Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) JANUALI 2015

Omolwashike hatu dimbuluka Ouvalelo wOmwene?

Omolwashike hatu dimbuluka Ouvalelo wOmwene?

“Shi ningeni okudimbulukwa nge.” — 1 KOR. 11:24.

1, 2. Jesus okwa li a ninga shike moufiku wo 14 Nisan 33 O.P.? (Tala efano pehovelo loshitukulwa.)

MOUFIKU wo 14 Nisan 33 O.P., muJerusalem omwedi owa li wa tokeka. Jesus okwa li a dana Opaasa novayapostoli vaye, okudimbuluka nghee Jehova a xupifa Ovaisrael moupika wOvaegipti konima yomido 1 500. Opo nee lwanima Jesus okwa dika po ouvalelo we likalekelwa novayapostoli vaye 11 ovadiinini, oo tau ka kala edimbuluko lefyo olo a li ta ka fya efiku olo. *Mat. 26:1, 2.

2 Jesus okwa li a ilikana ndele ta tambekida omungome inau ya onhafi kovayapostoli vaye, ta ti: “Tambuleni, lyeni.” Okwa kufa eholo lomaviinyu ndele ta ilikana vali, ndele ta ti: “Nweni mo amushe.” (Mat. 26:26, 27) Omungome nomaviinyu okwa li e na eityo le likalekelwa. Ovayapostoli vaJesus ovadiinini ova li ve lihonga oinima ihapu oufiku oo wa fimanenena.

3. Oshitukulwa eshi otashi ka nyamukula omapulo elipi?

 3 Jesus okwa li a hala ovahongwa vaye va kale hava dimbuluka efyo laye omudo keshe, olo lwanima la ka kala hali ifanwa “oshililo shOmwene,” ile tu tye, Ouvalelo wOmwene. (1 Kor. 11:20) Vamwe otashi dulika ve lipule shi na sha naasho tava ti: Omolwashike tu na okudimbuluka efyo laJesus? Omungome nomaviinyu otaa ti shike? Ongahelipi hatu dulu okulilongekidila Edimbuluko? Oolyelye ve na okukufa ombinga mokulya nokunwa omadidiliko? Nongahelipi Ovakriste ve na okulinyenga kwaasho Omishangwa tadi ti kombinga yeteelelo lavo?

ETOMHENO MOLWAASHI HATU DIMBULUKA EFYO LAJESUS

4. Efyo laJesus ole tu ningila shike tashi shiiva?

4 Tu li oludalo laAdam, otwa fyuulula oulunde nefyo. (Rom. 5:12) Kape na omunhu ina wanenena ta dulu okuyandja oikulila kuKalunga yomwenyo waye mwene ile davamwe. (Eps. 49:7-10) Ndele Jesus okwe tu yandjela omwenyo waye wa wanenena nokuyandja ongushu yekulilo laye kuKalunga. Mokuninga ngaho, Jesus okwe shi ninga tashi shiiva opo tu kale tu na eteelelo lomwenyo waalushe, tuhe fi vali ovalunde noitatu ka fya vali. — Rom. 6:23; 1 Kor. 15:21, 22.

5. (a) Otu shi shii ngahelipi kutya Kalunga naKristus ove hole ovanhu? (b) Omolwashike tu na okukala pEdimbuluko lefyo laJesus?

5 Efiloshisho lekulilo ola ulika kutya Kalunga oku hole ovanhu aveshe. (Joh. 3:16) Ekuliloyambo laJesus ola ulika kutya naye oku tu hole. Nokuli nofimbo ine uya kombada yedu, Jesus okwa kala ha “nyakukilwa ovana vovanhu.” (Omayel. 8:30, 31) Olupandu letu lokupandula Kalunga nOmona oli na oku tu linyengifa tu kale hatu kala pEdimbuluko lefyo laJesus, nokungaho ohatu dulika kelombwelo olo kutya: “Shi ningeni okudimbulukwa nge.” — 1 Kor. 11:23-25.

EITYO LOMADIDILIKO EDIMBULUKO

6. Otu na okutala ko ngahelipi omungome nomaviinyu Edimbuluko?

6 Eshi Jesus a dika po Edimbuluko, ka li a lundulula pashikumwifilonga omungome nomaviinyu a ninge ngeno ombelela nohonde yaye yo venevene. Ponhele yaasho, okwa popya shi na sha nomungome a ti: ‘Oo otau ti olutu lange.’ Shi na sha nomaviinyu okwa ti: ‘Otaa ti ohonde yange, ohonde yehangano tai tilwashi omolwavahapu.’ (Mark. 14:22-24, yelekanifa no-NW.) Onghee hano, osha yela kutya omungome nomaviinyu okwa li e na okutalika ko e li omadidiliko.

7. Omungome oo hau longifwa pEdimbuluko otau faneke shike?

7 Poshiningwanima osho sha fimanenena shomo 33 O.P., Jesus okwa li a longifa omungome inau ya onhafi oo wa li wa xupa pouvalelo wOpaasa. (Ex. 12:8) Peemhito dimwe Omishangwa oda longifa onhafi okuulika kenyonauko ile koulunde. (Mat. 16:6, 11, 12; Luk. 12:1) Onghee hano, osha yeleka eshi Jesus a longifa omungome inau ya onhafi molwaashi owa li tau faneke olutu laye lihe na oulunde. (Heb. 7:26) Nomolwaasho, omungome wa tya ngaho oo hau longifwa pEdimbuluko.

8. Eholo lomaviinyu olo hali longifwa pEdimbuluko otali faneke shike?

8 Omaviinyu oo Jesus a li a longifa mo 14 Nisan 33 O.P., okwa li taa faneke ohonde yaye, nosho naanaa eholo lomaviinyu hali faneke kunena pEdimbuluko. Ohonde yaJesus oya li ya tika ‘okudima po omatimba,’ eshi a dipaelwa konhele imwe ya li kondje yaJerusalem yedina Golgata. (Mat. 26:28; 27:33) Molwaashi omungome nomaviinyu oo haa longifwa pEdimbuluko otaa faneke eyambo laJesus li na ondilo olo a yandja omolwovanhu ovaduliki notwa pandula  efiloshisho la tya ngaho, osha yeleka kufye opo tu lilongekidile edano lokomudo lOuvalelo wOmwene.

EENGHEDI DIMWE OMO TO DULU OKULILONGEKIDA

9. (a) Omolwashike sha fimana okweendela pamwe nelesho lOmbibeli li na sha nEdimbuluko? (b) Ou uditile ngahelipi ekulilo?

9 Ngeenge otwa kala hatu endele pamwe nelandulafano lelesho lOmbibeli li na sha nEdimbuluko olo hali kala mokambo Konakona Omishangwa keshe efiku, ohatu ka dilonga kwaasho Jesus a li a ninga fimbo ina fya. Shikwao vali, osho otashi ke tu kwafela tu longekidile omitima detu Ouvalelo wOmwene. * Omumwameme umwe okwa ti: “Ohatu kala twa teelela Edimbuluko nodjuulufi. Omudo keshe ohatu kala twe li tala ko le likalekelwa shi dulife nale. Ohandi dimbuluka efiku limwe nda li ndi li ofika monhele omo hamu longekidilwa omidimba opo di ka pakwe . . . , eshi nda tala oshimhu shatate omuholike, opo ashike nda ka hovela okupandula ekulilo tashi di komutima. . . . Omishangwa adishe ondi di shii nondi shii oku di fatulula. Ndele eshi nda filwa nonda mona nghee efyo hali kumu omunhu, opo ashike nda ka hafela osho hatu ka wanifilwa okupitila mekulilo olo li na ondilo.” Eshi hatu lilongekidile Edimbuluko, oshiwa okudilonga kunghee ekuliloyambo laJesus le tu mangulula koulunde nefyo.

Okweendela pamwe nelesho lOmbibeli li na sha nEdimbuluko, otaku tu kwafele tu li lilongekidile (Tala okatendo 9)

10. Okulilongekidila Edimbuluko otaku dulu okukuma ngahelipi oukalele wetu?

10 Okulilongekidila Edimbuluko otashi dulika ku kwatele mo omalongekido e na sha nokutamununa mo oukalele wetu meenghedi donhumba, tashi dulika mokukufa oukwafelikokolindjila pefimbo lEdimbuluko. Eshi hatu shivi ovakonakonimbibeli nakeshe tuu kOuvalelo wOmwene, ohatu ka kala twa hafa eshi hatu va lombwele kombinga yaKalunga, Omona waye nomanangekonoupuna oo a tuvikililwa ovo hava hafifa Jehova noku mu tanga. — Eps. 148:12, 13.

11. Ongahelipi Ovakorinto vamwe va li va lya omadidiliko Edimbuluko monghedi yokuhe na efimaneko?

11 Eshi to lilongekidile Ouvalelo wOmwene, diladila kwaasho omuyapostoli Paulus a li a shangela eongalo lopaKriste lOvakorinto. (Lesha 1 Ovakorinto 11:27-34.) Paulus okwa li a ulika kutya keshe umwe ou ta li omungome nokunwa meholo ye ina wana, “ota ka kala e netimba lolutu nohonde yOmwene” Jesus Kristus.  Onghee hano, omuvaekwa “ne lipulaapule hano” tete opo a dule okulya omadidiliko Edimbuluko. Ngeenge hasho, “ote lilile ndee te linwine etokolo.” Omolwelihumbato lii, vahapu vomOvakorinto ova li ‘oingone novanaudu, navahapu ova fya’ pamhepo. Otashi dulika vamwe va li va lya nokunwa sha pitilila komesho ile pefimbo lEdimbuluko, osho tashi dulika she va ningifa va kale va kofa pamadiladilo nopamhepo. Okulya omadidiliko Edimbuluko monghedi yokuhe na efimaneko ya tya ngaho, okwa li kwe va ningifa va kale inava hokiwa vali kuKalunga.

12. (a) Paulus okwa li a faafanifa Edimbuluko nashike, nelondwelo lilipi a pa ovo hava kufa ombinga? (b) Oshike osho omunhu oo ha li nokunwa omadidiliko Edimbuluko e na okuninga ngeenge okwa nyono enyono la kwata moiti?

12 Paulus okwa faafanifa Edimbuluko noikulya oyo tai liwa navamwe, nokwa londwela ovo tava kufa ombinga ta ti: “Itamu dulu okunwa meholo lOmwene nomeholo leendemoni, itamu dulu okulya koshililo shOmwene nokoshililo sheendemoni.” (1 Kor. 10:16-21) Ngeenge omunhu oo ha li nokunwa omadidiliko Ouvalelo wOmwene okwa nyono enyono la kwata moiti, oku na okukonga ekwafo lopamhepo. (Lesha Jakob 5:14-16.) Ngeenge omuvaekwa oo okwa imike “oiimati yelidilululo,” okulya nokunwa kwaye omadidiliko Edimbuluko itaku ulike okuhe na efimaneko lekuliloyambo laJesus. — Luk. 3:8.

13. Omolwashike shiwa okwiilikana shi na sha neteelelo letu olo twa pewa kuKalunga?

13 Eshi hatu lilongekidile Edimbuluko, ohatu ka mona ouwa mokudilonga pamwe neilikano keteelelo letu olo twa pewa kuKalunga. Kape na omupiya waJehova e mu liyapulila nomushikuli omudiinini wOmona ta ka kala a hala okuulika okuhe na efimaneko mekuliloyambo laJesus mokulya omadidiliko Edimbuluko ngeenge ke na oumbangi we lixwa po oo tau ulike kutya oku li Omukriste omuvaekwa. Onghee hano, ongahelipi umwe ta dulu okuufa kutya okwa wana okulya nokunwa omadidiliko Edimbuluko ile hasho?

OLYELYE A WANA OKULYA OMADIDILIKO EDIMBULUKO?

14. Ekwatafano lilipi li li pokati kehangano lipe nokulya omadidiliko Edimbuluko?

14 Ovo va wana okulya omadidiliko Edimbuluko ove na oushili kutya ove li oilyo yehangano lipe. Jesus okwa popya shi na sha nomaviinyu a ti: ‘Eholo eli olo ehangano lipe omohonde yange.’ (1 Kor. 11:25) Okupitila momuprofeti Jeremia, Kalunga okwa li a xunganeka kutya ota ka ninga ehangano lipe olo inali fa ehangano lOmhango olo a ningile nOvaisrael. (Lesha Jeremia 31:31-34.) Kalunga okwa ninga ehangano lipe naIsrael shopamhepo. (Gal. 6:15, 16) Ehangano olo ola kolekwa kekuliloyambo laKristus notali longo omolwohonde yaye ya tika. (Luk. 22:20) Jesus oye Omupokati wehangano olo lipe, novavaekwa ovadiinini ovo ve li mo ove na efyuululo lomeulu. — Heb. 8:6; 9:15.

15. Oolyelye va tambulwa mehangano lOuhamba, noufembanghenda ulipi tava ka pewa ngeenge ova kala ovadiinini?

15 Oohandimwe ovo hava li omadidiliko Edimbuluko ove shi shii kutya ova tambulwa mehangano lOuhamba. (Lesha Lukas 12:32.) Ovo va kala ovashikuli vaJesus ovavaekwa nova kala ovadiinini kuye, va kala pamwe naye momauyahame aye, otava ka pangela pamwe naye meulu. (Fil. 3:10) Molwaashi ove li mehangano lOuhamba, ovavaekwa ovadiinini otava ka pangela pamwe naKristus meulu ve li eehamba fiyo alushe. (Eh. 22:5) Oohandimwe ovo ova wana okulya omadidiliko pOuvalelo wOmwene.

16. Yelifa pauxupi eityo lOvaroma 8:15-17.

16 Ovo va hololelwa komhepo kutya ove li ovana vaKalunga ovo ashike ve na okulya omadidiliko Edimbuluko. (Lesha Ovaroma 8:15-17.) Didilika kutya Paulus okwa longifa oshitya shOshiaramaic “Abba,” osho tashi ti  “Tate.” Okaana otashi dulika ka longife oshitya osho eshi taka ifana xe, molwaashi ohashi longifwa kokuulika efimaneko noukaume. Ovo va pewa ‘omhepo [va ninge ovana,’ NW] ove li ovana vaKalunga vopamhepo. Omhepo yaye otai hepaulula pamwe nomhepo yavo, tai va kwafele va mone kutya vo ovanamati vaJehova ovavaekwa. Itashi ti kutya osheshi ashike va kanifa ohokwe yokukala kombada yedu. Ova tomhwa kutya otava ka fyuulula Ouhamba womeulu va ka pangele pamwe naJesus ngeenge ova kala ovadiinini fiyo omefyo. Kunena, ope na ashike oshixupe shovashikuli vaKristus 144 000 ovo ve “nevaeko okOmuyapuki” Jehova. (1 Joh. 2:20; Eh. 14:1) Omhepo yaye oyo hai va ningifa va ifane tava ti, ‘Abba! Tate!’ Kave na tuu ekwatafano naKalunga le likalekelwa!

KALA WA LENGA ETEELELO LOYE LA KANGHAMENA KOMBIBELI

17. Ovavaekwa ove na eteelelo lilipi, nove li tala ko ngahelipi?

17 Ngeenge ou li Omukriste omuvaekwa, eteelelo lomeulu olo oshinima sha fimana okukwatela momailikano oye opaumwene. Eshi Ombibeli ya popya shi na sha ‘nokuvalekelwa’ omuhomboli meulu, Jesus Kristus, naave owa kwatelwa mo nowa teelela nodjuulufi oku ka kala ‘omuhombolwa’ waKristus. (2 Kor. 11:2; Joh. 3:27-29; Eh. 21:2, 9-14) Ngeenge Kalunga ta popi mEendjovo daye shi na sha nohole yaye yokuhola ovana vopamhepo, ou shii kutya oove to tongwa. Nongeenge Eendjovo daJehova tadi pe ovanamati vaye ovavaekwa omalombwelo, omhepo iyapuki ohai ku linyengifa u dulike. Omhepo yaKalunga otai hepaulula pamwe nomhepo yoye kutya ou na eteelelo lomeulu.

18. “Eedi” dimwe odi na eteelelo lilipi, nou li uditile ngahelipi?

18 Ngeenge ou li ‘mongudu inene’ ‘yeedi’ dimwe, Kalunga okwe ku pa eteelelo loku ka kala kombada yedu. (Eh. 7:9; Joh. 10:16) Molwaashi owa hala okukala mOparadisa kombada yedu, oho mono ehafo mokudilonga kwaasho Ombibeli tai ti shi na sha nonghalamwenyo yomonakwiiwa kombada yedu. Owa teelela nodjuulufi u ka hafele ombili inene pamwe novapambele voye novayuki vamwe vali. Owa teelela yo nodjuulufi eshi itapa ka kala vali omhumbwe yoikulya, oluhepo, okumona oixuna, ouyahame nefyo. (Eps. 37:10, 11, 29; 67:7; 72:7, 16; Jes. 33:24) Owa djuulukwa oku ka hambelela ovo tava ka nyumunwa notava ka kala ve na eteelelo lokukala nomwenyo fiyo alushe kombada yedu. (Joh. 5:28, 29) Ino pandula tuu eshi Jehova e ku pa eteelelo olo likumwifi! Nonande iho li omadidiliko Edimbuluko, oho kala po opo u ulike olupandu loye lekuliloyambo laJesus Kristus.

OPO NGOO TO KA KALA?

19, 20. (a) Ongahelipi eteelelo olo wa pewa kuKalunga tali dulu okukala loshili kwoove? (b) Omolwashike to ka kala pOuvalelo wOmwene?

19 Kutya nee eteelelo loye olokombada yedu ile olomeulu, otali ka kala ashike loshili kwoove ngeenge ou na eitavelo muJehova Kalunga, muJesus Kristus nomekulilo. Okukala pEdimbuluko otaku ke ku pa omhito u dilonge keteelelo loye nokefimano lefyo laJesus. Onghee hano, shi ninga elalakano loye oku ka kala umwe womomamiliyona oo taa ka kala pOuvalelo wOmwene oo tau ka ningwa eshi etango tali ningine mEtitano, 3 Aprili 2015 pOmalupale Ouhamba nopeenhele vali dimwe mounyuni aushe.

20 Okukala pEdimbuluko otaku dulu okuhapupalifa olupandu loye lokupandula ekuliloyambo laJesus. Okupwilikina nelitulemo koshipopiwa osho tashi ka yandjwa po otaku dulu oku ku linyengifa u ulike ohole yokuhola vamwe moku va lombwela shi na sha naasho we lihonga kombinga yohole yaJehova nosho yo elalakano laye linene li na sha novanhu. (Mat. 22:34-40) Onghee hano, kala wa tokola toko opo u ka kale pOuvalelo wOmwene.

^ okat. 1 Ovaheberi efiku lavo ola li hali hovele eshi etango tali ningine nokuxula eshi tali ka ningina vali.

^ okat. 9 Tala o-Appendix B12 mo-New World Translation.