Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) DESEMBA 2014

Okwa li ‘e shii ondjila’

Okwa li ‘e shii ondjila’

GUY HOLLIS PIERCE, oo a li oshilyo shOlutuwiliki lEendombwedi daJehova, okwa mana oweenda waye wokombada yedu mEtivali, omafiku 18 Marsa 2014. Okwa li e na omido 79 eshi eteelelo laye e li umwe vomovamwaxe vaKristus ovanyumunwa la wanifwa. — Heb. 2:10-12; 1 Pet. 3:18.

Guy Pierce okwa dalelwa muAuburn, shaCalifornia, mo-U.S.A, momafiku 6 Novemba 1934 nokwa ninginifwa 1955. Mo 1977, okwa li a hombola Penny, omukulukadi waye omuholike, nova li ve na oludalo. Owino oo a mona eshi a kala ta tekula ovana owe mu ningifa a kale e na eenghedi domudali omunahole. Mo 1982, ye naPenny ova li ve lipyakidila moilonga youkokolindjila, nomo 1986 okwa li a hovela okulonga e li omupashukilishikandjo mOilongo ya Hangana oule womido 11.

Mo 1997, Guy naPenny Pierce ova li va hovela okulonga ve li oilyo youkwaneumbo waBetel mOilongo ya Hangana. Omumwatate Pierce okwa li ha longo mOshikondo shOilonga, nomo 1998 okwa li a nangekwa po a kwafele mOkomitiye yOnghalonawa yOvanhu yOlutuwiliki. Momafiku 2 Oktoba 1999, pokwoongala kwokomudo kwo-Watch Tower Bible and Tract Society of Pennsylvania apa li pa shiivifwa kutya omumwatate Pierce okwa nangekwa po e li oshilyo shOlutuwiliki. Okwa longa mOkomitiye yOnghalonawa yOvanhu, Okomitiye yOkushanga, Okomitiye yOkunyanyangida nomOkomitiye yOkuunganeka.

Omumwatate Pierce okwa li e holike kovanhu va dja momaputuko e lili noku lili molwaashi okwa li e na ohamu nomhepo youkaume. Ndele omaukwatya oo a li e mu ningifa a kale e holike unene kuvamwe, ohole yaye, elininipiko, okufimaneka eemhango nomifikamhango douyuki nosho yo okukala a itavela filufilu muJehova. Guy Pierce okwa li a itavela kutya, ngaashi ashike etango ihali kala inali pita, omaudaneko aJehova kae na fiku a kale inaa wanifwa, noushili oo okwa li a hala oku u shiivifila ovanhu aveshe mounyuni.

Omumwatate Pierce okwa li ha longele Jehova noudiinini, ha penduka ongula inene nokulonga fiyo oufiku. Okwa li ha i momalweendo opo a ka twe omukumo ovamwaxe Ovakriste mounyuni aushe, nokwa li ha longifa efimbo opo a popye noohandimwe moukwaneumbo waBetel nosho yo ovo va hala okupanga oukaume naye, ovo va hala okupewa omayele nokukwafelwa. Nokuli nonande opa pita omido dihapu, ovaitaveli vakwao otava dimbuluka omhepo yaye yokuyakula vamwe, youkaume nosho yo etwomukumo laye lopamishangwa.

Omumwatate nakaume ketu omuholike okwa fiya ko omukulukadi waye novana va-6 nosho yo ovatekulu novatekulululwa. Okwa li yo e na ovana vopamhepo vahapu. Oshipopiwa shedimbuluko osha ningilwa moBetel yaBrooklyn mOlomakaya 22 Marsa 2014, sha yandjwa kuMark Sanderson, oshilyo shikwao shOlutuwiliki. Okwa popya kombinga yoinima ihapu, mwa kwatelwa eteelelo lomeulu lomumwatate Pierce nokulesha eendjovo daJesus odo tadi ti: “Meumbo laTate omu na eendjwo dihapu. . . . Nande ohandi i ndi ke mu [longele] onhele, ohandi aluka, ndele handi mu ile, nanye yo mu kale apa Ame ndi li. Apa handi i, ondjila mu i shi.” — Joh. 14:2-4.

Oshoshili kutya otwa djuulukwa omumwatate Pierce neenghono. Ashike otwa hafa molwaashi ‘ondjila oku i shii’ oyo tai mu twala ‘kondjwo,’ ile tu tye kolukalwa laye laalushe.