Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) JUNI 2014

“Hola omukweni ngaashi ove u lihole mwene”

“Hola omukweni ngaashi ove u lihole mwene”

Oshipango ‘oshitivali shi fike pusho, osheshi, hola omukweni ngaashi ove u lihole mwene.’ — MAT. 22:39.

1, 2. (a) Jesus okwa ti kutya oshipango oshitivali shinene shomOmhango oshilipi? (b) Omapulo elipi hatu ka kundafana?

OMUFARISAI umwe okwa li ta yeleke Jesus pomhito imwe moku mu pula ta ti: “Omuhongi, oshipango shinene shomomhango oshilipi po?” Ngaashi twa didilika moshitukulwa sha tetekela, Jesus okwe mu lombwela kutya ‘oshipango shinene noshotete osho tuu eshi: Hola Omwene Kalunga koye nomutima woye aushe nomwenyo woye aushe neendunge doye adishe.’ Jesus okwa weda ko vali ta ti: “Noshitivali shi fike pusho, osheshi, Hola omukweni ngaashi ove u lihole mwene.”— Mat. 22:34-39.

2 Jesus okwa ti kutya otu na okukala tu hole ovanhu vakwetu ngaashi tu lihole fye vene. Onghee hano, oshiwa okulipula kutya: Omukwetu olyelye naanaa? Ongahelipi hatu dulu okuulika kutya otu hole ovanhu vakwetu?

OMUKWETU OLYELYE NAANAA?

3, 4. (a) Jesus okwa li a longifa efaneko lilipi eshi a nyamukula epulo olo kutya: “Omukwetu olyelye?” (b) Omusamaria okwa li a kwafela ngahelipi omulumenhu oo a li a nyekwa oinima yaye nokudengwa, konyala a fye? (Tala efano pehovelo loshitukulwa.)

3 Ngeenge hatu lipula kutya omukwetu olyelye naanaa, otashi dulika  tu diladile kukaume ketu womushiinda oo he tu kwafele. (Omayel. 27:10) Ashike natu ka taleni kutya Jesus okwa ti shike eshi a li a pulwa komulumenhu umwe oo e lishii ouyuki kutya: “Omukwetu olyelye?” Jesus okwa li e mu nyamukula ta longifa efaneko li na sha nOmusamaria umwe oo a li a ulika kutya oku hole ovanhu vakwao. (Lesha Lukas 10:29-37.) Otashi dulika twa li twa teelela omupristeri Omuisrael nosho yo Omulevi va ulike ohole nokukwafela omulumenhu oo a nyekwa oinima yaye nokudengwa, konyala a fye. Ndele ovalumenhu ovo ova li va pitilila omulumenhu oo nopehe na oku mu kwafela. Okwa li a kwafelwa kOmusamaria, omunhu womoshiwana osho sha li sha fimaneka Omhango yaMoses, ashike ova li ve tondike kOvajuda. — Joh. 4:9.

4 Omusamaria okwa li a ninga eenghendabala opo a kwafele oipute yomulumenhu oo i veluke diva mokutila po omaadi nomaviinyu. Eendenari mbali odo Omusamaria a li a yandja kumwene weumbo lovaenda opo a file oshisho omulumenhu oo, odi fike pondjabi yomafiku avali lwaapo. (Mat. 20:2) Onghee hano, osha yela mo nawa filufilu kutya olyelye a ulika kutya omukwao lela womulumenhu oo a li a dengwa. Nopehe nomalimbililo, efaneko laJesus otali tu hongo tu kale hatu kenukile ovanhu vakwetu nokuulika kutya otu va hole.

Ovapiya vaJehova ohava ulike diva kutya ove hole ovanhu vakwao (Tala okatendo 5)

5. Ovapiya vaJehova ova li va ulika ngahelipi kutya ove hole ovanhu vakwao pefimbo loshiponga shopaushitwe shimwe osho opo sha ningilwe?

5 Ovanhu ashike vanini hava kenukile ovanhu vakwao ngaashi Omusamaria oo a li a ninga. Osho osho shi li ngaho unene tuu ‘momafiku axuuninwa’ oo madjuu okukaliwa muo omo mu na ovanhu vahapu vehe na ohole, ovakwanyanya novatondi vouwa. (2 Tim. 3:1-3) Pashihopaenenwa, otashi dulika paholoke eenghalo didjuu omolwoiponga yopaushitwe. Natu ka taleni osho sha li sha ningwa po eshi oshikungulu shedina Hurricane Sandy sha li sha denga New York City lwexulilo laOktoba 2012. Moshitukulwa shimwe shoshilando osho sha li sha dengwa unene, eembudi oda li de liteyela momaumbo ovanhu ovo va hangwa nale tava mono oixuna molwaashi vehe na olusheno noipumbiwa ikwao. Moshitukulwa osho tuu osho, Eendombwedi daJehova oda li de liunganeka nawa opo di dule okukwafelafana nokukwafela vamwe yo. Ovakriste ohava ningi ngaho molwaashi ove hole ovanhu vakwao. Omeenghedi vali dimwe dilipi hatu dulu okuulika kutya otu hole ovanhu vakwetu?

NGHEE HATU DULU OKUULIKA KUTYA OTU HOLE OVANHU VAKWETU

6. Oilonga yetu yokuudifa oya pambafana ngahelipi nohole yetu yokuhola ovanhu vakwetu?

6 Kwafela ovanhu pamhepo. Ohatu ningi ngaho mokuyukifa elitulemo lavo ‘kehekeleko lomomishangwa’ tali kumu omutima. (Rom. 15:4) Nopehe nomalimbililo, ohatu ulike kutya otu hole ovanhu vakwetu moku va udifila oshili yOmbibeli. (Mat. 24:14) Kashi fi tuu oufembanghenda munene okuudifa etumwalaka lOuhamba la dja ‘kuKalunga keteelelo’! — Rom. 15:13.

7. Jesus okwa popya efinamhango lilipi, nongahelipi twa nangekwa noupuna eshi hatu dulika kulo?

7 Dulika kefinamhango li na sha nanghee tu na okuungaunga navamwe. Efinamhango olo ola popiwa kuJesus pefimbo leudifo laye lokomhunda, a ti: “Keshe eshi mwa hala ovanhu ve mu ningile, osho va ningileni yo: osheshi omhango novaprofeti odo tuu odo.” (Mat. 7:12) Ngeenge otwa kala hatu ungaunga novamwe ngaashi Jesus e tu lombwela, ohatu katuka metwokumwe ‘nomhango’ (oyo i li muGenesis fiyo omuDeuteronomion) nosho yo ‘ovaprofeti’ (omambo ouprofeti Omishangwa dOshiheberi). Oinima oyo ya shangelwa momhango nomovaprofeti otai ulike kutya Kalunga oha nangeke noupuna ovo hava ulike kutya ove hole ovanhu vakwao. Pashihopaenenwa, Jehova okwa popya okupitila muJesaja ta ti: “Diinineni [ouyuki ndele tamu longo eshi sha yuka, NW] . . . Omunelao omunhu ou te shi diinine.” (Jes. 56:1, 2) Otwa nangekwa lela noupuna molwaashi ohatu ungaunga nohole nopauyuki novanhu vakwetu.

8. Omolwashike tu na okukala tu hole ovatondi vetu, noshike tashi dulika shi ka ningwe po ngeenge otwa ningi ngaho?

 8 Hola ovatondi voye. Jesus okwa ti: “Onye omwa uda kwa tiwa: Hola omukweni, tonda omutondi woye. Ndelenee Ame ohandi mu lombwele: Holeni ovatondi veni, ilikaneneni ovahepeki veni; opo mu ninge ovana vaXo yeni meulu.” (Mat. 5:43-45) Omuyapostoli Paulus naye okwa popya oshitwa sha faafana, eshi a ti: “omutondi woye ngenge e nondjala, mu pakela po nongenge e nenota, mu nwefa.” (Rom. 12:20; Omayel. 25:21) PaMhango yaMoses, omunhu okwa li e na okukwafela omutondi waye mokumangulula oshinamwenyo shaye osho sha pundila mondjila omolwomitwalo odo sha humbata. (Ex. 23:5) Mokulongela kumwe monghedi ya tya ngaho, oo a li omutondi woye otashi dulika a ninge kaume koye kopofingo. Molwaashi ohatu ulike ohole tu li Ovakriste, ohatu hemuna omitima dovatondi vetu vahapu nokukala ve na etaleko liwa li na sha nafye. Ngeenge otwa ulike kutya otu hole ovatondi vetu, nokuli naavo have tu hepeke nonyanya, itatu ka kala tuu twa hafa ngeenge vamwe vomuvo ove ke uya moshili efiku limwe!

9. Jesus okwa popya shike shi na sha nokupanga ombili novamwatate?

9 “Lalakaneni ombili naaveshe.” (Heb. 12:14) Nopehe nomalimbililo, osho osha kwatela mo ovamwatate, molwaashi Jesus okwa ti: “Ove ngenge to twala oshali shoye koaltari, ndele oko wa dimbulukila omumwanyoko nokutya, e na sha naave, fiya ko oshali shoye koaltari, u ye manga mu ka pafane ombili nomumwanyoko, ove u aluke u ka yandje oshali shoye.” (Mat. 5:23, 24) Kalunga ote ke tu nangeka noupuna ngeenge otwa ulike kutya otu hole ovamwatate nohatu katuka eenghatu diva opo tu pange ombili navo.

10. Omolwashike tuhe na okukala hatu konenene omapuko muvamwe?

10 Ino kala ho konenene omapuko muvamwe. Jesus okwa ti: “Inamu tokola, opo mu ha tokolwe; osheshi etokolo eli tamu li tokolifa, nanye yo otamu li tokolifwa; noshiyelekifo eshi tamu shi yelekifa, nanye yo otamu ke shi yelekifwa. Ndele ongahelipi hano wa tala okambodi ke li meisho lomukweni, ndele endangalati li li meisho loye mwene, ku li wete? Ile to shiiva ngahelipi okulombwela omumwanyoko: Handi uya, ndi kufe mo okambodi meisho loye, ndele tala, ove u nendangalati meisho loye mwene? Omunaihelele oove, kufa mo tete endangalati meisho loye mwene, opo to mono nawa, nhumbi to kufa mo okambodi ke li meisho lomukweni.” (Mat. 7:1-5) Oyo kai fi tuu onghedi ya denga mbada yoku tu lombwela  tuha kale hatu kembeula vamwe omolwoupuko vanini ovo hava ningi ofimbo fye tashi dulika hatu ningi omapuko manene!

ONGHEDI YE LIKALEKELWA YOKUULIKA KUTYA OTU HOLE OVANHU VAKWETU

11, 12. Omonghedi ye likalekelwa ilipi hatu ulike kutya otu hole ovanhu vakwetu?

11 Otwa hala okuulika kutya otu hole ovanhu vakwetu monghedi ye likalekelwa. Ngaashi Jesus, nafye ohatu udifa onghundana iwa yOuhamba. (Luk. 8:1) Jesus okwa lombwela ovashikuli vaye va ‘ninge ovanhu aveshe ovahongwa.’ (Mat. 28:19, 20) Mokuninga ngaashi hatu dulu opo tu wanife po oshilonga osho, ohatu kwafela ovanhu vakwetu va dje mondjila oyo ya mbwalangadja notai twala kehanauno, nova ende mondjila ya finana oyo tai twala komwenyo waalushe. (Mat. 7:13, 14) Kape na omalimbililo kutya Jehova ota ka nangeka noupuna eenghendabala da tya ngaho.

12 Ngaashi Jesus, ohatu kwafele ovanhu va kale ve shii omhumbwe yavo yopamhepo. (Mat. 5:3, NW) Ohatu kwafele ovanhu ovo va didilika onhumbwe yavo yopamhepo opo va dule oku i wanifa po, moku va udifila “evangeli laKalunga.” (Rom. 1:1) Ovo va tambula ko etumwalaka lOuhamba ohava hanganifwa naKalunga okupitila muJesus Kristus. (2 Kor. 5:18, 19) Onghee hano, ohatu ulike kutya otu hole ovanhu vakwetu monghedi ya fimanenena yoku va udifila onghundana iwa.

13. Ou udite ngahelipi eshi to kufa ombinga moilonga yetu u li omuudifi wOuhamba?

13 Ohatu ka kwafela ovanhu va dulike komifikamhango daKalunga douyuki okupitila mokuninga omalishuneko nomakonakonombibeli monghedi tai pondola. Naasho otashi ka kwafela omukonakonimbibeli a lundulule onghedi yaye yokukalamwenyo. (1 Kor. 6:9-11) Otashi hekeleke okutala nghee Kalunga ta kwafele ovo “va halelela oku ka mona omwenyo waalushe” va ninge omalunduluko a pumbiwa nova kale ve na ekwatafano liwa naye. (Oil. 13:48, NW) Ovanhu vahapu oluhodi lavo ola pingenwa po kehafo nokave na vali oshisho sha pitilila molwaashi paife ove na elineekelo muTate yetu womeulu. Kashi hafifa tuu okumona exumokomesho lopamhepo olo la ningwa kwaavo vape! Mbela ino dimina kutya oshi li enangeko noupuna okuulika kutya otu hole ovanhu vakwetu monghedi ye likalekelwa tu li ovaudifi vOuhamba?

EENDJOVO DAKALUNGA ODA FATULULA NAWA OHOLE

14. Yelifa noitya yoye mwene oinima imwe i na sha nohole oyo ya tumbulwa mo 1 Ovakorinto 13:4-8.

14 Ngeenge otwa tula moilonga osho Paulus a ti shi na sha nohole, otashi ke tu kwafela eshi hatu ungaunga novanhu vakwetu, hatu ka henuka omaupyakadi mahapu, na Kalunga ote ke tu nangeka noupuna. (Lesha 1 Ovakorinto 13:4-8.) Natu ka konakoneni pauxupi osho Paulus a ti shi na sha nohole nokutala nghee hatu dulu okutula moilonga eendjovo daye eshi hatu ungaunga novanhu vakwetu.

15. (a) Omolwashike tu na okukala tu na onheni nolukeno? (b) Omolwashike tu na okuhenuka ounhwa nelitango?

15 ‘Ohole oi noutalanheni, nolukeno.’ Ngaashi ashike Kalunga ha tale onheni nokuungaunga nolukeno novanhu inava wanenena, nafye otwa pumbwa okukala tu na onheni nolukeno ngeenge vamwe va nyona kufye, va popya sha inave shi diladila nawa ile tava ulike nokuli okuhe na eenghedi. “Ohole ihai fi efupa,” onghee hano, ngeenge otu na ohole yashili, itatu ka kala twa hala oinima yopamaliko yavamwe ile omaufembanghenda avo meongalo. Kakele kaasho, ngeenge otu na ohole, itatu ke litanga ile tu kale tu na ounhwa. Komesho yaaishe, “Elinenepeko lomesho nounhwa womutima osho evilimo lovahenakalunga noulunde.” — Omayel. 21:4.

16, 17. Ongahelipi hatu dulu okukatuka metwokumwe no-1 Ovakorinto 13:5, 6?

16 Ohole otai ke tu kwafela tuhe lihumbatele nai ovanhu vakwetu. Itatu ke va lombwela oipupulu, tu vake po oinima yavo ile tu ninge sha osho shi li omhinge nomhango nosho yo omifikamhango daJehova. Ohole otai ke tu kwafela tuha kale  tu lihole fye vene, ndele tu ulike kutya otu na ko nasha navamwe. — Fil. 2:4.

17 Ngeenge otu na ohole yashili itatu ka handuka diva ‘nokudimbulukwa owii twe u ningilwa,’ twa fa ngeno tu na embo omo hatu didilike oshinima keshe shihe fi shopahole osho vamwe ve tu ningila. (1 Tes. 5:15) Itatu ka hafifa Kalunga ngeenge ohatu kwatele vamwe onghone, nokungaho otwa fa hatu xwameke omundilo oo tau dulu okundwafuka noku tu etela oshiponga nosho yo vamwe. (Lev. 19:18) Ohole ohai tu linyengifa tu nyakukilwe pamwe noshili, ndele itatu ka “nyakukilwa osho inashi yuka,” nokuli nonande omunhu oo e tu tonde ota ungaungwa naye nai. — Lesha Omayeletumbulo 24:17, 18.

18. Oshike hatu lihongo mo 1 Ovakorinto 13:7, 8 shi na sha nohole?

18 Natu ka taleni nghee Paulus a yelifa moule shi na sha nohole. Okwa ti kutya ohole “ohai tuvike aishe.” Ngeenge umwe okwe tu udifa nai ndele te tu pula tu mu dimine po, ohole otai ke tu linyengifa tu mu dimine po. Ohole ‘ohai itavele aishe’ oyo i li mEendjovo daKalunga nohai tu linyengifa tu kale tu na olupandu li na sha neendja dopamhepo odo hatu pewa. Ohole “ohai teelele aishe” oyo ya shangwa mOmbibeli noku tu linyengifa tu yelifile vamwe ekanghameno leteelelo letu. (1 Pet. 3:15) Ohatu ilikana yo ngeenge tu li meenghalo didjuu tu na elineekelo kutya ohatu ka mona epepelelo. Ohole ‘ohai lididimikile aishe,’ mwa kwatelwa okuningwa nai kuvamwe, okuhepekwa nosho yo omayeleko amwe vali. Shikwao vali, “ohole ihai xulu po.” Otai ka kala tai ulikwa kovanhu ovaduliki fiyo alushe.

KALA U HOLE OVANHU VAKWENI NGAASHI U LIHOLE OVE MWENE

19, 20. Omayele opamishangwa elipi e na oku tu linyengifa tu twikile okuulika kutya otu hole ovanhu vakwetu?

19 Ngeenge otwa tula moilonga omafinamhango Ombibeli, ohatu ka twikila okuulika kutya otu hole ovanhu vakwetu. Ohole oyo oya kwatela mo ovanhu aveshe, ndele havoovo ashike vomeputuko letu. Otu na yo okudimbuluka kutya Jesus okwa ti: “Hola omukweni ngaashi ove u lihole mwene.” (Mat. 22:39) Kalunga naKristus ova teelela tu kale tu hole ovanhu vakwetu. Ngeenge katu shii kutya natu ninge ngahelipi monghalo yonhumba oyo ya kwatela mo ohole yokuhola ovanhu vakwetu, natu ilikaneni kuKalunga e tu wilike okupitila momhepo iyapuki. Ngeenge otwa ningi ngaho, Jehova ote ke tu nangeka noupuna note ke tu kwafela tu katuke pahole. — Rom. 8:26, 27.

20 Oshipango shokuhola ovanhu vakwetu ngaashi tu lihole fye vene ohashi ifanwa “omhango onghwahamba.” (Jak. 2:8) Konima eshi Paulus a popya shi na sha noipango imwe yOmomhango yaMoses, okwa ti: ‘Oshipango keshe shikwao, oyo ya mangwa kumwe kondjovo ei: Hola omukweni ngaashi ove u lihole mwene. Ohole itai ningile mukwao owii nande washa, osheshi ohole oyo ewanifo lomhango.’ (Rom. 13:8-10) Onghee hano, otu na okutwikila okuulika kutya otu hole ovanhu vakwetu.

21, 22. Omolwashike tu na okukala tu hole Kalunga nosho yo ovanhu vakwetu?

21 Eshi hatu dilonga ketomheno kutya omolwashike tu na okuulika kutya otu hole ovanhu vakwetu, oshiwa okudiladila keendjovo daJesus odo kutya Xe “etango laye ote li pitifile ava vaii naava vawa, nodula ote i lokifile ovayuki naava ve he fi ovayuki.” (Mat. 5:43-45) Otu na okuulika kutya otu hole ovanhu vakwetu kutya nee ovayuki ile ovovo vehe fi ovayuki. Ngaashi sha popiwa metetekelo, onghedi ya denga mbada yokuulika ohole oyo okuudifila ovanhu etumwalaka lOuhamba. Ovanhu vakwetu itava ka nangekwa tuu noupuna ngeenge ova tambula ko onghundana iwa nolupandu!

22 Otu na omatomheno mahapu okukala tu hole Jehova pauyadi. Ope na yo eenghedi dihapu omo hatu dulu okuulika kutya otu hole ovanhu vakwetu. Eshi tu hole Kalunga nosho yo ovanhu vakwetu, ohatu ulike kutya otwa fimaneka osho Jesus a ti moshinima osho sha fimanenena. Komesho yaaishe, ohatu hafifa Tate yetu womeulu omunahole, Jehova.