Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) JUNI 2014

“Hola Omwene Kalunga koye”

“Hola Omwene Kalunga koye”

Hola Omwene Kalunga koye nomutima woye aushe nomwenyo woye aushe neendunge doye adishe.— MAT. 22:37.

1. Oshike sha ningifa Kalunga nOmona va kale ve holafane neenghono?

OMONA waKalunga, Jesus Kristus okwa ti: “Ame ondi hole Tate.” (Joh. 14:31) Okwa ti yo vali: “Xe e hole Omona.” (Joh. 5:20) Osho kashi na oku tu kumwifa molwaashi fimbo Jesus ine uya kombada yedu, okwa kala oule womido puKalunga ngaashi “omunongoelela.” (Omayel. 8:30) Eshi Jehova naJesus va kala nokulonga pamwe, Omona okwe lihonga shihapu shi na sha nomaukwatya aXe noku na omatomheno mahapu oku mu hola. Osha yela kutya ekwatafano lavo lopofingo olo le va ningifa va kale ve holafane neenghono.

2. (a) Ohole oya kwatela mo shike? (b) Omapulo elipi hatu ka kundafana?

2 Ohole oya kwatela mo omaliudo okukala wa nanenwa komunhu wonhumba. Omupsalme David okwa imba ta ti: “Omwene, ondi ku hole nohole yokomutima, Oove eenghono dange.” (Eps. 18:2) Nafye osho tu na okukala tu uditile Kalunga ngaho molwaashi oku tu hole. Ngeenge otwa kala hatu dulika kuKalunga, ota ka ulika kutya oku tu hole. (Lesha Deuteronomion 7:12, 13.) Ndele mbela ohatu dulu ngoo okukala tu hole shili Kalunga ye ihatu mu mono? Okukala tu hole Jehova osha hala okutya shike? Omolwashike tu na okukala tu mu hole? Nongahelipi hatu dulu okuulika kutya otu mu hole?

 OMOLWASHIKE HATU DULU OKUKALA TU HOLE KALUNGA?

3, 4. Omolwashike hatu dulu okukala tu hole Jehova nonande ihatu mu mono?

3 “Kalunga Oye Omhepo,” onghee hano, itatu dulu oku mu mona. (Joh. 4:24) Ndele ohatu dulu okukala tu mu hole, notwa lombwelwa mOmbibeli tu ulike ohole ya tya ngaho. Pashihopaenenwa, Moses okwa li a lombwela Ovaisrael a ti: “Hola Omwene Kalunga koye nomutima woye aushe nomwenyo woye aushe neenghono doye adishe.” — Deut. 6:5.

4 Omolwashike hatu dulu okukala tu hole Jehova nohole yomoule? Omolwaashi okwe tu shita tu na omhumbwe yopamhepo nohatu dulu okuulika ohole. Ngeenge omhumbwe yetu yopamhepo oya wanifwa po monghedi ya yuka, ohole yetu yokuhola Jehova otai kulu notu na omatomheno a kola okukala twa hafa. Jesus okwa ti: “Ovanelao ovovo ve shii omhumbwe yavo yopamhepo, osheshi ouhamba weulu wavo.” (Mat. 5:3, yelekanifa no-NW.) Embo Man Does Not Stand Alone, la shangwa ku-A. C. Morrison, ola popya shi na sha nehalo lokulongela Kalunga olo la shitilwa movanhu, la ti: “Oshinima shikumwifi neenghono eshi ovanhu mounyuni aushe va itavela kutya oku na omunhu munenenene meshito nohava kala ve na ehalo loku mu longela.”

5. Otu shi shii ngahelipi kutya otashi ti sha okukonga Kalunga?

5 Mbela otashi ti sha ngoo okukonga Kalunga? Heeno, molwaashi okwa hala tu mu mone. Omuyapostoli Paulus okwa yelifa nawa oshinima osho eshi a li ta yandje oundombwedi kongudu oyo ya li ya ongala puAreopagi. Osho osha ningilwa potembeli yedina Parthenon, oyo ya li ya yapulilwa Athena, oshikalungakainhu osho kwa li kwa itavelwa kutya osho sha li hashi amene Atena shonale. Diladila nee ngeno opo wa li eshi Paulus ta popi kombinga ‘yaKalunga ou a shita ounyuni noinima aishe i li mo,’ naashi ta yelifa kutya “Ye [iha] kala meetembeli da tungwa nomake.” Omuyapostoli okwa weda ko kutya Kalunga “okwa ninga oiwana aishe yovanhu, opo i kale kombada yedu alishe, ndele okwe i yukifila nale omafimbo ayo neengaba dokukala kwayo, opo va kale nokukonga Kalunga, va tale, [ngeenge] tava dulu okupamhadala fiyo okuye, noku mu mona, nande Oye ina kala kokule nafye nande oumwe.” (Oil. 17:24-27) Osha yela kutya ovanhu otava dulu okukala ve na ekwatafano liwa naKalunga. Eendombwedi daJehova di dulife pomamiliyona aheyali netata oda ‘mona Kalunga,’ sha hala kutya, odi na ekwatafano liwa naye nodi mu hole shili.

OKUKALA TU HOLE KALUNGA OSHA HALA OKUTYA SHIKE?

6. Jesus okwa ti ‘oshipango shinene noshotete’ oshilipi?

6 Ohole yetu yokuhola Kalunga oi na okukala tai di komutima. Jesus okwa li a yelifa oshinima osho eshi a li a pulwa kOmufarisai umwe, a ti: “Omuhongi, oshipango shinene shomomhango oshilipi po?” Jesus okwa ti: “Hola Omwene Kalunga koye nomutima woye aushe nomwenyo woye aushe neendunge doye adishe. Oshipango shinene noshotete osho tuu eshi.” — Mat. 22:34-38.

7. Osha hala okutya shike okukala tu hole Kalunga (a) ‘nomutima wetu aushe’? (b) ‘nomwenyo wetu aushe’? (c) ‘neendunge detu adishe’?

7 Jesus okwa li a hala okutya shike eshi a ti otu na okuhola Kalunga ‘nomutima aushe’? Okwa li a hala okutya otu na okuhola Jehova nomutima wetu aushe wopafaneko, naasho oshi na okukuma omahalo etu nosho yo omaliudo. Otu na yo oku mu hola ‘nomwenyo aushe,’ ile tu tye okukalamwenyo kwetu akushe. Shikwao vali, otu na okukala tu hole Kalunga ‘neendunge detu adishe,’ ile tu tye nomadiladilo etu aeshe. Onghee hano, otu na okukala tu hole Jehova pauyadi notuhe na omalimbililo.

8. Okukala tu hole Kalunga pauyadi otaku ke tu linyengifa tu ninge shike?

8 Ngeenge otu hole Kalunga nomutima aushe, nomwenyo aushe nosho yo nomadiladilo etu aeshe, ohatu ka kala hatu konakona Eendjovo daye noukeka, hatu ka longa nomutima aushe metwokumwe nehalo laye nohatu ka udifa nouladi onghundana iwa yOuhamba. (Mat. 24:14; Rom. 12:1, 2) Ohole yashili yokuhola Jehova otai ke tu  ehenifa popepi elela naye. (Jak. 4:8) Oshoshili kutya itatu mane okuvala omatomheno aeshe oo tu na okukala tu hole Kalunga. Ndele natu ka kundafaneni ashike manini omuo.

OMOLWASHIKE TU NA OKUKALA TU HOLE JEHOVA?

9. Omolwashike u hole Jehova oo e li Omushiti nOmufilishisho wetu?

9 Jehova oye Omushiti nOmufilishisho wetu. Paulus okwa ti: “Muye tu li mo tu nomwenyo ndee hatu linyengaanyenga.” (Oil. 17:28) Jehova okwe tu pa eduumbo liwa opo tu kale mo. (Eps. 115:16) Ohe tu pe yo oikulya nosho yo oinima imwe vali oyo twa pumbwa opo tu kale nomwenyo. Nomolwaasho Paulus a li a lombwela ovalongeli voikalunga vomuListra kutya ‘Kalunga omunamwenyo ina kala ine liholola, osheshi okwe mu monifila ouwa, eshi e mu lokifila odula meulu nokwe mu pa omafimbo oshishipo nokwa yadifa omitima deni oipalwifa nehafo.’ (Oil. 14:15-17) Mbela osho kashi fi etomheno lokukala tu hole Omushiti wetu munenene nOmufilishisho omunahole?— Omuud. 12:1.

10. Otu na okulinyenga ngahelipi kelongekido olo Kalunga a ninga po lokuxulifa po oulunde nefyo?

10 Kalunga okwe shi ninga tashi shiiva opo oulunde nefyo oyo twa fyuulula kuAdam i xulifwe po. (Rom. 5:12) Osha yela kutya “Kalunga okwe tu hololela ohole yaye oku tu hola, Kristus eshi e tu fila fimbo twa li natango ovalunde.” (Rom. 5:8) Nopehe na omalimbililo, omitima detu otadi xunga ohole yokuhola Jehova molwaashi okwe shi ninga tashi shiiva opo tu diminwe po omatimba etu ngeenge otwe livele ombedi notu na eitavelo mekuliloyambo laJesus. — Joh. 3:16.

11, 12. Omeenghedi dilipi Jehova e tu pa eteelelo?

11 Jehova okwe tu pa ‘eteelelo opo tu yadifwe nehafo alishe nombili.’ (Rom. 15:13) Eteelelo olo twa pewa kuKalunga ohali tu kwafele opo tu lididimikile omayeleko eitavelo. Ovavaekwa ovo va kanyatela ‘oudiinini wavo fiyo okefyo, otava ka pewa oshishani shomwenyo.’ (Eh. 2:10) Ovadiinini ovo ve na eteelelo loku ka kala kombada yedu otava ka hafela omanangeko noupuna aalushe meduparadisa olo la udanekwa. (Luk. 23:43) Osho otu shi uditile ngahelipi? Mbela inatu hafa neenghono, tu udite ombili notu hole Kalunga oo ha yandje “keshe oshipewa shiwa, nokeshe oshali sha wanenena”? — Jak. 1:17.

12 Kalunga okwe tu pa eteelelo lenyumuko tali hekeleke. (Oil. 24:15) Oshoshili kutya ohatu nyematekwa kefyo lomuholike wetu, ashike omolweteelelo lenyumuko, ‘iha tu va nyikile oluhodi twa fa tuhe neteelelo.’ (1 Tes. 4:13) Omolwohole yaye, Jehova Kalunga okwa djuulukwa okunyumuna ovafi, naunene tuu ovadiinini vaye ngaashi omuyuki Job. (Job 14:15) Diladila ashike kehafo apa tali ka kala li fike, eshi hatu ka hambelela oonakufya ovo tava nyumunwa nokukala vali nomwenyo kombada yedu nokuhangana nafye. Omitima detu itadi xunga tuu ohole yokuhola Tate yetu womeulu oo e tu pa eteelelo lenyumuko likumwifi!

13. Oumbangi ulipi tau ulike kutya Kalunga oku na ko nasha nafye shili?

13 Jehova oku na ko nasha nafye shili. (Lesha Epsalme 34:7, 19, 20; 1 Petrus 5:6, 7.) Molwaashi otu shi shii kutya Kalunga ketu omunahole okwe lilongekida alushe okukwafela ovo ovadiinini kuye, ohatu kala tu udite twa amenwa eshi tu li ‘eedi doufita waye.’ (Eps. 79:13) Shikwao vali, ohole yaKalunga yoku tu hola otai ke limonikila mwaasho ta ka wanifa po omolwetu okupitila mOuhamba wopaMesias. Konima eshi Ohamba yaye ihoololwa, Jesus Kristus, ya xulifa po oukolokoshi nomafininiko kombada yedu, ovanhu ovaduliki otava ka nangekwa noupuna va kale nombili nehepuluko. (Eps. 72:7, 12-14, 16) Mbela ito dimine kutya omaudaneko aeshe oo otae tu pe omatomheno okukala tu hole Kalunga ketu omufilishisho nomutima wetu aushe, omwenyo wetu aushe, eenghono detu adishe nosho yo omadiladilo etu aeshe? — Luk. 10:27.

14. Jehova okwa ulika kutya okwe tu hokwa eshi e tu pa oufembanghenda itau yelekwa nasha ulipi?

14 Jehova okwa ulika kutya okwe tu hokwa eshi e tu pa oufembanghenda woku mu longela itau yelekwa nasha tu li Eendombwedi daye. (Jes.  43:10-12) Otu hole Jehova eshi e tu pa omhito ei opo tu yambidide ounamapangelo waye nokukwafela ovanhu va kale ve na eteelelo lashili mounyuni ou wa nyonauka. Kakele kaasho, ohatu dulu okupopya tu na eitavelo notwa tomhwa molwaashi ohatu udifa onghundana iwa ya kanghamena kEendjovo daKalunga kashili, oo omaudaneko aye oo tae tu pe eteelelo haa wanifwa po alushe. (Lesha Josua 21:45; 23:14.) Osha yela kutya itatu mane okuvala omanangeko noupuna nosho yo omatomheno okukala tu hole Jehova. Ndele mbela ongahelipi hatu dulu okuulika kutya otu mu hole?

ONGAHELIPI HATU DULU OKUULIKA KUTYA OTU HOLE KALUNGA?

15. Ongahelipi okukonakona nokudulika kEendjovo daKalunga taku tu kwafele?

15 Kala ho konakona noukeka Eendjovo daKalunga noku di tula moilonga. Okuninga ngaho otaku ka ulika kutya otu hole Jehova notwa hala shili eendjovo daye di kale ‘ouyelele mondjila yetu.’ (Eps. 119:105) Ngeenge otwa hangwa komaupyakadi, ohatu dulu okumona ehekeleko momashilipaleko opahole ngaashi aa: “Omutima, ou wa teyauka nowa alamekwa, o nee, Kalunga ito u dini.” “Ouwanghenda woye, Omwene, owo wa paka nge ofika, ngenge ndi noshisho shoudjuu meni lange, omahekeleko oye oo a hekeleka omwenyo wange.” (Eps. 51:19; 94:18, 19) Jehova naJesus ohava kala ve uditile onghenda ovo tava mono oixuna. (Jes. 49:13; Mat. 15:32) Okukonakona Ombibeli otaku dulu oku tu kwafela tu kale tu shii kutya Jehova oku tu hole noku na ko nasha nafye, nokungaho ohatu ka kala tu mu hole nohole yomoule.

16. Ongahelipi okwiilikana pandjikilile taku tu kwafele tu kale tu hole Jehova nohole yomoule?

16 Kala ho ilikana kuKalunga pandjikilile. Omailikano ohae tu nanene popepi elela ‘nOmuudi womailikano.’ (Eps. 65:3) Ngeenge otwa mono kutya Kalunga oha nyamukula omailikano etu, ohatu ka kala tu mu hole neenghono. Pashihopaenenwa, otashi dulika twa didilika kutya iha efa tu yelekwe nomayeleko e dule eenghono detu. (1 Kor. 10:13) Ngeenge otu na oshisho shonhumba, ndele hatu indile ekwafo kuJehova, ohatu ka mona ‘ombili yaKalunga’ oyo itai dulu okuyelekwa nasha. (Fil. 4:6, 7) Omafimbo amwe ohashi dulika tu ilikane momutima ngaashi Nehemia a li a ninga, ndele hatu didilike kutya eilikano letu ola nyamukulwa. (Neh. 2:1-6) Eshi hatu “diinineni mokwiilikana,” nokukala tu shii kutya Jehova oha nyamukula omailikano etu, ohole yetu yoku mu  hola otai ka kula nohatu ka kala tu na elineekelo kutya ote ke tu kwafela tu ungaunge nomayeleko eitavelo monakwiiwa. — Rom. 12:12.

17. Ngeenge otu hole Jehova, ohatu ka tala ko ngahelipi okukala pokwoongala?

17 Kala ho kala pokwoongala nosho yo poyoongalele pandjikilile. (Heb. 10:24, 25) Ovaisrael ova li hava ongala va pwilikine nokulihonga kombinga yaJehova opo va kale ve netilofimaneko nokudulika kOmhango yaye. (Deut. 31:12) Ngeenge otu hole shili Kalunga itatu ka kala tu wete okudulika kuye ku li omutengi. (Lesha 1 Johannes 5:3) Onghee hano, inatu efa nande osha shi tu ningife tu kale twa tala ko okukala pokwoongala ku li oshinima shanafangwa. Inatu hala nandenande osha shi tu kanifife ohole yetu yopehovelo yokuhola Jehova. — Eh. 2:4.

18. Ohole yokuhola Kalunga ohai tu linyengifa tu ninge shike ngeenge tashi uya ponghundana iwa?

18 Kala ho udifile vamwe “oshili yevangeli” nouladi. (Gal. 2:5) Ohole yetu yokuhola Kalunga ohai tu linyengifa tu udife kombinga yOuhamba wopaMesias wOmona omuholike oo ta ka “kondjela oshili” puHarmagedon. (Eps. 45:5; Eh. 16:14, 16) Kashi hafifa tuu okukala tu na ombinga mokuninga ovanhu ovahongwa eshi hatu va kwafele ve lihonge kombinga yohole yaKalunga nounyuni waye mupe oo a udaneka! — Mat. 28:19, 20.

19. Omolwashike tu na okupandula Jehova omolwelongekido lokulifa oufita waye?

19 Kala u na olupandu lelongekido laKalunga li na sha nokulifa oufita waye. (Oil. 20:28) Ovakulunhuongalo Ovakriste ovo hava longo alushe omolwouwa wetu, ove li efiloshisho la dja kuJehova. Ove li “ngaashi oshikelelifo shokukelela omhepo nongaashi ehondameno lokuyaama oshikungulu ngaashi omakungulukilo omeva medu loluteni nomudidimbe wemanya lile medu lenotelo.” (Jes. 32:1, 2) Ihatu kala tuu twa pandula ngeenge otwa mono onhele opo hatu dulu okuyaama omhepo ya kula ile odula yoshikungulu! Ngeenge etango tali tu xwike, ohatu pandula omudile wemanya lile omo hatu dulu okuya. Omipopyofano odo da longifwa momushangwa oo otadi tu kwafele tu mone kutya ovakulunhuongalo ohava yandje ekwafo lopamhepo nepepelelo olo twa pumbwa. Okudulika kwaavo tava kwatele komesho mokati ketu, otaku ulike kutya otwa pandula shi fike peni “eeshali di li ovanhu,” notashi ka ulika yo kutya otu hole Kalunga naKristus oo e li Omutwe weongalo. — Ef. 4:8 yelekanifa no-NW; 5:23; Heb. 13:17.

Jehova okwa nangeka po ovafita ovo hava ulike kutya ove na ko na sha noufita (Tala okatendo 19)

TWIKILA OKUKULIKA OHOLE YOYE YOKUHOLA KALUNGA

20. Ngeenge ou hole Kalunga, oto ke linyenga ngahelipi kuJakob 1:22-25?

20 Ngeenge ou na ekwatafano liwa naJehova, oto ka kala ‘omuwanifi weendjovo, hamupwilikini wongaho.’ (Lesha Jakob 1:22-25.) ‘Omuwanifi’ oku na eitavelo olo hali mu kwafele a longe oilonga ngaashi, okuudifa nouladi nosho yo okukufa ombinga mokwoongala kwopaKriste. Molwaashi ou hole Kalunga, oto ka dulika komhango yaye ya “wanenena,” oyo ya kwatela mo keshe shimwe osho ta pula kwoove. — Eps. 19:8-12.

21. Omailikano oye taa di komutima otaa dulu okufaafanifwa nashike?

21 Ohole yoye yokuhola Jehova otai ke ku linyengifa u kale ho ilikana kuye alushe tashi di komutima. David okwa li a imba ta tumbula osho sha li hashi ningwa koshi yehangano lOmhango keshe efiku shi na sha nokuxwika omatwimino, a ti: “Eindilo lange nali talwe kuove, olo etwimino, neyelulo lomaoko ange, olo eyambo longuloshi.” (Eps. 141:2; Ex. 30:7, 8) Omaindilo oye elininipiko, okwiilikana wa mana mo nosho yo eendjovo doye tadi di komutima dokutanga nokupandula Kalunga nadi kale da fa omatwimino edimba liwa oo taa faneke okutambulwa ko kwomailikano. — Eh. 5:8.

22. Ohole ilipi hatu ka kundafana moshitukulwa tashi landula?

22 Jesus okwa ti otu na okukala tu hole Kalunga novanhu vakwetu. (Mat. 22:37-39) Eshi hatu ende hatu kundafana oukwatya oo moule, ohole yetu yokuhola Jehova nomifikamhango daye otai ke tu kwafela tu ungaunge nawa navakwetu nokuulika kutya otu va ohole.