Inda koshikalimo

Inda kelandulafano etivali

Inda koshikalimo

Eendombwedi daJehova

Oshikwanyama

Oshungonangelo — Oshifo shokukonakonwa  |  Oktoba 2014

Otamu ka ninga “ouhamba wovapristeri”

Otamu ka ninga “ouhamba wovapristeri”

“Otamu ka kalela nge ouhamba wovapristeri noshiwana shiyapuki.” — EX. 19:6.

1, 2. Oludalo lomwalikadi ola li la pumbwa eameno lilipi, nomolwashike?

EXUNGANEKO lotete olo la shangwa mOmbibeli otali dana onghandangala inene mokuwanifwa kwelalakano laJehova. Eshi Kalunga kashili a li a udaneka eudaneko lomuEden, okwa ti: ‘Ohandi ka tula outondwe pokati koye [Satana] nomwalikadi . . . nokoludalo loye nokoludalo laye.’ Outondwe oo owa li tau ka kala u fike peni? Jehova okwa ti: “Ye [oludalo lomwalikadi] ota ka nyanyaula omutwe [waSatana] ndele ove to ke mu twa moshififinwa.” (Gen. 3:15) Outondwe pokati keyoka nomwalikadi owa li tau ka kala munene nomolwaasho Satana a li ta ka ninga eenghendabala da mana mo opo a hanaune po oludalo lomwalikadi.

2 Onghee hano, itashi kumwifa eshi omupsalme a popya meilikano laye li na sha noshiwana shaKalunga oshihoololwa a ti: “Tala, osheshi ovo tave ku tondo otava uyaana, novatondi voye otava yelulile omitwe davo pombada. Oshiwana shoye otave shi diladilile ekengelelo, novanhu vopolwamba loye otave va dutile ehangakeno, tava ti: Ileni tu yeni, tu ke va hanauneni po, vo va ha ifanwe vali oshiwana.” (Eps. 83:3-5) Epata omo mwa li tamu ka dja oludalo lomwalikadi ola li li na okwaamenwa liha hanaunwe po noliha nyatekwe. Opo osho shi ningwe, Jehova okwa li vali a ninga po  omalongekido opaveta oo taa ningifa elalakano laye li wanifwe.

EHANGANO OLO TALI AMENE OLUDALO

3, 4. (a) Onaini Ehangano lOmhango la hovela okutulwa moilonga, noshiwana shaIsrael osha li sha dimina okuninga shike? (b) Ehangano lOmhango ola li la totwa opo li kelele shike?

3 Eshi oludalo laAbraham, Isak naJakob la enda tali hapupala fiyo opomamiliyona, Jehova okwe li ninga oshiwana, oshiwana shaIsrael shonale. Jehova okwa li a ninga ehangano le likalekelwa nasho okupitila muMoses moku shi pa Omhango, noshiwana osho shaIsrael osha li sha dimina okuliufa koiteelelwa yehangano olo. Ombibeli oya ti: “[Moses] okwa kufa ko oramata yehangano ndele e i leshela momatwi ovanhu. Ndele vo ova tya: Ashishe eshi Omwene e shi tonga, ohatu ke shi wanifa nokudulika kusho. Opo nee Moses okwa kufa ko ohonde nokwe i shamina kovanhu ndee ta ti: Ohonde ei oyehangano Omwene e li ninga nanye opeendjovo adishe edi.” — Ex. 24:3-8.

4 Ehangano lOmhango ola li la hovela okutulwa moilonga pOmhunda yaSinai mo 1513 K.O.P. Okupitila mehangano olo, oshiwana shaIsrael shonale osha li sha ninga oshiwana shaKalunga oshihoololwa. Jehova okwa li a ninga ‘Omutokoli washo, Omuyandjimhango nOhamba yasho.’ (Jes. 33:22, yelekanifa no-NW.) Ondjokonona yOvaisrael otai ulike kutya oshike hashi ningwa po ngeenge oshiwana tashi dulika komifikamhango daKalunga douyuki nongeenge itashi dulika. Omhango oya li ya dilika Ovaisrael vaha hombolafane novapaani novaha kufe ombinga melongelokalunga loipupulu opo oludalo laAbraham liha nyatekwe. — Ex. 20:4-6; 34:12-16.

5. (a) Ehangano lOmhango ola li la yeululila Ovaisrael omhito ilipi? (b) Omolwashike Kalunga a li ina hokwa vali Ovaisrael?

5 Ehangano lOmhango ola li la kwatela mo yo elongekido loupristeri, olo la li tali faneke elongekido linene lomonakwiiwa. (Heb. 7:11; 10:1) Okupitila mehangano olo, Ovaisrael ova li ve na omhito ye likalekelwa noufembanghenda wokuninga “ouhamba wovapristeri.” Ndele opo va mone oufembanghenda oo ova li ve na okudulika keemhango daJehova. (Lesha Exodus 19:5, 6.) Ashike oshiwana shaIsrael osha li sha dopa okuwanifa po oshiteelelwa osho. Ponhele yokutambula ko Messias eshi e uya, oo e li oshitukulwa shotete sholudalo laAbraham, oshiwana osho kasha li she mu tambula ko. Oshidjemo, Kalunga ka li vali e shi hokwa.

Eshi Ovaisrael inava dulika itashi ti kutya ehangano lOmhanga ola ponya (Tala okatendo 3-6)

6. Omhango oya wanifa po shike?

6 Eshi Ovaisrael va dopa okukala ovadiinini kuJehova nokungaho inava dula vali okuwanifa po omuvalu waavo tava ka ninga ouhamba wovapristeri, osho inashi hala kutya Omhango oya ponya. Omhango oya li tai amene oludalo nokukwafela ovanhu va didilike mo Messias. Osho osha li tashi ka wanifwa po shimha ashike Kristus e uya novanhu ve mu didilika mo. Ombibeli oya ti: “Kristus Oye exulilo lomhango.”  (Rom. 10:4) Ashike epulo oli li apa kutya: Oolyelye va li tava ka kala ve na omhito yokuninga ouhamba wovapristeri? Jehova Kalunga okwa li a ninga po eudafanotwokumwe limwe vali lopaveta lokutota po oshiwana shipe.

OSHIWANA SHIPE

7. Jehova okwa li a xunganeka shike okupitila muJeremia shi na sha nehangano lipe?

7 Nalenale fimbo ehangano lOmhango inali xulifwa po, Jehova okwa li a xunganeka okupitila momuprofeti Jeremia kutya ota ka ninga “ehangano lipe” noshiwana shaIsrael. (Lesha Jeremia 31:31-33.) Ehangano olo kala li tali ka kala la fa ehangano lOmhango meityo olo kutya ovanhu ova li tava dulu okudiminwa po omatimba avo nopehe na okuyamba omayambo oinamwenyo. Osho osha li tashi shiiva ngahelipi?

8, 9. (a) Ohonde yaJesus ya tika oya wanifa po shike? (b) Omhito ilipi ya li ya yeululilwa ovo ve li mehangano lipe? (Tala efano pehovelo loshitukulwa.)

8 Konima yomido omafele onhumba, Jesus okwa li a dika po Ouvalelo wOmwene mo 14 aNisan 33 O.P. Jesus okwa popya kombinga yeholo ta lombwele ovayapostoli vaye ovadiinini 11 ta ti: “Eholo eli olo ehangano lipe omohonde yange tai tilwashi molweni.” (Luk. 22:20) Mehokololo laMateus, Jesus okwa tofwa mo ta popi shi na sha nomaviinyu ta ti: “Olo ohonde yange, ohonde yehangano, tai tilwashi omoluvahapu oyokudima po omatimba.” — Mat. 26:27, 28.

9 Ohonde yaJesus ya tika oyo ya ningifa ehangano lipe li kale li na oshilonga. Oya ningifa yo ovanhu va dule okudiminwa po omatimba avo palumwe nofiyo alushe. Jesus ina kwatelwa mo mehangano olo lipe. Molwaashi ina nyona sha, ka li a pumbwa okudiminwa po. Ashike Kalunga ota longifa ongushu yohonde yaJesus omolwouwa woludalo laAdam. Okwa li yo ta ka vaeka nomhepo iyapuki ovanhu vamwe ovadiinini va ninge “ovana” vaye. (Lesha Ovaroma 8:14-17.) Molwaashi Kalunga okwe va tala ko va fa vehe na omatimba, kungaho ova li tava ka kala va fa Jesus, Omona waKalunga, oo ehe na nande etimba. Ovavaekwa ovo otava ka ninga ‘ovafyuululi pamwe naKristus’ nove na omhito noufembanghenda oo Ovaisrael va li ve na eshi va li koshi yOmhango, woku ka ninga “ouhamba wovapristeri.” Omuyapostoli Petrus okwa popya kombinga ‘yovafyuululi pamwe naKristus’ a ti: “Nye epata la hoololwa nongudu youpristeri pauhamba noshiwana shiyapuki novana vaye mwene, mu hepaulule oilonga ya fimana yaau e mu ifana mo momulaulu, mu ye mouyelele waye tau kumifa.” (1 Pet. 2:9) Ehangano lipe inali fimanenena tuu! Ole shi ningifa tashi shiiva opo ovahongwa vaJesus va ninge oshitukulwa oshitivali sholudalo laAbraham.

EHANGANO LIPE TALI I MOILONGA

10. Ehangano lipe ola li la hovela okutulwa moilonga naini, nomolwashike la li inali tulwa moilonga nale?

10 Onaini ehangano lipe la hovela okutulwa moilonga? Inali hovela okutulwa moilonga okudja eshi Jesus a popya kombinga yalo moufiku waxuuninwa wokukalamwenyo kwaye kwokombada yedu. Opo li ye moilonga, ohonde yaJesus oya li i na okutilwashi nongushu yayo oya li i na okuyandjwa kuJehova meulu. Shimwe vali, ovo va li tava ka ninga ‘ovafyuululi pamwe naKristus’ ova li va pumbwa okutililwa omhepo iyapuki. Nomolwaasho, ehangano lipe ola li la hovela okutulwa moilonga pOpentekoste yomo 33 O.P. eshi ovahongwa vaJesus ovadiinini va li va vaekwa nomhepo iyapuki.

11. Ongahelipi ehangano lipe le shi ninga tashi shiiva opo Ovajuda novanhu vomoiwana imwe va ninge oshitukulwa shaIsrael yopamhepo, novanhu vangapi tava kala mehangano lipe?

11 Nonande ehangano lOmhango ola li la talika ko la “kulupa” eshi Jehova a shiivifa okupitila muJeremia kutya ota ka ninga ehangano  lipe naIsrael, ola ka xula ashike eshi eli lipe la hovela okutulwa moilonga. (Heb. 8:13) Okudja opo, Ovajuda novaitaveli vomoiwana imwe ovo inava pita etanda ova li ve li pondodo imwe pataleko laKalunga, molwaashi ‘epitotanda loshili oleli lomomutima, momhepo hapaendada.’ (Rom. 2:29) Eshi Kalunga a ninga ehangano lipe navo, okwa li ta ka tula omhango yaye ‘momadiladilo avo noku i shangela momitima davo.’ (Heb. 8:10) Omuvalu we lixwa po waavo ve li mehangano lomhango owa li tau ka kala 144 000, nova ninga oshiwana shipe, ‘Israel yaKalunga,’ Israel shopamhepo. — Gal. 6:16; Eh. 14:1, 4.

12. Efaafano lilipi li li pokati kehangano lOmhango nehangano lipe?

12 Efaafano lilipi li li pokati kehangano lOmhango nehangano lipe? Ehangano lOmhango ola li pokati kaJehova naIsrael shopambelela, ehangano lipe oli li pokati kaJehova naIsrael shopamhepo. Ehangano lOmhango ola li li na omupokati, Moses, ehangano lipe nalo oli na omupokati, Jesus. Ehangano lOmhango ola li li na ongushu omolwohonde yoinamwenyo, ofimbo ehangano lipe li na ongushu omolwohonde yaJesus ya tika. Oshiwana shaIsrael osha li sha unganekwa okupitila mehangano lOmhango koshi yewiliko laMoses; ovo ve li mehangano lipe ova unganekwa koshi yewiliko laJesus oo e li Omutwe weongalo. — Ef. 1:22.

13, 14. (a) Ehangano lipe ola pambafana ngahelipi nOuhamba? (b) Oshike sha pumbiwa opo Israel shopamhepo shi dule oku ka pangela pamwe naKristus meulu?

13 Ehangano lipe ola pambafana nOuhamba meityo olo kutya ola etifa po oshiwana shiyapuki osho shi na oufembanghenda woku ka ninga eehamba novapristeri mOuhamba womeulu. Oshiwana osho osho shi li oshitukulwa oshitivali sholudalo laAbraham. (Gal. 3:29) Onghee hano, ehangano lipe ola pameka ehangano olo la ningwa naAbraham.

14 Ope na vali oshinima shimwe shi na sha nOuhamba osho sha li sha pumbwa okutotwa po. Ehangano lipe ola etifa po Israel shopamhepo nole shi ningifa tashi shiiva opo oilyo yalo i ka ninge ‘ovafyuululi pamwe naKristus.’ Ashike opa li pa pumbiwa elongekido lopaveta olo tali va pitike va ka waimine Jesus mOuhamba waye ve li eehamba novapristeri meulu.

EHANGANO OLO TALI PITIKE VAMWE VA KA PANGELE PAMWE NAKRISTUS

15. Ehangano lopaumwene lilipi Jesus a li a ninga novayapostoli vaye ovadiinini?

15 Konima eshi Jesus a dika po Ouvalelo wOmwene, okwa li a ninga ehangano novahongwa vaye ovadiinini, olo luhapu hali ifanwa ehangano lOuhamba. (Lesha Lukas 22:28-30.) Mepingafano nomahangano makwao, omo Jehova a kwatelwa mo, ehangano eli Jesus okwe li ninga paumwene novashikuli vaye ovavaekwa. Eshi Jesus a ti kutya “ongaashi Tate a tokolela nge [ile tu tye, “a ninga naame ehangano,” NW] otashi dulika a li ta popi ehangano olo Jehova a ninga naye loku ka kala “omupristeri fiyo alushe opanghedi yaMelkisedek.” — Heb. 5:5, 6.

16. Ehangano lOuhamba ola ningifa shike tashi shiiva shi na sha nOvakriste ovavaekwa?

16 Ovayapostoli ovadiinini 11 ‘ova kala puJesus momayeleko aye.’ Ehangano lOuhamba otali va shilipaleke kutya otava ka kala naye meulu notava ka kala komalukalwapangelo va pangele ngaashi eehamba nokulonga ve li ovapristeri. Ashike ovayapostoli ovo 11 havo aveke va li tava ka pewa oufembanghenda oo. Omutumbalekwa Jesus okwa li e lihololela omuyapostoli Johannes memoniko nokwa ti: “Ou ta findi, ohandi mu kaleke omutumba pamwe naame kolukalwapangelo lange, ngaashi Ame nda finda ndele ndi li omutumba pamwe naTate okolukalwapangelo laye.” (Eh. 3:21) Onghee hano, Jesus okwa ninga ehangano lOuhamba nOvakriste ovavaekwa 144 000. (Eh. 5:9, 10; 7:4) Ehangano olo ole va pa oufemba  wopaveta woku ka pangela pamwe naJesus meulu. Osho otashi dulu okufaafanifwa nokakadona ka dja moukwaneumbo wa koshoka paenghedi taka ka hombolwa kohamba noku ka pangela pamwe nayo. Omishangwa oda popya nokuli kutya Ovakriste ovavaekwa “omuhombolwa” waKristus, “okakadona ka koshoka” oko Kristus a udanekela kutya ote ke ka hombola po. — Eh. 19:7, 8; 21:9; 2 Kor. 11:2.

KALA U NA EITAVELO IHALI TENGAUKA MOUHAMBA WAKALUNGA

17, 18. (a) Yelifa pauxupi ehangano keshe lomomahangano a-6 oo a pambafana nOuhamba oo twa kundafana. (b) Omolwashike tu na okukala tu na eitavelo ihali tengauka mOuhamba?

17 Omahangano aeshe oo twa kundafana moitukulwa ei ivali okwa pambafana noshinima shimwe ile ihapu ya fimanenena yOuhamba. (Tala oshimhungu, “Nghee Kalunga ta ka wanifa po elalakano laye.”) Osho otashi ulike kutya elongekido lOuhamba ola kanghamena filufilu komaudafanotwokumwe opaveta. Onghee hano, otu na etomheno la kola lokukala twe lineekela filufilu kutya Kalunga ota ka longifa Ouhamba wopaMessias opo a wanife po elalakano laye lopehovelo li na sha nedu nosho yo ovanhu. — Eh. 11:15.

Jehova ota ka wanifa po elalakano laye li na sha nedu okupitila mOuhamba wopaMessias (Tala okatendo 15-18)

18 Inatu tomhwa mbela filufilu kutya Ouhamba otau ka etela ovanhu omanangekonoupuna taa kalelele? Ohatu dulu okuudifila vamwe kutya Ouhamba waKalunga oo ashike tau ka kala ekandulepo tali kalelele lomaupyakadi aeshe ovanhu, hatu shi ningi tu na elineekelo la kola. Onghee hano, natu udifileni vamwe oshili ya tya ngaho nouladi! — Mat. 24:14.