Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) JANUALI 2015

Jehova na pameke nokwaamena ohombo yeni

Jehova na pameke nokwaamena ohombo yeni

“Omwene [ngeenge] ita amene oshilando, omunangeli ota kelele oshimha.” — Eps. 127:1b.

1, 2. (a) Omolwashike Ovaisrael 24 000 ve likanifila oku ka mona omanangekonoupuna makumwifi? (b) Omolwashike oshiningwanima osho shonale sha fimana kufye?

FIMBO Ovaisrael va li pokuya mEdu lEudaneko, ovalumenhu omayovi omilongo ova li va ‘haela novana oukadona Ovamoab.’ Oshidjemo, ovanhu 24 000 ova hanaunwa po kuJehova. Diladila ashike, Ovaisrael ova kala efimbo lile va teelela oku ka mona efyuululo lavo nopefimbo opo ova li popepi elela noku li mona, ashike ova li ve likanifila omanangekonoupuna a tya ngaho molwaashi ve liyandja komayeleko. — Num. 25:1-5, 9.

2 Oshihopaenenwa osho shinyikifa oluhodi oshi li “elondwelo kufye [nosha] shangwa oku tu kumaida, ofye ava twa hangika komaxulilo omafimbo ounyuni.” (1 Kor. 10:6-11) Paife otu li pexulilo ‘lomafiku axuuninwa,’ novapiya vaKalunga ove li popepi elela nokuya mounyuni mupe wouyuki. (2 Tim. 3:1; 2 Pet. 3:13) Ndele shinyikifa oluhodi, ovapiya vaJehova vamwe ova xutula omufika wavo wopaenghedi. Ova yulwa komwiyo woluhaelo nova mona oilanduliko inyikifa oluhodi omolwelihumbato olo inali koshoka. Ovanhu va tya ngaho otave likanifile omhito yoku ka mona omanangekonoupuna taa kalelele.

3. Omolwashike ovalihomboli va pumbwa ewiliko neameno laJehova? (Tala efano pehovelo loshitukulwa.)

 3 Molwaashi ounyuni kunena owa duvila omilele, ovashamane novakulukadi ova pumbwa ewiliko neameno laJehova opo eehombo davo di kale da amenwa. (Lesha Epsalme 127:1.) Ohatu ka kundafana nghee ovalihomboli tava dulu okupameka ohombo yavo mokwaamena omitima davo, okweehena popepi naKalunga, okudjala ounhu mupe, okukala hava ningi eenghundafana tadi ti sha nosho yo okuliulikila ohole nokuliwanifila po eemhumbwe dopamilele.

AMENA OMUTIMA WOYE

4. Oshike sha ningifa Ovakriste vamwe va ye moluhaelo?

4 Ohashi ende ngahelipi opo Omukriste e liyandje keyeleko lelihumbato inali koshoka? Luhapu ohashi tameke nomesho. Jesus okwa yelifa a ti: “Okeshe tuu ou ta tale omukainhu nokahalu, oye okwe mu haela momutima waye.” (Mat. 5:27, 28; 2 Pet. 2:14) Ovakriste vahapu ovo va ya moluhaelo ova xutula omufika wavo wopaenghedi mokutala omafano oipala kointaneta ile mokulesha oileshomwa oyo tai popi kombinga yomilele. Ovanhu vamwe ohava tale eemuvi, omaudano ile eeprograma doko-TV odo tadi ulike oinima ya nyika omilele. Vamwe ohava i keeklaba, keendanisha dovanhu tave lidula ile tava i keenhele oko tava ka fefengwa nokufulwa monghedi oyo tai pendula omahalo omilele.

5. Omolwashike twa pumbwa okwaamena omitima detu?

5 Vamwe ohave liyandje komayeleko molwaashi ohava yandje elitulemo komunhu oo ehe fi kaume kavo kopahombo. Molwaashi otu li mounyuni omo ovanhu vehe na elipangelo nohava xumifa komesho eenghedi inadi koshoka doludi keshe, oshi na oupu omutima oo u na omakoto u kulike oihole nomunhu oo ehe fi kaume koye kopahombo. (Lesha Jeremia 17:9, 10.) Jesus okwa ti: “Momutima omo hamu di omadiladilo [mai], omadipao, omanyonohombo, oluhaelo.” — Mat. 15:19.

6, 7. (a) Oshike tashi dulu okuholoka po ngeenge omahalo a puka okwa kulu momitima detu? (b) Ongahelipi hatu dulu okuhenuka exutuko lopaenghedi?

6 Ngeenge omahalo a puka okwa mene omidi momitima davo di na omakoto, ovanhu ovo vavali va hokwafana otava dulu okulihanga tava kundafana oinima oyo ve na ashike okupopya nookaume kavo kopahombo. Ohava hovele okukonga eemhito lwoikando opo va shakene, tave liningifa alushe va fa hava shakene inave shi teelela. Eshi omaliudo avo taa ende taa kulu, omufika wavo wopaenghedi ohau ende tau xutuka. Eshi ekwatafano lavo tali ende tali kulu, ohashi kala shidjuu oku li xulifa po, nonande ove shii kutya osho tava ningi osha puka. — Omayel. 7:21, 22.

7 Oupamhepo wavo ohau nghundipala eshi omahalo a puka neenghundafana davo tadi endele ko fiyo otava tameke okulikwata meenyala, okulixupita, okulikwataakwata komalutu, okulifefenga monghedi oyo tai kokele momilele nokuliulikila ohole meenghedi dimwe vali, oinima oyo ve na okuninga ashike ngeno nookaume kavo kopahombo. Xuuninwa, ohava ‘hongaulwa kokahalu kavo vene.’ Ngeenge okahalu oka fimbapala, “otaka dala oulunde,” nopomhito ei, oluhaelo. (Jak. 1:14, 15) Kashi nyemateka tuu! Ngeno ovanhu ovo vavali ova efele Jehova a pameke etaleko lavo li na sha nohombo oyo iyapuki moku i fimaneka, ngeno exutuko lopaenghedi la tya ngaho inali holoka. Ongahelipi omunhu ta dulu okukulika efimaneko la tya ngaho?

KALENI NOKWEEHENA POPEPI NAKALUNGA

8. Oukaume naJehova ohau tu amene ngahelipi paenghedi?

8 Lesha Epsalme 97:10. Okukala tu na oukaume naJehova okwa fimana ngeenge otwa hala okwaamenwa paenghedi. Eshi hatu lihongo  kombinga yomaukwatya aKalunga mawa nomahokwifa, nohatu kendabala okukala ‘ovahopaeleli vaKalunga ngaashi ovana ovaholike nokweenda mohole,’ ohatu ka kala twa pama nokuhenuka “oluhaelo nakeshe tuu onyata youlunde.” (Ef. 5:1-4) Ovalihomboli ovo ve shii kutya Kalunga ota ka tokola “ovaholi voipala novateyihombo,” ohava longo noudiinini opo va fimanekife ohombo yavo noku i kaleka ihe na oshipo. — Heb. 13:4.

9. (a) Ongahelipi Josef a li a kondjifa eyeleko lokuya moluhaelo? (b) Oshilihongomwa shilipi hatu lihongo moshihopaenenwa shaJosef?

9 Ovapiya vaKalunga ovadiinini vamwe ohava xutula omufika wavo wopaenghedi mokweendafana novanailonga pamwe navo ovo vehe fi Eendombwedi konima yoilonga. Omayeleko otaa dulu yo okuholoka po peevili doilonga. Osha li okonhele yoilonga eshi omunyasha Josef oo a li e na ondjelo iwa a li a didilika kutya okwa hokiwa komukulukadi womuyandji woilonga waye. Okwa kala te mu yeleke efiku keshe aye naye momilele. Efiku limwe okwe “mu kwata koshikutu ndee ta ti: Ila, u nangale naame.” Ashike Josef okwa anya nokwa faduka po. Oshike sha kwafela Josef a kale a pama pamhepo koshi yeyeleko la tya ngaho? Okwa li a tokola toko okuhateya po ekwatafano laye naJehova, naasho oshe mu kwafela a kale a koshoka paenghedi nomudiinini. Omolwetokolotoko laye, Josef okwa li a kanifa oilonga yaye nokutulwa modolongo shihe li pauyuki, ndele Jehova okwa li e mu nangeka noupuna. (Gen. 39:1-12; 41:38-43) Kutya nee ove li koilonga ile opamwe pe lili, Ovakriste ove na okuhenuka okukala navamwe ovo vehe fi ookaume kavo kopahombo meenghalo odo tadi va yeleke va nyone.

DJALA OUNHU MUPE

10. Ongahelipi okudjala ounhu mupe haku amene ohombo?

10 Molwaashi ounhu mupe owa ‘shitwa pahalo laKalunga mouyuki nomoudiinini woshili,’ owa fimanenena opo ovalihomboli va kale va pama pamhepo. (Ef. 4:24) Ovo va djala ounhu mupe ohava ‘dipaa’ oinhimbu yavo ngeenge tashi uya poinima ngaashi “oluhaelo, onyata, olwisho loipala, okahalu kaii, nolwisho.” (Lesha Ovakolossi 3:5, 6.) Oshitya ‘dipaa’ otashi ulike kokukatuka eenghatu da kwata moiti tu lwife omahalo opambelela a puka. Ohatu ka henuka keshe shimwe osho tashi dulu okupendula omahalo okuya momilele naumwe oo ehe fi kaume ketu kopahombo. (Job 31:1) Eshi hatu kaleke okukalamwenyo kwetu metwokumwe nehalo laKalunga, ohatu lihongo ‘okutila owii, nokudama ouwa.’ — Rom. 12:2, 9.

11. Ongahelipi ounhu mupe tau dulu okupameka ohombo?

11 Ounhu mupe otau ulike ‘efano lOmushiti wao,’ Jehova mwene. (Kol. 3:10) Ovashamane novakulukadi itava ka mona tuu omanangekonoupuna ngeenge ova djala ‘efilonghenda lomomutima, olune, elininipiko, omwenyo muwa noutalanheni!’ (Kol. 3:12, yelekanifa no-NW.) Otava ka hafela yo oukumwe mohombo yavo ngeenge ova efa ‘ombili yaKristus i pangele momitima davo.’ (Kol. 3:15) Itashi ka kala tuu shiwa ngeenge ovalihomboli ova kala ve ninafane ‘ohole ya xwama!’ Otava ka kala va hafa eshi tava katuka eenghatu ‘okufimanekafana.’ — Rom. 12:10, yelekanifa no-NW.

12. Omaukwatya elipi to diladila kutya okwa fimana opo ovalihomboli va kale va hafa?

12 Eshi ovalihomboli vamwe va pulwa kutya omaukwatya elipi e va kwafela va kale va hafa mohombo yavo, Sid okwa ti: “Ohole oyo oukwatya wa tongomana oo twa kala hatu kulike. Otwa mona yo kutya oukwatya womwenyo muwa owa fimanenena.” Omukulukadi waye Sonja ota tu kumwe naye nokwa weda ko a ti: “Olune oukwatya wa fimanenena. Notwa kendabala yo okuulika elininipiko nonande haalushe shipu.”

 KALENI HAMU NINGI EENGHUNDAFANA TADI TI SHA

13. Oshike tashi dulu okupameka ekwatafano lopahombo, nomolwashike?

13 Eenghundafana dopahole nado oda fimanenena opo ohombo i kale ya pama. Ohashi kala shinyemateka ngeenge ookaume kopahombo ohava popi novanhu vamwe nefimaneko, ndele vo ngeenge tava popi ve li ovalihomboli ihava popi nefimaneko. Ngeenge ovalihomboli ohava popi “nonya, ekeshuko nehandu, efulakato netukano,’ otava ka nghundipaleka kanini nakanini ekwatafano lavo. (Ef. 4:31) Ponhele yokunghundipaleka ohombo yavo mokuliula nai, ovalihomboli ove na okupameka ekwatafano lavo mokupopya monghedi youkaume, nonghenda nonolune. — Ef. 4:32.

14. Oshike osho ovalihomboli ve na okuhenuka?

14 Ombibeli oya ti kutya ope na “efimbo lokumwena.” (Omuud. 3:7) Osho inashi hala okutya ngeenge opa holoka okuhaudafana katu na okupopya nakaume ketu kopahombo, molwaashi eenghundafana oda fimanenena mohombo. Omukulukadi umwe wokoGermany okwa ti: “Okukala wa mwena otaku dulu okuyahameka kaume koye kopahombo.” Okwa weda ko vali ta ti: “Nonande ihashi kala alushe shipu okukala wa ngungumana ngeenge pa holoka oupyakadi, kashi li pandunge okuhanduka neenghono nopehe nelipangelo. Oto ke lihanga to popi ile to ningi oinima oyo tai dulu okuyahameka kaume koye kopahombo, naasho otashi ka naipaleka ashike onghalo.” Omushamane nomukulukadi itava dulu okukandula po omaupyakadi avo mokukala tave lihanyaukile ile mokukala itava popi. Ponhele yaasho, otava dulu okupameka ohombo yavo mokupongolola po diva okuhaudafana fimbo inaku etifa eenhangu.

15. Eenghundafana tadi ti sha otadi dulu ngahelipi okupameka ohombo?

15 Ekwatafano mohombo ohali pame ngeenge ovalihomboli tava kufa efimbo va lombwelafane omaliudo nomadiladilo avo. Ngeenge oshinima shonhumba ino shi popya monghedi  iwa nonande osha fimana, otashi dulika shiha tye sha. Onghee hano, nonande eenghalo odidjuu, kendabala okupopya newi litalala noneendjovo doukaume. Ngeenge owa ningi ngaho, otashi ka kala shipu kukaume koye kopahombo a pwilikine kwaasho to popi. (Lesha Ovakolossi 4:6.) Omushamane nomukulukadi otava dulu okupameka ohombo yavo mokupopya eendjovo “diwa dokutungafana, da wapala.” — Ef. 4:29.

Omushamane nomukulukadi otava dulu okupameka ohombo yavo neenghundafana tadi ti sha (Tala okatendo 15)

KALENI HAMU LIULIKILE OHOLE NOKULIWANIFILA PO EEMHUMBWE DOPAMILELE

16, 17. Omolwashike sha fimana kovalihomboli okukala hava yavelelafana pamaliudo nokuliwanifila po eemhumbwe dopamilele?

16 Ovalihomboli otava dulu yo okupameka ohombo yavo mokukala va pitifa komesho eemhumbwe dookaume kavo kopahombo. (Fil. 2:3, 4). Ove na okukala ve na ko na sha neemhumbwe dopamaliudo nodopamilele dookaume kavo kopahombo — Lesha 1 Ovakorinto 7:3, 4.

17 Ovalihomboli vamwe ihava ulikile ookaume kavo kopahombo ohole ile ihava kala va hala okuhafela pamwe ekwatafano lopamilele. Ovalumenhu vamwe ohava kala ve udite kutya okuungaunga novakulukadi vavo neyavelelo osha nyika ouvaya. Ashike Ombibeli oya ti: “Ovalumenhu nye, kaleni novakainhu veni neendunge.” (1 Pet. 3:7) Omushamane oku na okuuda ko kutya okuulikilafana ohole okwa kwatela mo shihapu shihe fi ashike okuya momilele. Omukulukadi ota ka kala ha hafele omilele ngeenge omushamane waye ohe mu ulikile ohole nopomafimbo amwe e lili. Ngeenge keshe umwe oku na ko na sha namukwao, otashi ka kala shipu kuvo okuliwanifila po eemhumbwe davo dopamaliudo nodopalutu.

18. Ongahelipi ovashamane novakulukadi tava dulu okupameka ekwatafano lavo mohombo?

18 Nonande kape na elipopilo lokukala uhe fi omudiinini mohombo, okuhaungaungafana nawa otaku dulu okuningifa umwe a ka konge apa ta udifwa nawa. (Omayel. 5:18; Omuud. 9:9) Nomolwaasho Ombibeli tai ladipike ovalihomboli tai ti: “Inamu lidilikafana [omilele], okuninga mwe shi pangela mu likalele manga.” Omolwashike mbela? “Opo mu ha shindwe kuSatana omolwokuhelipangela kweni.” (1 Kor. 7:5) Itashi ka kala tuu shinyemateka ngeenge umwe womovalihomboli okwa efa Satana e mu yeleke “omolwokuhelipangela,” ndele te liyandje nokuya moluhaelo! Ngeenge kaume kopahombo keshe okwa kala ta ‘kongo ouwa wamukwao ndele hawaye mwene’ nokuliwanifila po eemhumbwe dopamilele shi li euliko lohole, ndele haku shi ninga ashike molwaashi e na oku shi ninga, otashi ka pameka ohombo yavo. — 1 Kor. 10:24.

KALENI HAMU AMENE OHOMBO YENI

19. Otu na okukala twa tokola toko okuninga shike, nomolwashike?

19 Otu li popepi elela nokuya mounyuni mupe wouyuki. Nomolwaasho okuliyandja kouhalu wombelela kwa nyika oshiponga ngaashi ashike kwa li kwa nyika oshiponga kOvaisrael 24 000 ovo va li momaluhaela aMoab. Konima eshi Eendjovo daKalunga da popya kombinga yoshiningwanima osho shififohoni noshinyemateka, ode tu londwela da ti: “Ou e lishii e li ofika, na lungame a ha wile po.” (1 Kor. 10:12) Onghee hano, osha fimanenena okupameka eehombo detu mokukala ovadiinini kuTate yetu womeulu nokookaume ketu kopahombo. (Mat. 19:5, 6) Paife olo efimbo ‘lokukendabala shili, tu monike xuuninwa kuye tuhe nonyata notu he noshipo mombili’ shi dulife nale. — 2 Pet. 3:13, 14.