Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) MARSA 2015

Oto ka ‘kala ngoo oupafi’?

Oto ka ‘kala ngoo oupafi’?

“Kaleni hano oupafi, osheshi inamu shiiva efiku notundi.” — MATEUS 25:13.

1, 2. (a) Jesus okwa holola shike shi na sha nomafiku axuuninwa? (b) Omapulo elipi hatu ka kundafana?

KALA nee ngeno wa fa u wete Jesus e li omutumba kOmhunda yEemono ta tale kotembeli yaJerusalem. Oku li novayapostoli vaye vane, Petrus, Andreas, Jakob naJohannes, notava pwilikine nelitulemo eshi te va lombwele exunganeko litunhula li na sha nonakwiiwa. Exunganeko otali ulike kwaasho tashi ka ningwa po pefimbo lomafiku axuuninwa ounyuni ou woukolokoshi eshi Jesus ta ka pangela mOuhamba waKalunga. Jesus okwe va lombwela kutya pefimbo olo litunhula, “omupiya omudiinini nomunaendunge” ote ke mu kalela po kombada yedu nota ka pa ovashikuli vaye eendja dopamhepo pefimbo la wapala. — Mateus 24:45-47.

2 Kexunganeko olo, Jesus okwa li a shikulifa ko efaneko li  na sha noukadona omulongo. (Lesha Mateus 25:1-13.) Onghee hano, moshitukulwa eshi ohatu ka kundafana omapulo aa: (1) Efaneko oli na etumwalaka la fimana lilipi? (2) Ongahelipi ovavaekwa vadiinini va tula moilonga omayele omefaneko, noidjemo oilipi? (3) Ongahelipi keshe umwe womufye ta dulu okumona ouwa mefaneko laJesus kunena?

EFANEKO OLI NA ETUMWALAKA LILIPI?

3. Oileshomwa yetu oya li ya yelifa ngahelipi efaneko li na sha noukadona omulongo, nosha li sha etifa oidjemo ilipi?

3 Moshitukulwa sha dja ko, otwe lihonga kutya momido opo da di ko, omupiya omudiinini nomunaendunge okwa pepaleka onghedi yaye yokuyelifa omahokololo amwe Ombibeli. Paife omupiya omudiinini ota yandje unene elitulemo koilihongomwa tai longo, ndele hakwaasho tashi fanekwa ile keityo lopaxunganeko. Pashihopaenenwa, diladila shi na sha nefaneko loukadona omulongo. Oileshomwa yetu oya kala hai ti kutya, eelamba, omahooli nosho yo eeshanga otadi faneke oshinima shonhumba ile omunhu wonhumba. Mbela okuyandja ashike elitulemo kounima vanini vomehokololo otaku dulu okukanififa etumwalaka lefaneko la endelela noli li paunafangwa? Enyamukulo lepulo olo ola fimana.

Oukadona ove na okukala ve lilongekida, ve na eelamba davo da tema eshi omuhomboli te uya

4. Mefaneko laJesus, otu shi shii ngahelipi kutya (a) omuhomboli olyelye? (b) oukadona oolyelye?

4 Natu ka konakoneni etumwalaka la fimana lefaneko laJesus. Tete, diladila kwaavo va popiwa mefaneko loukadona omulongo. Omuhomboli olyelye? OJesus. Osho otu shi shii molwaashi Jesus okwa li nale e liifana omuhomboli. (Lukas 5:34, 35) Oukadona oolyelye? Ovo “okangudu” kOvakriste ovavaekwa. Osho otu shi shii ngahelipi? Mefaneko, oukadona ove na okukala ve lilongekida, ve na eelamba davo da tema eshi omuhomboli te uya. Paife tala kwaasho Jesus a lombwela ovashikuli vaye ovavaekwa, a ti: “Oiya yeni nai kale ya mangwa neelamba deni da tema, nye mu fe ovanhu va teelela Omwene wavo, ta di koshivilo shehombolo.” (Lukas 12:32, 35, 36) Shikwao vali, omuyapostoli Paulus nosho yo Johannes ova faafanifa ovashikuli vaKristus ovavaekwa noukadona va koshoka. (2 Ovakorinto 11:2; Ehololo 14:4) Kungaho, otu wete kutya omayele nelondwelo olo tali hangwa muMateus 25:1-13, okwa yukifwa kovashikuli vaJesus ovavaekwa.

5. Jesus okwa holola ngahelipi efimbo oko kwa yukifwa efaneko laye?

5 Mbela omayele aJesus okwa li taa ka longa pefimbo lilipi? Osho Jesus a popya lwopexulilo lefaneko laye otashi tu kwafele. Okwa ti: ‘Omuhomboli okwe uya.’ (Mateus 25:10) Otwe lihonga mOshungonangelo yo  15 Juli 2013, kutya exunganeko laJesus olo li li muMateus etukulwa 24 nosho yo 25 ola popya shi na sha ‘nokuuya’ kwaJesus lwoikando ihetatu. Ngeenge Jesus ta popi ‘okuuya’ kwaye, ota ulike kefimbo loudjuu munene eshi te uya okutokola nokuhanauna po ounyuni ou woukolokoshi. Onghee hano, ohatu dulu okufika pexulifodiladilo kutya efaneko laJesus otali yukifwa komafiku axuuninwa, ashike ote ke ‘uya’ pefimbo loudjuu munene.

6. Efaneko laJesus oli na etumwalaka la fimana lilipi?

6 Etumwalaka la fimana lilipi hatu lihongo mefaneko olo? Natu ka taleni koshikalimo shehokololo olo lOmbibeli. MuMateus etukulwa 24, Jesus okwa kundafana shi na sha “nomupiya omudiinini nomunaendunge.” Omupiya oo oku li okangudu kovalumenhu ovavaekwa ovo tava kwatele komesho mokati kovashikuli vaKristus momafiku axuuninwa. Jesus okwa londwela ovalumenhu ovo kutya ove na okukala ovadiinini. Metukulwa la landula ko, Jesus okwa longifa efaneko loukadona omulongo, ta pe ovashikuli vaye aveshe ovavaekwa omayele momafiku axuuninwa. Etumwalaka oli na sha ‘nokukala oupafi’ opo vaha kanife ondjabi yavo lomeulu. (Mateus 25:13) Paife natu ka konakoneni efaneko olo notu mone nghee ovavaekwa va tula moilonga omayele alo.

ONGAHELIPI OVAVAEKWA VA TULA MOILONGA OMAYELE EFANEKO LAJESUS?

7, 8. (a) Omolwashike oukadona ovanaendunge va li ve lilongekida? (b) Ongahelipi ovavaekwa ve lilongekida?

7 Jesus okwa divilika kutya mefaneko oukadona ovanaendunge ova li oupafi eshi omuhomboli e uya, ndele kava li ngaashi oukadona omalai. Omolwashike mbela? Omolwaashi ova li ve lilongekida nove li oupafi. Oukadona aveshe omulongo ova li ve na okukala oupafi nokukaleka eelamba davo da tema oufiku aushe. Mepingafano noukadona omalai, oukadona ovanaendunge vatano ova li ve lilongekida, molwaashi ova li ve na eelamba di na omahooli nova li va etelela amwe vali a wedwa po. Ongahelipi Ovakriste ovavaekwa ovadiinini ve lilongekidila okuuya kwaJesus?

8 Ovavaekwa ove lilongekida okuwanifa po oshinakuwanifwa shavo fiyo okexulilo. Ova didilika kutya okulongela kwavo Kalunga otaku va pula va yambe po onghalamwenyo youdjeko yomounyuni waSatana, ashike ove shi ninga nehalo liwa. Ova tokola toko okulongela Jehova noudiinini, hamolwaashi exulilo li li popepi, ndele omolwaashi ve mu hole nove hole Omona waye. Ohava kanyatele oudiinini wavo noihava efa va nwefwe mo koikala younyuni yokuhola omaliko, yokuliholamwene noyokukala inava koshoka paenghedi. Ngaashi oukadona ovanaendunge ovo va li ve lilongekida nove na eelamba davo, ovavaekwa otava twikile okuvilima, va teelela nelididimiko omuhomboli a fike, nonande ota monika a fa a kala ko. — Ovafilippi 2:15.

Jesus okwa londwela ovavaekwa va kale ovadiinini

9. (a) Elondwelo lilipi Jesus a yandja li na sha nokufya eemhofi? (b) Ongahelipi ovavaekwa ve linyenga keingido olo kutya: “Omuhomboli oye ou”? (Tala yo eshangelo lopedu.)

 9 Oukadona ovanaendunge ova li yo ve lilongekidila okuuya kwomuhomboli molwaashi ova li oupafi. Ashike mefaneko omwa popiwa kutya oukadona aveshe omulongo ova ka ‘fya eemhofi, ndele tava kofa’ eshi va teelela omuhomboli oo a li ta monika a fa a kala ko. Ndele mbela otashi shiiva ngoo Ovakriste ovavaekwa va ‘kofe’ kunena, sha hala kutya, va twalwaatwalwe fimbo va teelela Kristus a fike? Heeno. Jesus oku shi shii kutya, nokuli nomunhu oo a halelela nomuladi, ota dulu okunghundipala pamhepo, ndele ta twalwaatwalwa fimbo a teelela okuuya kwaJesus. Onghee hano, Ovakriste ovavaekwa ohava longo noudiinini opo va kale oupafi. Ngahelipi mbela? Oukadona aveshe omulongo vomefaneko ova penduka eshi va uda eingido tali ti: “Omuhomboli oye ou!” Ashike oukadona ovanaendunge ovo ashike va li ve lilongekida. (Mateus 25:5, 6; 26:41) Sha faafana, pefimbo lomafiku axuuninwa, Ovakriste ovavaekwa ovadiinini ova li ve linyenga keingido olo kutya: “Omuhomboli oye ou!” Ova tambula ko oumbangi wa kola kutya Jesus oku li pokuuya, nove lilongekidila okuuya kwaye. * (Tala eshangelo lopedu.) Paife natu ka konakone eendjovo dopexulilo lefaneko laJesus, odo tadi ulike kefimbo lonhumba lokondadalunde.

ONDJABI YOVANAENDUNGE NEHANDUKILO LOMALAI

10. Oshike tashi dulika tu lipule shi na sha neenghundafana pokati koukadona ovanaendunge noukadona omalai?

10 Lwopexulilo lefaneko opwa popiwa kutya oukadona omalai ova indila oukadona ovanaendunge ve va pe omahooli va tule meelamba davo. Ndele ovanaendunge ova anya oku va kwafela. (Lesha Mateus 25:8, 9.) Ndele mbela onaini Ovakriste ovavaekwa ovadiinini va anya okukwafela umwe oo a pumbwa ekwafo? Dimbuluka kutya efaneko olo otali ulike kefimbo lilipi. Jesus, oo e li Omuhomboli, ote ke uya okutokola lwopexulilo loudjuu munene. Onghee hano, otashi dulika eenghundafana domefaneko tadi ulike kwaasho tashi ka ningwa po diva ashike fimbo oudjuu munene inau xula. Omolwashike hatu tile ngaho? Omolwaashi pefimbo opo ovavaekwa otava ka didilikwa lwaxuuninwa.

11. (a) Oshike tashi ka ningwa po eshi oudjuu munene u li pokuhovela? (b) Oukadona ovanaendunge ova hala okutya shike eshi va lombwela oukadona omalai ve ke lilandele omahooli?

11 Onghee hano, fimbo oudjuu munene inau hovela, ovavaekwa aveshe ovadiinini ovo ve li kombada yedu otava ka didilikwa lwaxuuninwa. (Ehololo 7:1-4) Okudja opo, otava ka kala ve na oushili kutya otava ka ya meulu. Ashike diladila kombinga yomido odo tadi twala fiyo opoudjuu munene. Oshike tashi ka ningilwa ovavaekwa ovo inava kala oupafi novehe fi vali ovadiinini? Itava ka didilikwa lwaxuuninwa. Pefimbo opo, otaku ka vaekwa Ovakriste vamwe ovadiinini. Ngeenge oudjuu munene owa hovele, omalai otashi dulika a ka kumwe eshi taa ka mona Babilon Shinene tashi hanaunwa po.  Otashi dulika okudja opo opo ashike tae ke shi didilika mo kutya inae lilongekidila okuuya kwaJesus. Oshike tashi ka ningwa po pefimbo opo ngeenge ova ka kala va hala okukwafelwa? Efaneko olo otali tu pe enyamukulo. Oukadona ovanaendunge ova anya okuyandja omahooli avo koukadona omalai, ponhele yaasho ove va lombwela va ye ke lilandele omahooli. Ndele molwaashi osha li “opokati koufiku,” kapa li vali oo ta landifa omahooli. Kava li tuu va xutwifa omhito yavo!

12. (a) Pefimbo loudjuu munene, oshike tashi ka ningilwa keshe oo a li a vaekwa ndele ta kala ehe fi omudiinini fimbo okudidilikwa kwaxuuninwa inaku ningwa? (b) Oshike tashi ka ningilwa ovo va fa oukadona omalai?

12 Pefimbo loudjuu munene, ovavaekwa ovadiinini itava ka kwafela umwe oo ehe fi vali omudiinini. Omhito yavo yokukwafelwa itai ka kala po vali. Oshike tashi ka ningilwa ovo vehe fi vali ovadiinini? Didilika osho sha ningilwa oukadona omalai ovo va li va ya va ka lande omahooli. Ombibeli oya ti: “Omuhomboli okwe uya; naavo va hangika ve lilongekida, ova ya mo pamwe naye koshivilo shehombolo, noshivelo sha idilwa po.” Eshi Jesus te ke uya moshinge shaye lwopexulilo loudjuu munene, ota ka ongela ovavaekwa ovadiinini va ye meulu. (Mateus 24:31; 25:10; Johannes 14:1-3; 1 Ovatessaloniki 4:17) Ashike Jesus ita ka tambula ovo vehe fi ovadiinini. Ngaashi oukadona omalai, otashi dulika va ka tye, “Omwene, Omwene, tu yeulula!” Ndele mbela Jesus ote ke va nyamukula ngahelipi? Shinyikifa oluhodi, ote ke va pa enyamukulo la faafana naalo ta ka yandja kuvahapu ovo va fa oikombo, ta ti: “Oshili handi mu lombwele: Ame nghi mu shii.” — Mateus 7:21-23; 25:11, 12.

Omukriste keshe omuvaekwa oku na okuhoolola a kale e lilongekida noku li oupafi

13. (a) Omolwashike inatu pumbwa okufika pexulifodiladilo kutya ovashikuli vaKristus ovavaekwa vahapu otava ka kala vehe fi ovadiinini? (b) Omolwashike hatu dulu kutya efaneko laJesus otali ulike kutya okwe lineekela Ovakriste ovavaekwa? (Tala efano pehovelo loshitukulwa.)

13 Mbela Jesus okwa hala okutya ovavaekwa vahapu otava ka kala vehe fi ovadiinini notava ka pumbwa okupingenwa po? Ahowe. MuMateus etukulwa 24, Jesus okwa londwela omupiya omudiinini nomunaendunge aha ninge omupiya mwii. Ashike osho inashi hala okutya Jesus okwa hala va ninge ngaho. Sha faafana, efaneko loukadona omulongo oli li elondwelo. Ngaashi ashike oukadona vatano ovo va li omalai navatano ova li ovanaendunge, Omukriste omuvaekwa keshe oku na okuhoolola okukala e lilongekida noku li oupafi. Ngeenge hasho, ota dulu okukala elai noke fi vali omudiinini. Paulus naye okwa londwela ovamwaxe ovavaekwa monghedi ya faafana. (Lesha Ovaheberi 6:4-9; yelekanifa naDeuteronomion 30:19.) Okwa li e va londwela sha yukilila, ashike okwa li yo e na omukumo kutya ovamwaxe otava ka pewa ondjabi yavo. Elondwelo olo li li mefaneko loukadona omulongo otali ulike kutya Jesus naye oku na elineekelo la faafana movavaekwa. Oku shii kutya keshe omupiya waye omuvaekwa ota dulu okukala omudiinini noku ka mona ondjabi ikumwifi.

 ONGAHELIPI “EEDI” DIMWE DAKRISTUS TADI DULU OKUMONA OUWA?

14. Omolwashike “eedi” dimwe nado tadi dulu okumona ouwa mefaneko loukadona omulongo?

14 Efaneko laJesus ola yukifwa kOvakriste ovavaekwa. Ndele mbela “eedi” dimwe nado otadi dulu ngoo okumona ouwa mefaneko olo? (Johannes 10:16) Heeno! Efaneko oli netumwalaka li li paunafangwa, olo kutya: “Kaleni oupafi.” Jesus okwa tile: ‘Osho handi shi mu lombwele, ohandi shi lombwele aveshe: Kaleni oupafi.’ (Markus 13:37) Jesus okwa teelela ovahongwa vaye aveshe va kale ve lilongekida nove li oupafi. NOvakriste aveshe otava dulu okulandula oshihopaenenwa shiwa shovavaekwa, ovo va pitifa komesho oukalele monghalamwenyo yavo. Dimbuluka kutya oukadona omalai ova li va pula oukadona ovanaendunge ve va pe mo momahooli avo. Kava li va pewa omahooli eshi va li va pula va kwafelwe. Naasho otashi tu dimbulukifa kutya keshe umwe womufye oku na oshinakuwanifwa shokukala omudiinini kuKalunga, shokukala e lilongekida noku li oupafi. Kape na ou ta dulu oku tu ningila oinima oyo. Keshe umwe womufye ote ke lihokolola komutokoli omuyuki, Jesus Kristus, oo te uya mafiku. Onghee hano, otu na okukala twe lilongekida!

Kape na ou ta dulu okukala omudiinini ile oupafi ponhele yetu

15. Omolwashike ehombolo laKristus nomuvalekwa waye litunhula kOvakriste vashili aveshe?

15 Ovakriste aveshe ova tunhukwa omolwehombolo olo la popiwa mefaneko laJesus. Monakwiiwa, konima yoita yaHarmagedon, Ovakriste ovavaekwa otava ka ninga omuvalekwa waKristus. (Ehololo 19:7-9) Keshe umwe kombada yedu ota ka mona ouwa mehombolo olo tali ka kala meulu. Omolwashike mbela? Omolwaashi otali kwashilipaleke epangelo dingi olo tali ka pangela ovanhu aveshe. Kutya nee otu na eteelelo loku ka kala nomwenyo fiyo alushe meulu ile okombada yedu, natu kaleni twa tokola toko okukala twe lilongekida notu li oupafi. Ngeenge otwa ningi ngaho, ohatu dulu oku ka hafela onakwiiwa ikumwifi oyo Jehova e tu longekidila.

^ okat. 9 Efaneko otali ulike kutya ope na oule wefimbo lonhumba pokati keingido, “Omuhomboli oye ou!” (ovelishe 6) nokuuya kwomuhomboli (ovelishe 10). Momukokomoko womafiku axuuninwa, ovavaekwa ova kala ve li oupafi. Ova didilika okukala po kwaJesus, onghee hano, ove shii kutya ota pangele e li Ohamba yOuhamba waKalunga. Ndele nande ongaho, natango ove na okukala oupafi fiyo ote uya.