Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) JANUALI 2014

Omido 100 dokupangela kwOuhamba—Ode ku kuma ngahelipi?

Omido 100 dokupangela kwOuhamba—Ode ku kuma ngahelipi?

Oilonga yoye oinene noikumifa Omwene Kalunga, . . . ohamba [yaalushe].” — EH. 15:3.

1, 2. Ouhamba waKalunga otau ka ninga shike, nomolwashike tu na elineekelo kutya otau ke uya?

POMHITO imwe, pefimbo loitemadula yokOushilo woPokati, mo 31 O.P., fimbo Jesus Kristus a li komhunda oyo ya li popepi naKapernaum, okwa li a honga ovashikuli vaye va kale hava ilikana kutya: “Ouhamba woye nau uye.” (Mat. 6:10) Vahapu kunena inava itavela kutya Ouhamba oo onau ke uye. Ndele fye otu na elineekelo kutya eilikano letu la tya ngaho, olo hatu ilikana nomutima aushe, otali ka nyamukulwa.

2 Jehova ota ka longifa Ouhamba opo a hanganife oilyo aishe youkwaneumbo waye, oyo i li meulu nokombada yedu. Elalakano olo itali kala inali wanifwa. (Jes. 55:10, 11) Jehova okwa ninga vali Ohamba pefimbo letu. Oushili oo otau kolekwa koiningwanima itunhula oyo ya kala nokuningwa omido 100 da ka lupuka. Okwa kala ta longo oilonga inene noikumwifi omolwovapangelwa ovadiinini omamiliyona vOuhamba waye. (Sak. 14:9; Eh. 15:3) Ashike okuninga kwaJehova Ohamba itaku ti shimwe nokuuya kwOuhamba waye oko Jesus a ti kutya natu ku ilikane. Eyooloko oli li peni pokati kokuninga kwaJehova Ohamba nokuuya kwOuhamba waye, naasho oshe tu kuma ngahelipi?

OHAMBA OYO YA NANGEKWA PO KUJEHOVA OYA HOVELA OKUKATUKA EENGHATU

3. (a) Jesus okwa nangekwa po e li Ohamba naini, nopeni? (b) Oumbangi ulipi tau ulike kutya Ouhamba owa dikwa po mo 1914? (Tala eshangelo lopedu.)

3 Lwopexulilo lefelemudo 19, exunganeko limwe laDaniel olo la xunganekwa pa pita omido 2 500 ola enda tali udiwa ko, olo tali ti: “Pomafiku  eehamba dinya Kalunga ou komeulu ota ka dika ouhamba itau ka teka po fiyo alushe.” (Dan. 2:44) Ovakonakoni vOmbibeli ova kala oule womido omilongo tava popi kutya 1914 otau ka kala omudo udidilikwedi. Ovanhu vahapu pefimbo olo ova li ve na omukumo ngaashi omushangi oo a shanga a ti: “Ovanhu vomo 1914 ova li ve na eteelelo netimaumbwile.” Ndele lwanima momudo oo, pefimbo lOita Yotete yOunyuni, omaxunganeko Ombibeli okwa hovela okuwanifwa. Ondjala, omakakamo edu nomikifi ode ke uya. Oinima oyo nosho yo omaxunganeko amwe vali oo taa wanifwa otaa yandje oumbangi wa yela kutya Jesus Kristus okwa hovela okupangela meulu mo 1914 e li Ohamba yOuhamba waKalunga. * Onghee hano, Jehova okwa ninga Ohamba meityo olo kutya okwa nangeka po Omona waye e li Ohamba yopaMessias.

4. Onghatu yotete ilipi Jesus a li a katuka e li Ohamba, nolwanima okwa ka yandja elitulemo kushike?

4 Eshi Jesus a nangekwa po e li Ohamba, tetetete okwa li e na okulwifa Satana, oo e li omutondi munenenene waXe. Jesus novaengeli vaye ova ta mo Ondiaboli neendemoni dayo meulu. Osho osha li sha eta ehafo linene meulu, ndele pefimbo opo tuu opo osha etifa yo oupyakadi muhapu kombada yedu. (Lesha Ehololo 12:7-9, 12.) Konima yaasho, Jesus okwa li a hovela okuyandja elitulemo kovapangelwa vaye vokombada yedu moku va kwafela va kale va koshoka pamhepo, moku va honga noku va unganeka va longe ehalo laKalunga. Natu ka taleni nhumbi ovapangelwa ovo va li ve linyenga meembinga odo nhatu dokupangela kwOuhamba noshihopaenenwa osho ve tu tulila po kunena.

OHAMBA YOPAMESSIAS OYA KWAFELA OVAPANGELWA VAYO OVADIININI VA KALE VA KOSHOKA PAMHEPO

5. Ovashikuli vaJesus ova li va kosholwa ngahelipi pokati ko 1914 fiyo olwopeemwedi dopetameko mo 1919?

5 Konima eshi Ohamba oyo ipe ya ta mo Satana neendemoni meulu, Jehova okwa li e i tuma i ka konakone onghalonawa yopamhepo yovashikuli vayo noku va kwafela va kale va koshoka pamhepo. Omuprofeti Malakia okwa li a shanga kombinga yoshinima osho. (Mal. 3:1-3) Ondjokonona otai ulike kutya osho osha ningwa pokati ko 1914 fiyo olwopeemwedi dopetameko mo 1919. * Opo tu kale oshitukulwa shoukwaneumbo waJehova womeshito alishe, otwa pumbwa okukala twa koshoka ile tu va yapuki. (1 Pet. 1:15, 16) Otu na okulungama tuha nyatekwe komalongelokalunga oipupulu ile keepolotika dounyuni ou.

6. Ohatu pewa ngahelipi eendja dopamhepo, nomolwashike da fimana kufye?

6 Lwanima Jesus okwa li a longifa eenghono daye dopauhamba okunangeka po “omupiya omudiinini nomunaendunge.” Omupiya oo oku na oshinakuwanifwa shokuyandja pefimbo eendja dopamhepo tadi palula kwaavo ve li oshitukuluwa ‘shoshiunda shimwe’ osho shi li mefiloshisho laJesus. (Mat. 24:45-47; Joh. 10:16) Okudja mo 1919 opa kala okangudu kanini kovamwatate ovavaekwa ovo va kala tava longo noudiinini va wanife po oshinakuwanifwa osho shidjuu shokupalula ‘ovapiya.’ Eendja dihapu dopamhepo odo hatu pewa okupitila moupitilo oo ohadi tu kwafele tu kale neitavelo la kola. Ohadi tu pameke opo tu kale twa koshoka pamhepo, paenghedi, pamadiladilo nopalutu. Ohatu hongwa yo okupitila momafiloshisho opamhepo a tya ngaho nohae tu kwafele tu kufe ombinga pauyadi moilonga yokuudifa oyo ya fimanenena kombada yedu kunena. Mbela oho longifa ngoo nawa omafiloshisho oo?

OHAMBA OHAI HONGO OVAPANGELWA VAYO VA KALE TAVA UDIFA MOUNYUNI AUSHE

7. Oilonga ya fimanenena ilipi Jesus a li a hovela eshi a li kombada yedu, noya li tai ka twikila okulongwa fiyo onaini?

7 Eshi Jesus a li ta wanifa po oukalele waye kombada yedu, okwa tile: “Ondi na okuudifila oilando imwe yo evangeli louhamba waKalunga, osheshi olo tuu eli [nde] li tuminwa.” (Luk. 4:43)  Jesus okwa kala ta longo noudiinini oule womido nhatu netata opo a wanife po oshilonga osho. Okwa li yo a lombwela ovahongwa vaye a ti: “Keshe apa tamu ende, va lombweleni mu tye: ouhamba weulu wa ehena popepi.” (Mat. 10:7) Konima eshi a nyumunwa, okwa li a lombwela ovashikuli vaye kutya nava udife ‘fiyo okominghulo dounyuni.’ (Oil. 1:8) Okwa li a udaneka kutya ota kala pamwe navo eshi tava longo oilonga oyo ya fimanenena fiyo okefimbo letu. Mat. 28:19, 20.

8. Ohamba oya li ye linyengifa ngahelipi ovapangelwa vayo va ka udife Ouhamba?

8 Okudja mo 1919, “evangeli eli louhamba” ola hovela okukala li na eityo la wedwa po. (Matt. 24:14) Ohamba oya li tai pangele meulu noya li ya ongela okangudu kovapangelwa vayo vokombada yedu ovo va koshoka pamhepo. Ovapangelwa ovo ova li va tambula ko nomutima aushe elombwelo laJesus la yela, olo kutya: Ka udifeni onghundana iwa mounyuni aushe kutya Ouhamba waKalunga owa dikwa! (Oil. 10:42) Pashihopaenenwa, ovayambididi vOuhamba 20 000 lwaapo ova li va ongala poshoongalele shopaiwana muCedar Point, Ohio, mOilongo ya Hangana yaAmerika, muSeptemba 1922. Kava li tuu va tunhukwa koshipopiwa shomumwatate Rutherford, osho sha li shi na oshipalanyole “Ouhamba,” omo a shiivifa a ti: “Tala, Ohamba otai pangele! Nye ovakalele vayo voku shi shiivifa. Hano udifeni, udifeni, udifeni Ohamba nouhamba wayo.” Pefimbo loshoongalele osho, ovanashiongi 2 000 ova li va kufa ombinga “mEfiku lOkuudifa” le likalekelwa, va li va enda tava talele po omaumbo oule woshinano sheekilometa 72 okudja ponhele opo pa li tapa danenwa oshoongalele. Omunashiongi umwe oo a li e linyengifwa keladipiko olo okwa ti: “Nghi na fiku ndi dimbwe eladipiko olo lokushiivifa Ouhamba nosho yo ouladi oo wa li u niwe keemhunga odo da li da ongala.” Vahapu osho va li yo ve udite ngaho.

9, 10. (a) Omalongekido elipi a ningwa po opo ovaudifi vOuhamba va kale va deulikika? (b) Ouwa ulipi wa mona momadeulo a tya ngaho?

9 Mo 1922, opa li ovaudifi vOuhamba ve dulife 17 000 ovo va li tava udifa moilongo 58 mounyuni aushe. Ndelenee ova li va pumbwa edeulo. Mefelemudo lotete, Jesus, e li Ohamba yokonahiya, okwa li a pa ovahongwa vaye omalombwelo a yela kutya oshike ve na okuudifa, openi ve na okuudifila nonghee ve na oku shi ninga. (Mat. 10:5-7; Luk. 9:1-6; 10:1-11) Ngaashi ashike a li a lombwela ovahongwa vaye vopetameko, nokunena oha shilipaleke kutya aveshe ovo hava kufa ombinga moilonga yokuudifa Ouhamba ova hongwa nove na oilongifo oyo tai va kwafele va udife nomupondo. (2 Tim. 3:17) Oha deulile ovapangelwa vaye oukalele okupitila meongalo lopaKriste, unene tuu okupitila mOfikola yOkudeula Ovaudifi, oyo hai ningwa momaongalo e dulife po 111,000 mounyuni aushe. Oshidjemo, ope na ovaudifi ve dule pomamiliyona aheyali ovo va pyokoka mokuudifa nokuhonga monghedi oyo tai hokwifa ovanhu vomaludi ‘aeshe.’Lesha 1 Ovakorinto 9:20-23.

10 Kakele kOfikola yOkudeula Ovaudifi, ope na yo eefikola dikwao dopaMbibeli odo da nuninwa okudeula ovakulunhuongalo, ovakokolindjila,  ovamwatate inava hombola, ovalihomboli Ovakriste, oilyo yEekomitiye dOitaimbelewa novakulukadi vayo, ovapashukili ovaendi novakulukadi vavo nosho yo ovatumwa. * Umwe oo a pita mOfikola yOmbibeli yOkudeula Ovalihomboli Ovakriste okwa popya nolupandu shi na sha nofikola oyo a ti: “Edeulo le likalekelwa olo twa mona ole tu kwafela tu kale tu hole Jehova neenghono shi dulife nale notu kale tu shii nawa nghee tu na okukwafela vamwe.”

11. Oshike sha kwafela ovaudifi vOuhamba va dule okulididimika nomupondo nonande ohava patanekwa?

11 Kape nomalimbilo kutya Satana oku wete eshi oilonga oyo yokuudifa nokuhonga vamwe kombinga yOuhamba tai xumu komesho. Onghee hano, oha kendabala okuya moshipala oilonga oyo ile okushololifa ovaudifi, kutya nee ote shi ningi meenghedi di liwetikile ile omonanguwi. Ashike ke na eshi ta pondola. Jehova okwa paka Omona waye “kombada yomapangelo aeshe nomauhamba meenghopangelo neenghono moumwenepangelo.” (Ef. 1:20-22) Onghee hano, Jesus, e li Ohamba, oha longifa eenghonopangelo daye okwaamena nokuwilika ovahongwa vaye opo va wanife po ehalo laXe. * Nomolwaasho, onghundana iwa otai udifwa, novanamitimadiwa omamiliyona ova hongwa eendjila daJehova. Kau fi tuu oufembanghenda okukufa ombinga moilonga oyo inene!

OHAMBA OYA UNGANEKA OVAPANGELWA VAYO VA DULE OKULONGA SHIHAPU

12. Omalunduluko amwe opahangano elipi a ningwa okudja eshi Ouhamba wa dikwa po?

12 Okudja eshi Ouhamba wa dikwa po mo 1914, Ohamba oya xwepopaleka onghedi omo ovapiya vaKalunga va unganekwa opo va dule okuwanifa po ehalo laXe. (Lesha Jesaja 60:17.) Mo 1919, opa li pa nangekwa omuwiliki woilonga meongalo keshe oo ha kwatele komesho oilonga yokuudifa. Mo 1927, omaongalo okwa li a unganekwa opo a kale haa kufa ombinga pandjikilile moilonga yokuudifa eumbo neumbo mOyoondaxa. Mo 1931, eshi ovayambididi vOuhamba va tambula ko edina lopamishangwa Eendombwedi daJehova, ova li va ladipikwa va kale tava longo shihapu. (Jes. 43:10-12) Mo 1938, onghedi yokuhoolola paudemokoli ovo tava kwatele komesho momaongalo oya li ya xulifwa po; okudja opo ova li hava nangekwa po pamishangwa. Okudja 1972, omaongalo kaa li vali haa pashukilwa komupashukili umwe, ndele ponhele yaasho ohaa pashukilwa kolutu lovakulunhuongalo. Ovalumenhu aveshe ovo va wana ova li tava ladipikwa va lalakanene oufembanghenda ‘wokulifa oufita waKalunga ve u pewa.’ (1 Pet. 5:2) Mo 1976, Olutuwiliki ola li la unganekwa meekomitiye hamano dokupashukila oilonga yOuhamba yomounyuni aushe. Osha yeleka eshi Ohamba oyo ya nangekwa po kuJehova ya enda tai unganeke  ovapangelwa vOuhamba opo va kale tava ningi oinima pamishangwa, ngaashi naanaa Jehova a hala.

13. Osho epangelo lOuhamba la pondola moule womido 100 da pita oshe ku kuma ngahelipi?

13 Tala kutya Ohamba yopaMessias oya pondola shi fike peni momido 100 dotete dokupangela kwayo. Oya kwafela oshiwana shaJehova shi kale sha koshoka opo shi dule okuhumbata edina laJehova. Oya kala tai wilike oilonga yokuudifa onghundana iwa yOuhamba noyokuhonga ovanhu omamiliyona moilongo 239 kombinga yeendjila daJehova. Oya hanganifa ovapangelwa ovadiinini ve dulife pomamiliyona aheyali, ovo keshe umwe ta longo ehalo laXe nehalo liwa. (Eps. 110:3) Oshoshili kutya Jehova okwa longa oilonga inene noikumwifi okupitila mOuhamba wopaMessias. Ope na vali oiningwanima imwe itunhula neenghono oyo twa teelela monakwiiwa.

OMANANGEKO NOUPUNA OMONAKWIIWA OO TAA KA ETWA KOUHAMBA WOPAMESSIAS

14. (a) Ngeenge hatu ilikana hatu ti “ouhamba woye nau uye” oshike lela hatu indile Kalunga a ninge? (b) Omushangwa womudo 2014 otau ti ngahelipi, nomolwashike wa yeleka?

14 Oshoshili kutya Jehova okwa nangeka po Omona waye, Jesus Kristus, e li Ohamba yopaMessias mo 1914. Ndele osho itashi ti kutya eilikano “ouhamba woye nau uye” ola nyamukulwa pauyadi. (Mat. 6:10) Ombibeli oya xunganeka kutya Jesus okwa li ta ka “pangela mokati kovatondi” vaye. (Eps. 110:2) Omapangelo opanhu, oo e li meke laSatana, oku li omhinge nOuhamba waKalunga. Onghee hano, eshi hatu ilikana kutya Ouhamba waKalunga nau uye, ohatu indile Kalunga opo Ohamba yopaMessias novapangeli pamwe nayo va xulife po omapangelo opanhu novapataneki aveshe vOuhamba ovo ve li kombada yedu. Kungaho, Daniel 2:44 ota ka wanifwa, oo ta ti kutya Ouhamba waKalunga otau “ka teyaula omauhamba aeshe noku a xulifa po.” Ovatondi vopapolitika vOuhamba otava ka hanaunwa po filufilu. (Eh. 6:1, 2; 13:1-18; 19:11-21) Oshiningwanima osho oshi li popepi elela. Inashi yeleka tuu eshi omushangwa womudo 2014, omudo omuti-100 wokupangela kwOuhamba waKalunga womeulu, eshi wa kufwa muMateus 6:10, tau ti: “Ouhamba woye nau uye”!

Omushangwa womudo 2014 otau ti: Ouhamba woye nau uye.”Mateus 6:10

15, 16. (a) Oiningwanima itunhula ilipi tai ka ningwa momukokomoko womido eyovi depangelo laKristus? (b) Onghatu yaxuuninwa ilipi Jesus ta ka katuka e li Ohamba yopaMessias, nelalakano laJehova li na sha noishitwa aishe otali ka hanga oshitwa shilipi?

15 Konima eshi Ohamba yopaMessias ya hanauna po ovatondi vaKalunga, otai ka umbila Satana neendemoni daye mombwili omo tava ka kala oule womido 1 000. (Eh. 20:1-3) Opo nee Ouhamba oo otau ka longifa ongushu yekuliloyambo laJesus nokukufa po oilanduliko aishe youlunde oo wa etifwa kuAdam. Ohamba otai ka nyumuna yo ovanhu omamiliyona mahapu ovo ve li meembila notai ka ninga omalongekido a kwata moiti opo ovanhu ovo va hongwe kombinga yaJehova. (Eh. 20:12, 13) Edu alishe otali ka ningwa oparadisa, tali fe naanaa oshikunino shaEden, novanhu aveshe ovadiinini otava ka ya mewaneneno.

16 Pexulilo lEpangelo laKristus lOmido Eyovi, Ouhamba wopaMessias otau ka kala wa wanifa po omalalakano ao. Opo nee Jesus ota ka yandja Ouhamba kuXe. (Lesha 1 Ovakorinto 15:24-28.) Itapa ka kala vali pa pumbwa omupokati pokati kaJehova novana vaye vokombada yedu. Ovana vaJehova aveshe vomeulu novokombada yedu otave ke mu longela e li Xe yavo womeulu, ve li oilyo youkwaneumbo waye womeshito alishe.

17. Oshike wa tokola toko okuninga shi na sha nOuhamba?

17 Oiningwanima itunhula oyo ya kala nokuningwa momido 100 dokupangela kwOuhamba otai tu shilipaleke kutya Jehova ota yukifa oinima e li Omunamapangelo aeshe nonokutya elalakano laye li na sha nedu otali ka wanifwa. Onghee hano, natu twikileni okukala ovapangelwa vaye ovadiinini nokukala hatu shiivifile vamwe kombinga yOhamba nOuhamba wayo. Otwa hala yo okuninga ngaho tu na elineekelo kutya mafiku Jehova ota ka nyamukula eilikano olo hatu ilikana nomutima aushe kutya, “Ouhamba woye nau uye”!

^ okat. 10 Tala oshitukulwa shOshungonangelo yo 15 Septemba 2012, epandja 13-17, shi na oshipalanyole “Eefikola domehangano laJehova —Otadi ulike kutya Jehova omunahole.”

^ okat. 11 Tala Oshungonangelo yo 15 Auguste 2012, epandja 17, opo u mone oihopaenenwa yomafindano opaveta oshiwana shaKalunga moilongo i lili noku lili.