Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) JANUALI 2014

Longela Jehova, Ohamba yaalushe

Longela Jehova, Ohamba yaalushe

Ohamba yomafimbo ounyuni, ei i he nexulilo . . . na hambelelwe, Ye na fimanekwe alushe fiyo alushe!1 TIM. 1:17.

1, 2. (a) Olyelye e li “Ohamba yomafimbo ounyuni, ei i he nexulilo,” nomolwashike a yeleka okwiifanwa ngaho? (Tala efano olo li li pehovelo loshitukulwa.) (b) Oshike lela hashi tu nanene kuJehova e li Ohamba?

OHAMBA yaSwaziland SOBHUZA II oya li ya pangela lunga omido 61. Osho oshinima tashi kumwifa lela kunena okuuda ohamba tai pangele efimbo li fike opo. Oshoshili kutya ovanhu ova kuminwa efimbo noule oo ohamba Sobhuza ya pangela, ndelenee ope na ohamba oyo tai pangele nopehe na exulilo. oya popya shi na sha nayo ya ti: “Ohamba yomafimbo ounyuni, ei i he nexulilo.” (1 Tim. 1:17) Omupsalme umwe okwa tumbula Omunamapangelo oo kedina a ti: “[Jehova, NW] Oove ohamba fiyo alushe.” — Eps. 10:16.

2 Mepingafano novanhu, oule wefimbo olo Kalunga ta kala nokupangela owe mu ninga a kale Omupangeli e likalekelwa. Ndele nande ongaho, onghedi yaye yokupangela oyo hai tu ningifa tu kale twa nanenwa kuye. Ohamba imwe oyo ya li ya pangela Israel shonale oule womido 40 oya li ya tanga Kalunga ya ti: “Omwene Oye omunefilonghenda nomunanghenda, oku yadi onheni nouwanghenda munene. Omwene meulu okwe liningila mo olukalwa laye, nouhamba waye otau pangele akushe.” (Eps. 103:8, 19) Jehova ke fi ashike Ohamba yetu, ndele oku li yo Tate yetu womeulu omunahole. Osho otashi pendula omapulo avali taa landula: Jehova okwa ulika ngahelipi kutya oku li Tate yetu? Okwa kala ta ulike ngahelipi kutya oku li Ohamba nokuli nokonima younashibofa womuEden? Omanyamukulo omapulo oo otae ke tu linyengifa  tu ehene popepi elela naJehova notu mu longele nomutima wetu aushe.

NGHEE OHAMBA YAALUSHE YA TOTA PO OUKWANEUMBO WOMESHITO ALISHE

3. Olyelye oshilyo shotete shoukwaneumbo waJehova womeshito alishe, noolyelye vali ve li ‘ovanamati’ vaJehova?

3 Jehova ka li tuu a tunhukwa eshi a shita Omona waye ewifa! Jehova ka li a tala ko omona waye woshiveli e li omupika wongaho. Ponhele yaasho, okwa li e hole Omona nokwa li e mu pa oufembanghenda wokukufa ombinga mokushita oishitwa ikwao ya wanenena. (Kol. 1:15-17) Osho osha kwatela mo okushita ovaengeli omamiliyona. Nonande ovaengeli ove li ‘ovapiya vaye vokuwanifa po ehalo laye,’ Kalunga okwa ulika kutya okwe va fimaneka eshi e va ifana ‘ovanamati.’ Ovaengeli ove li oshitukulwa shoukwaneumbo waJehova womeshito alishe. — Eps. 103:20-22; Job 38:7.

4. Ongahelipi ovanhu va li va ninga oilyo youkwaneumbo waKalunga womeshito alishe?

4 Jehova okwa ka weda mo yo ovanhu moukwaneumbo waye womeshito alishe konima eshi a shita eulu omo mu neenyofi netango nosho yo edu. Konima eshi a wapeka edu nokutula ko oinima aishe oyo ya pumbiwa opo ku kale oinima i na omwenyo, okwa shita omunhu wotete, Adam oo a li oshishitwa sha tongomana moishitwa yaye aishe yokombada yedu, osheshi okwa shitwa oshifeka shaYe. (Gen. 1:26-28) Molwaashi Jehova oye Omushiti, osha yeleka eshi a li a teelela Adam a dulike kuye. E li Xe nomolwolune laye, Jehova okwa li e va lombwela pahole oinima aishe oyo tava dulu okuninga nosho yo osho vehe na okuninga. Omalombwelo a tya ngaho kaa li tae va imbi nande emanguluko lasha. — Lesha Genesis 2:15-17.

5. Omalongekido elipi Kalunga a li a ninga opo ovanhu va yadife edu ve li oludalo laye?

5 Mepingafano neehamba dopanhu dihapu, Jehova oha kala a hafa okupa ovapangelwa vaye oinakuwanifwa, naasho otashi ulike kutya oha kala e lineekela oilyo youkwaneumbo waye. Pashihopaenenwa, okwa li a pa Adam eenghonopangelo dokupangela oishitwa ikwao yokombada yedu, a li nokuli a pewa oshinakuwanifwa shidjuu shokuluka oinamwenyo aishe omadina, ashike osha li oufembanghenda muhafifa. (Gen. 1:26; 2:19, 20) Kalunga ka li a shitila kombada yedu odikilila ovanhu omamiliyona. Ponhele yaasho, okwa li a pa Adam omukwafi ta wapalele nokwa wanenena, omukainhu Eva. (Gen. 2:21, 22) Opo nee okwa pa ovalihomboli ovo oufembanghenda wokuyadifa edu noludalo lavo. Ngeno oinima oya endele nawa, ngeno ovanhu ova enda tava tamununa mo edu alishe fiyo la ninga oparadisa. Ngeno ova kala tava longele Jehova pamwe novaengeli vaye fiyo alushe ve li oilyo youkwaneumbo waye womeshito alishe. Kava li tuu va pewa omhito ya denga mbada, oyo tai ulike kutya Jehova oku li Xe omunahole!

OVANAMATI OVANASHIBOFA OVO VA TWA ONDUBO NOUNAMAPANGELO WAKALUNGA

6. (a) Oilyo youkwaneumbo waKalunga imwe oya li ya hovela ngahelipi oku mu tukulila oshibofa? (b) Nonande opa holoka ounashibofa oo, omolwashike hatu dulu okutya Jehova ka li a kanifa eenghonopangelo daye?

6 Adam naEva ova li va ulika kutya inava hala Jehova a kale Omupangeli wavo. Ova li va hoolola okulandula omonamati waKalunga wopamhepo omunashibofa, Satana. (Gen. 3:1-6) Omolwokuliteeka epangelo laKalunga, oshe va etela vo vene noludalo lavo oilanduliko ngaashi ouyahame, okumona oixuna nosho yo efyo. (Gen. 3:16-19; Rom. 5:12) Eshi Adam naEva ve liteeka Kalunga, Kalunga ka li va li e na ovapangelwa ovaduliki kombada yedu. Ndele mbela osho osha li sha hala okutya Kalunga okwa kanifa eenghonopangelo daye dokupangela edu novanhu ovo ve li ko? Hasho nandenande! Okwa li a ulika eenghonopangelo daye eshi a ta mo moshikunino shaEden ovalihomboli ovo nokutula ovakerubi poshivelo shoshikunino ve va kelele vaha shune mo. (Gen. 3:23, 24) Pefimbo opo tuu opo, Kalunga okwa ulika kutya oku li Xe omunahole eshi a xunganeka kutya elalakano laye lokukala noukwaneumbo womeshito alishe, oo wa fikama po movanamati vopamhepo novanhu ovo ve mu liyandjela, otali ka wanifwa. Okwa li a udaneka kombinga ‘yoludalo’ olo tali ka hanauna po Satana  nokukufa po oilanduliko youlunde oyo ya etifwa kuAdam. — Lesha Genesis 3:15.

7, 8. (a) Eenghalo oda li da naipala shi fike peni pefimbo laNoa? (b) Oshike osho Jehova a li a ninga opo a koshole edu noku xupife ovanhu?

7 Momukokomoko womafelemido a ka landula ko, opa li ovalumenhu ovo va li ovadiinini kuJehova, ngaashi Abel naHenok. Ashike ovanhu vahapu mondjokonona kava li va dimina eenghonopangelo daJehova eli Xe nOhamba yavo. Ombibeli oya ti kutya pefimbo laNoa edu ola li “la yada oukolokoshi.” (Gen. 6:11) Mbela osho osha hala okutya Jehova ka li vali ta dulu okuya olunyala moinima yokombada yedu? Natu ka taleni koumbangi wondjokonona.

8 Diladila kehokololo li na sha naNoa. Jehova okwa li e mu pa omalombwelo okondadalunde noku mu ulikila nghee onguluwato inene, omo ye noukwaneumbo waye va li tava ka xupifilwa, i na okutungwa. Jehova okwa li a ulika yo kutya oku hole ovanhu neenghono eshi a pa Noa oshinakuwanifwa shokukala “omuudifi wouyuki.” (2 Pet. 2:5) Nopehe nomalimbilo, Noa okwa li ta ladipike ovanhu ve lidilulule noku va londwela kombinga yehanauno olo la li poduka. Mupya munene, ovanhu kava li va pwilikina. Noa noukwaneumbo waye ova kala omido omilongo mokati kovanhu ovo va li ve hole elongifo leenghono nova duvila oluhaelo. Ashike Jehova e li Tate omunahole, okwa li a amena nokupunika ovanhu vahetatu ovo va li ovadiinini. Eshi Jehova a eta Eyelu, okwa ulika kutya oku na eenghono e dule ovanhu ovanashibofa novaengeli ovakolokoshi. Osha yela kutya Jehova okwa twikila okuulika eenghonopangelo daye. — Gen. 7:17-24.

Jehova okwa kala alushe ta holola eenghonopangelo daye (Tala okatendo 6, 8, 10, 12, 17)

NGHEE JEHOVA A ULIKA KUTYA OKU LI OHAMBA KONIMA YEYELU

9. Omhito ilipi Jehova a li a pa ovanhu konima yEyelu?

9 Eshi Noa noukwaneumbo waye va dja mo monguluwato ndele te uya kombada yedu la kosholwa nokufudila mo omhepo ya koshoka, nopehe nomalimbililo, omitima davo oda li tadi xunga olupandu eshi Jehova e va fila oshisho nokwe va amena. Nomolwaasho, Noa okwa li a tungila Jehova oaltari divadiva noku mu yambela omaxwikiloyambo. Jehova okwa li a nangeka noupuna Noa noukwaneumbo waye, ndele te va lombwele kutya nava ‘dalafane nokuhapupala ndee tava yadifa edu.’ (Gen. 8:20–9:1) Kungaho, ovanhu ova li ve na natango omhito yokukala va hangana melongelokalunga limwe nokuyadifa edu.

10. (a) Ovanhu ova ka tukululila vali Jehova oshibofa ngahelipi konima yEyelu, nopeni? (b) Jehova okwa li a ninga po shike opo ehalo laye li wanifwe?

10 Eyelu kala li la kufa po okuhawanenena. Onghee hano, ovanhu ova li natango ve na okutwikila okukondjifa enwefemo lii loishitwa oyo ihai monika, Satana neendemoni daye dikolokoshi. Konima ashike yefimbo linini, natango ovanhu ova ka tukululila oshibofa Jehova, oo e li omupangeli muwa. Pashihopaenenwa, opa li omutekulululwa waNoa wedina Nimrod oo a li xwangu mounashibofa waye. Ombibeli oya ti kutya okwa li “omukongo omunaenghono e li omhinge naJehova.” Okwa li a tunga oilando inene, ngaashi Babel, ndele te liningi ohamba “medu laSinear.” (Gen. 10:8-12, yelekanifa no-NW.) Mbela Ohamba yaalushe, Jehova, oya li ya ningila shike omunashibofa oo nosho yo eemhangela daye dokuya moshipala elalakano layo li na sha ‘nokuyadifa edu’? Jehova okwa li a dongakanifa elaka olo ovanhu va li hava popi, opo nee ovapangelwa vaNimrod kava li tava dulu okuudafana. Onghee ova halakana “kombada yedu alishe.” Okudja opo, elongelokalunga loipupulu nosho yo onghedi yopanhu yokupangale oya li ye lihanena apeshe. — Gen. 11:1-9.

11. Jehova okwa ulika ngahelipi kutya okwa li omudiinini kukaume kaye Abraham?

11 Nonande konima yEyelu ovanhu vahapu ova li hava longele oikalunga, opa li vamwe ovo va li ovadiinini kuJehova. Pashihopaenenwa, opa li Abraham, oo a li a lombwelwa a fiye po onghalamwenyo youdjeko yomoshilando shambulavo shedina Ur, ndele ta i a ka kale ha di momatwali oule womido. (Gen. 11:31; Heb. 11:8, 9) Eshi Abraham a li momatwali e nonghalamwenyo yokutembavauka, okwa li ha kala a dingililwa keehamba dopanhu odo da li moilando i na eehotekuma. Ndele Jehova okwa kala ta amene Abraham  noukwaneumbo waye. Omupsalme umwe okwa popya kombinga yanghee Jehova a ulika kutya oku li Tate omunahole mokwaamena Abraham, a ti: “[Kalunga] ina efa nande umwe e va fininike, nokwa li a handukila eehamba omolwavo.” (Eps. 105:13, 14) Molwaashi Jehova okwa li omudiinini kukaume kaye Abraham, okwe mu udanekela a ti: ‘Eehamba tadi ka holoka mwoove.’ — Gen. 17:6; Jas. 2:23.

12. Jehova okwa li a ulikila ngahelipi Ovaegipti kutya oku li omunamapangelo aeshe, naasho osha li sha kuma ngahelipi oshiwana shaye oshihoololwa?

12 Kalunga okwa li yo a lombwela Isak, omona waAbraham, nosho yo Jakob, omutekulu waAbraham, kutya ote ke va nangeka noupuna, naasho osha kwatela mo eudaneko kutya eehamba otadi ka dja mepata lavo. (Gen. 26:3-5; 35:11) Ndele ofimbo inapa holoka eehamba odo, oludalo laJakob ola li la ninga ovapika muEgipti. Mbela osho osha hala okutya Jehova ka li ta ka dula okuwanifa po eudaneko laye ile kutya ka li e na eenghono dokuya olunyala moinima yokombada yedu? Hasho nandenande! Eshi eufwafimbo laJehova lokumangulula Ovaisrael moupika la fika, okwa li a ulikila omukwandudi Farao kutya Ye omunaenghono nomunamapangelo aeshe. Osho osha li she linyengifa Ovaisrael va kale ve na eitavelo muJehova, oo e va xupifa monghedi ikumwifi pEfuta Litilyana. Oo kawa li tuu oumbangi wa yela, oo wa li tau ulike kutya Jehova oye Omupangeli weshito alishe noku li Xe omunahole, oo ha longifa eenghono daye dinene okwaamena oshiwana shaye! — Lesha Exodus 14:13, 14.

JEHOVA OKWA LI OHAMBA YAISRAEL

13, 14. (a) Ovaisrael ova popya shike shi na sha nepangelo laJehova meimbilo lavo? (b) Eudaneko li na sha nouhamba lilipi Kalunga a li a udanekela David?

13 Diva konima eshi Ovaisrael va mangululwa pashikumwifilonga muEgipti, ova li va imbila Jehova eimbilo lefindano. Eimbo olo tali hangwa paife muExodus etukulwa 15 oli na eendjovo edi di li movelishe 18 tadi ti: “Omwene ota ka kala nokupangela fiyo alushe fiyo ndongolondongo.” Okudja opo Jehova okwa li a ninga Ohamba yoshiwana osho shipe. (Deut. 33:5) Ndelenee oshiwana osho kasha li sha wanenwa kokukala shi na Jehova e li Ohamba yasho ihai monika. Konima eshi pa pita omido 400 lwaapo okudja eshi sha mangululwa muEgipti, osha li sha pula Kalunga e shi nangekele po ohamba yopanhu ngaashi oiwana yovapaani yopoishiindalongo. (1 Sam. 8:5) Nonande osha ka kala neehamba dopanhu, Jehova okwa li a twikila okukala Ohamba yasho, naasho osha li shi liwetikile pefimbo lokupangela kwaDavid, oo a li ohamba yaIsrael yopanhu onhivali.

 14 Eshi David a li a eta oshikefa shehangano muJerusalem, Ovalevi ova li va imba eimbilohambelelo pomhito oyo ihafifa, olo li na eendjovo edi dididilikwedi tadi hangwa mo 1 Omafimbo 16:31, tadi ti: “Nava tye mokati koiwana: Omwene Oye ohamba [“okwa ninga Ohamba,” NW].” Otashi dulika tu lipule kutya, ‘Ngeenge Jehova oku li Ohamba yaalushe, omeityo lilipi a li a ninga Ohamba vali pefimbo olo?’ Ngeenge Jehova ta holola eenghopangelo daye pefimbo lonhumba ile monghedi yonhumba opo a ungaunge nonghalo yonhumba ile a nangeka po umwe e li omukalelipo waye, kungaho otashi holola kutya Jehova oku li Ohamba. Jehova okwa li ta ka ninga yo Ohamba meityo olo konahiya elela. Fimbo David ina fya, Jehova okwa li a udaneka kutya ouhamba waDavid kau na fiku u xule po, eshi a ti: “Ohandi ka lenga oludalo loye tali di molutu loye ndee handi ka pameka ouhamba walo.” (2 Sam. 7:12, 13) Metwokumwe neudaneko olo, eshi pa pita omido di dulife 1 000, “oludalo” laDavid ola ka holoka. Olyelye a li oludalo olo, nonaini a li ta ka ninga Ohamba?

JEHOVA OKWA NANGEKA PO OHAMBA IPE

15, 16. Jesus okwa li a vaekwa naini e li Ohamba yokonahiya, nokwa li a ninga omalongekido elipi fimbo a li kombada yedu e na sha nokupangela kwaye?

15 Mo 29 O.P., Johannes Omuninginifi okwa li a hovela okuudifa kutya “ouhamba weulu we uya popepi.” (Mat. 3:2) Eshi Jesus a ninginifwa kuJohannes, okwa li a vaekwa e li Messias omuudanekwa nosho yo Ohamba yomonakwiiwa yOuhamba waKalunga. Jehova okwa li a ulika kutya oku hole Jesus eshi a ti: “Ou Omona wange omuholike, onde mu hokwa.” — Mat. 3:17.

16 Jesus okwa li ha fimanekifa Xe moukalele waye mokuudifa kombinga yOuhamba waKalunga. (Joh. 17:4; Luk. 4:43) Okwa li a honga nokuli ovahongwa vaye va kale hava ilikana Ouhamba oo u uye. (Mat. 6:10) E li Ohamba yokonahiya, Jesus okwa li a lombwela ovatondi vaye a ti: “Ouhamba waKalunga ou li mokati keni.” (Luk. 17:21, NW) Lwanima, okwa li a ninga ‘ehangano li na sha nouhamba’ novashikuli vaye moufiku oo wa tetekela okufya kwaye. Kungaho, okwa pa vamwe vomovahongwa vaye ovadiinini etimaumbwile loku ka pangela pamwe naye mOuhamba waKalunga ve li eehamba. — Lesha Lukas 22:28-30.

17. Jesus okwa li a pewa eenghonopangelo da ngabekwa dilipi mefelemudo lotete, nokwa li e na okuteelela shike?

17 Jesus okwa li ta ka hovela naini okupangela e li Ohamba yOuhamba waKalunga? Osho kasha li sha ningwa diva konima yefyo laye. Jesus okwa li a dipawa pefimbo lomutenya novahongwa vaye ova li ve lihana. (Joh. 16:32) Ndele nande ongaho, Jehova okwa twikila ngaashi nale okuholola eenghonopangelo daye. Mefiku etitatu, okwa nyumuna Omona waye. Mefiku lOpentekoste yomo 33 O.P., Jesus okwa li a dika po ouhamba wopamhepo wokupangela eongalo lopaKriste lovamwaxe ovavaekwa. (Kol. 1:13) Ashike Jesus okwa li a teelela natango okupewa eenghonopangelo dokupangela kombada yedu alishe e li ‘oludalo’ la udanekwa. Jehova okwa li a lombwela Omona waye a ti: “Kala omutumba kolulyo lange, fiyo handi ningi ovatondi voye oshilyatelo shokeemhadi doye.” — Eps. 110:1.

LONGELA OHAMBA YAALUSHE

18, 19. Osho twe lihonga moshitukulwa eshi otashi tu linyengifa tu ninge shike, noshike hatu ke lihonga moshitukulwa tashi landula?

18 Oule womido omayovi, ounamapangelo waJehova owa kala tau shongwa meulu nokombada yedu. Ndele Jehova ine liteeka ounamapangelo waye; okwa twikila okuyukifa oinima e li omupangeli weshito alishe. E li Xe omunahole, okwa kala ta amene nokufila oshisho ovapiya vaye ovadiinini ngaashi Noa, Abraham naDavid. Mbela osho itashi ku linyengifa u kale ho dulika kOhamba yetu nokweehena popepi elela nayo?

19 Otashi dulika tu lipule kutya: Jehova okwa ninga ngahelipi Ohamba pefimbo letu? Ongahelipi hatu dulu okuulika kutya otu li ovapangelwa vOuhamba waye ovadiinini nokuninga ovana vaye va wanenena vomoukwaneumbo waye womeshito alishe? Okwiilikana kutya Ouhamba waKalunga nau uye osha hala okutya ngahelipi? Omapulo oo otaa ka nyamukulwa moshitukulwa tashi landula.