Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) FEBRUALI 2014

‘Tala ouwanyenye wOmwene’

‘Tala ouwanyenye wOmwene’

Eenghalo dinyikifa oluhodi otadi dulu oku tu kuma nai. Otadi dulu okunyona po omadiladilo etu, oku tu mana eenghono notadi dulu okukuma etaleko letu li na sha nonghalamwenyo. Ohamba yaIsrael shonale, David, oya li ya hangwa komaudjuu mahapu. Ongahelipi ya li ya ungaunga nao? Mepsalme olo tali kumu omutima, David okwa nyamukula a ti: ‘Ohandi lalekida Omwene mokule nohandi lilile Omwene mokule. Eshi tashi tilifa nge, ohandi shi mu pimhile, noudjuu wange ohandi u mu mbubulile. Omhepo yange nande nai notelwe meni lange, Ove ou shii nokuli nhumbi ndi li.’ David okwa li a ilikana nelininipiko kuJehova e mu kwafele. — Eps. 142:2-4.

David okwa li a ilikana nelininipiko kuJehova pomafimbo oudjuu

David okwa li a imba mepsalme limwe vali a ti: “Shimwe ashike onde shi ehela kOmwene, nde shi hala unene: ngeno ame ndi kale mongulu yOmwene omafiku ange aeshe, okutala ouwanyenye wOmwene, ndi [shipulule] nawa motembeli yaye.” (Eps. 27:4) David ka li Omulevi, ndele kala nee wa fa u mu wete e li ofika pondje yoshihale shiyapuki popepi nonhele oyo ya li ondingandinga yelongelokalunga lashili. Omutima waye owa li u yadi olupandu nomolwaasho a li a hala okukala oko onghalamwenyo yaye aishe opo a ‘tale ouwanyenye wOmwene.’

Outumbulilo “ouwanyenye” owa pambafana noukwatya wokukala kwoshinima shihokwifa nosha wapala ile shihafifa. David okwa kala alushe e na olupandu li na sha nelongekido laKalunga loku mu longela. Otashi dulika tu lipule kutya, mbela naame ohandi kala ngoo ndi udite ngaashi David a li e udite?

KALA U NA OLUPANDU LI NA SHA NELONGEKIDO LAJEHOVA

Kunena, elongekido laJehova li na sha noku mu longela ina li likolelela komutungilo ile koshinima shopanhu. Ponhele yaasho, ola kwatela mo otembeli yaKalunga yakula yopamhepo, oyo i li elongekido liyapuki lelongelokalunga lashili. * Ngeenge otwa kala ‘nokushipulula nawa’ elongekido olo, nafye ohatu ka ‘tala ouwanyenye wOmwene.’

Diladila nee koaltari yexwikiloyambo oyo ya li hai kala komesho yoshivelo shetwali leongalo. (Ex. 38:1, 2; 40:6) Oaltari oyo oya li tai faneke okutambula ko kwa Kalunga nehalo liwa, omwenyo waJesus wopanhu u li eyambo. (Heb. 10:5-10) Diladila kutya osho otashi ti shike kufye! Omuyapostoli Paulus okwa shanga a ti: ‘Hano ngeenge fye fimbo twa li ovatondi vaKalunga, otwa kwatakanifwa naye molwefyo lOmona waye.’ (Rom. 5:10). Ngeenge otwa kala tu na eitavelo mohonde yaJesus ya tika, Kalunga ota dulu okukala e tu hokwa nokwe tu lineekela tu li ookaume kaye. Oshidjemo, ohatu ka kala tu na ‘eendafano nOmwene.’ — Eps. 25:14.

Molwaashi ‘omatimba etu okwa dimwa po,’ ohatu mono ‘omafimbo omahekeleko’ ile tu tye omafimbo epepelelo taa di kuJehova. (Oil. 3:19) Onghalo yetu oya fa ashike yomunadolongo oo e livela ombedi komanyono aye ndele ta ningi omalunduluko manene ofimbo a teelela oku ka dipawa. Eshi omupanguli omunanghenda e shi mona, okwe linyengifwa a dime po omanyono omunhu oo, ta kufa po etokolo lefyo olo a li a tokolelwa. Omunadolongo oo ita ka kala tuu a pepelelwa nokwa hafa neenghono! Ngaashi ashike omupanguli oo, Jehova naye oha file onghenda ovanhu ovo ve lialuluka nota ka kufa po etokolo lefyo.

KALA WA LENGA ELONGELOKALUNGA LASHILI

Imwe yomoinima yelongelokalunga lashili oyo David a li ta dulu okukonakona meumbo laJehova oya li okwoongala pamwe neemhunga dOvaisrael  vakwao, elesho lOmhango moipafi nefatululo layo, omatwimino edimba liwa noilonga iyapuki oyo ya li hai longwa kovapristeri nokOvalevi. (Ex. 30:34-38; Num. 3:5-8; Deut. 31:9-12) Oiningwanima oyo yelongelokalunga lashili yomuIsrael shonale, oya faafana naayo yokunena.

Ngaashi pefimbo lonale, nokunena ‘oshiwa nosha wapala shi fike peni, ovamwatate ngeenge tava kala kumwe nombili.’ (Eps. 133:1) “Ovamwatate” otava hapupala neenghono mounyuni aushe. (1 Pet. 2:17). Eendjovo daKalunga ohadi leshwa nokufatululwa moipafi pokwoongala kwetu. Okupitila mehangano laye, Jehova ohe tu pe ehongo la denga mbada nope na yo eendja dopamhepo dihapu odo di li molupe loishangomwa oyo hatu dulu okulongifa pekonakono lopaumwene noloukwaneumbo. Oshilyo shimwe shOlutuwiliki osha li sha popya kutya: “Okudilonga kombinga yEendjovo daJehova, okudiladila keityo lado nokukonga ounongo neudeko, ohaku pe nge omamona opamhepo nokukala ndi udite nda wanenwa ongula keshe handi penduka.” Oshoshili kutya ‘eshiivo otali dulu okukala ounyenye keemwenyo detu.’ — Omayel. 2:10.

Kunena, ovapiya vaJehova ohava ilikana pandjikilile omailikano oo ta hokwa. Omailikano oo Jehova okwe a tala ko ngaashi omatwimino edimba liwa. (Eps. 141:2) Itashi kumu tuu omitima detu okushiiva kutya Jehova Kalunga oha kala e tu hokwa neenghono ngeenge hatu mu ilikana nelininipiko!

Moses okwa li a ilikana a ti: “Efilonghenda lOmwene Kalunga ketu nali kale kombada yetu! Noilonga yomake etu i punika.” (Eps. 90:17) Jehova ota nangeke noupuna oilonga yetu eshi hatu longo nouladi moukalele. (Omayel. 10:22) Otashi dulika twa kwafela vamwe ve lihonge oshili notashi dulika yo twa kala hatu lididimike moukalele oule womido dihapu nonande otu na ounghundi wopalutu, wopamadiladilo ile ovanhu inava hala okupwilikina ile tave tu hepeke. (1 Tes. 2:2) Ndele nande ongaho, mbela inatu mona “ouwanyenye wOmwene” nokudidilika kutya Tate yetu womeulu okwa hokwa eenghendabala detu?

David okwa li a imba a ti: ‘Omwene Oye oshitukulwa shefyuululo lange nonheka yange. Ove ho diinine [efyuululo ange, NW]. Oshihoololifo sha hoololelwa nge.’ (Eps. 16:5, 6) David okwa li e na olupandu li na sha ‘noshitukulwa’ shaye, okukala e na ekwatafano naJehova nosho yo oufembanghenda woku mu longela. Ngaashi David, nafye otashi dulika tu hangwe komaudjuu, ashike otu na omanangeko noupuna mahapu opamhepo. Onghee hano, natu twikileni okuhafela elongelokalunga lashili nokukala alushe hatu ‘shipulula nawa’ otembeli yaJehova yopamhepo.

^ okat. 6 Tala Oshungonangelo 1 Juli 1996 epandja 21-26.