Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) JULI 2014

“Omwene ava vaye oku va shii”

“Omwene ava vaye oku va shii”

“Ou e hole Kalunga, oye a shiivika kuye.” — 1 KOR. 8:3.

1. Hokolola oshimoniwa osho tashi popi shi na sha nokutomhafana kwa puka oko kwa li kwa pukifa vamwe vomoshiwana shaKalunga. (Tala efano pehovelo loshitukulwa.)

EFIKU limwe ongula, Omupristeri Omukulunhu Aron okwa li a fikama poshivelo shetwali laJehova e kwete oshikwatelwa shomakala mu na oitwimino. Polwaamba laye opa li Korah novalumenhu 250 ovo navo keshe umwe e kwete oikwatelwa yomakala mu na oitwimino tave i twimine Jehova. (Num. 16:16-18) Potete, ovalumenhu aveshe ovo ova li tava monika va fa ovalongeli vaJehova ovadiinini. Ndele mepingafano naAron, ovalumenhu ovo ova li ovanashibofa ve na ounhwa nova hala okunangekwa po ve li ovapristeri. (Num. 16:1-11) Ova li tave lifufya mokudiladila kutya Kalunga okwa hokwa onghedi yavo yoku mu longela. Ashike osho va li tava diladila osha li sha handukifa Jehova, oo ha mono momitima nokwa li a didilika oihelele yavo. — Jer. 17:10.

2. Moses okwa li a xunganeka kombinga yashike, neendjovo daye oda li da wanifwa po ngahelipi?

2 Ngonghela, Moses okwa li a xunganeka a ti: “Ongula inene Omwene ta ka holola olyelye [waye].” (Num. 16:5) Shilishili, Jehova okwa li a ulika kutya oolye tave mu longele moshili naava itave mu longele moshili eshi “omundilo wa dja kOmwene ndele wa lungwinifa  po [Korah novalumenhu] venya 250 ava va eta oitwiminifo.” (Num. 16:35; 26:10) Pefimbo opo tuu opo, Jehova okwa li a xupifa Aron, osho tashi ulike kutya okwa li omupristeri nomulongelikalunga washili. — Lesha 1 Ovakorinto 8:3.

3. (a) Onghalo ilipi ya li ya holoka po pefimbo lomuyapostoli Paulus? (b) Oshihopaenenwa shilipi Jehova a tula po omido omafele da pita shokuungaunga novanashibofa?

3 Omido 1 500 lwaapo konima yaasho, onghalo ya faafana oya ka holoka po pefimbo lomuyapostoli Paulus. Vamwe ovo va li va talika ko ve li Ovakriste ova li va tambula ko omahongo oipupulu ashike ova li natango tava twikile okweendafana neongalo. Pakutala, ovashunimonima ovo otashi dulika kava li naanaa va yooloka ko kuvamwe meongalo. Ndele oushunimonima wavo owa li wa nyika oshiponga kOvakriste ovadiinini. Omambungu oo a li moikafa yeedi okwa li taa “nyono po eitavelo lavamwe.” (2 Tim. 2:16-18) Ashike oshinima osho Jehova ka li e shi tala ko shanafangwa, naPaulus okwa li e shii onghedi omo Jehova a li a ungaunga novanashibofa, Korah novayambididi vaye konima yomido omafele da pita. Moshinima eshi, natu ka konakoneni oshitukulwa shihokwifa shomushangwa umwe nokutala kutya oshike hatu lihongo mo.

“AME OMWENE IHANDI LUNDULUKA”

4. Paulus okwa tomhwa kombinga yashike, nongahelipi a li a ulika kutya okwa tomhwa eshi a shangela Timoteus?

4 Paulus okwa li e na oushili kutya Jehova ota ka didilika mo ovalongelikalunga ovanaihelele nokwa li yo a tomhwa kutya Jehova ota ka didilika mo ovo hava dulika kuye. Paulus okwa ulika kutya okwa tomhwa mokutala komautumbulilo oo a longifa eshi a nwefwa mo a shangele Timoteus. Konima eshi Paulus a popya shi na sha nanghee oushunimonima wa yahameka nale vamwe meongalo, okwa ti: “Nande ngaha, ekanghameno la pama laKalunga tali kala la pamenena, ndele ou na oshihako eshi: Omwene ava vaye oku va shii, nakeshe tuu ou ta ifana edina lOmwene, na efe ouhenouyuki.”— 2 Tim. 2:18, 19.

5, 6. Oshike shididilikwedi shi na sha noutumbulilo “ekanghameno la pama laKalunga” oo wa longifwa kuPaulus, naasho otashi dulika sha li sha kuma ngahelipi Timoteus?

5 Oshike shididilikwedi shi na sha nokuhoolola kwaPaulus omautumbulilo oo a longifwa momushangwa oo? Outumbulilo “ekanghameno la pama laKalunga” owa holoka ashike momushangwa oo mOmbibeli. Ombibeli oya longifa oshitya “ekanghameno” tashi ulike koinima i lili noku lili mwa kwatelwa Jerusalem sho venevene osho sha li oshilandopangelo shaIsrael shonale. (Eps. 87:1, 2, yelekanifa no-NW.) Onghandangala oyo Jesus a dana melalakano laJehova otai faafanifwa yo nekanghameno. (1 Kor. 3:11; 1 Pet. 2:6) Paulus okwa li e na shike momadiladilo eshi a shanga kombinga ‘yekanghameno la pama laKalunga’?

6 Paulus okwa tumbula “ekanghameno la pama laKalunga” movelishe omo a tofa eendjovo daMoses odo a li a popya shi na sha naKorah novayambididi vaye, odo di li muNumeri 16:5. Paulus okwa li ta popi shi na sha noiningwanima yopefimbo laMoses, ta kendabala okuladipika Timoteus noku mu dimbulukifa kutya Jehova oha dulu okudidilika mo ovanashibofa noha ningi po sha. Ngaashi ashike Korah, ovashunimonima navo kava li va dula okuya moshipala elalakano laJehova. Paulus ka li a yelifa moule kutya “ekanghameno la pama laKalunga” otali faneke shike. Ndele omautumbulilo oo a li a longifa okwa li a kwafela Timoteus a kale e lineekela meendjila daJehova.

7. Omolwashike hatu dulu okukala noushili kutya Jehova ota ka katuka pauyuki nonoudiinini?

7 Omifikamhango daJehova da tongomana ihadi lunduluka. Epsalme 33:11 ola ti: “Omhangela yOmwene otai kalelele, nomadiladilo omutima waye okomapupi nomapupi.” Omishangwa dimwe oda popya kutya ounamapangelo waJehova, ohole ina oudiinini, ouyuki noudiinini  waye otai kala fiyo alushe. (Ex. 15:18; Eps. 106: 1, NW; 112:9; 117:2) Malakia 3:6 okwa ti: “Ame Omwene ihandi lunduluka.” Sha faafana, Jakob 1:17 okwa ti kutya puJehova kape “nomalundululo ile omapilauko ouyelele nomulaulu.”

“OSHIHAKO” SHOPAFANEKO OSHO TASHI PAMEKE EITAVELO LETU MUJEHOVA

8, 9. Oshilihongomwa shilipi hatu lihongo ‘moshihako’ shomefaneko laPaulus?

8 Mu 2 Timoteus 2:19, Paulus okwa li a longifa efaneko li na sha nekanghameno oko kwa shangwa etumwalaka onga oshinima sha dengwa oshihako. Pefimbo lonale, ovanhu ova li hava shange omashangelo peefulula domatungo tashi dulika taa ulike kutya olyelye e li tunga ile mwene walo. Paulus oye omushangi wOmbibeli wotete a longifa efaneko olo. * Oshihako osho shi li ‘kekanghameno la pama laKalunga’ oshi na omatumwalaka opavali. Lotete, “Omwene ava vaye oku va shii” netivali, ‘Keshe tuu ou ta ifana edina lOmwene, na efe ouhenouyuki.’ Osho otashi tu dimbulukifa osho sha shangwa muNumeri 16:5. — Lesha.

9 Oshilihongomwa shilipi hatu lihongo ‘moshihako’ shomefaneko laPaulus? Ohatu lihongo mo oilihongomwa yopavali ya fimanenena i na sha netaleko laJehova, oyo kutya: (1) Jehova oku hole ovo ovadiinini kuye nosho yo (2) Jehova oku tonde okuhenouyuki. Mbela oshilihongwa osho osha pambafana ngahelipi noshinima shi na sha noushunimonima meongalo?

10. Eenghatu dovashunimonima oda li da kuma ngahelipi ovadiinini vopefimbo laPaulus?

10 Timoteus nosho yo ovadiinini vakwao vamwe otashi dulika va li va piyaanekwa neenghono keenghatu dovashunimonima ovo va li mokati kavo. Ovakriste vamwe otashi dulika va li tave lipula kutya omolwashike ovanhu va tya ngaho va efiwa va kale meongalo. Ovadiinini ovo otashi dulika va li va limbililwa ngeenge Jehova oha yoolola ngoo shili pokati kaavo tava kendabala okukala ovadiinini kuye novashunimonima ovo tave liningifa va fa tave mu longele. — Oil. 20:29, 30.

Timoteus ka li ta ka nwefwa mo keenghatu daavo ve na eamo loushunimonima (Tala okatendo 10-12)

11, 12. Ongahelipi onhumwafo yaPaulus ya li ya pameka eitavelo laTimoteus?

11 Osha yela kutya omumwafo yaPaulus oya li ya pameka eitavelo laTimoteus eshi a li e mu dimbulukifa oshiningwanima shi na sha nanghee Jehova a li a ulika kutya okwa hokwa omudiinini Aron nokuulika kutya ina hokwa omunaihelele Korah nongudu yaye, e va nyaneka pomutenya noku va hanauna po. Paulelalela, Paulus okwa li ta ti kutya nonande mokati kavo omwa li Ovakriste ovanaipupulu, Jehova ota ka didilika  mo ovo vaye, ngaashi ashike a li e shi ninga pefimbo laMoses.

12 Jehova iha lunduluka, nohatu dulu okukala twe mu lineekela. Oku tonde okuhenouyuki nomokweendela ko kwefimbo ota ka nyaneka pomutenya ovalongi vowii ovo inava hala okulivela ombedi. Molwaashi Timoteus okwa li umwe womwaavo ‘tava ifana edina lOmwene,’ okwa li yo a dimbulukifwa kutya oku na okulungama aha nwefwe mo kokuhenouyuki kwOvakriste ovanaipupulu. *

OKULONGELA KALUNGA NOMUTIMA AUSHE KAKU FI OSHIMHA

13. Ohatu dulu okukala nelineekelo lilipi?

13 Nafye ohatu dulu okupamekwa pamhepo keendjovo daPaulus da nwefwa mo. Komesho yaaishe, otashi hekeleke okushiiva kutya Jehova oku wete kutya otu li ovadiinini kuye. Osho inashi hala kutya oku tu wete ashike ngahenya ndele ke na nafye, ponhele yaasho, Jehova oku na ko nasha filufilu naava vaye. Ombibeli oya ti: “Omesho Omwene taa tale edu alishe, opo a kwafe neenghono ovo have liameke kuye nomutima aushe.” (2 Omaf. 16:9) Onghee hano, ohatu dulu okukala noushili filufilu kutya keshe osho hatu longele Jehova ‘nomutima wa yela’ kashi na fiku shi kale oshimha. — 1 Tim. 1:5; 1 Kor. 15:58.

14. Jehova ke hole okulongelwa kovanhu ve na oikala ilipi?

14 Otashi hekeleke yo okushiiva kutya Jehova ke hole ovo tave mu longele noihelele. Ngaashi naanaa omesho aye “taa tale edu alishe,” ota dulu okudidilika ovo itave “liameke kuye nomutima aushe.” Omayeletumbulo 3:32 oya ti kutya “omupukifi oye oixuna kOmwene.” Omupukifi ongaashi ovanhu ovo have liningifa va fa ovaduliki ofimbo tava nyono meholeko. Nonande ovanhu va tya ngaho otashi dulika va holeke nelungi ovanhu vakwao omanyono avo oule wokafimbo, Jehova omunaenghono adishe nomuyuki okwa ti kutya “Ou [ta] holeke omatauluko aye, ita ka mona elao.” — Omayel. 28:13; lesha 1 Timoteus 5:24; Ovaheberi 4:13.

15. Oshike tu na okuhenuka, nomolwashike?

15 Vahapu vomoshiwana shaJehova ove mu liyandjela nomutima aushe. Hanaanaa umwe meongalo ta ka tambula ko owina eenghedi doihelele dokulongela Kalunga. Ashike ngeenge osha li sha ningwa pefimbo laMoses nopefimbo lOvakriste vomefelemudo lotete, otashi dulu yo okuningwa kunena. (2 Tim. 3:1, 5) Ndele mbela otu na okukala twa limbililwa Ovakriste vakwetu hatu fekele kutya otashi dulika vehe fi ovadiinini kuJehova? Hasho nandenande. Osha puka okukala hatu fekele kutya ovamwatate novamwameme kave fi ovadiinini kuJehova. (Lesha Ovaroma 14:10-12; 1 Ovakorinto 13:7.) Okukala neamo lokulimbililwa oudiinini wavamwe meongalo otaku dulu oku tu yahameka pamhepo.

16. (a) Oshike osho keshe umwe womufye ta dulu okuninga opo a kelele oihelele iha mene omidi momutima waye? (b) Oilihongomwa ilipi hatu lihongo moshimhungu ‘ Liyelekeni nye vene nokulipulapula’?

16 Omukriste keshe oku na ‘okukonakona oilonga yaye mwene.’ (Gal. 6:4) Omolweamo letu loulunde, otashi dulika ngoo pa holoke eamo lokuhe na oudiinini. (Heb. 3:12, 13) Onghee hano, omafimbo nomafimbo otu na okukonakona omalinyengotomheno etu okulongela Jehova. Otashi dulika tu lipule kutya: ‘Mbela ohandi longele Jehova omolwohole yoku mu hola nomokudimina ounamapangelo waye? Ile ohandi yandje unene elitulemo komanangekonoupuna opalutu oo handi ka mona moParadisa?’ (Eh. 4:11) Osha yela kutya atusheni ohatu dulu okumona ouwa mokukonakona eenghatu detu vene nokukufa mo eamo keshe loihelele momitima detu.

OUDIININI OHAU ETA EHAFO

17, 18. Omolwashike tu na okulongela Jehova nomutima aushe?

17 Ngeenge otwa kendabala okulongela Jehova nomutima aushe, ohatu ka mona omauwa  mahapu. Omupsalme okwa ti: “Omulumenhu omunelao oye ou Omwene ite mu valulile owii waye, nomomhepo yaye ngenge kamu na ekonda.” (Eps. 32:2) Osha yela kutya ovo hava kufa mo oihelele momitima davo ova hafa nove li melila loku ka kala va hafa fiyo alushe.

18 Mokweendela ko kwefimbo, Jehova ota ka nyaneka pomutenya aveshe ovo hava longo owii ile ve na onghalamwenyo yopavali, ta ka ulika “etongolo pakati kovayuki novadinikalunga, pokati kaau ha longele Kalunga naau ihe mu longele.” (Mal. 3:18) Fimbo twa teelela osho shi ningwe, otashi hekeleke okushiiva kutya “omesho Omwene ohaa pashukile ovayuki nomatwi aye ohaa endekele komailikano avo.” — 1 Pet. 3:12.

^ okat. 8 Ehololo 21:14 olo la ka shangwa konima yomido omilongo okudja eshi Paulus a shangela Timoteus onhumwafo, omwa tumbulwa ‘omamanya omakanghameno’ omulongo naavali a shangwa omadina ovayapostoli 12.

^ okat. 12 Oshitukulwa tashi landula ko otashi ka kundafana nghee hatu dulu okuhopaenena Jehova mokweefa ouhenouyuki.