Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) MARSA 2015

“Osho she ku wapalela”

“Osho she ku wapalela”

“Oinima ei we i holeka ovanaendunge novanongo ndele owe i hololela ava va fa ouhanana.” — LUKAS 10:21.

1. Omolwashike Jesus a li a ‘hafela pombada momhepo iyapuki’? (Tala efano pehovelo loshitukulwa.)

KALA nee ngeno wa fa u wete Jesus eshi a li a ‘hafela pombada momhepo iyapuki.’ Otashi dulika a li te limemesha noku na omesho e yadi ehafo. Omolwashike mbela? Jesus okwa li ashike opo a tumu ovahongwa vaye 70 va ka udife onghundana iwa yOuhamba waKalunga. Molwaashi opa li ovatondi vahapu ovanaenghono vonghundana iwa, Jesus okwa li a halelela okumona nghee ovahongwa vaye tava wanifa po oshinakuwanifwa shavo. Ovatondi ovo ova li va kwatela mo ovanongo vomishangwa nosho yo Ovafarisai ovo va li va hongwa neenghono nova li ve na eendunge. Ova li va hala ovanhu va kale va tala ko Jesus e li ashike omuhongi woipilangi novahongwa vaye “ovanhu vongaho, inava longwa.” (Oilonga 4:13; Markus 6:3) Ndele nande ongaho, ovahongwa ova li va hafa neenghono eshi va aluka koshilonga shavo. Ova li va udifa nonande opa li omapataneko, nokuli nokudja keendemoni. Oshike sha li she va kwafela va kale ve na ouladi nova hafa? — Lesha Lukas 10:1, 17-21.

Oshiwana shaKalunga osha xwepopaleka onghedi yasho yokuhonga i kale i li paunafangwa noya yela

2. (a) Omeityo lilipi ovahongwa vaJesus va li ngaashi ounona? (b) Oshike she va kwafela va ude ko oshili yOmbibeli yomoule?

2 Jesus okwa lombwela Jehova a ti: “Ohandi ku hambelele, Tate,  Omwene weulu nowedu, osheshi oinima ei Ove we i holeka ovanongo novanaendunge, ndele we i hololela eehanana. Heeno, Tate, osheshi osho tuu ngaha she ku wapalela.” (Mateus 11:25, 26) Omolwashike Jesus a li a ifana ovahongwa vaye eehanana? Omolwaashi ovahongwa vaJesus ova li va halelela okuhongwa ngaashi ounona, ndele kava li ngaashi ovanongo vomishangwa nOvafarisai ovo va li va hongwa nova li tava diladila kutya ove na eendunge. Ova li ve lihonga okukala ovalininipiki, ndele hakukala nounhwa. (Mateus 18:1-4) Molwaashi ova li ovalininipiki, Jehova okwa li a longifa omhepo yaye iyapuki e va kwafele va ude ko oshili yOmbibeli yomoule. Ndele ovawiliki velongelokalunga lOshijuda ovo va li ve na ounhwa ova kala va twikifwa kuSatana nokounhwa wavo.

3. Oshike hatu ka kundafana moshitukulwa eshi?

3 Ope na oumbangi wa yela oo tau ulike kutya omolwashike Jesus a li a hafa. Okwa li a hafa okumona nghee Jehova a hololela ovanhu ovalininipiki oshili yOmbibeli yomoule, kashi na nee mbudi kutya ouhongelwe wavo owa li wa tya ngahelipi. Kalunga iha lunduluka, natango oku hole onghedi yokuhonga ya tya ngaho. Oha ulike ngahelipi kutya natango okwe i hokwa? Moshitukulwa eshi, ohatu ke lihonga nghee Jehova a hololela ovanhu ovalininipiki kunena oshili yOmbibeli yomoule.

OKUYELIFILA OVANHU AVESHE OSHILI YOMOULE

4. Omeenghedi dilipi Oshungonangelo ya pupalekwa i li oshali?

4 Omido opo da di ko, ehangano laKalunga ola kala tali divilike efimano lokuhonga monghedi i li paunafangwa noya yela. Natu ka kundafaneni oihopaenenwa itatu. Shotete, ope na Oshungonangelo yokukonakonwa ya pupalekwa. * (Tala eshangelo lopedu.) Oshungonangelo oyo oi li oshali oyo ya kwafela vahapu, mwa kwatela ovo vehe shii okulesha nawa ile vehe udite ko nawa elaka, ngaashi Oshiingilisha. Omaukwaneumbo okwa mona kutya Oshungonangelo oyo ya pupalekwa oya kwafela ovana vavo va kale ve udite ko nawa oitukulwa. Vahapu ova shanga eenhumwafo dolupandu. Omumwameme umwe okwa ti kutya okwa li ha kala a tila okuyandja omilombo pefimbo lekonakono lOshungonangelo. Ashike paife iha kala vali e udite ngaho. Konima eshi a hovela okulongifa Oshungonangelo oyo ya pupalekwa, okwa shanga a ti: “Paife ohandi nyamukula lwoikando i dulife pushimwe, noihandi kala vali nda tila. Ohandi pandula Jehova nanye yo mwa kwatelwa mo.”

5. Ombibeli ya pepalekwa yo-New World Translation of the Holy Scriptures oi na omauwa amwe elipi?

5 Oshitivali, ope na Ombibeli ya pepalekwa yo-New World Translation of the Holy Scriptures, oyo ya nyanyangidwa mOshiingilisha noya li ya yandjwa pokwoongala kwokomudo mo 5 Oktoba 2013. * (Tala eshangelo lopedu.) Omishangwa dihapu oda longifa oitya inini, ashike eityo inali lunduluka nodi pu okuudiwa ko. Pashihopaenenwa, Job 10:1 nale okwa li e  na oitya 27, paife oi li ashike 19, nOmayeletumbulo 8:6 nale okwa li e na oitya 20, paife oi li ashike 13. Paife eevelishe odo dopavali oda yela nawa mOmbibeli ei ipe. Omumwatate umwe omuvaekwa oo a kala ta longele Jehova noudiinini oule womido dihapu okwa ti: “Onda lesha embo laJob mOmbibeli ipe, ndele ondi li udite ko nda fa ashike opo handi li lesha oshikando shotete!” Vahapu ova popya yo eendjovo da yukila oko.

6. Ou uditile ngahelipi eudeko letu la yela nawa li na sha naMateus 24:45-47?

6 Oshititatu, diladila kombinga yomapepaleko amwe oo opo a ningwa e na sha neudeko letu lomishangwa donhumba. Pashihopaenenwa, eudeko la yela nawa li na sha ‘nomupiya omudiinini nomunaendunge’ ola nyanyangidwa mOshungonangelo yo 15 Juli 2013. (Mateus 24:45-47) Oshitukulwa osho osha yelifa kutya omupiya omudiinini Olutuwiliki. Osha yelifa yo kutya ‘ovapiya’ ovavaekwa nosho yo “eedi” dimwe, ovo tava palulwa komupiya omudiinini. (Johannes 10:16) Otwa hafa eshi twe lihonga kombinga yoshili oyo, notwa tunhukwa yo oku i honga vamwe. Omeenghedi vali dilipi Jehova a ulika kutya okwa hokwa omahongo oo e li paunafangwa nokwa yela?

EYELIFO LI LI PAUNAFANGWA LOMAHOKOLOLO OMBIBELI

7, 8. Oihopaenenwa imwe yomahokololo Ombibeli ilipi tai faneke sha sha fimanenena shomonakwiiwa?

7 Ngeenge owa kala to longele Jehova oule womido dihapu, otashi dulika wa didilika elunduluko olo la ningwa po li na sha nonghedi omo oileshomwa yetu ya yelifa omahokololo amwe Ombibeli. Nale, luhapu okwa li haku tiwa kutya omahokololo amwe otaa faneke oinima ya fimanenena oyo tai ka ningwa monakwiiwa. Omahokololo oo okwa li haa yelifwa taku longifwa outumbulilo osho tashi faneke, naasho shi lilwe po kwaashi tashi faneke osha li hashi ifanwa, osho tashi fanekwa. Mbela opa li ngoo omatomheno mawa okuyelifa omahokololo Ombibeli monghedi ya tya ngaho? Heeno. Pashihopaenenwa, Jesus okwa popya kombinga ‘yedidiliko lomuprofeti Jona.’ (Lesha Mateus 12:39, 40.) Okwa yelifa kutya efimbo olo Jona a kala medimo loshi, otali faneke efimbo olo Jesus a li ta ka kala mombila.

Ohashi pameke eitavelo letu okukonakona omahokololo Ombibeli nosho yo osho taa faneke

8 Ope na omahokololo amwe vali Ombibeli oo taa faneke oinima ya fimanenena oyo tai ka ningwa monakwiiwa. Omuyapostoli Paulus okwa tumbula mahapu omuo. Pashihopaenenwa, ekwatafano pokati kaAbraham naHagar nosho yo naSara, otali faneke ekwatafano pokati kaJehova noshiwana shaIsrael nosho yo oshitukulwa shomeulu shehangano laKalunga. (Ovagalati 4:22-26) Sha faafana, etwali, otembeli, Efiku lEkwatakanifo, omupristeri omukulunhu nosho yo oinima ikwao ya pamba Omhango oya li “omudidimbe wongaho wouwa wokomesho.” (Ovaheberi 9:23-25; 10:1) Ohashi pameke eitavelo letu okukonakona omahokololo oo Ombibeli nosho yo osho taa faneke. Ndele mbela osho osha hala kutya omunhu, oshiningwanima noshinima keshe osho sha popiwa mOmbibeli otashi faneke umwe ile oshinima shonhumba?

9. Ongahelipi ehokololo lOmbibeli li na sha naNabot la li la yelifwa?

 9 Nale, oileshomwa yetu luhapu oya kala hai yelifa kutya omunhu keshe, oshiningwanima ile oshinima shi li momahokololo amwe otashi faneke omunhu wonhumba ile oshinima shonhumba. Pashihopaenenwa, ohambakainhu ikolokoshi Isebel oya li ya dipaifa Nabot opo omushamane wayo, Ahab, a dule okukufa po oshikunino shomiviinyu shaNabot. (1 Eehamba 21:1-16) Mo 1932, Oshungonangelo oya li ya yelifa kutya Ahab naIsebel otava faneke Satana nehangano laye, ofimbo Nabot ta faneke Jesus, nonokutya efyo laNabot otali faneke okudipawa kwaJesus. Ndele mo 1961, embo “Let Your Name Be Sanctified” ola ti kutya Nabot ota faneke ovavaekwa ofimbo Isebel ta faneke Oukwakriste. Ola ti yo kutya okuhepekwa kwaNabot kuIsebel otaku faneke okuhepekwa kwovavaekwa momafiku axuuninwa. Omayelifo oo okwa li a pameka eitavelo loshiwana shaKalunga oule womido dihapu. Ndele mbela omolwashike paife hatu yelifa oinima monghedi ya yooloka ko kwaayo yonale?

10. (a) Omonghedi ilipi omupiya omudiinini a lungama shi dulife nale ngeenge ta yelifa omahokololo onhumba Ombibeli? (b) Oileshomwa yetu ohai yandje elitulemo unene kushike kunena?

10 Oule womido, Jehova okwa li a kwafela “omupiya omudiinini nomunaendunge” a kale omunaendunge ile a lungama. Omonghedi ilipi mbela? Paife omupiya omudiinini oha popi ashike kutya ehokololo lOmbibeli otali  faneke sha sha fimanenena ngeenge ope na etomheno la yela lOpamishangwa lokuninga ngaho. Omayelifo amwe makulu e na sha naasho tashi faneke nosho yo osho tashi fanekwa okwa li madjuu okuuda ko, okudimbuluka nokutula moilonga. Osho sha fimanenena, ngeenge elitulemo lihapu ola yandjwa ashike keityo la fimanenena lomahokololo Ombibeli, oilihongomwa yopaenghedi ile oyo tai longo ihai pewa elitulemo. Onghee hano, kunena oileshomwa yetu ohai yandje elitulemo koilihongomwa i li paunafangwa i na sha neitavelo, elididimiko, eliyandjo lometilokalunga nosho yo omaukwatya amwe a fimana oo hatu dulu okulihonga momahokololo Ombibeli. * — Tala eshangelo lopedu.

Oshihopaenenwa shaNabot otashi tu hongo oshilihongomwa sha fimana (Tala okatendo 11)

11. (a) Otu udite ko ngahelipi paife ehokololo li na sha naNabot, nongahelipi oshihopaenenwa shaye tashi tu kwafele? (b) Omolwashike omido edi oileshomwa yetu ihai longifa vali naanaa outumbulilo, osho tashi faneke nosho yo osho tashi fanekwa? (Tala oshitukulwa, “Omapulo a dja kovaleshi,” moshifo eshi.)

11 Eudeko letu li na sha nehokololo laNabot paife ola yela nawa noli li paunafangwa. Nabot ka li a fya molwaashi ta faneke Jesus ile ovavaekwa. Ndele ponhele yaasho, okwa fya molwaashi okwa li a tokola toko okukala omudiinini kuKalunga. Okwa kala ta dulika kOmhango yaJehova nonande opa li omahepeko manene okudja komupangeli omunaenghono. (Numeri 36:7; 1 Eehamba 21:3) Osho kashi fi tuu oshihopaenenwa shiwa kovapiya vaKalunga aveshe kunena ovo tashi dulika navo tave lididimikile omahepeko a faafana! (Lesha 2 Timoteus 3:12.) Ovakriste aveshe otava dulu okuuda ko, okudimbuluka, okutula moilonga oshilihongomwa osho nokupameka eitavelo lavo.

12. (a) Oshike tuhe na okufika pexulifodiladilo lasho shi na sha nomahokololo Ombibeli? (b) Omolwashike hatu dulu okukala neyelifo la yela nokuli noloinima yomoule? (Tala eshangelo lopedu.)

12 Mbela otu na okufika pexulifodiladilo kutya omahokololo Ombibeli oku na ashike oilihongomwa tai longo, ndele kae na vali eityo limwe? Ahowe. Ponhele yokuyelifa kutya omahokololo amwe otaa faneke sha ile mu na osho tashi fanekwa, oishangomwa yetu paife ohai yandje elitulemo lihapu kunghee ehokololo limwe lOmbibeli la pambafana nalikwao. Pashihopaenenwa, oudiinini waNabot nonande okwa li ta hepekwa nosho yo okufya kwaye, otai tu dimbulukifa oudiinini waKristus nowovavaekwa. Ashike otau tu dimbulukifa yo oudiinini wavahapu ‘vomeedi’ dimwe. Osho otashi tu ulikile nghee Jehova te tu hongo monghedi i li paunafangwa. * — Tala eshangelo lopedu.

 EYELIFO LI LI PAUNAFANGWA LOMAFANEKO AJESUS

13. Oihopaenenwa ilipi tai ulike kutya paife otwa yelifa omafaneko amwe aJesus monghedi i li paunafangwa noya yela nawa?

13 Jesus Kristus okwa li Omuhongi munenenene oo a li ko nale. Okwa li e hole okulongifa omafaneko ile oihopaenenwa eshi ta hongo. (Mateus 13:34) Omafaneko ohaa pondola molwaashi ohaa yelifa omadiladilo oo madjuu okuudiwa ko monghedi i li paunafangwa oyo tai dulu oku tu ningifa tu diladile, notaa dulu okukuma omitima detu. Oule womido, oileshomwa yetu oya kala tai yelifa omafaneko aJesus monghedi i li paunafangwa noya yela nawa. Pashihopaenenwa, Oshungonangelo ye 1 Juli 2008 oye tu kwafela tu ude ko monghedi ya yela nawa efaneko laJesus li na sha nonhafi, ombuto yoshinapi noshiyulifo sheeshi. Paife otu wete kutya omafaneko oo okwa yukifwa kOuhamba waKalunga, naasho osha kwafela ovanhu vahapu va efe po ounyuni ou woukolokoshi nova ninge ovahongwa vaKristus.

Omafaneko ohaa pondola molwaashi ohaa yelifa omadiladilo oo madjuu okuudiwa ko monghedi i li paunafangwa oyo tai dulu oku tu ningifa tu diladile, notaa dulu okukuma omitima detu

14. (a) Otwa li twa yelifa ngahelipi efaneko lOmusamaria omunalukeno? (b) Otu udite ko ngahelipi paife efaneko olo laJesus?

14 Ongahelipi hatu dulu okuuda ko moule omahokololo ile omafaneko oo Jesus a li a longifa? Omahokololo amwe oo a li a longifa otaa faneke sha ile opaxunganeko. Ofimbo amwe taa hongo oilihongomwa tai longo. Ndele ongahelipi hatu dulu okuufa kutya omahokololo amwe otaa faneke sha ofimbo amwe itaa faneke sha? Oule womido, enyamukulo kepulo olo ola enda tali yela. Pashihopaenenwa, diladila kombinga yonghedi omo twa li hatu yelifa efaneko laJesus li na sha nOmusamaria omunalukeno. (Lukas 10:30-37) Mo 1924, Oshungonangelo oya li ya popya kutya Omusamaria ota faneke Jesus nonokutya ondjila oyo ya tavakana koikulundudu yaJerusalem ya finda kuJeriko otai faneke okunaipala kweenghalo dovanhu okudja pounashibofa womuEden. Natango oya ti yo kutya eembudi odo da li hadi kala mondjila oyo otadi faneke omahangano manene nosho yo ovanangeshefa ovanalwisho, nonokutya omupristeri nOmulevi otava faneke Oukwakriste. Ndele kunena, oileshomwa yetu ohai longifa efaneko olo okudimbulukifa Ovakriste aveshe vaha kale ve na onhondo. Otu na okukwafela aveshe ovo ve na omhumbwe, unene tuu moku va kwafela ve lihonge oshili kombinga yaKalunga. Osho otashi tu hafifa okumona nghee Jehova ta yelifa oshili.

15. Ohatu ka kundafana shike moshitukulwa tashi landula?

15 Moshitukulwa tashi landula, ohatu ka kundafana kombinga yefaneko laJesus loukadona omulongo. (Mateus 25:1-13) Jesus okwa hala ovashikuli vaye momafiku axuuninwa va ude ko ngahelipi efaneko olo? Mbela omunhu keshe, oshinima ile oshiningwanima shomefaneko olo otashi faneke omunhu wonhumba ile oshinima sha fimanenena shomonakwiiwa? Ile okwa hala tu lihonge oilihongomwa tai longo oyo tai dulu oku tu kwafela momafiku axuuninwa? Ohatu ka mona omanyamukulo omapulo oo moshitukulwa tashi landula.

^ okat. 4 Oshungonangelo yokukonakonwa ya pupalekwa tete oya li ashike ya nyanyangidwa mOshiingilisha okuhovela muJuli 2011. Okudja opo oya ka kala yo hai nyanyangidwa momalaka amwe vali manini.

^ okat. 5 Ombibeli oyo ya pepalekwa otai ka nyanyangidwa yo momalaka amwe.

^ okat. 10 Pashihopaenenwa, embo Natu hopaeneneni eitavelo lavo ola kundafana omahokololo onghalamwenyo a yoolokafana ovanhu ovo va popiwa mOmbibeli e li 14. Embo olo ola yandja elitulemo koilihongomwa tai longo, ndele hakwaasho omahokololo oo taa faneke ile osho tashi fanekwa.

^ okat. 12 MEendjovo daKalunga omu na yo oinima oyo tai monika ya fa tai ‘nyenge eendunge’ ile idjuu okuudiwa ko, mwa kwatelwa oinima imwe oyo Paulus a shanga. Ashike ovashangi aveshe vOmbibeli ova nwefwa mo komhepo iyapuki. Omhepo yaKalunga ohai kwafele Ovakriste vashili kunena va ude ko Ombibeli, mwa kwatelwa oinima yomoule yaKalunga ile ‘oule waKalunga.’ — 2 Petrus 3:16, 17; 1 Ovakorinto 2:10.