Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) FEBRUALI 2014

Natu nyakukweni omolwehombolo lOdjona!

Natu nyakukweni omolwehombolo lOdjona!

“Tu nyakukweni, fye tu hafeni . . . osheshi ehombolo lOdjona ola fika.” — EH. 19:7.

1, 2. (a) Ehombolo lilipi tali ka eta ehafo linene meulu? (b) Omapulo elipi a holoka po?

OHASHI pula lela efimbo okulilongekidila ehombolo. Moshitukulwa eshi otwa hala oku ka kundafana ehombolo le likalekelwa, ehombolo lOhamba. Oule womido 2 000 lwaapo da pita, omalongekido e na sha nehombolo olo okwa kala e li metifa. Paife efimbo lehombolo olo ola ehena popepi elela. Mafiku mombala yOhamba otamu ka udika oishikomwa neengudu domeulu otadi ka imba nehafo tadi ti: “Halleluya! Osheshi Omwene Kalunga ketu, Omunamapangelo aeshe a hovela okupangela. Tu nyakukweni, fye tu hafeni, fye tu mu pe efimano, osheshi ehombolo lOdjona ola fika, nomuhombolwa waye okwe lilongekida.” — Eh. 19:6, 7.

2 “Odjona” oyo ehombo layo tali ka etifa ehafo meulu oJesus Kristus. (Joh. 1:29) Ota ka kala a djala ngahelipi pehombolo laye? Omuvalekwa waye olyelye? Okwa kala ta longekidilwa ngahelipi ehombolo olo? Ehombolo olo otali ka ningwa naini? Mbela ovo ve na eteelelo loku ka kala nomwenyo fiyo alushe kombada yedu otava ka dula yo okuhafela ehombolo olo tali ka etifa ehafo meulu? Otwa teelela nodjuulufi oku ka mona omanyamukulo omapulo oo eshi hatu twikile nokukonakona Epsalme 45.

 “OMUDJALO WAYO AUSHE OU NEDIMBA LIWA”

3, 4. (a) Oshike sha tongwa shi na sha nomudjalo wehombolo wOmuhomboli, noshike tashi ka wedela ko kehafo layo? (b) “Ovana veehamba oukadona” nosho yo “ovakainhu” ovo tava ka hafela pamwe nOmuhomboli otava faneke shike?

3 Lesha Epsalme 45:9, 10. Omuhomboli, Jesus Kristus, ota ka djala omudjalo wopauhamba u na oshinge. Nosha yeleka yo eshi taku tiwa kutya omudjalo waye otau di edimba liwa la fa ‘loimbodi yedimba liwa,’ ngaashi omirha nokassia, oyo ya li hai longifwa mokuninga omaadi mayapuki okuvaeka, oo kwa li haa longifwa kOvaisrael. — Ex. 30:23-25.

4 Oishikomwa yomeulu oyo tai ka hovela okushikwa eshi ehombolo li li pokuhovela otai ka weda ko kehafo lOmuhomboli. “Ovakainhu” ovo tava faneke oshitukulwa shehangano laKalunga lomeulu, olo la kwatela mo “ovana veehamba oukadona” ovo tava faneke ovaengeli ovayapuki, otava ka hafela pamwe nOmuhomboli. Itashi ka kala tuu shitunhula eshi ovaengeli tava ka imba tava ti: “Tu nyakukweni, fye tu hafeni . . . osheshi ehombolo lOdjona ola fika”!

NGHEE OMUVALEKWA A LONGEKIDILWA EHOMBOLO

5. “Omukainhu wOdjona” olyelye?

5 Lesha Epsalme 45:11, 12. Paife otu shii Omuhomboli oo ta popiwa. Mbela omuvalekwa waye olyelye? Omuvalekwa oo oku li ongudu yOvakriste ovavaekwa ovo ve li oilyo yeongalo olo tali wilikwa kuJesus Kristus. (Lesha Ovaefeso 5:23, 24.) Ovavaekwa ovo otava ka pangela pamwe naKristus mOuhamba waye wopaMessias. (Luk. 12:32) Ove li 144 000, nohava “shikula Odjona keshe apa tai i.” (Eh. 14:1-4) Otava ka ninga “omukainhu wOdjona” notava ka kala pamwe naye meulu. — Eh. 21:9; Joh. 14:2, 3.

6. Omolwashike ovavaekwa tava popiwa ve li “okakadona kohamba,” nomolwashike tava ladipikwa va ‘xupule oshiwana shavo’?

6 Mepsalme, omuvalekwa oo okwa popiwa e li “omona okakadona” nosho yo “okakadona kohamba.” (Eps. 45:14) ‘Ohamba’ oyo tai popiwa apa oyo lyelye? OJehova. Ovakriste ovavaekwa ove li “ovana” vaJehova. (Rom. 8:15-17) Molwaashi otava ka ninga omuvalekwa, ova ladipikwa taku ti: “Xupula oshiwana sheni novambuleni” pambelela. Onghee ove na okukala va ‘dama oinima yopombada, ndele hainima yokombada yedu.’ — Kol. 3:1-4.

7. (a) Kristus okwa kala ta longekidile ngahelipi omuvalekwa waye ehombolo lavo? (b) Omuvalekwa ye oha tale ko ngahelipi Omuhomboli waye womonakwiiwa?

7 Oule womafelemido, Kristus okwa kala ta longekidile omuvalekwa waye ehombolo lavo lomeulu. Omuyapostoli Paulus okwa ti kutya Kristus okwa kala e “hole eongalo, nokwe liyandja molwalo, opo e li yapule noku li yelife mekosho lomeva oneendjovo, opo a dule okukaleka ofika moipafi yaye mwene eongalo la yelifwa li he nedilo ile eengonyoto ile oinima inai wapala, ndelenee li kale liyapuki noli he noshipo.” (Ef. 5:25-27) Paulus okwa li yo a lombwela ovavaekwa vomuKorinto shonale a ti: “Handi mu kondjele nouladi waKalunga, osheshi onde mu [valekela] omulumenhu umwe, ndi etele Kristus okakadona ka koshoka.” (2 Kor. 11:2) Nomolwaasho Omuhomboli Ohamba Jesus Kristus okwa “hala” omuvalekwa waye, ile tu tye, okwa hokwa oupamhepo muwa womuvalekwa waye. Nomuvalekwa oo okwa tala ko Kristus e li ‘omwene waye’ nosho yo omushamane waye womonakwiiwa, nomolwaasho te ‘linyongamene kuye.’

ESHI OMUVALEKWA TA KA “TWALWA KOHAMBA”

8. Omolwashike sha yeleka eshi taku ti wa kutya omuvalekwa ‘omuwa’?

8 Lesha Epsalme 45:14, 15a. Omuvalekwa ota popiwa ta monika ‘nawa’ pefimbo lehombolo lavo. MEhololo 21:2, omuvalekwa oo ota yelekanifwa noshilando, Jerusalem Shipe,  osho sha ‘djalekelwa omulumenhu washo.’ Oshilando osho shomeulu oshi “noshinge shaKalunga” noshi na evadimo la fa “emanya li nondilo, ngaashi yaspis tali vilima la fa kristalli.” (Eh. 21:10, 11) Ehololo ola hokolola nawanawa ewapalo loshilando osho. (Eh. 21:18-21) Onghee osha yukila ko eshi omupsalme ta ti kutya omuvalekwa ‘omuwa.’ Nosha yeleka okukala ngaho molwaashi ehombolo olo ehombolo lOhamba tai hombolele meulu.

9. Omuvalekwa ota ka twalwa “kwohamba” ilipi, nota i ko a djala ngahelipi?

9 Omuvalekwa oo ota ka twalwa kOmuhomboli, Ohamba yopaMessias. Omuhomboli oo okwa kala efimbo noule ta longekida omuvalekwa waye, te mu ‘yelifa mekosho lomeva oneendjovo’ ndele ta ningi ‘omuyapuki ehe noshipo.’ (Ef. 5:26, 27) Omuvalekwa oo okwa li yo e na okudjala monghedi tai wapalele ehombolo. Otaku tiwa kutya ‘momudjalo waye omwa tungilwa oingoli, nokwa “dikwa oikutu ya tungilwa omaluvala ndee taka twalwa kohamba.” Ehololo ola ti kutya okwa “pewa a djale oikutu yoliina itoka ya vilima noya yela. Oikutu oyo yoliina oyo ouyuki wovayapuki.” — Eh. 19:8.

‘EHOMBOLO OLA FIKA’

10. Ehombolo lOdjona otali ka ningwa naini?

10 Lesha Ehololo 19:7. Ehombolo lOdjona otali ka ningwa naini? Nonande okwa tiwa kutya ‘omuhombolwa okwe lilongekidila’ ehombolo, Ehololo inali popya kombinga yanghee ehombolo la enda. Ponhele yaasho, ola landulifa ko oiningwanima oyo tai ka ningwa lwopexulilo loudjuu munene. (Eh. 19:11-21) Mbela osho osha hala okutya ehombolo olo otali ka ningwa fimbo Ohamba oyo i li Omuhomboli inai mana olwoodi layo nokufinda filufilu? Hasho nandenande. Otu na okudimbuluka kutya omamoniko omEhololo inaa shangwa palandulafano loiningwanima. Ashike mEpsalme 45, ehombolo olo lOhamba ola ningwa konima eshi ohamba ya mangela moshiya shayo omukonda ‘nokukala omunelao mokufinda’ ovatondi vayo. — Eps. 45:4, 5.

11. Oiningwanima i na sha nokufindana kwaKristus otai ka landulafana ngahelipi?

11 Oiningwanima i na sha nokufindana kwaKristus otai ka landulafana ngaha: Tete ‘ombwada inene,’ Babilon Shinene, ouhamba womounyuni aushe womalongelokalunga oipupulu, otai ka tokolwa. (Eh. 17:1, 5, 16, 17; 19:1, 2) Opo nee Kristus ota ka tokola oshixupe shonghalelo aishe yaSatana yokombada yedu noku i hanauna po puHarmagedon, “oita mefiku linene laKalunga omunamapangelo aeshe.” (Eh. 16:14-16; 19:19-21) Xuuninwa, Ohamba oyo i li Omukwaita otai ka findana filufilu eshi tai ka umbila Satana neendemoni daye mombwili, opo vaha hongaule vali ovanhu. — Eh. 20:1-3.

12, 13. (a) Ehombolo lOdjona otali ka ningwa naini? (b) Oolyelye meulu tava ka hafela ehombolo lOdjona?

12 Ngeenge Ovakriste ovavaekwa va fi pefimbo lokukala po kwaKristus, ohava nyumuninwa omwenyo womeulu. Konima eshi Babilon Shinene sha hanaunwa po, Jesus ota ka ongela meulu oilyo aishe yongudu yomuvalekwa. (1 Tes. 4:16, 17) Onghee hano, oilyo aishe yongudu ‘yomuhombolwa’ otai ka hangwa i li meulu ofimbo oita yaHarmagedon inai hovela. Opo nee konima eshi oita oyo ya luwa, ehombolo lOdjona otali ka hovela. Itashi ka kala tuu omhito itunhula! Ehololo 19:9 ola ti: “Ovanelao [ovovo] va ifanwa kehombolo lOdjona.” Nopehe nomalimbilo, oilyo yongudu yomuvalekwa 144 000 otai ka kala ya hafa neenghono. Ohamba oyo i li Omuhomboli nayo otai ka kala ya hafa neenghono eshi ovapangeli pamwe nayo aveshe tava ka ‘lya nokunwa pafaneko poshililo shayo mouhamba wayo.’ (Luk.  22:18, 28-30) Ashike Omuhomboli nomuvalekwa havo ashike tava ka kala va hafa omolwehombolo olo.

13 Ngaashi sha popiwa nale metetekelo, eengudu domeulu otadi ka ingida tadi ti: ‘Tu nyanyukweni, fye tu hafeni, fye tu pe [Jehova] efimano, osheshi ehombolo lOdjona ola fika, nomuhombolwa wayo okwe lilongekida.’ (Eh. 19:6, 7) Ongahelipi kombinga yovapiya vaJehova vokombada yedu? Mbela navo otava ka hafa omolwehombolo olo?

“OTAVA ENDIFWA NEHAFO”

14. “Oukadona” ovo ve li ‘ookahewa’ komuvalekwa, tava popiwa mEpsalme 45, ovo oolyelye?

14 Lesha Epsalme 45:13, 15b, 16. Omuprofeti Sakaria okwa xunganeka kutya pefimbo lexulilo ovanhu vomoiwana i lili noku lili ova li tava ka dimina nehafo okweendafana noshixupe shaIsrael yopamhepo. Okwa ti: “Omafiku tuu enya ovalumenhu omulongo vomomalaka aeshe oiwana otava ka kwata koshikutu shomulumenhu Omujuda nokukanyatela ko, ndee tava ti: Ofye twa hala okweenda pamwe nanye, osheshi ofye twa uda, nokutya Kalunga eli pamwe nanye.” (Sak. 8:23) MEpsalme 45:13, “ovalumenhu omulongo” ovo vopafaneko ova popiwa ve li “ovanhu vomuTiros” nosho yo ‘ovanenenhu.’ Ohava etele oshixupe shovavaekwa omilongelo, molwaashi ova hala shi kale she va ‘hokwa’ noshi va kwafele pamhepo. Okudja mo 1935, ovavaekwa ova kwafela ovanhu va tya ngaho omamiliyona, ve va ‘twala kouyuki.’ (Dan. 12:3) Osho osha kwafela ookaume ovadiinini vOvakriste ovavaekwa ovo va koshola eenghalamwenyo davo ndele tava ningi oukadona elela vopamhepo. “Oukadona” ovo ve li ‘ookahewa’ komuvalekwa ove liyapulila Jehova nohava dulika noudiinini kOhamba oyo i li Omuhomboli.

15. ‘Oukadona, ookahewa,’ ova kala tava longo ngahelipi moukumwe noilyo yongudu yomuvalekwa oyo i li kombada yedu?

 15 Oshixupe shongudu yomuvalekwa otashi pandula lela ‘oukadona, ookahewa,’ ovo va kala nokuyambidida nouladi oilonga yokuudifa “evangeli eli louhamba” mounyuni aushe. (Mat. 24:14) “Omhepo nomuvalekwa otava ti: Ila! Naou te shi udu na tye: Ila!” (Eh. 22:17) Metwokumwe naasho, “eedi dimwe” oda uda eshi oilyo yongudu yomuvalekwa ya ti: “Ila!” Ndele nado oda waimina ongudu oyo mokushiva ovanhu kombada yedu alishe mokutya, “Ila!” — Joh. 10:16NW.

16. Oufembanghenda ulipi Jehova ta ka pa eedi dimwe?

16 Ovavaekwa ove hole eedi dimwe nova hafa eshi ve shii kutya Jehova, Xe yOmuhomboli, ota ka pa eedi dimwe yo oufembanghenda wokuhafela ehombolo olo lomeulu lOdjona nonande do otadi ka kala nomwenyo kombada yedu. Okwa xunganekwa kutya ‘oukadona ookahewa’ ovo, “otava ka endifwa nehafo neenghuwilili. Osha yela lela kutya eedi dimwe, odo da teelela oku ka kala nomwenyo fiyo alushe kombada yedu, otadi ka waimina oishitwa ikwao mokuhafela ehombolo olo lomeulu lOdjona. Nomolwaasho osha yukila ko eshi embo lEhololo la popya kutya “ongudu inene” oi li “ofika [ya] taalela olukalwapangelo nOdjona.” Ongudu inene ohai longele Jehova oilonga iyapuki moshihale shotembeli yaye yopamhepo shokombada yedu. — Eh. 7:9, 15.

“Oukadona” ovo ve li ‘ookahewa’ komuvalekwa otava ka hafela ehombolo lOdjona (Tala okatendo 16)

“OUNONA VOYE OVAMATI OTAVA KA KALA PONHELE YOOXO”

17, 18. Ongahelipi ohombo yOdjona otai ka etela ouwa ovo tava ka kala mounyuni mupe, na Kristus ota ka ninga xe yoolyelye pefimbo lEpangelo laye lOmido Eyovi?

17 Lesha Epsalme 45:17. “Oukadona” ovo ve li ‘ookahewa’ komuvalekwa waKristus womeulu otava ka kala va hafa yo eshi tava ka mona ohombo oyo tai pondola shihapu mounyuni mupe. Ohamba oyo i li Omuhomboli otai ka nyumuna ‘ooxekulululwa’ vayo ndele tava ningi ‘ovanamati’ vayo vokombada yedu. (John 5:25-29; Heb. 11:35) Vamwe vomwaavo otava ka nangekwa po ve li “oidale moshilongo ashishe,” ile tu tye, omalenga kombada yedu. Nopehe nomalimbililo, Kristus ota ka nangeka po yo vamwe vomovakulunhuongalo vokunena ovadiinini va kwatele komesho mounyuni mupe. — Jes. 32:1.

18 Pefimbo lEpangelo lOmido Eyovi, Kristus ota ka ninga yo xe yavamwe. Ovanhu aveshe ovo tava ka kala kombada yedu otava ka mona omwenyo waalushe pakanghameno leitavelo lavo mekuliloyambo laJesus. (Joh. 3:16) Kungaho, ota ka ninga “Tate yaalushe” kuvo. — Jes. 9:6, 7.

OTWE LINYENGIFWA TU ‘DIMBULUKIFE VAMWE EDINA LOHAMBA’

19, 20. Oiningwanima itunhula oyo ya xunganekwa mEpsalme 45 oya kuma ngahelipi Ovakriste aveshe kunena?

19 Lesha Epsalme 45:2, 18. Kape nomalimbililo kutya oiningwanima oyo ya xunganekwa mEpsalme 45 oya kuma Ovakriste aveshe. Oshixupe shovavaekwa ovo ve li kombada yedu osha teelela nodjuulufi oku ka hangana navakwao ovo ve li meulu nosho yo nOmuhomboli wavo. Eedi dimwe oda halelela okukala hadi dulika kOhamba yado ikumwifi nodi udite etumba eshi di na oufembanghenda wokweendafana noshixupe shongudu yomuvalekwa osho shi li natango kombada yedu. Konima yehombolo olo lomeulu, Kristus novapangeli pamwe naye otava ka etela ovakali kombada yedu omanangeko noupuna mahapu. — Eh. 7:17; 21:1-4.

20 Ofimbo twa teelela “eendjovo diwa” di na sha nOhamba oyo yopaMessias di wanifwe, mbela itashi tu linyengifa tu ‘dimbulukife vamwe edina lohamba’ oyo? Natu kaleni mokati kaavo tava ka ‘fimaneka Ohamba oyo fiyo alushe.’