Inda koshikalimo

Inda kelandulafano etivali

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) NOVEMBA 2014

Omolwashike tu na okukala ovayapuki?

Omolwashike tu na okukala ovayapuki?

“Nye mu nokukala ovayapuki.” — LEV. 11:45.

1. Ongahelipi embo laLeviticus tali dulu oku tu kwafela?

MEMBO laLeviticus omwa popiwa ouyapuki lwoikando ihapu shi dulife momambo makwao Ombibeli. Molwaashi ovalongeli vaJehova aveshe vashili ova teelelwa va kale ve na oukwatya oo, okuuda ko nokukala twa lenga embo laLeviticus otashi ke tu kwafela tu kale ovayapuki.

2. Oinima imwe ilipi i li membo laLeviticus?

2 Embo laLeviticus olo la shangwa komuprofeti Moses, oli li oshitukulwa ‘shOmishangwa adishe’ odo di shii okuhonga. (2 Tim. 3:16) Eshi Ombibeli ya shangelwe pehovelo, edina laJehova ola holoka mo lwoikando hanga omulongo metukulwa keshe lembo olo. Okuuda ko embo laLeviticus otaku ke tu pameka tu henuke okuninga keshe osho tashi dulu okushekifa edina laKalunga. (Lev. 22:32) Eshi embo olo la longifa lwoikando outumbulilo “Aame [Jehova, NW]” oshi na oku tu dimbulukifa tu dulike kuKalunga. Moshitukulwa eshi naashi tashi landula, ohatu ka kundafana oitwa imwe ya fimana oyo tai hangwa membo laLeviticus, olo li li oshali ya dja kuKalunga oyo tai tu kwafele tu kale melongelokalunga liyapuki.

 OUYAPUKI OWA PUMBIWA

3, 4. Okulikosha kwaAron novanamati vaye otaku faneke shike? (Tala efano pehovelo loshitukulwa.)

3 Lesha Leviticus 8:5, 6Jehova okwa li a hoolola Aron a ninge omupristeri omukulunhu waIsrael, novanamati vaye ova li ve na okulonga ve li ovapristeri tava yakula oshiwana shavo. Aron ota faneke Jesus Kristus ofimbo ovanamati vaye tava faneke ovashikuli vaJesus ovavaekwa. Ndele mbela okulikosha kwaAron okwa li taku faneke okuliyelifa kwaJesus? Ahowe, Jesus ka li a pumbwa okuliyelifa molwaashi ka li e na etimba noka li e “na nande oshipo.” (Heb. 7:26; 9:14) Ashike okulikosha kwaAron okwa li taku ulike kutya Jesus okwa koshoka nomuyuki. Ndele mbela okulikosha kwovanamati vaAron otaku faneke shike?

4 Okulikosha kwovanamati vaAron otaku faneke okukosholwa kwaavo va hoololwa va ka ninge oilyo yongudu youpristeri meulu. Ndele mbela eninginifo lovavaekwa oli na ekwatafano nokulikoshola kwovanamati vaAron? Ahowe, eninginifo ihali kosho po omatimba; ndele ponhele yaasho, ohali ulike kutya omunhu okwe liyapulila filufilu Jehova Kalunga. Okukosholwa kwovavaekwa ohaku ningwa okupitila ‘meendjovo,’ naasho otashi pula okutula moilonga nomutima aushe omahongo aKristus mokukalamwenyo kwavo. (Ef. 5:25-27) Kungaho, ova yapulwa nova kosholwa. Ndele ongahelipi shi na sha ‘needi’ dimwe? — Joh. 10:16.

5. Omolwashike taku dulu okutiwa kutya eedi dimwe oda kosholwa okupitila mEendjovo daKalunga?

5 Ovanamati vaAron itava faneke eedi dimwe daJesus ile oilyo ‘yongudu inene.’ (Eh. 7:9) Mbela oohandimwe va tya ngaho ovo va ninginifwa navo ohava ningi ovayapuki nova yelifwa okupitila mEendjovo daKalunga? Heeno! Ngeenge ovo ve na eteelelo loku ka kala kombada yedu tava lesha osho Ombibeli tai ti kombinga yefimano nongushu yohonde yaJesus ya tika, ohava kala va itavela meendjovo odo nohava ‘[longo oilonga iyapuki, NW] omutenya noufiku.’ (Eh. 7:13-15) Oidjemo yokukosholwa taku twikile kwovavaekwa needi dimwe oi liwetikile eshi tava twikile “nokweenda [vehe] noshipo.” (1 Pet. 2:12) Jehova iha kala tuu a hafa eshi ta tale oukoshoki noukumwe wovavaekwa needi dimwe, ovo hava pwilikine nokushikula noudiinini Omufita wavo, Jesus!

6. Okulikonakona paumwene kulipi taku ke tu etela ouwa?

6 Oshiteelelwa osho kutya ovapristeri vomuIsrael ova li ve na okukala va koshoka palutu oshi na eityo lolela koshiwana shaJehova kunena. Ovo hatu konakona Ombibeli navo luhapu ohave shi didilike mo kutya eenhele detu delongelokalunga oda koshoka nosho yo kutya otwa koshoka nohatu djala nawa. Shimwe vali, oukoshoki wovapristeri otau tu kwafele tu dimbuluke kutya keshe oo ta i komhunda yaJehova yelongelokalunga oyo ya lelepala, oku na okukala “nomutima wa yela.” (Lesha Epsalme 24:3, 4; Jes. 2:2, 3.) Oilonga iyapuki oyo hatu longele Kalunga oi na okulongwa nomadiladilo nomitima da yela nosho yo nomalutu a yela. Osho otashi pula okukala hatu likonakona fye vene lwoikando, nokonima yaasho vamwe otashi dulika va pumbwa okuninga omalunduluko manene opo va dule okukala ovayapuki. (2 Kor. 13:5) Pashihopaenenwa, omunhu a ninginifwa oo ha tale owina omafano oipala oku na okulipula kutya, ‘Ohandi ulike ngoo kutya ondi muyapuki?’ Opo nee na konge ekwafo opo a xulife po onghedindjikilile oyo inai koshoka. — Jak. 5:14.

ULIKA KUTYA OU MUYAPUKI MOKUKALA HO DULIKA

7. Metwokumwe naLeviticus 8:22-24, Jesus okwa tula po oshihopaenenwa shilipi?

7 Eshi ovapristeri vomuIsrael va li hava nangekwa po, Omupristeri Omukulunhu Aron novanamati vaye ova li hava xuwa ohonde yodi kokutwi kwokolulyo nosho yo komunwe wakula wokeenyala nowokeemhadi. (Lesha Leviticus 8:22-24.) Okulongifa ohonde monghedi oyo  okwa li taku ulike kutya ovapristeri ove na okuwanifa po neduliko oinakuwanifwa yavo ngaashi tava dulu. Sha faafana, Omupristeri Omukulunhu Jesus okwa tulila po ovavaekwa needi dimwe oshihopaenenwa sha wanenena. Okutwi kwaye okwa li haku pwilikine kewiliko laKalunga. Jesus okwa longifa eenyala daye mokuwanifa po ehalo laJehova neemhadi daye inadi yapuka mo mondjila iyapuki. — Joh. 4:31-34.

8. Ovalongeli vaJehova aveshe ove na okuninga shike?

8 Ovakriste ovavaekwa needi dimwe daJesus ove na okushikula oshihopaenenwa shokukanyatela oudiinini shOmupristeri wavo Omukulunhu. Ovalongeli vaJehova aveshe ove na okudulika kewiliko olo tali hangwa mEendjovo daye, nokungaho, otava ka henuka okunyikifa oluhodi omhepo yaye. (Ef. 4:30) Ove na yo ‘okuyukifa omalila eemhadi davo.’ — Heb. 12:13.

9. Ovamwatate vatatu ovo va kala nokulonga pamwe noilyo yOlutuwiliki ova popya shike, nongahelipi eendjovo davo tadi dulu oku ku kwafela u twikile okuulika kutya ou muyapuki?

9 Natu ka taleni komatyekosha taa di komitima ovamwatate vatatu ovo ve na eteelelo loku ka kala kombada yedu nova kala tava longo pamwe noilyo yOlutuwiliki oule womido dihapu. Umwe okwa ti: “Nonande eshi osha kala oufembanghenda we likalekelwa eshi hatu longo pamwe efimbo nefimbo novamwatate ovo, ohatu mono kutya nonande ovavaekwa nomhepo, inava wanenena. Ndele nande ongaho, elalakano limwe lomwaao nda kala nde litulila po oleli kutya ondi na okudulika kwaavo tava kwatele komesho.” Omumwatate omutivali okwa ti: “Omishangwa ngaashi 2 Ovakorinto 10:5, odo tadi popi kombinga ‘yokudulika kuKristus,’ oda kwafela nge ndi dulike nokulongela kumwe naavo tava kwatele komesho. Olo ola li eduliko tali di komutima.” Omumwatate omutitatu okwa ti: “Ngeenge ou hole osho Jehova e hole nokutonda osho e tonde, okukala ho kongo ewiliko laye nokulonga osho tashi mu wapalele, kungaho oto dulika kehangano laye nokwaavo ta longifa opo a wanife po elalakano laye kombada yedu.” Omumwatate oo okwa li a uda kutya Nathan Knorr, oo a ka ninga oshilyo shOlutuwiliki, okwa li a tambula ko nehalo liwa oinima oyo vamwe va li tava pataneke oyo ya li ya yelifwa mOshungonangelo yOshiingilisha yomo 1925, moshitukulwa shi na oshipalanyole, “Okudalwa kwoshiwana.” Eduliko la tya ngaho ola li la kuma neenghono omumwatate oo. Okudilonga keendjovo dovamwatate vatatu ovo twa dja nokupopya otaku ku kwafele u ulike kutya ou muyapuki mokukala ho dulika.

OKUDULIKA FILUFILU KOMHANGO YAKALUNGA I NA SHA NOHONDE

10. Osha fimana shi fike peni okudulika komhango yaKalunga i na sha nohonde?

10 Lesha Leviticus 17:10. Jehova okwa li a lombwela Ovaisrael vaha lye “keshe ohonde,” ile tu tye, yoludi keshe. Okulidilika ohonde, kutya nee oyoshinamwenyo ile oyomunhu, oku li yo oshiteelelwa shopaKriste. (Oil. 15:28, 29) Otu na okukala twa tila Kalunga e tu ‘taalelife oshipala shaye nehandu’ noku tu dima mo meongalo laye. Otu mu hole notwa hala okudulika kuye. Nokuli nonande otwe lihange monghalo tai pula efyo ile omwenyo, natu kale twa tokola toko tuhe liyandje kwaasho ovo vehe shii Jehova nokave na ko nasha nokudulika kuye va hala tu ninge. Oshoshili kutya otwa teelela okushekwa omolwokulidilika ohonde, ashike otwa hoolola okudulika kuKalunga. (Jud. 17, 18) Etaleko lilipi li na sha noshikundafanwa eshi tali ke tu kwafela tu kale twa “pama” tuha lye ohonde ile tuha dimine tu i tulwe? — Deut. 12:23.

11. Omolwashike hatu dulu okutya Efiku lEkwatakanifo lokomudo kala li ashike onghedindjikilile yongaho?

11 Okulongifwa kwohonde yoinamwenyo komupristeri omukulunhu mEfiku lEkwatakanifo lokomudo muIsrael shonale otaku tu kwafele tu ude ko etaleko laKalunga li na sha nohonde. Ohonde oya li hai longifwa omolwelalakano le  likalekelwa. Oya li hai longifwa okuninga ekwatakanifo omolwomatimba aavo va hala Jehova e va dimine po. Ohonde yomhedi noyoshikombo oya li i na okushaminwa koshituviko shoshikefa shehangano nokomesho yasho. (Lev. 16:14, 15, 19) Nokungaho, Jehova okwa li ta dulu okudima po omatimba Ovaisrael. Shimwe vali, Jehova okwa popya kutya ngeenge omunhu okwa dipaa oshinamwenyo shokulya, ohonde oku na oku i tilashi noku i fufila nedu, “osheshi omwenyo wombelela keshe ohonde” yayo. (Lev. 17:11-14) Mbela okuninga oinima aishe okwa li ashike onghedindjikilile yongaho? Ahowe. Okulongifwa kwohonde mEfiku lEkwatakanifo nosho yo oshipango shoku i tilashi medu, oi li metwokumwe nelombwelo li na sha nohonde olo Jehova a li a pa Noa noludalo laye. (Gen. 9:3-6) Jehova Kalunga okwa li e va kelela vaha lye ohonde opo ngeno ve lipalule nayo va kale nomwenyo. Osho otashi ti shike kOvakriste?

12. Ongahelipi Paulus a yelifa monhumwafo oyo a li a shangela Ovakriste Ovaheberi ekwatafano olo li li pokati kohonde nokudiminwa po?

12 Eshi omuyapostoli Paulus a li a shangela Ovakriste Ovaheberi kombinga yeenghono dokukoshola dohonde, okwa yelifa ta ti: “Hanga aishe hai yapulwa nohonde pamhango, nokape nekufile po lomatimba pe he netiko lohonde.” (Heb. 9:22) Paulus okwa popya yo kutya nonande omayambo oinamwenyo okwa li ngoo haa kwafele monghedi yonhumba, okwa li ashike haa dimbulukifa Ovaisrael kutya ove li ovalunde nova pumbwa sha shi dulife pomayambo opo va diminwe po filufilu omatimba avo. Omhango oya li ashike “omudidimbe wongaho wouwa wokomesho, halupe loinima yovene.” (Heb. 10:1-4) Osha enda ngahelipi opo ovanhu va dule okudiminwa po omatimba avo?

13. Ou uditile ngahelipi oushili oo kutya Jesus okwa yandja kuJehova ongushu yohonde yaye?

13 Lesha Ovaefeso 1:7. Efyo laJesus Kristus lopayambo, ou e “liyandja ponhele” yetu nehalo liwa, otali ti sha lela kwaaveshe ovo ve mu hole nove hole Xe. (Gal. 2:20) Ashike nande ongaho, osho Jesus a ninga konima yefyo nenyumuko laye osho she tu mangulula, she shi ninga tashi shiiva opo tu diminwe po omatimba etu. Jesus okwa wanifa po osho sha li tashi fanekwa kOmhango yaMoses mEfiku lEkwatakanifo. Mefiku olo, omupristeri omukulunhu okwa  li ha i nohonde yonhumba yoinamwenyo oyo tai yambwa mOuyapukielela metwalihangano, nolwanima omotembeli yaSalomo, noku i twala koshipala shaKalunga, a fa e li naye komudidi. (Lev. 16:11-15) Sha faafana, Jesus okwa ya meulu lo vene nongushu yohonde yaye yopanhu noku i yandja kuJehova. (Heb. 9:6, 7, 11-14, 24-28) Inatu pandula tuu eshi omatimba etu a dimwa po notu na eliudo la yela molwaashi tu na eitavelo tali longo mohonde yaJesus!

14, 15. Omolwashike sha fimana okuuda ko nokudulika komhango yaJehova i na sha nohonde?

14 Mbela paife ou udite ko nawa kutya omolwashike Jehova e tu lombwela tuha lye ‘ohonde yoludi keshe’? (Lev. 17:10) Mbela ou udite ko etomheno kutya omolwashike Kalunga a tala ko ohonde iyapuki? Kalunga okwa tala ko ohonde i li ngaashi omwenyo. (Gen. 9:4) Owa dimina ngoo kutya otu na okutambula ko etaleko laKalunga li na sha nohonde nokudulika koshipango shaye shoku i lidilika? Ohatu dulu ashike okukala tu na ombili naKalunga ngeenge otu na eitavelo mekuliloyambo laJesus notu udite ko kutya ohonde oi na eityo le likalekelwa kOmushiti wetu. — Kol. 1:19, 20.

15 Keshe umwe womufye otashi dulika e lihange ombadilila a taalela eyeleko lokutulwa ohonde. Ile omupambele ile kaume koye otashi dulika e lihange ombadilila monghalo omo e na okutokola kutya ota tulwa ohonde ile hasho. Monghalo ya tya ngaho, otu na yo okuninga omatokolo shi na sha noutukulwa vanini ovo va kufwa mohonde nomilandu dopauhaku. Onghee hano, osha fimanenena okuninga omapekapeko nokulilongekidila eenghalo dopaulumomhumbwe. Ngeenge otwa ningi ngaho pamwe neilikano, otashi ke tu kwafela tu kale twa pama nokuhenuka okuhakatuka pandunge moshinima osho. Inatu hala okunyikifa oluhodi omutima waJehova mokutambula ko oshinima osho sha tokolwa mEendjovo daye! Ovashiivinawa voinima yopaunamiti vahapu nosho yo vamwe ovo tava xumifa komesho etulwohonde ohava indile ovanhu va yandje ohonde nelalakano opo ngeno va xupife eemwenyo. Ashike oshiwana shaJehova shiyapuki osha dimina kutya Omushiti oku na oufemba wokuufa kutya ohonde oi na okulongifwa ngahelipi. “Keshe ohonde” okwe i tala ko iyapuki. Otu na okukala twa tokola toko okudulika komhango yaye i na sha nohonde. Okupitila melihumbato letu liyapuki, ohatu ulike kutya otwa pandula filufilu eenghono dokuxupifa dohonde yaJesus, oyo oyo aike ye shi ningifa tashi shiiva opo tu diminwe po omatimba etu notu ka kale nomwenyo waalushe. — Joh. 3:16.

Owa tokola ngoo okudulika komhango yaJehova i na sha nohonde? (Tala okatendo 14, 15)

OMOLWASHIKE JEHOVA A TEELELA TU KALE OVAYAPUKI?

16. Omolwashike oshiwana shaJehova shi na okukala shiyapuki?

16 Eshi Kalunga a li ta mangulula Ovaisrael moupika waEgipti, okwe va lombwela ta ti: “Aame Omwene, ou nde mu pitifa mo medu laEgipti, opo ndi kale Kalunga keni. Osho ngaha hano nye mu nokukala ovayapuki shaashi Aame omuyapuki.” (Lev. 11:45) Ovaisrael ova li va teelelwa va kale ovayapuki molwaashi Jehova omuyapuki. Tu li Eendombwedi daJehova, nafye otu na okukala ovayapuki. Embo laLeviticus ole tu yelifila nawa oshinima osho.

17. Ou uditile ngahelipi embo lOmbibeli laLeviticus?

17 Okukonakona oitukulwa yonhumba yaLeviticus okwe tu etela shili ouwa. Otashi dulika oshitukulwa eshi sha hapupalifa olupandu loye lokupandula embo olo lOmbibeli la nwefwa mo. Okudilonga kouyelele umwe wa fimanenena oo u li muLeviticus oku na okukala kwe ku kwafela u ude ko moule omatomheno kutya omolwashike tu na okukala ovayapuki. Ndele mbela eeshili vali di na ondilo dopamhepo dilipi hatu ke lihonga membo olo li li oshitukulwa shEendjovo daKalunga da nwefwa mo? Oshike vali hatu dulu okulihonga mo shi na sha nokulongela Jehova oilonga iyapuki? Osho ohatu ke shi kundafana moshitukulwa tashi landula.