Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) MEI 2014

Jehova oKalunga kelandulafano

Jehova oKalunga kelandulafano

Kalunga Ye ke fi Kalunga kedongakano, ndelenee okombili.” — 1 KOR. 14:33.

1, 2. (a) Olyelye a shitwa tete kuKalunga, nokwe mu longifa ngahelipi? (b) Oshike tashi ulike kutya ovaengeli ova unganekwa nawa?

JEHOVA oo a shita oinima aishe meulu nokombada yedu, oha ningi oinima monghedi ya unganekwa nawa. Oshishitwa shaye shotete osho Omona waye wopamhepo ewifa, oo ha ifanwa “Ondjovo” molwaashi oye omupopikalelipo waye munenenene. Ondjovo oyo oya kala tai yakula Jehova oule womido dihapu nomolwaashi Ombibeli ya ti: “Pehovelo opa li Ondjovo, nOndjovo oya kala puKalunga.” Ombibeli oya popya yo kutya: “Aishe oya shitwa kuye, ndele kape na nande oshinima shimwe sha shitwa, eshi inashi shitwa muye.” Omido di dule 2 000 lwaapo da pita, Jehova okwa li a tuma Ondjovo kombada yedu oko ya kala tai wanifa po ehalo laYe i li omunhu a wanenena, Jesus Kristus. — Joh. 1:1-3, 14.

2 Fimbo ine uya kombada yedu e li omunhu, Omona waKalunga okwa kala ta longo noudiinini pamwe naXe e li “omunongoelela.” (Omayel. 8:30) Jehova okwa li e mu longifa okushita oishitwa ikwao yopamhepo omamiliyona meulu oyo i li ovaengeli. (Kol. 1:16) Ombibeli oya popya shi na sha novaengeli ovo, ya ti: “Eyovi lwomayovi ove mu longela, nomayovi omulongo lwomayovi omulongo ova kala ofika koshipala shaye.” (Dan. 7:10) Eemhunga doishitwa yopamhepo yaKalunga oda popiwa kutya oda  unganekwa nawa di li ‘ovakwaita’ vaJehova. — Eps. 103:21.

3. Eenyofi neepulaneta dikwao odihapu shi fike peni, noda unganekwa ngahelipi?

3 Ongahelipi kombinga yoinima imwe meshito ngaashi eenyofi odo tadi nyengana okuvalwa nosho yo eepulaneta? Shi na sha neenyofi, oshikundaneki shokuHouston, shomuTexas, shedina Chronicle, efimbo opo la di ko osha ti kutya oku na eenyofi “omabiliyona omabiliyona 300 000, ile tu tye odi dule lwomapa atatu omuvalu oo wa li wa tengenekwa nale kovanongononi.” Oshikundaneki osha ti: “Osho osha hala okutya 3 a landulwa keenola di li 23. Ile tu tye, omabiliyona 100 a hapulalifwa nomabiliyona 3 000.” Eenyofi ohadi kala da unganekwa momihalavili, nomuhalavili keshe ou na eenyofi omabiliyona omafele ile omabiliyona omayovi nosho yo eepulaneta dihapu. Omihalavili dihapu ohadi kala da unganekwa meengudu ile tu tye omaxwata, nomaxwata amwe ohaa kala manenenene.

4. Omolwashike shi li pandunge okufika pexulifodiladilo kutya ovapiya vaKalunga vokombada yedu navo ove na okukala va unganekwa?

4 Ngaashi oishitwa yopamhepo iyuki yomeulu, oishitwa yomewangadjo nayo oya unganekwa monghedi ya denga mbada. (Jes. 40:26) Onghee hano, oshi li pandunge okufika pexulifodiladilo kutya Jehova ota unganeke ovapiya vaye kombada yedu. Okwa hala va kale ve na elandulafano, naasho osha fimanenena molwaashi ove na oilonga ihapu ya fimana ve na oku i longa. Ondjokonona ikumwifi yoilonga yoshiwana shaJehova shonale noshokunena, otai yandje oumbangi kutya Jehova okwa kala pamwe nasho ‘noke fi Kalunga kedongakano, ndelenee okombili.’— Lesha 1 Ovakorinto 14:33, 40.

OSHIWANA SHAKALUNGA SHONALE OSHA LI SHA UNGANEKWA

5. Ongahelipi elongekido lovanhu va yadife ombada yedu la iwa moshipala?

5 Eshi Jehova a shita ovanhu votete okwe va lombwela, a ti: “Dalafaneni nokuhapupala ndee yadifeni edu, lo nali kale mepangelo leni, ndee pangeleni oinamwenyo yomefuta needila dokeulu noinamwenyo aishe tai linyenge kombada yedu.” (Gen. 1:28) Ovanhu kombada yedu ova li ve na okuhapupala monghedi ya unganekwa nawa opo va yadife edu fiyo alishe la ninga Oparadisa. Ndele elongekido olo la unganekwa nawa ola iwa moshipala pakafimbo kokuhadulika kwaAdam naEva. (Gen. 3:1-6) Mokweendela ko kwefimbo “Omwene eshi a mona owii wovanhu kombada yedu wa li uhapu, nomauko omadiladilo omitima davo okwa li [mai] efimbo alishe.” Oshidjemo, “edu la nyonauka koshipala shaKalunga. Nedu la yada oukolokoshi.” Onghee hano, Kalunga okwa li a pangela omhangela a hanaune po ounyuni wovahenakalunga neyelu. — Gen. 6:5, 11-13, 17.

6, 7. (a) Omolwashike Noa a li a filwa onghenda kuJehova? (Tala efano pehovelo loshitukulwa.) (b) Oshike sha li sha ningilwa ovanhu ovo va li vehe na eitavelo pefimbo laNoa?

6 “Noa okwa mona onghenda momesho omwene” molwaashi okwa li “omulumenhu omuyuki” oo a li “e he noshipo mokati kovanhu vomounyuni waye.” Molwaashi “Noa okwa enda pamwe naKalunga,” Jehova okwa li e mu lombwela a tunge onguluwato yakula neenghono. (Gen. 6:8, 9, 14-16) Oya li ya tungwa monghedi omo tai dulu okukala ovanhu noinamwenyo. ‘Noa okwa li a ninga naanaa ngaashi Omwene e mu lombwela,’ nomolwaashi oukwaneumbo waye owa li wa longela kumwe naye, okwa li a manifa oilonga yokutunga monghedi ya unganekwa. Konima eshi oinamwenyo ya tulwa monguluwato, “Omwene okwa idila po.” — Gen. 7:5, 16.

7 Eshi Eyelu le uya mo 2370 K.O.P, Jehova okwa ‘komba po oinamwenyo aishe kombada yedu,’ ndele okwa xupifila omudiinini Noa noukwaneumbo waye monguluwato. (Gen. 7:23) Keshe umwe e li kombada yedu kunena oku li oludalo laNoa, lovanamati novakulukadi vavo. Ndele aveshe ovo va li vehe na eitavelo nokava li monguluwato, ova hanaunwa po filufilu molwaashi kava li va hala okupwilikina kuNoa, “omuudifi wouyuki.” — 2 Pet. 2:5.

Okuunganeka nawa oinima okwa kwafela ovanhu va-8 va xupe pEyelu (Tala okatendo 6, 7)

8. Oshike sha li tashi ulike kutya Ovaisrael ova li va unganekwa nawa eshi Kalunga a li e va lombwela va ye mEdu lEudaneko?

 8 Omafelemido e dulife pwaahetatu konima yEyelu, Kalunga okwa li a unganeka Ovaisrael ve li oshiwana. Okukalamwenyo kwavo akushe okwa li ku na okukala kwa unganekwa nawa, naunene tuu okulongela Kalunga kwavo. Pashihopaenenwa, kakele kovapristeri nOvalevi vahapu, opa li yo pe na ‘ovakainhu ovo va kala [va unganekwa, NW] va yakule poshivelo shetwali leongalo.’ (Ex. 38:8) Ndele eshi Jehova Kalunga a li a lombwela Ovaisrael va ye kuKanaan, epupi olo ola li la ulika kutya kali na eitavelo, nokwa li e va lombwela a ti: “Oshili, nye itamu ka ya medu olo nde li mu udanekela nokwaana nye mu li nangale, Kaleb yaJefunne ye aeke naJosua yaNun” molwaashi ova li va etelela ehokololo liwa konima eshi va lava Edu lEudaneko. (Num. 14:30, 37, 38) Lwanima, Moses okwa li a nangeka po Josua oye e mu pingene po metwokumwe newiliko laKalunga. (Num. 27:18-23) Eshi Josua a li e li pokutwala Ovaisrael muKanaan, okwa li a lombwelwa kutya: “Kala wa pama ndee nyatipala? Ino tila ndele ino haluka, osheshi Omwene Kalunga koye oku li naave keshe apa to i.” — Jos. 1:9.

9. Rahab okwa li e uditile ngahelipi Jehova nosho yo oshiwana shaYe?

9 Jehova Kalunga okwa li shili pamwe naJosua keshe apa ta i. Pashihopaenenwa, natu ka taleni kutya oshike sha li sha ningwa po eshi Ovaisrael va li va onga onhanda popepi noshilando shOvakanaan shedina Jeriko. Mo 1473 K.O.P., Josua okwa li a tuma ovalumenhu vavali va ka lave Jeriko, novalumenhu ovo kuJeriko oko va shakena nombwada Rahab. Rahab okwa li e va holeka moshihokohoko sheumbo laye, opo vaha monike kovanhu ovo va li va tumwa kohamba yaJeriko ve va kwate po. Rahab okwa li a lombwela eendadi odo, a ti: ‘Ondi shi shii, Omwene okwa yandja kunye edu eli, osheshi fye twa uda nhumbi Omwene okwe mu pwiininifila omeva omEfuta [Litilyana, NW] komesho yeni, naashi mwe shi ningila eehamba mbali dOvaamori.’ Okwa weda ko vali ta ti: “Omwene Kalunga keni, Oye Kalunga komeulu pombada noposhi kombada yedu.” (Jos. 2:9-11) Molwaashi Rahab okwa li ta yambidida ehangano laJehova lopefimbo opo, Kalunga okwa li  a shilipaleka kutya ye noukwaneumbo waye ova xupifwa eshi Ovaisrael va kwata ko Jeriko. (Jos. 6:25) Rahab okwa li e na eitavelo, a li a fimaneka Jehova nosho yo oshiwana shaYe.

EHANGANO ENAENGHONO LOMEFELEMUDO LOTETE

10. Jesus okwa li a lombwela shike ovawiliki velongelokalunga lOshijuda vopefimbo laye, nomolwashike e va lombwelela ngaho?

10 Koshi yewiliko laJosua, Ovaisrael ova li va finda oilongo noilongo nokunangala edu lOvakanaan. Ndele mbela oshike sha ka ningwa po lwanima? Oule womafelemido, Ovaisrael ova kala nokunyona eemhango daKalunga. Pefimbo opo Jehova a ka tuma Omona waye kombada yedu, okuhadulika kwavo kuYe nokuhapwilikina komupopikalelipo waye okwa li kwa tongomana neenghono nomolwaashi Jesus a ti kutya Jerusalem ‘omudipai wovaprofeti.’ (Lesha Mateus 23:37, 38.) Kalunga ka li vali a hokwa ovawiliki velongelokalunga lOshijuda omolwokuhena oudiinini kwavo. Onghee hano, Jesus okwa li e va lombwela a ti: “Ouhamba waKalunga otau mu kufwa ndele tau pewa ovanhu, hava imike oiimati yawo.” — Mat. 21:43.

11, 12. (a) Oshike tashi ulike kutya Jehova ka li vali ta nangeke noupuna oshiwana shOvajuda ndele ehangano lipe lomefelemudo lotete? (b) Ehangano lipe olo Kalunga a hokwa ola li la kwatela mo oolyelye?

11 Mefelemudo lotete O.P., Jehova okwa li a ekelashi oshiwana shOvaisrael osho sha li shihe fi oshidiinini. Ashike osho kasha li tashi ti kutya ota ka kala ehe na ehangano lovapiya vaye ovadiinini kombada yedu. Jehova okwa li a nangeka noupuna ehangano lipe enaenghono olo la kanghamena kuJesus Kristus nokomahongo aye. Ehangano olo ola li la hovela pOpentekoste yomo 33 O.P. Pefimbo opo, ovahongwa vaJesus 120 lwaapo ova li va ongala monhele yonhumba muJerusalem eshi “ohaluka, meulu mwa dja oshihomo ngaashi oshikungulu shinene tashi ende, ndele osha yadifa ondjwo aishe.” Opo nee “opa monika kuvo omalaka a fa omundilo a tukauka nakeshe limwe tali wile kombada yakeshe umwe womokati kavo. Vo aveshe ova yadifwa Omhepo Iyapuki, ndele ova hovela okupopya omalaka amwe elili Omhepo ngaashi e va pa oku shi popya.” (Oil. 2:1-4) Oshiningwanima osho shikumwifi osha yandja oumbangi uhe fi okupatanekwa kutya Jehova okwa li ta yambidida ehangano lipe, omo mwa li mu na ovahongwa vaKristus.

12 Mefiku olo litunhula, “ovanhu ve fike pomayovi atatu” ova li va wedwa momuvalu wovashikuli vaJesus. Natango, “Omwene a wedela mo mongudu yavo ava tava xupifwa.” (Oil. 2:41, 47) Oilonga yovaudifi vomefelemudo lotete oya li ya pondola neenghono nomolwaasho “eendjovo daKalunga da tandavela, nomuvalu wovalongwa vomuJerusalem owa hapupala neenghono.” Nokuli “nongudu inene yomovapristeri oya dulika keitavelo.” (Oil. 6:7) Ovanamitimadiwa vahapu ova li va tambula ko oshili oyo ya li ya udifwa koilyo yehangano olo lipe. Lwanima, Jehova okwa ka yandja oumbangi wa faafana kutya ota yambidida ehangano olo eshi a li a hovela okweeta ‘ovapaani,’ ile tu tye ovanhu vomoiwana imwe meongalo lopaKriste. — Lesha Oilonga 10:44, 45.

13. Ehangano lipe laKalunga ola kala tali longo shike?

13 Ovashikuli vaKristus ova li ve shii oilonga oyo va pewa kuKalunga. Jesus mwene okwa li e va tulila po oshihopaenenwa molwaashi diva ashike konima yokuninginifwa kwaye, okwa li a hovela okuudifa kombinga ‘yOuhamba weulu.’ (Mat. 4:17) Jesus okwa li a lombwela ovahongwa vaye navo va longe oshilonga sha tya ngaho. Okwa li e va lombwela ta ti: “[Otamu] ka ninga eendombwedi dange muJerusalem nomuJudea ashishe nomuSamaria nofiyo okominghulo dounyuni.” (Oil. 1:8) Nopehe na omalimbililo, ovashikuli vaKristus ova li va uda ko filufilu kutya oshike va li va teelelwa va ninge. Pashihopaenenwa, muAntiokia shaPisidia, Paulus naBarnabas ova li va lombwela ovapataneki vavo Ovajuda nopehe na oumbada, va ti: “Onye tuu ava mu nokuudifilwa tete eendjovo daKalunga; ndele nye eshi tamu di kandula po, nomwe  litala nye inamu wapala okuya momwenyo waalushe, hano taleni, ohatu liameke kovapaani. Osheshi osho ngaha Omwene e tu lombwela: Ame nde ku tula po ouyelele wovapaani, u ninge exupifo fiyo okominghulo dedu.” (Oil. 13:14, 45-47) Okudja ashike mefelemudo lotete, oshitukulwa shehangano laKalunga shokombada yedu osha kala tashi shiivifa elongekido laJehova lexupifo.

VAHAPU OVA FYA, NDELE OVAPIYA VAKALUNGA OVA XUPA

14. Oshike sha li sha ningilwa Jerusalem shomefelemudo lotete, noolyelye va li va xupa?

14 Ovajuda vahapu kava li va tambula ko onghundana iwa nova li tava ka hangwa koiponga, nomolwaasho Jesus okwa li a londwela ovahongwa vaye a ti: “Ngenge tamu mono Jerusalem sha kondekelwa komatanga ovakwaita, opo nee shiiveni ehanauno laJerusalem ola fika popepi; opo nee ava vomuJudea nava fadukile keemhunda naava ve li moshilando nava dje mo, naava tava hangika komikunda va ha ye musho.” (Luk. 21:20, 21) Osho Jesus a li a xunganeka osha li sha wanifwa. Omolwounashibofa wOvajuda, mo 66 O.P., omatangakwaita Ovaroma oo a li mewiliko laCestius Gallus okwa li e uya nokudingilila Jerusalem. Ndele ohaluka, omatanga oo okwa ka shuna, naasho osha li sha pa ovashikuli vaJesus omhito va fiye po Jerusalem naJudea. Omunandjokonona umwe wedina Eusebius okwa ti kutya vahapu ova li va faduka po nokutauluka omulonga waJordan va yuka kuPella shomuPerea. Mo 70 O.P., omatangakwaita aRoma oo a li mewiliko londjai Titus okwa li a aluka nokuhanauna po Jerusalem. Onghee hano, Ovakriste ovadiinini ova li va xupa molwaashi ova li va dulika kelondwelo laJesus.

15. Eenghalo dilipi da li po ndele nande ongaho Ovakriste vonale kava li va sholola?

15 Ovakriste vomefelemudo lotete kava li va sholola nonande opa li eenghalo didjuu, omahepeko nosho yo omayeleko amwe vali eitavelo oo a li e va hanga. (Oil. 11:19-21; 19:1, 19, 20) Ovakriste ovo vonale ova li va pama pamhepo molwaashi ova li tava nangekwa noupuna kuKalunga. — Omayel. 10:22.

16. Opo Omukriste a kale a pama pamhepo, okwa li e na okuninga shike pauhandimwe?

16 Opo Omukriste a kale a pama pamhepo, okwa li e na okuninga eenghendabala pauhandimwe. Okwa li a pumbwa okukonakona noukeka Eendjovo daKalunga, okukala ha i kokwoongala nopehe na okufaula nosho yo okulonga nouladi moilonga yokuudifa Ouhamba. Okuninga oinima aishe oyo okwa li kwa kwafela oshiwana shaJehova shopefimbo lonale shi kale sha pama pamhepo noshi na oukumwe ngaashi ashike kunena. Ovo va li hava endafana neongalo olo la li la unganekwa nawa lopefimbo lonale, ova li va mona ouwa muhapu omolwekwafo neenghendabala dovapashukili novayakuliongalo ovo va li hava longo nehalo liwa. (Fil. 1:1; 1 Pet. 5:1-4) Kasha li tuu shihafifa eshi ovapashukili ovaendi, ngaashi Paulus, va li va talela po omaongalo! (Oil. 15:36, 40, 41) Efaafano olo li li pokati konghedi omo Ovakriste vonale va li hava longele Kalunga naayo yokunena olididilikwedi. Inatu hafa tuu eshi Jehova a li a unganeka ovapiya vaye vonale nosho yo ava vokunena! *

17. Oshike tashi ka kundafanwa moshitukulwa tashi landula ko?

17 Eshi ounyuni waSatana u li pokuxula po momafiku aa axuuninwa, oshitukulwa shokombada yedu shehangano laJehova lomeshito alishe otashi pula komesho ponhapo inai monika nale. Mbela oto endele ngoo pamwe nasho? Oto ningi ngoo exumokomesho lopamhepo? Oshitukulwa tashi landula ko otashi ke ku ulikila nghee to dulu oku shi ninga.

^ okat. 16 Tala oshitukulwa, “Ovakriste ohava longele Kalunga momhepo nomoshili”nosho yo “Otava twikile okweenda moshili” mOshungonangelo ye 1 Auguste 2002. Ouyelele muhapu u na sha noshitukulwa shehangano laJehova shokombada yedu kunena owa kundafanwa membo Jehovah’s Witnesses—Proclaimers of God’s Kingdom.