi e li omuhongwa? (b) Ongahelipi Jehova a li a nangeka noupuna Elisa omolwoudiinini waye?

12 Ovamwatate ovanyasha, eongalo ola pumbwa ekwafo leni! Oikala ilipi tai ke mu kwafela mu pondole eshi tamu longele Jehova? Opo tu mone enyamukulo, natu ka kundafaneni oiningwanima imwe oyo ya ningwa monghalamwenyo yomuhongwa wopefimbo lonale, wedina Elisa.

13 Omido 3 000 lwaapo da ka lupuka, omuprofeti Elia okwa li a lombwela omunyasha Elisa a ninge omupiya waye. Elisa okwa li a dimina diva, nokwa li ha longele noudiinini omuprofeti oo oilonga idinifa. (2 Eehamba 3:11) Elia okwa li a deula Elisa oule womido hanga hamano lwaapo. Opo nee eshi omuprofeti Elia a li pokumanifa oilonga yaye muIsrael, okwa li a lombwela omupiya waye kutya ite ke mu longela vali. Ndele Elisa okwa li a popya lwoikando itatu a ti: “Ito fii nge po.” Okwa li a tokola toko a kale nomuhongi waye. Jehova okwa li a nangeka noupuna Elisa omolwoudiinini neitavelo laye eshi a li a shikula Elia, ndele ta mono eshi Elia a vakulwa po moshikungulu shomhepo. — 2 Eehamba 2:1-12.

14. (a) Ongahelipi ovahongwa kunena tava dulu okuhopaenena Elisa? (b) Omolwashike sha fimanenena komuhongwa okukala omudiinini?

14 Ongahelipi to dulu okuhopaenena Elisa u li omuhongwa? Kala ho tambula ko oinakuwanifwa nopehe na okwoongaonga, nokuli naayo ya fa idinifa. Dimbuluka kutya omuhongi woye okaume koye. Mu lombwela kutya owa pandula osho te ku ningile noku mu ulikila kutya owa hala okutwikila okuhongwa kuye. Osho sha fimanenena osho okuwanifa po oinakuwanifwa yoye noudiinini. Omolwashike mbela? Omolwaashi ngeenge owa ulike kutya ou li omudiinini nou shii okulineekelwa, ovakulunhuongalo otava dulu okukala noushili kutya Jehova okwa hala u pewe oinakuwanifwa ya wedwa po meongalo. — Epsalme 101:6; lesha 2 Timoteus 2:2.

FIMANEKA OVAKULUNHUONGALO OMOLWOWINO WAVO

15, 16. (a) Omeenghedi dilipi Elisa a li a ulika kutya okwa fimaneka omuhongi waye? (Tala efano pehovelo loshitukulwa.) (b) Omolwashike ovaprofeti vamwe va li va itavela Elisa?

15 Ehokololo laElisa otali ulike yo kutya osha fimana kovamwatate kunena va fimaneke ovakulunhuongalo omolwowino wavo. Konima eshi Elia naElisa va li va talela po ongudu yovaprofeti oyo ya li muJeriko, ovalumenhu ovo vavali ova li ve uya komulonga waJordan. Opo nee “Elia a kufa elwakani laye, e li tonya ndee ta denge momeva. Nomeva a tukauka kombinga  nombinga.” Ovalumenhu ovo ova li va tauluka omulonga waJordan tava ende poukukutu nova li tava ‘kundafana eshi tava ende.’ Elisa okwa li a pwilikina nelitulemo kukeshe osho omuhongi waye ta popi nokwa li a twikila okulihonga. Elisa ka li e litala ko e shii keshe shimwe. Elia okwa li a vakulwa po moshikungulu shomhepo, na Elisa okwa li a shuna komulonga waJordan. Eshi a ya ko, okwa li a denga omeva noshikutu shaElia ndele ta ti: “Omwene Kalunga kaElia oku li peni?” Natango, omeva omulonga okwa li a tukauka. — 2 Eehamba 2:8-14.

16 Owa didilika ngoo kutya oshikumwifilonga shaElisa shotete osha li sha fa filufilu shaElia shaxuuninwa? Osho otashi tu hongo shike? Elisa ka li e udite kutya molwaashi oye a ya ponhele yaElia oku na okuninga oinima monghedi ya yooloka ko kwaayo Elia e i ninga. Ponhele yaasho, Elisa okwa li a ulika kutya okwa fimaneka omuhongi waye mokuhopaenena onghedi yaElia yokuninga oinima, naasho osha li sha kwafela ovaprofeti vamwe va itavele Elisa. (2 Eehamba 2:15) Elisa okwa longa e li omuprofeti oule womido 60, na Jehova okwa li e mu pa eenghono dokulonga oikumwifilonga ihapu i dule yaElia. Oshike osho ovahongwa vokunena tave lihongo mo?

17. (a) Ongahelipi ovahongwa kunena tava dulu okuhopaenena oikala yaElisa? (b) Ongahelipi Jehova ta ka dula okulongifa ovahongwa ovadiinini?

17 Ngeenge owa pewa oinakuwanifwa ya wedwa po meongalo, ino kala u udite kutya ou na oku i wanifa po monghedi ya yooloka ko filufilu kwaayo ya kala hai ningwa. Dimbuluka kutya, omalunduluko ohaa ningwa omolwomhumbwe meongalo ile omolwewiliko olo tali di kehangano laJehova. Ku na okuninga omalunduluko molwaashi ashike osho wa hala. Eshi Elisa a kala nokuninga oinima ngaashi Elia, okwa li a kwafela ovaprofeti vakwao ve mu itavele nokwa li a ulika kutya okwa fimaneka omuhongi waye. Sha faafana, ngeenge oto twikile okulongifa eenghedi dokuninga oinima dovahongi voye odo da kanghamena kOmbibeli, oto ulike kutya owa fimaneka ovakulunhuongalo va pyokoka, novamwaxo otava ka kala ve ku lineekela. (Lesha 1 Ovakorinto 4:17.) Eshi to ende to pyokoka, oto ka tula moilonga omalunduluko oo taa ka kwafela eongalo li endele pamwe nehangano laJehova, olo tali pula alushe komesho. Opo nee Jehova ota ka dula oku ku kwafela u longe oilonga inene i dule yomuhongi woye, ngaashi ashike a li a kwafela Elisa a ninge. — Johannes 14:12.

18. Omolwashike sha endelela okudeula ovamwatate momaongalo?

18 Otwe lineekela omaetepo aa e li moshitukulwa eshi naashi sha tetekela otaa ka ladipika ovakulunhuongalo vahapu va konge efimbo lokudeula vamwe. Ohatu indile yo opo ovamwatate vahapu va kale ve na ehalo lokudeulwa nova longife osho ve lihonga opo va kwafele oshiwana shaJehova. Osho otashi ka pameka omaongalo mounyuni aushe notashi ke tu kwafela atusheni tu kaleni ovadiinini pefimbo olo lididilikwedi twa taalela.

^ okat. 5 Ngeenge omumwatate omunyasha oku liwetikile kutya okwa kula pamhepo, omulininipiki noku na yo omaukwatya amwe oo a pumbiwa mokuyakula meongalo, ovakulunhuongalo otashi dulika ve mu popile a nangekwe po e li omuyakuliongalo nonande ina wanifa natango omido 20. — 1 Timoteus 3:8-10, 12; tala Oshungonangelo yOshiingilisha ye 1 Juli 1989, epandja 29.

^ okat. 11 Oto dulu okukundafana oitwa oyo i li mOshungonangelo yo 15 Aprili 2012, epandja 14-16, okatendo 8-13; nosho yo membo “Likalekeni mohole yaKalunga,” etukulwa 16, okatendo 1-3.