Inda koshikalimo

Inda kelandulafano etivali

Inda koshikalimo

Eendombwedi daJehova

Oshikwanyama

Oshungonangelo — Oshifo shokukonakonwa  |  Mei 2014

‘Oikulya yange oyo okulonga ehalo laKalunga’

‘Oikulya yange oyo okulonga ehalo laKalunga’

Oshike hashi ku etele ehafo linene? Mbela ekwatafano lovanhu, ngaashi ohombo, okutekula oukwaneumbo ile okupanga oukaume? Otashi dulika u mone ehafo mokulya pamwe novaholike voye. Ndele u li omupiya waJehova, mbela iho mono ouwa unene tuu mokulonga ehalo laye, okulesha Eendjovo daye nokuudifa onghundana iwa?

Ohamba David yaIsrael shonale oya li ya tanga Omushiti ya imba ya ti: “Kalunga kange, okuwanifa ehalo loye, osho otashi nyakula nge, nomhango yoye oyo ya nyolelwa moule womwenyo wange.” (Eps. 40:9) Nonande David okwa li a shakeneka omaudjuu nomafininiko, okwa li shili a mona ehafo mokulonga ehalo laKalunga. Ashike, David haye aeke a li omulongeli waJehova oo a li a mona ehafo mokulongela Kalunga kashili.

Omuyapostoli Paulus okwa li a longifa eendjovo dEpsalme 40:9 eshi a li ta popi kombinga yaMessias ile Kristus. Paulus okwa ti: “[Jesus] mokuuya mounyuni ota ti: Omatomenoyambo neendyayambo ino a hala, ndelenee wa longela nge olutu, omaxwikiloyambo netimbayambo ino a hokwa, opo Ame nda tonga: Tala, ohandi uya—momishangwa onda shangwa mo—okulonga ehalo loye, Kalunga.”—Heb. 10:5-7.

Jesus manga a li kombada yedu, okwa li ha hafele okukonakona eshito, okukala nookaume nokulya pamwe navo. (Mat. 6:26-29; Joh. 2:1, 2; 12:1, 2) Ashike, okwa kala unene ha yandje elitulemo kokulonga ehalo laXe womeulu nosha li she mu etela ehafo linene. Onghee hano, Jesus okwa ti: “Oikulya yange ei, Ame ndi longe ehalo laau a tuma nge nondi wanife oshilonga shaye.” (Joh. 4:34; 6:38) Ovahongwa vaJesus okwa li ve lihonga osho hashi eta ehafo lashili, kOmuhongi wavo. Molwaashi ova li va hafa unene, okwa li va halelela okulombwela vamwe kombinga yetumwalaka lOuhamba. — Luk. 10:1, 8, 9, 17.

‘INDENI KA NINGENI OVANHU OVAHONGWA’

Jesus okwa li a lombwela ovashikuli vaye a ti: ‘Indeni ka ningeni ovanhu aveshe ovahongwa vange, noku va [ninginifa, NW] medina laXe nolOmona nolomhepo iyapuki, noku va longa okudiinina aishe ei nde i mu lombwela. Ndele tala, Ame ndi li pamwe nanye omafiku aeshe fiyo okexulilo lefimbo lounyuni.’ (Mat. 28:19, 20) Okuwanifa po oshinakuwanifwa osho okwa kwatela mo okuudifila ovanhu keshe apa tava hangwa, okuninga omalishuneko kwaavo va li va ulika ohokwe nokukonakona Ombibeli navo. Okulonga oshilonga sha tya ngaho ohaku eta ehafo linene.

Ohole ohai tu linyengifa tu twikile okuudifa nonande ovanhu ovo hatu shakeneke itava pwilikine

 Kashi na nee mbudi kutya ovanhu otava ulike ohokwe metumwalaka letu ile hasho, etaleko letu otali dana onghandangala ya fimanenena notali tu kwafele tu hafele oukalele. Omolwashike tu na okutwikila okuudifa onghundana iwa nonande ohatu shakeneke ovanhu itava pwilikine ile vehe na ko nasha? Omolwaashi otu shi shii kutya okukufa ombinga moilonga yokuudifa Ouhamba nokuninga ovanhu ovahongwa ohashi ulike kutya otu hole Kalunga novanhu vakwetu. Eemwenyo odi li monghuwo i nonghambe shili, detu vene nosho yo davakwetu. (Hes. 3:17-21; 1 Tim. 4:16) Natu ka taleni koitwa imwe oyo ya kwafela ovaudifi vahapu va kaleke po ile va pepaleke ouladi wavo moukalele moitukulwa oyo i na omashongo.

LONGIFA OMHITO KESHE

Okulongifa omapulo taa wapalele moukalele wetu luhapu ohashi eta oidjemo iwa. Ongula yefiku limwe, Amalia okwa mona omulumenhu e li moparka ta lesha oshifokundaneki. Okwa li a ehena popepi naye ndele te mu pula ngeenge okwa lesha mo ngoo onghundana iwa. Eshi omulumenhu a nyamukula a ti kutya ahowe, Amalia okwa ti, “Onde ku etela onghundana iwa i na sha nOuhamba waKalunga.” Osho osha li sha pendula ohokwe yomulumenhu oo, nokwa li a tambula ko ekonakonombibeli. Amalia okwa li a hovela omakonakonombibeli atatu moparka omo.

Janice okwa li a ninga onhele yaye yoilonga oshitukulwa shokuudifila. Eshi omwaameni womaliko nomunailonga mukwao va li va ulika ohokwe moshitukulwa shimwe shi li mOshungonangelo, Janice okwa li he va twaalele oifo pandjikilile. Okwa li yo ha ningi sha faafana shi na sha nomunailonga mukwao umwe, oo a li a tunhukwa eshi a mona oikundafanwa i lili naku lili oyo i li mOshungonangelo nomo-Awake! Osho osha li sha ningifa vali omunailonga mukwao a pule oifo. Janice okwa ti, “Kashi fi tuu enangeko noupuna laJehova!” Mokweendela ko kwefimbo okwa li ha twaalele ovanhu 11 oifo pandjikilile koilonga.

KALA U NA ETALEKO LIWA

Omupashukili omweendi okwa ti ngeenge ovaudifi ve li moukalele weumbo neumbo, kave na okuxulifa eenghundafana davo nomuneumbo mokutya ashike otava aluka vali efiku limwe. Ponhele yaasho, otava dulu okupula omunhu kutya: “Ino hala ndi uye ndi ku ulikile nghee ekonakonombibeli hali ningwa?” ile, “Onaini nefimbo peni wa hala ndi aluke tu twikile eenghundafana detu?” Omupashukili omweendi okwa ti kutya ovamwatate novamwameme meongalo limwe omo a li ta yakula ova li va hovela omakonakonombibeli 44 moshivike shimwe ashike, eshi va longifa onghedi oyo.

Okuninga omalishuneko diva, nokuli nande okonima yomafiku manini okudja eshi mwa shakena, ohaku pondola neenghono. Omolwashike? Omolwaashi mokuninga ngaho otashi ulike kutya otu na ohokwe shili yokukwafela ovanamitimadiwa opo va shiive Ombibeli. Omukulukadi umwe eshi a li a pulwa kutya omolwashike a dimina okukonakona Ombibeli nEendombwedi daJehova, okwa ti, “Onda li nda hovela ekonakonombibeli molwaashi oda li da ulikila nge kutya odi na ko nasha shili naame nodi hole nge.”

Oto dulu okupula omuneumbo kutya, “Ino hala ndi uye ndi ku ulikile nghee ekonakonombibeli hali ningwa?”

 Konima yefimbo lixupi okudja eshi Madaí a dja kOfikola yOkudeula Ovakokolindjila, okwa li ha ningi omakonakonombibeli 15 nokwa li a yandja po amwe vali e dulife pwaatano kovaudifi vakwao. Vahapu vomwaavo ha konakona navo Ombibeli ova li hava kala pokwoongala pandjikilile. Oshike sha li sha kwafela Madaí opo a hovele omakonakonombibeli mahapu ngaho? Ofikola yOkudeula Ovakokolindjila oya li ye mu kwafela a kale ha shuna kwaavo va li va ulika ohokwe fiyo osheshi e va mona. Ondombwedi imwe vali oyo ya kwafela ovanhu vahapu ve lihonge oshili yOmbibeli oya ti: “Onde lihonga kutya okuninga omalishuneko pandjikilile osho oshinima sha fimanenena tashi dulu okukwafela ovanhu ovo va hala okushiiva Jehova.”

Okuninga omalishuneko diva otaku ulike kutya otu na ohokwe shili movanhu ovo va hala okuuda ko Ombibeli

Okuninga omalishuneko nosho yo omakonakonombibeli otaku pula eenghendabala da mana mo. Ashike, ondjabi otai ka kala i dule kokule eenghendabala adishe odo twa ninga. Ngeenge otwa kala hatu kufa ombinga moilonga yokuudifa Ouhamba, ohatu ka kwafela vakwetu va “fike meshiivo loshili,” naasho otashi ke va etela exupifo. (1 Tim. 2:3, 4) Otashi ke tu kwafela yo tu kale twa wanenwa notashi ke tu etela ehafo linene.