Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) JANUALI 2015

Pamekeni ohombo yeni mu kale mwa hafa

Pamekeni ohombo yeni mu kale mwa hafa

“Omwene, [ngeenge] haye omudikifi weumbo, ovadiki valo otava kendabala oshimha.” — Eps. 127:1a.

1-3. Omashongo elipi ovalihomboli va taalela? (Tala efano pehovelo loshitukulwa.)

OMUSHAMANE umwe oo a kala ta hafele ohombo yavo oule womido 38, okwa ti: “Ngeenge owa ningi eenghendabala da mana mo nokuulika kutya owa hala ohombo yeni i pondole, oto ka hafela omanangekonoupuna aJehova.” Nopehe nomalimbililo, omushamane nomukulukadi otava dulu okuhafela omafimbo mawa pamwe notava dulu yo okuyambididafana momafimbo oudjuu. — Omayel. 18:22.

2 Ashike ovalihomboli ohava dulu okuhangwa komaupyakadi onhumba. NOmbibeli oya popya shi na sha nomaupyakadi oo ya ti “oudjuu wopalutu.” (1 Kor. 7:28) Omolwashike mbela? Okuungaunga nomaupyakadi efiku keshe otaku dulu okunyona po ekwatafano lomohombo. Kashi na nee mbudi kutya ohombo otai ende nawa shi fike peni, molwaashi omukulukadi nomushamane inava wanenena, keshe umwe otashi dulika a udife nai mukwao, naasho ohashi shi ningifa shidjuu okuninga eenghundafana tadi ti sha. (Jak. 3:2, 5, 8) Ovalihomboli vahapu ove na oilonga yomboloto oyo tai va pula shihapu nove na yo ounona ovo ve na okufila oshisho. Omaupyakadi nosho yo eloloko ohali shi ningi shidjuu kovalihomboli vamwe okukonga efimbo  olo va pumbwa opo va pameke ohombo yavo. Ohole yavo nefimanekafano otai dulu okunghundipalekwa komaupyakadi opashimaliwa, okuhe na oukolele ile komaupyakadi amwe vali. Shikwao vali, ohombo oyo tai monika ya fa ya pama otai dulu okunghundipalekwa ‘koilonga yombelela,’ ngaashi oluhaelo, eenghedi inadi koshoka, onyanya, eemhata, ondubo, ehandu nosho yo omashilafano. — Gal. 5:19-21.

3 Osho sha ningifa unene onghalo i kale ya naipala, oikala yokuliholamwene noyokuhe na ko na sha naKalunga yovanhu ‘vomomafiku axuuninwa,’ oyo tai dulu okunyateka ohombo. (2 Tim. 3:1-4) Shikwao vali, ope na omutondi omukwanyanya oo a tokola toko okuteya po eehombo. Omuyapostoli Petrus okwe tu londwela a ti: “Omutondi weni, Satana, ohe mu dingilile ngaashi onghoshi hai kumbu, nota kongo ou te mu xwake po.” — 1 Pet. 5:8; Eh. 12:12.

4. Ongahelipi ovalihomboli tava dulu okukala va hafa nove na ekwatafano la pama mohombo yavo?

4 Omushamane umwe wokoJapan okwa ti: “Onda li ndi na oshisho shihapu shi na sha noimaliwa. Ndele molwaashi kanda li naanaa handi kundafana nomukulukadi wange, naye okwa li yo a wililwa po. Shimwe vali, okwa ka kala e na oupyakadi wa kwata moiti u na sha noukolele waye. Omafimbo amwe, oshisho osho ohashi tu etele okuhaudafana.” Mohombo otamu dulu okukala omashongo onhumba, ashike otaa dulu okufindwa. Kekwafo laJehova, ovalihomboli otava dulu okukala va hafa nove na ekwatafano la pama. (Lesha Epsalme 127:1.) Natu ka kundafaneni eenghedi nhano omo ovalihomboli tava dulu okutunga ohombo yavo i kale ya pama notai kalelele. Ohatu ka kundafana yo kutya omolwashike ohole ya fimanenena opo ohombo i kale ya pama.

OKUKWATELA JEHOVA MOHOMBO YENI

5, 6. Oshike osho omushamane nomukulukadi tava dulu okuninga opo va kwatele Jehova mohombo yavo?

5 Ngeenge ovalihomboli ovadiinini nohava dulika kuJehova, ohombo yavo otai ka kala i na ekanghameno la kola. (Lesha Omuudifi 4:12.) Ovashamane novakulukadi otava dulu okukwatela Jehova mohombo yavo mokulandula ewiliko laye lopahole. Ombibeli oya popya kombinga yoshiwana shaKalunga shonale ya ti: “Fiku mwa hala okwaama lolulyo ile kolumosho, omatwi eni otaa ka uda ondjovo ei tai di konima yeni, tai ti: Apa ondjila, ei mu nokweenda nayo.” (Jes. 30:20, 21) Kunena, ovalihomboli otava dulu ‘okuuda’ eendjovo daKalunga mokulesha Ombibeli pamwe. (Eps. 1:1-3) Otava dulu yo okupameka ohombo yavo okupitila mElongelokalunga lOukwaneumbo lihafifa notali tungu pamhepo. Okwiilikana pamwe efiku keshe otaku ke va kwafela yo va pameke ohombo yavo opo va dule okufinda omaponokelo ounyuni waSatana.

Ngeenge ovalihomboli ohava ningi oinima yopamhepo pamwe, otava ka kala ve na ekwatafano lopofingo naKalunga nosho yo pokati kavo notava ka kala va hafa (Tala okatendo 5, 6)

6 Gerhard wokoGermany okwa ti: “Ngeenge twa kanifa ehafo omolwomaupyakadi opaumwene ile molwokuhaudafana, omayele oo e li mEendjovo daKalunga ohae tu kwafele tu kulike elididimiko notu kale hatu diminafana po. Omaukwatya oo okwa pumbiwa mohombo opo i pondole.” Ngeenge ovalihomboli otava longo noudiinini opo va kaleke Kalunga mohombo yavo mokuninga oinima yopamhepo pamwe, otava ka ehena popepi elela naKalunga notava kala ve na ekwatafano lopofingo nova hafa.

OVASHAMANE LONGIFENI OUKWAMUTWE WENI PAHOLE

7. Ongahelipi ovashamane ve na okulongifa oukwamutwe wavo?

7 Onghedi omo omushamane ha longifa oukwamutwe waye otai dulu okukwafela ohombo i kale ya pama nova hafa. Ombibeli oya ti: “Kristus Oye omutwe wakeshe omulumenhu, nomutwe womukainhu omulumenhu.” (1 Kor. 11:3) Oshikalimo shovelishe oyo otashi lombwele ovashamane nghee ve na okulongifa oukwamutwe wavo, ve shi ninge monghedi oyo Kristus a li ha ungaunga novashikuli vaye. Jesus ka li omukwanyanya, ndele okwa li alushe omunahole,  omunalukeno, e na ondjele, omwenyo muwa nomulininipiki momutima. — Mat. 11:28-30.

8. Omushamane oku na okuninga shike opo a kale e holike nokwa fimanekwa komukulukadi waye?

8 Ovashamane Ovakriste kave na okukala tava komangele lwoikando kutya ovakulukadi vavo nava kale ve va fimaneka. Ndele ponhele yaasho, ove na okukala navo ‘neendunge ngaashi noiyuma inai pama, noku va fimaneka.’ (1 Pet. 3:7) Kutya nee omoipafi nongeenge ve li ovo aveke, ovashamane ohava ulike okupitila meendjovo davo defimaneko nomeenghatu davo dolune kutya ovakulukadi vavo ove na ongushu kuvo. (Omayel. 31:28) Okulongifa oukwamutwe wavo monghedi yopahole ya tya ngaho, otaku ke linyengifa ovakulukadi vavo va ulike kutya ove va hole nove va fimaneka, na Kalunga ota ka nangeka noupuna ohombo yavo.

OVAKULUKADI OVO HAVA DULIKA NELININIPIKO

9. Ongahelipi omukulukadi ha ulike okudulika nelininipiko?

9 Ohole yokuheliholamwene yokuhola Jehova ya kanghamena komafinamhango aye otai tu kwafele tu lininipike koshi yeke laye li na eenghono. (1 Pet. 5:6) Onghedi imwe ya fimana omo omukulukadi oo ha dulika ha ulike kutya okwa fimaneka eenghonopangelo daJehova omokulongela kumwe nokuyambidida omushamane waye. Ombibeli oya ti: “Ovakainhu nye, dulikeni kovalumenhu veni, ngaashi sha wapalela mOmwene.” (Kol. 3:18) Oshoshili kutya hamatokolo aeshe oo omushamane ta ningi taa ka kala a hokiwa komukulukadi waye. Ndele ngeenge omatokolo aye itaa kondjifafana neemhango daKalunga, omukulukadi oo ha dulika ota ka kala a hala okutifuka. — 1 Pet. 3:1.

10. Omolwashike okudulika pahole kwa fimana?

10 Omukulukadi ota dana onghandangala ya fimana mokuninga oinima pamwe nokulongela kumwe nomushamane waye e li ‘omukainhu waye.’ (Mal. 2:14) Ngeenge ovalihomboli tava ningi omatokolo, omukulukadi oha popi omaliudo aye nosho yo osho ta diladila monghedi yefimaneko, nopefimbo opo tuu opo ota dulika. Omushamane omunaendunge oha pwilikine nelitulemo komaetepo omukulukadi waye. (Omayel. 31:10-31) Okudulika pahole ohaku xumifa komesho  ehafo, ombili nelongelokumwe moukwaneumbo, nohaku pe omushamane nomukulukadi ewaneno olo hali di mokushiiva kutya otava hafifa Kalunga. — Ef. 5:22.

KALENI HAMU DIMINAFANA PO NEHALO LIWA

11. Omolwashike okudiminafana po kwa fimanenena?

11 Oshinima shimwe sha fimanenena osho tashi mu kwafele mu kale mu na ohombo tai pondola, ediminafanepo. Ekwatafano lomohombo ohali pame ngeenge omushamane nomukulukadi tave ‘lididimikilafana, nokudiminafana po omanyono.’ (Kol. 3:13) Mepingafano naasho, ekwatafano lomohombo ohali nghundipala ngeenge ovalihomboli tava kwatelafana onghone nokulongifa omapuko a pita opo va homonafane. Ngaashi ashike omifya hadi ningifa ekuma li kale la heva, oluhodi nonghone otai dulu okukula momitima detu notai ke shi ninga shidjuu okudiminafana po. Mepingafano naasho, ohombo ohai kala ya pama ngeenge omushamane nomukulukadi ohava diminafana po, ngaashi Jehova he va dimine po. — Mika 7:18, 19.

12. Ongahelipi ohole hai fufile “onduba yomatimba”?

12 Ohole yashili “ihai dimbulukwa owii ye u ningilwa.” Ponhele yaasho, “ohole ohai fufile onduba yomatimba.” (1 Kor. 13:4, 5; lesha 1 Petrus 4:8.) Noitya imwe, ohole ihai tula po ongaba kutya otu na okudimina po lungapi vamwe omanyono avo. Eshi omuyapostoli Petrus a li a pula kutya olungapi e na okudimina po umwe, Jesus okwe mu nyamukula a ti: ‘Olwo-77.’ (Mat. 18:21, 22) Jesus okwa li ta ulike kutya kape na omuvalu wa ngabekwa woikando oyo Omukriste e na okudimina po mukwao. — Omayel. 10:12. *

13. Ongahelipi hatu dulu okukondjifa eamo lokuhadimina po?

13 Annette okwa ti: “Ngeenge ovalihomboli inava hala okudiminafana po, onghone nosho yo okuhelineekelafana otaku dulu okuholoka, naasho otashi ka nyateka ohombo. Okudiminafana po ohaku pameke ohombo nohaku kwafele ovalihomboli va kale nekwatafano lopofingo.” Opo va kondjife eamo lokuhadiminafana po, ove na okukulika oikala yokupandulafana. Shi ninga onghedindjikilile yoye okukala ho pandula kaume koye kopahombo. (Kol. 3:15) Kungaho otamu ka kala mu na ombili yopamadiladilo, oukumwe notamu ka mona omanangekonoupuna oo taa hafelwa kwaavo ve na oikala yokudimina po. — Rom. 14:19.

TULA MOILONGA EFINAMHANGO LI NA SHA NOKUUNGAUNGA NAVAMWE

14, 15. Efinamhango li na sha nokuungaunga navamwe ola hala okutya shike, notali longo ngahelipi mohombo?

14 Nopehe nomalimbililo, ou hole okuungaungwa naave nawa nonefimaneko. Oho shi pandula ngeenge vamwe tava tambula ko omadiladilo oye nokuuda ko omaliudo oye. Ndele mbela owa uda ngoo nale umwe ta ti, “Naame ohandi mu talifa naanaa”? Nonande omalinyengotomheno a tya ngaho otashi dulika ngoo omafimbo amwe a fa e shii okuudiwa ko, Ombibeli otai tu lombwele tai ti: ‘Ino tya: Ye ngaashi a ningila nge, nosho yo ame ohandi ke mu ningila.’ (Omayel. 24:29) Jesus okwe tu honga onghedi ya denga mbada omo hatu dulu okuungaunga neenghalo didjuu. Okwa popya shi na sha nefinamhango lokuungaunga navamwe olo tali ti: “Ngaashi mwa hala ovanhu ve mu ningile, osho va ningileni yo.” (Luk. 6:31) Jesus okwa hala okutya otu na okuungaunga novanhu vakwetu monghedi omo twa hala okuungaungwa nafye, ndele haku va shunifila owii. Mohombo, osha hala okutya otu na okuningila kaume ketu kopahombo osho twa hala e tu ningile.

15 Ovalihomboli ohava pameke ekwatafano  lavo ngeenge keshe umwe oha udu ko omaliudo amukwao. Omushamane umwe wokoSouth Africa okwa ti: “Otwa kendabala okutula moilonga efinamhango li na sha nokuungaunga navamwe. Oshoshili kutya ope na omafimbo amwe oo hatu kala twa handuka, ndele ohatu longo noudiinini opo keshe umwe a ungaunge namukwao monghedi omo a hala ngeno mukwao a ungaunge naye, sha hala okutya, nawa nonefimaneko.”

16. Oshike osho ookaume kopahombo vehe na okuningilafana?

16 Ino hololela vamwe omaunghundi akaume koye kopahombo, ile u ngongote kombinga yomaukwatya aye oo uhe hole, ino ninga nokuli nande omashendjo kombinga yao. Dimbuluka kutya ohombo kai fi omafiyafanepo, okuulika kutya olyelye e na eenghono, e shii okutanguna ile dingi mokupopya oinima tai yahameke neenghono. Oshoshili kutya atusheni ohatu ningi omapuko, nomafimbo amwe ohatu udifa nai vamwe. Ashike kape na etomheno li shii okuudiwa ko lomushamane ile omukulukadi okuula mukwao omalaka mai, oku mu fifa ohoni ile eshi sha kwata moiti nokuli oku mu undula ile oku mu denga. — Lesha Omayeletumbulo 17:27; 31:26.

17. Ongahelipi ovashamane tava dulu okukala metwokumwe nefinamhango li na sha nanghee tu na okuungaunga navamwe?

17 Nonande momaputuko amwe ovalumenhu ovo hava ningi onyanya nokudenga ovakulukadi vavo ova talika ko ovo ovalumenhu elela, Ombibeli oya ti: ‘Omutalonheni e dule omuladi. Ndele ou te lipangele, e dule ou a teya oshilando.” (Omayel. 16:32) Otashi pula eenghendabala da mana mo okuhopaenena omulumenhu munenenene oo a li ko nale, Jesus Kristus, mokukala u na elipangelo. Omulumenhu oo ha ula omukulukadi waye omalaka mai ile he mu denge evaya, note ke likanifila ekwatafano liwa naJehova. Omupsalme David, oo a li omulumenhu omunaenghono nomuladi okwa ti: “Handukeni, ndelenee inamu nyona. Popyeni momitima deni momitala deni nokulimwenenena.” — Eps. 4:5.

“DJALENI OHOLE”

18. Omolwashike sha fimana okutwikila okukulika oukwatya wohole?

18 Lesha 1 Ovakorinto 13:4-7. Ohole oukwatya wa fimanenena mohombo. Ombibeli oya ti: “Djaleni efilonghenda lomomutima, ombili, elininipiko, engungumano noutalanheni. Ndele kombada yaaishe djaleni ohole, oyo oshimangifo sha wana shoku mu manga kumwe.” (Kol. 3:12, 14) Omushamane nomukulukadi ove na okuulika ohole yokuheliholamwene nokuhopaenena Kristus, oo e liyamba nehalo liwa omolwavamwe. Ngeenge ohombo oya kanghamena kohole ya tya ngaho, otai ka kala ya pama, kashi na nee mbudi kutya ope na omaukwatya oo hae ku udifa nai, oupyakadi wa kwata moiti woukolele, omaupyakadi opashimaliwa nosho yo omashongo okuungaunga nooxomweno noonyokomweno.

19, 20. (a) Ongahelipi ovalihomboli tava dulu okupondola mokukala nohombo ya pama nova hafa? (b) Oshike hatu ka kundafana moshitukulwa tashi landula?

19 Ohole, oudiinini neenghendabala da mana mo oya pumbiwa opo ohombo i pondole. Ponhele yokuhauluka ohombo molwaashi mwa holoka omaupyakadi, ookaume kopahombo ove na okukala va tokola toko opo ohombo yavo i kale tai pondola ndele hashimha ashike i li po. Ovalihomboli Ovakriste ovo ovadiinini kuJehova nokookaume kavo kopahombo ohave linyengifwa kohole yavo yokuhola Jehova noyokuholafana opo va pongolole po omaupyakadi avo, molwaashi “ohole ihai xulu po.” — 1 Kor. 13:8; Mat. 19:5, 6; Heb. 13:4.

20 Okukala nohombo ya pama nomwa hafa oshi li eshongo ‘momafimbo madjuu’ aa tu li muo. (2 Tim. 3:1) Ndele kekwafo laJehova, otai dulu okukala ya pama. Shikwao vali, ovalihomboli ove na yo okukondjifa ounyuni ou wa duvila omilele. Oshitukulwa tashi landula otashi ka kundafana kutya oshike osho ovashamane novakulukadi tava dulu okuninga opo ve liamene koluhaelo.

^ okat. 12 Nonande ovalihomboli ove na okukendabala okudiminafana po nokukandula po omaupyakadi avo, Ombibeli oya pa kaume kopahombo oo ehe na ondjo oufemba wokuhoolola kutya ota ka dimina po kaume kopahombo oo a ya momilele kondje yohombo ile ota teya ohombo. (Mat. 19:9) Tala oshiwedelwako, “Ombibeli oya tala ko ngahelipi eteyohombo netopoko?” membo ‘Ohole yaKalunga,’ epandja 219-221.