Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) AUGUSTE 2014

Oho mono ngoo “oikulya pefimbo la wapala”?

Oho mono ngoo “oikulya pefimbo la wapala”?

EFIMBO olo tu li mulo olo unene li na omashongo mondjokonona aishe yovanhu. (2 Tim. 3:1-5) Ohole yetu yokuhola Jehova netokolotoko letu lokukala pamufika waye wouyuki ohai yelekwa efiku keshe. Jesus okwa li a xunganeka efimbo olo lidjuu, nokwa li a shilipaleka ovashikuli vaye kutya otava ka pewa etwomukumo olo va pumbwa opo ve lididimike fiyo exulilo. (Mat. 24:3, 13; 28:20) Opo e va pameke, Jesus okwa li a nangeka po omupiya omudiinini a yandje “oikulya [yopamhepo] pefimbo la wapala.” — Mat. 24:45, 46NW.

Okudja eshi omupiya omudiinini a nangekwa po mo 1919, omamiliyona ‘ovapiya’ omomalaka aeshe okwa kala taa ongelwa mehangano laKalunga nokwa kala taa palulwa pamhepo. (Mat. 24:45, 46; Eh. 22:17) Ashike oishangomwa yetu haaishe i li momalaka aeshe, na hakeshe umwe ta dulu okumona oishangomwa yetu oyo hai monika paelektronika. Pashihopaenenwa, vahapu kave na eevidio noihava mono oitukulwa oyo hai nyanyangidwa ashike konhele yetu yokointaneta, ko-jw.org. Mbela osho osha hala okutya vamwe otava pitililwa po keendja odo va pumbwa opo va kale va pama pamhepo? Opo tu fike pexulifodiladilo li li mondjila, natu ka taleni komanyamukulo omapulo ane a fimanenena.

 1. Oshike sha fimanenena moikulya oyo Jehova he tu pe?

Eshi Satana a li ta yeleke Jesus a shitukife omamanya omungome, Jesus okwa li e mu nyamukula ta ti: “Hakomungome auke omunhu ta kala e nomwenyo, ndelenee okondjovo keshe tai di mokanya kaKalunga.” (Mat. 4:3, 4) Eendjovo daKalunga oda shangwa mOmbibeli. (2 Pet. 1:20, 21) Onghee hano, Ombibeli oyo ya fimanenena moikulya yetu yopamhepo. — 2 Tim. 3:16, 17.

Ehangano laJehova ohali andjakaneke Ombibeli yo-New World Translation of the Holy Scriptures ye lixwa po ile oitukulwa yayo momalaka 120, notaa hapupala omudo keshe. Kakele ko-New World Translation of the Holy Scriptures, ope na yo omatoloko eembibeli dimwe omamiliyona de lixwa po ile oitukulwa yado momalaka omayovi. Osho oshi li metwokumwe nehalo laJehova oo a hala “ovanhu aveshe va xupifwe nova fike meshiivo loshili.” (1 Tim. 2:3, 4) Ndele molwaashi “kape na nande oshishitwa shimwe sha holekwa moipafi” yaJehova, ohatu dulu okukala noushili kutya ota ka nanena “eehepele domhepo,” ile tu tye ovo ve shii omhumbwe yavo yopamhepo, kehangano laye noku va pa oikulya yopamhepo. — Heb. 4:13; Mat. 5:3, 6; Joh. 6:44; 10:14.

2. Oishangomwa yetu otai dana onghandangala ilipi mokuyandjwa kwoikulya yopamhepo?

Opo omunhu a kale e na eitavelo la pama, oku na okuninga shihapu shihe fi ashike okulesha Ombibeli. Oku na okuuda ko osho ta lesha nokutula moilonga osho e lihonga. (Jak. 1:22-25) Elenga lokuEtiopia lomefelemudo lotete ola li la dimina oushili oo. Ola li la hangwa tali lesha Eendjovo daKalunga eshi omuudifi wevangeli Filipus e li pula ta ti: “Ove u udite ko tuu eshi to lesha?” Elenga ola nyamukula tali ti: “Handi udu ko ngahelipi, ngenge kape na ou ta tula nge mondjila?” (Oil. 8:26-31) Filipus okwa li a katuka onghatu opo a kwafele elenga li mone eshiivo lashili lEendjovo daKalunga. Elenga ola li le linyengifwa kwaasho le lihonga ndele tali ninginifwa. (Oil. 8:32-38) Sha faafana, oishangomwa yetu ya kanghamena kOmbibeli oye tu kwafela tu shiive oshili. Oya kuma omaliudo etu noye tu ladipika tu tule moilonga osho twe lihonga. — Kol. 1:9, 10.

Ovapiya vaJehova ohava pewa oikulya noikunwa yopamhepo ya henena okupitila moishangomwa. (Jes. 65:13) Pashihopaenenwa, Oshungonangelo, oyo i li momalaka e dulife 210, ohai yelifa omaxunganeko Ombibeli, hai tu kwafele tu kale tu na eudeko lomoule li na sha noshili yopamhepo nohai tu ladipike tu kale pamifikamhango dOmbibeli. Oshifo sho-Awake! osho hashi nyanyangidwa momalaka 100 lwaapo, ohashi hapupalifa eshiivo letu li na sha neshito laJehova nohashi tu ulikile nghee hatu dulu okutula moilonga omayele taa longo Ombibeli. (Omayel. 3:21-23; Rom. 1:20) Omupiya omudiinini oha yandje oishangomwa ya kanghamena kOmbieli momalaka e dulife 680. Oho litulile po ngoo efimbo u leshe Ombibeli keshe efiku? Oho lesha ngoo oshifo keshe shipe nosho yo oishangomwa aishe ipe oyo hai nyanyangidwa melaka loye omudo keshe?

Kakele koishangomwa, ehangano laJehova ohali longekida oipopiwadutilo ya kanghamena kOmbibeli oyo hai yandjwa pokwoongala kwetu nopoyoongalele. Oho hafele ngoo oipopiwa, oinyandwa, omauliko nosho yo omapulapulo oo haa kala pokwoongala kwa tya ngaho? Nopehe na omalimbililo, Jehova ohe tu longekidile oitendele yopamhepo. — Jes. 25:6.

 3. Ngeenge melaka loye kamu na oishangomwa aishe oyo hai nyanyangidwa, mbela oto ka fya ondjala pamhepo?

Hasho. Nokashi na oku tu kumwifa eshi ovapiya vaJehova vamwe tashi dulika va mone oikulya ihapu yopamhepo shi dulife vakwao. Omolwashike hatu tile ngaho? Diladila koshihopaenenwa shovayapostoli. Ova li va pewa omalombwelo mahapu shi dulife ovahongwa vakwao vomefelemudo lotete. (Mark. 4:10; 9:35-37) Ashike nande ongaho, ovahongwa ovo kava li va fya ondjala yopamhepo; ova li va mona osho va pumbwa. — Ef. 4:20-24; 1 Pet. 1:8.

Osha fimana yo okudidilika kutya, shihapu osho Jesus a li a popya naasho a ninga kombada yedu, inashi shangwa mo momambo Omavangeli. Omuyapostoli Johannes okwa ti: “Ope na yo oinima ihapu ilili ei Jesus e i longa, ndele ngeno aishe ya shangwa, ngeno ndi shii mounyuni itamu wana omambo oo, e nokushangwa.” (Joh. 21:25) Nonande ovashikuli vaJesus vomefelemudo lotete ova li va mona omauyelele mahapu kombinga yomulumenhu a wanenena, Jesus, ve tu dule, nafye katu na ondjala yopamhepo. Jehova okwa shilipaleka kutya otu na eshiivo olo twa pumbwa opo tu kale twa wana okushikula oshikoti shaJesus. — 1 Pet. 2:21.

Diladila yo keenhumwafo odo da li da shangelwa omaongalo omefelemudo lotete kovayapostoli. Onhumwafo imwe oyo ya li ya shangwa kuPaulus inai kwatelwa mo mOmbibeli. (Kol. 4:16) Mbela oikulya yetu yopamhepo inai henena molwaashi ashike tuhe na onhumwafo oyo? Hasho. Jehova oku shii osho twa pumbwa nohe tu pe sha henena opo tu kale twa pama pamhepo. — Mat. 6:8.

Jehova oku shii osho twa pumbwa, nokwe tu pa sha henena oku tu kaleka twa pama pamhepo

Kunena, vamwe vomovapiya vaJehova ove na oikulya yopamhepo ihapu ve dule vakwao. Mbela melaka loye ohamu tolokwa ashike oishangomwa inini? Ngeenge osho, shiiva kutya Jehova ote ku file oshisho. Konakona oishangomwa oyo u na po, nongeenge otashi shiiva, kala ho i kokwoongala oko haku longifwa elaka loye. Shilipalekwa yo kutya, Jehova ote ke ku kaleka wa pama pamhepo. — Eps. 1:2; Heb. 10:24, 25.

4. Mbela ngeenge ito dulu okumona omauyelele oo e li ko-jw.org, oto ka fya ondjala yopamhepo?

Osho hatu tula konhele yetu yokointaneta oshosho ashike sha dja moifo yetu nomoishangomwa ikwao yokukonakonwa ya kanghamena kOmbibeli. Onhele yetu yokointaneta ohai kala i na omauyelele oo taa dulu okukwafela ovalihomboli, ovanyasha nosho yo ovo ve na ounona vanini. Omaukwaneumbo ohaa mono ouwa mokukundafana ouyelele wa tya ngaho pelongelokalunga lao loukwaneumbo. Shikwao vali, onhele yetu yokointaneta ohai yandje omauyelele e na sha noinima ya fimanenena, ngaashi ovo va pita kofikola yaGilead nosho yo okwoongala kwokomudo. Ohai kala yo tai shiivifile oumwainafana womounyuni aushe shi na sha noiponga yopaushitwe nosho yo oinima yopaveta oyo ya kuma oshiwana shaJehova. (1 Pet. 5:8, 9) Onhele yetu yokointaneta oi li yo oshilongifo sha fimanenena shokuudifa onghundana iwa, nokuli nomoilongo omo oilonga yetu ya shilikwa.

Ashike oto dulu okukala wa pama pamhepo kashi na nee mbudi kutya oho i konhele yetu yokointaneta ile hasho. Omupiya okwa longa noudiinini mokupilinda nokuyandja oishangomwa ya henena kovapiya aveshe opo va palulwe pamhepo. Onghee hano, ku na okukala u udite wa fininikwa u lande oshikwaelektronika osho tashi ku twala ko-jw.org. Vamwe ovo hava dulu okuya konhele yetu yokointaneta otashi dulika va ninge omalongekido opaumwene opo va pilindile ovo ihava dulu okuya ko, oinima yonhumba oyo hai kala ko, ashike omaongalo inaa teelelwa a ninge ngaho.

Otwa pandula Jesus eshi a wanifa po eudaneko laye li na sha nokufila oshisho eemhumbwe detu dopamhepo. Eshi omafiku axuuninwa aa madjuu taa ende nokupwa ko, ohatu dulu okukala nelineekelo kutya Jehova ota ka twikila oku tu pa “oikulya [yopamhepo] pefimbo la wapala.”