Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) APRILI 2014

Kape na oo ta dulu okulongela oovene vavali

Kape na oo ta dulu okulongela oovene vavali

“Kaku na ou ta dulu okukalela oovene vavali; . . . Kamu dulu okukalela Kalunga nemona.”MAT. 6:24.

1-3. (a) Ovanhu vahapu kunena ova taalela omaupyakadi opainiwe elipi, navamwe ohava kendabala oku a kandula po ngahelipi? (Tala efano pehovelo loshitukulwa.) (b) Omalipulo elipi a holoka po e na sha nokutekula ounona?

MARILYN okwa ti: “Omushamane wange James ohadi alushe koilonga a loloka, ndele oshimaliwa osho ha futwa ihashi wanifa po eemhumbwe detu dakeshe efiku. * Onda li nda hala ndi kale handi longo opo James aha kale vali te lidipaele po nonda li yo nda hala omonamati wetu Jimmy a kale e na oinima iwa oyo i niwe kovanafikola vakwao.” Marilyn okwa li yo a hala okukwafela ovapambele vaye vamwe nova tuvikile oimaliwa imwe yoku ka longifa monakwiiwa. Ookahewa kaye vahapu ova tembukila koilongo imwe oko ku na oilonga oyo hai futu nawa. Ashike eshi Marilyn a diladila kombinga yokufiya po oukwaneumbo waye, osha li she mu ningifa a kale a lyalyakana noke shii kutya na ninge po shike. Omolwashike mbela?

2 Marilyn okwa li a nyemata eshi a li ta diladila kombinga yaasho sha li tashi dulu okuningwa po ngeenge okwa fiye po oukwaneumbo waye. Ndele nande ongaho, okwa li a tomhafana kutya, vakwetu ova ya kondje yoilongo oule wefimbo nomaukwaneumbo avo otaa monika ngoo e li nawa pamhepo. Ashike okwa li te lipula kutya ongahelipi ta ka tekula Jimmy e li kokule naye. Ota ka dula ngoo okutekula omonamati waye  “meduliko nomekumaido lOmwene” okupitila mointaneta?—Ef. 6:4.

3 Marilyn okwa li a pula omayele kuvamwe. Omushamane waye ka li a hala aye, ashike okwa ti kutya ite mu kelele ngeenge okwa hala okuya. Ovakulunhuongalo navamwe meongalo ova li ve mu kumaida aha ye, ndele ovamwameme vamwe ova li ve mu ladipika a ye. Ovamwameme ovo ove mu lombwela va ti: “Ngeenge ou hole oukwaneumbo woye shili, inda. Natango oto ka twikila ashike okulongela Jehova.” Nonande Marilyn natango okwa li e na omalimbililo, okwa lekela James naJimmy ndele ta i a ka longe koshilongo shimwe shi lili. Okwe va udanekela a ti: “Itandi kala ko.”

OINAKUWANIFWA YOUKWANEUMBO NOSHO YO OMAFINAMHANGO OMBIBELI

4. Omolwashike ovanhu vahapu hava i va ka longe koilongo imwe i lili, na luhapu oolyelye hava tekula ovana vovadali va tya ngaho?

4 Jehova ina hala ovapiya vaye va fye kondjala, nokutembukila koilongo imwe omolwondjala otaku dana onghandangala mondjokonona yovapiya vaye. (Eps. 37:25; Omayel. 30:8) Opo tatekulululwa Jakob noukwaneumbo waye vaha fye kondjala, Jakob okwa li a tuma ovanamati vaye kuEgipti va ka lande oikulya. * (Gen. 42:1, 2) Kunena ovanhu vahapu ovo hava tembukile koilongo imwe ihava i ko molwaashi tava fi ondjala. Ndele vamwe otashi dulika hava ka longa ko molwaashi ve na omikuli. Vamwe ohave shi ningi ashike molwaashi va hala okukala ve na oinima iwa nokuxwepopaleka onghalonawa yopamaxupilo yomaukwaneumbo avo. Opo va hange omalalakano avo mounyuni omu eliko tali u pedu, ohava fiye po omaukwaneumbo avo tashi dulika tava i konhele imwe i lili moshilongo shavo ile va ye koshilongo shimwe shi lili. Luhapu ovadali ovo hava fiye po omaukwaneumbo avo, ohava yandje ovana vavo va tekulwe kuvamwe, ngaashi komudali umwe, komumwaina oo a kula, inakulu naxekulu, kovapambele vamwe ile kookaume. Nonande ohava kala va nyika oluhodi eshi tava fiye po omaukwaneumbo avo, vahapu ovo hava i va ka longe koilongo imwe ove udite kutya kave na ehoololo.

5, 6. (a) Jesus okwa honga shike kombinga yehafo neameno? (b) Jesus okwa honga ovashikuli vaye va ilikane kombinga yeemhumbwe dilipi? (c) Omonghedi ilipi Jehova he tu nangeke noupuna?

5 Pefimbo laJesus, ovanhu vahapu ova li ovakwanaluhepo, nova li ve udite kutya ova pumbwa oimaliwa ihapu opo va kale va hafa nova amenwa. (Mark. 14:7) Ashike Jesus ka li a hala va kale ve lineekela moinima oyo tai xulu po. Okwa li a hala va kale ve lineekela muJehova, oo omanangeko noupuna aye taa kalelele. Meudifo laJesus lokOmhunda, okwa popya kutya ehafo lashili neameno inali likolelela kokukala noinima yopamaliko ile keenghendabala detu, ndele okokukala nekwatafano liwa naTate yetu womeulu.

6 Jesus okwe tu honga moshihopaenenwa shaye sheilikano tu ilikane kombinga yeemhumbwe detu dakeshe efiku, ‘omungome wetu womafiku aeshe,’ ndele hakombinga yonghalamwenyo youdjeko. Okwa lombwela ovapwilikini vaye sha yukilila a ti: “Inamu liongelela omamona kombada yedu. . . . Ndelenee liongeleleni omamona meulu.” (Mat. 6:9, 11, 19, 20) Otu na elineekelo kutya Jehova ote ke tu nangeka noupuna ngaashi a udaneka. Omanangeko noupuna aKalunga okwa kwatela mo shihapu shihe fi ashike okukala e tu hokwa; ote ke tu pa osho twa pumbwa shili. Onghee hano, opo tu kale twa hafa shili notu li meameno, ongeenge ashike twe lineekela muTate yetu omufilishisho ponhele yokukala twe lineekela moimaliwa. — Lesha Mateus 6:24, 25, 31-34.

7. (a) Jehova okwa yandja oshinakuwanifwa shokutekula ounona koolyelye? (b) Omolwashike ovadali aveshe vavali va pumbwa okutekula ovana vavo?

7 ‘Okukonga tete ouyuki waKalunga’ okwa kwatela mo okukala u na etaleko la fa laJehova li na sha noinakuwanifwa youkwaneumbo. Pashihopaenenwa, mOmhango yaMoses omu na efinamhango olo tali longo kOvakriste tali ti: Ovadali ove na okudeulila ovana vavo oinima yopamhepo. (Lesha Deuteronomion 6:6, 7.) Kalunga okwa yandja oshinakuwanifwa osho kovadali, ndele hakooxekulu nooinakulu ile kuumwe e lili. Ohamba Salomo oya ti: ‘Omumwange, pwilikina outekuduliko waxo, ndele  ino ekelashi elongo lanyoko.’ (Omayel. 1:8) Jehova okwa hala yo omaukwaneumbo a kale pamwe opo ovadali aveshe vavali va honge nova wilike ovana vavo. (Omayel. 31:10, 27, 28) Ngeenge ounona tava pwilikine kovadali vavo eshi tava popi kombinga yaJehova nokutala nghee tave mu longele efiku keshe, ohave lihongo okuninga sha faafana.

OILANDULIKO INAI TEELELWA

8, 9. (a) Omalunduluko elipi haa holoka po ngeenge omudali umwe okwa ka kala kokule noukwaneumbo? (b) Ngeenge ovadali ova kala vehe li pamwe novana, ohashi kumu ngahelipi ounona pamaliudo nopaenghedi?

8 Ovo hava kala va hala okutembukila koilongo imwe, ohava kendabala okudiladila komaupyakadi oo tashi dulika a holoke po nokomaliyambo oo a kwatelwa mo fimbo inava tembuka, ndele ovanini hava didilike oilanduliko aishe oyo tai ke va hanga ngeenge ova fiye po omaukwaneumbo avo. (Omayel. 22:3) * Omafiku kemale okudja ashike eshi Marilyn a tembuka, okwa li a hovela okukala a wililwa po pamaliudo eshi a topoka noukwaneumbo waye. Omushamane waye nomonamati wavo navo ova li va wililwa po pamaliudo. Okamonamati kavo Jimmy oka li hake mu pula alushe taka ti: “Oshike wa fiila nge po?” Marilyn okwa li ashike a lalakanena okukala kondje yoshilongo eemwedi donhumba ndele okwa ka papala ashike eshi omido tadi piti, nokwa li she mu tilifa eshi a didilika kutya oukwaneumbo waye otau ende tau lunduluka. Jimmy ka li vali ngaashi e mu fiile. Okwa popya a nyemata ta ti: “Jimmy ke hole nge vali.”

9 Ngeenge ovadali nounona kave li pamwe ve li oukwaneumbo, aveshe otava dulu okukala va wililwa po pamaliudo nohashi kumu eenghedi davo. * Opa ngoo pe fike oule fimbo olo okaana kanini kehe li novadali vako opo ngoo pe fike tashi ka kumu neenghono. Marilyn okwa li a yelifila Jimmy kutya ota ningi omaliyambo a tya ngaho omolwouwa waye. Ashike Jimmy okwa li e udite kutya meme waye okwe mu ekelashi. Pehovelo okwa li a handuka eshi ina a ya ndele eshi a ka aluka ke na vali naye. Ngaashi ashike ounona ovo inava kala povadali vavo hava kala ve udite, Jimmy naye okwa li e udite kutya ina pumbwa vali okukala e hole ina nokudulika kuye. — Lesha Omayeletumbulo 29:15.

Ito dulu okupapatela okaana koye okupitila mointaneta

(Tala okatendo 10)

10. (a) Oshike tashi dulu okuningwa po shi na sha nokaana ngeenge ovadali ova kala have ka pe omaano ponhele yokukala efimbo nako noku ka pa elitulemo? (b) Oshike osho ovadali itava dulu okuninga ngeenge otava kendabala okutekula ovana vavo ve li kokule navo?

10 Molwaashi Marilyn okwa li kokule naJimmy, okwa li ha kendabala a xwepopaleke onghalo mokukala ha tumine Jimmy oimaliwa nomaano. Ndele okwa ka didilika kutya okwa li ashike ta ningifa omona aha kale e na naye nandenande noku kale e hole oimaliwa ponhele yokukala e hole Jehova nosho yo oukwaneumbo wavo. (Omayel. 22:6) Shinyikifa oluhodi, Jimmy okwe mu lombwela ta ti: “ino aluka vali. Kala ashike ho tumu omaano.” Osho osha li sha ningifa Marilyn a didilike kutya ita dulu okutekula omonamati okupitila meenhumwafo, mokudenga ongodi ile okupopya naye okupitila  mointaneta. Okwa ti: “Ito dulu okupapatela ile okuxupita okaana koye eshi taka ka nangala okupitila mointaneta.”

Oiponga ilipi tai dulu oku mu hanga ngeenge omulyaafane kokule nakaume koye kopahombo? (Tala okatendo 11)

11. (a) Ongahelipi okukala kokule noukwaneumbo woye omolwoilonga haku kumu ohombo? (b) Onaini Marilyn a li a didilika kutya okwa pumbwa okushuna keumbo opo a ka kale pamwe noukwaneumbo waye?

11 Ekwatafano laMarilyn naJehova nosho yo nomushamane waye nalo ola enda tali nghundipala. Okwa li ashike ha endafana nOvakriste vakwao nokuya moukalele lumwe moshivike ile aha ye mo, nokwa li yo e na okukondjifa omuyandji waye woilonga oo a li a hala a ye naye momilele. Molwaashi James naMarilyn kava li hava kundafana kombinga yomaupyakadi oo keshe umwe womuvo ta shakeneke, ova li hava lombwele vamwe ve lili omaliudo avo, naaveshe vavali okonyala va ye momilele kondje yohombo. Marilyn okwa ka didilika kutya nonande inava nyona ohombo, ohombo yavo oya li moshiponga, molwaashi eshi vaha li pamwe kava li tava dulika kewiliko lOmbibeli olo kutya ovalihomboli ove na okuliwanifila po eemhumbwe davo dopamaliudo nodopamilele. Kava li yo tava dulu okukala pamwe efimbo ovo aveke nokulipa elitulemo olo ovalihomboli ve na okuhafela. (Eimb.lela. 1:2; 1 Kor. 7:3, 5) Kava li yo tava dulu okulongela Jehova pauyadi pamwe nomonamati wavo. Marilyn okwa ti: “Eshi nde lihonga poshoongalele shimwe shoshitukulwa kutya elongelokalunga loukwaneumbo ihali faula ola fimanenena opo tu ka xupe mefiku linene laJehova, onda li nda didilika kutya onda pumbwa okushuna keumbo. Onda li nda hovela vali okupameka oupamhepo wange nosho yo ekwatafano liwa noukwaneumbo wange.”  

OMAYELE TAA TUNGU NOSHO YO OO ITAA TUNGU

12. Omayele Ombibeli elipi taa dulu okukwafela ovo va fiya po omaukwaneumbo avo omolwoilonga?

12 Eshi Marilyn a li a tokola okushuna keumbo, vamwe ova li ve mu pa omayele taa tungu ofimbo vamwe ve mu pa oo itaa tungu. Ovakulunhuongalo vomeongalo lokoshilongo oko a li ova li ve mu pandula omolweitavelo nouladi waye. Ndele vamwe ovo navo va li va fiya po omaukwaneumbo avo, ponhele yokushikula oshihopaenenwa shaye shiwa ova li tava kendabala oku mu ningifa aha shune. Ova ti: “Oto ka aluka ashike konima yefimbo lixupi. Openi to ka hanga oimaliwa yokufila oshisho eemhumbwe doukwaneumbo woye ngeenge owa shuna keumbo?” Ponhele yomapopyo taa teya omukumo a tya ngaho, Ovakriste ove na ‘okupukulula ovakainhu ovanyasha va kale ve hole ovalumenhu vavo nokuhola ovana vavo, ve shii kutekula omaumbo avo vene, opo ondjovo yaKalunga iha shekifwe.’—Lesha Titus 2:3-5.

13, 14. Omolwashike tashi pula eitavelo opo tu hafife Jehova ponhele yokuliyandja kwaasho ovapambele vetu va hala tu ninge? Shi yelifa to yandje oshihopaenenwa.

13 Vahapu ovo hava fiye po omaukwaneumbo avo va ka longe konhele imwe i lili ova dja momaputuko oo a lenga omifyuululwakalo novapambele, unene tuu ovadali vavo komesho yoinima aishe. Otashi pula eitavelo opo Omukriste a hafife Jehova ponhele yokuliyandja kwaasho tashi ningwa kuvahapu ile osho ovapambele va hala a ninge.

14 Natu ka taleni kehokololo laCarin, oo a ti:  “Eshi okamonamati ketu Don ka dalwa, ame nomushamane waye otwa hangwa hatu longo kondje yoshilongo nonda hangwa ashike opo nda hovele okukonakona Ombibeli. Ovapambele vange ova li va teelela ndi tume Don keumbo opo a ka tekulwe kovadali vange ofimbo ame nomushamane wange hatu longo oshimaliwa.” Eshi Carin a li a popya kutya oye ta tekula okaana kaye mwene, ovapambele vaye, mwa kwatelwa omushamane waye, ova li ve mu ula kutya oku na onyalo nova li tave mu yolo. Carin okwa ti: “Paushili wovene, pefimbo opo kanda li ndi udite ko moule kutya osha puka okutuma Don a ka kale novadali vange oule womido donhumba. Ashike onda li ndi shii kutya Jehova okwa yandja kufye oshinakuwanifwa shokutekula omonamati wetu, tu li ovadali vaye.” Eshi Carin a ka ninga vali eteelelo, omushamane waye oo ehe fi omwiitaveli okwa li te mu fininike e li kufe mo. Etokolo laCarin olo a li a ninga pehovelo ola pameka eitavelo laye, nopomhito oyo natango okwa li a ninga etokolo olo tali hafifa Jehova. Paife ye, omushamane waye novana vavo ove li pamwe aveshe va hafa. Ngeno Carin okwa tumine omona umwe ile aveshe va ka tekulwe kuvamwe, ngeno osha ka eta oidjemo ya yooloka ko kwaayo ve na paife.

15, 16. (a) Vicky okwa tekulwa ngahelipi eshi a li okaana? (b) Omolwashike ina efa okamonakadona ka tekulwe monghedi ya faafana?

15 Ondombwedi yedina Vicky oya ti: “Onda kala omido donhumba nameekulu ofimbo ovadali vange va li pamwe nokandenge kange kokakadona. Eshi nda ka ya kuvo, omaliudo ange e na sha navo okwa li a lunduluka. Okandenge kange oka li haka popi omaliudo ako ka manguluka, take va papatele noka li ke na ekwatafano lopofingo navo. Ashike ame kanda li ndi na ekwatafano lopofingo novadali vange, nokuli naashi nda ka kula, osha li shidjuu kwaame oku va hololela omaliudo ange ashili. Ame nokandenge kange otwa li twa shilipaleka ovadali vetu kutya ohatu ke va fila oshisho ngeenge va kulupa. Ndele ame onda li ashike handi ke shi ninga molwaashi ndi udite ndi na oshinakuwanifwa, ashike okandenge kange oka li take ke shi ninga omolwohole yoku va hola.”

16 Vicky okwa twikila ko a ti: “Paife meme okwa hala ndi mu pe okamonakadona kange e ka tekule, ngaashi ashike a li a yandja nge po kumeekulu. Onde shi anya nelungi. Ame nomushamane wange otwa hala okutekula ovana vetu va ende meendjila daJehova. Inandi hala okunyona po ekwatafano letu lomonakwiiwa nokamonakadona kange.” Vicky okwa didilika kutya opo omunhu a pondole shili ongeenge ashike e hole Jehova nomafinamhango aye ponhele yokukala a pitifa komesho oinima yopamaliko nosho yo osho ovapambele va hala a ninge. Jesus okwa ti: ‘Kaku na ou ta dulu okukalela oovene vavali,’ Kalunga nemona. — Mat. 6:24; Ex. 23:2.

JEHOVA OTA KA NINGIFA EENGHENDABALA DETU DI PONDOLE

17, 18. (a) Ovakriste ove na alushe ehoololo lilipi? (b) Omapulo elipi hatu ka kundafana moshitukulwa tashi landula?

17 Tate yetu Jehova, okwa udaneka kutya ote ke tu pa oinima oyo twa pumbwa ngeenge otwa pitifa komesho Ouhamba nouyuki waye monghalamwenyo yetu. (Mat. 6:33) Onghee hano, Ovakriste vashili alushe ove na ehoololo. Nokuli nonande otwa taalela omaupyakadi a kwata moiti, ohatu dulu okuhafifa Jehova nokutula moilonga omafinamhango Ombibeli molwaashi Jehova okwa udaneka kutya ote ke tu kwafela tu ‘pite mo.’ (Lesha 1 Ovakorinto 10:13.) Ngeenge otwa “teelele” Jehova, twe ‘mu lineekela’ mokwiilikana e tu pe ounongo noku tu wilike mokudulika koipango yaye nokomifikamhango daye, opo nee ‘ote shi ningi.’ (Eps. 37:5, 7) Jehova ota ka nangeka noupuna eenghendabala detu odo hatu ningi nomutima aushe tu mu longele oye aeke, e li Omwene wetu. Ngeenge oye twa pitifa komesho, ote ke tu ‘wapalekifa keshe osho hatu shi longo,’ ile tu tye ote ke tu kwafela tu pondole monghalamwenyo yetu. — Yelekanifa naGenesis 39:3.

18 Oshike tashi dulu okuningwa po opo ku pamekwe ekwatafano olo la nghundipala sha etifwa kokuhakala pamwe oule wefimbo lonhumba? Ongahelipi hatu dulu okufila oshisho omaukwaneumbo etu painiwe nopehe na okuya kokule nao? Ongahelipi hatu dulu okuladipika vamwe pahole va ninge omatokolo a yuka moshinima osho? Oshitukulwa tashi landula ko otashi ka kundafana kombinga yomapulo oo.

^ okat. 1 Omadina oo hao ovanhu ovo lelalela.

^ okat. 4 Oshikando keshe ovanamati vaJakob va ya kuEgipti, otashi dulika sha li hashi va pula oivike itatu ile inini vehe li nomaukwaneumbo avo. Lwanima eshi Jakob novanamati va ka tembukila kuEgipti, ova li va ya pamwe novakulukadi vavo nosho yo ovana. — Gen. 46:6, 7.

^ okat. 8 Tala oshitukulwa “Immigration—Dreams and Realities” mo-Awake! yaFebruali 2013.

^ okat. 9 Omatyekosha a dja koilongo i lili noku lili otaa ulike kutya okufiya po kaume koye kopahombo ile ounona u ka longe kondje yoshilongo osho shimwe shomoinima oyo hai etifa omaupyakadi a kwata moiti. Omaupyakadi oo okwa kwatela mo okuya momilele kondje yohombo kwaumwe womookaume kopahombo ile aveshe, oushenge ile okuya momilele nomupambele. Ounona otashi dulika va kale ve na omaupyakadi kofikola, va handuka, ve na oshisho, va polimana ile va kale va hala okulidipaa.