Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) NOVEMBA 2013

Ovafita va-7 novakulunhu va-8 otava faneke shike kunena?

Ovafita va-7 novakulunhu va-8 otava faneke shike kunena?

“Fye ohatu tula po ovafita va-7 novakulunhu va-8 vomovanhu.” — MIKA 5:4.

1. Omolwashike omhangela yohamba yaSiria noyaIsrael ya li ya ponya?

PEFIMBO lonhumba pokati komudo 762 K.O.P. nosho yo 759 K.O.P., ohamba yOvaisrael noyOvasiria oda li da hala okulwifa ouhamba waJuda. Omolwashike mbela? Oda li da hala okukwata ko Jerusalem nokuumba ko koshipundi ohamba Ahas, do di tule ko ohamba imwe, oyo tashi dulika ya li ihe fi yomepata lohamba David. (Jes. 7:5, 6) Ohamba yaIsrael oi na okukala ya li i shi shii nawa kutya Jehova okwa ti kutya umwe womoludalo laDavid oye ta ka kala kolukalwapangelo laYe fiyo alushe, neendjovo daKalunga ohadi wanifwa alushe. — Jos. 23:14; 2 Sam. 7:16.

2-4. Yelifa nghee Jesaja 7:14, 16 a li a wanifwa (a) mefelemudo eti-8 K.O.P. (b) mefelemudo lotete O.P.

2 Potete, etangakwaita laSiria nolaIsrael oo a li e limanga kumwe okwa li taa monika a fa taa ka findana moita. Ovakwaita ovaladi vaAhas 120 000 ova li va dipawa molwoodi ashike limwe alike. Maaseja, “omona wohamba,” naye okwa li a dipawa. (2 Omaf. 28:6, 7) Ashike Jehova okwa li e wete ashishe osho tashi ningwa. Okwa li a dimbuluka osho a li a udanekela David, nomolwaasho okwa li a tuma omuprofeti Jesaja nokwe mu lombwela etumwalaka ta li tu omukumo.

3 Jesaja okwa ti: “Tala, okakadona otaka ka ninga kafimba, ndee taka dala omona okamati, ndee te ka luku Immanuel. . . . Omumati ou fimbo ina shiiva okweefa owii nokuhoolola ouwa, edu olo leehamba odo mbali we di tila [yaSiria noyaIsrael], otali ningi omaputu.” (Jes. 7:14, 16) Oshitukulwa shotete shexunganeko olo luhapu ohashi yukifwa kokudalwa kwaMessias, naasho oshi li mondjila. (Mat. 1:23) Ndele molwaashi ‘eehamba odo mbali,’ yaSiria noyaIsrael, inadi ka ponokela vali Juda mefelemudo lotete, exunganeko li na sha naImmanuel oli na okukala la li la wanifwa oshikando shotete pefimbo laJesaja.

 4 Diva konima eshi Jesaja a ninga eshiivifo olo lididilikwedi, omukulukadi waye okwa li a ninga oufimba ndele ta dala okaana okamati nokwe ka luka Maher-Saalal-Has-Bas. Oshi na oupu okaana oko oko ka li “Immanuel” oo a li a xunganekwa kuJesaja. * Pefimbo lOmbibeli, okaana okwa li haka lukwa edina limwe eshi opo ka dalwa, tashi dulika shi li edimbulukifo loshiningwanima she likalekelwa, ashike ovadali novapambele vako ohave ka ifana edina limwe vali. (2 Sam. 12:24, 25) Kape na oumbangi oo tau ulike kutya Jesus okwa li a ifanwa edina olo Immanuel. — Lesha Jesaja 7:14; 8:3, 4.

5. Ohamba Ahas oya li ya ninga etokolo lilipi lihe li pandunge?

5 Ofimbo oshiwana shaIsrael noshaSiria ya li ya hala okuponokela Juda, oshiwana shimwe vali, osho sha li shi hole omalwoodi, nasho osha li sha hala okuponokela oshitukulwa osho. Oshiwana osho oshOvaassiria, osho sha li pokuninga epangelo enaenghono mounyuni. Jesaja 8:3, 4 okwa ti kutya Assiria ota ka ya ‘noupuna waDamaskus noitinhwa yaSamaria’ ofimbo ina ponokela ouhamba wokolukadi waJuda. Ahas okwa li e na ngeno okukala e lineekela Eendjovo daKalunga odo e mu lombwela okupitila muJesaja, ashike omolwokuheneitavelo kwaye, okwa li a ninga ehangano lihe li pandunge nOvaassiria, naasho osha ka ningifa Ovajuda va ka hepekwe kuvo. (2 Eeh. 16:7-10) Ahas oo a li omufita waJuda ka li tuu a nyematekwa! Otashi dulika tu lipule kutya, ‘Ngeenge handi ningi omatokolo a fimana, mbela ohandi kala ngoo nde lineekela muKalunga ile omovanhu?’ — Omayel. 3:5, 6.

OMUFITA MUPE A KATUKA MONGHEDI I LILI

6. Hokolola eyooloko olo la li pokati kepangelo laAhas nolaHiskia.

6 Ahas okwa ka fya mo 746 K.O.P. nomonamati waye Hiskia okwa li a ninga ohamba ponhele yaye. Pefimbo opo ouhamba waJuda owa li wa hepa painiwe novanhu kava li ve na oupamhepo muwa. Ndele mbela eshi ohamba oyo inyasha ya ya koshipundi oya li ya hala tetetete okuninga shike? Mbela okuyambula po eliko laJuda olo la li la wa pedu? Ahowe. Hiskia okwa li omulumenhu e na oupamhepo muwa, oo a wana shili okulifa oshiwana shavo. Tete okwa li a tungulula elongelokalunga lashili nokwa li a kwafela oshiwana oshitangalali shi pameke vali ekwatafano lasho naJehova. Eshi Hiskia a uda ko kutya Kalunga okwa hala a ninge shike, okwa li a katuka diva eenghatu. Ine tu tulila po tuu oshihopaenenwa shiwa! — 2 Omaf. 29:1-19.

7. Omolwashike Ovalevi va li va pumbwa eyambidido lohamba oyo ipe?

7 Ovalevi ova li ve na oshinakuwanifwa sha kwata moiti shokukwafela ovanhu va hovele okulongela vali Jehova. Onghee hano, Hiskia okwa li a ongala navo opo e va shilipaleke kutya ote ke va yambidida. Kala nee ngeno wa fa u wete Ovalevi ovadiinini ovo va li pokwoongala oko, otashi dulika va li tava pololoka omahodi kehafo eshi va uda ohamba yavo tai va shilipaleke tai ti: “Omwene e mu hoolola mu kale ofika koshipala shaye, mu mu longele.” (2 Omaf. 29:11) Osha yela kutya, Ovalevi ova li va pewa oshinakuwanifwa shokuxumifa komesho elongelokalunga la koshoka.

8. Eenghatu dilipi vali Hiskia a li a katuka odo da kwafela oshiwana shi longele Jehova, noshidjemo osha li shike?

8 Hiskia okwa li a shiva Ovajuda novaIsrael aveshe va ka dane oshivilo shinene shOpaasa osho sha li sha shikulwa kOshivilo shOmingome Dihe Na Onhafi shomafiku aheyali. Oshiwana osha li sha hafela oshivilo osho nosha li she shi dana fiyo omafiku vali aheyali a wedwa po. Ombibeli oya ti: “Ndele muJerusalem omwa li ehafo linene. Osheshi okomafiku enya aSalomo yaDavid, ohamba yaIsrael, oshinima sha tya ngaha inashi ningwa muJerusalem.” (2 Omaf. 30:25, 26) Oshivilo osho kasha li tuu sha twa  ovanhu aveshe omukumo! MOmafimbo omativali 31:1, omwa popiwa kutya: “Ashishe osho eshi sha xula po, . . . va tataula po omiti neengudimanya, omalupwelele ve a ka po, noikulundu noiyambelo.” Kungaho, oshiwana shOvajuda osha li sha alukila kuJehova. Osho osha li she shi kwafela shi lilongekidile omaupyakadi oo a li tae ke shi hanga.

OHAMBA TAI LILONGEKIDILE OMAUPYAKADI

9. (a) Omhangela yOvaisrael oya li ya iwa ngahelipi moshipala? (b) Potete, Sanherib okwa li a pondola shi fike peni muJuda?

9 Ngaashi Jesaja a popya, Ovaassiria ova li va finda ouhamba wokolundume waIsrael, nokutwala ovanhu moukwatwa. Nokungaho, ova li va xulifa po omhangela yOvaisrael yokutula ohamba imwe kolukalwapangelo laDavid oyo ihe fi yomepata laye. Ndele ongahelipi shi na sha nomhangela yOvaassiria? Ovaassiria ova li va hala oku ka ponokela Juda. Ombibeli oya ti: “Momudo omuti-14 wohamba Hiskia, Sanherib, ohamba yaAssiria, ya homona oilando aishe i neehotekuma yomuJuda, ndele ye i hanauna po.” Otaku tiwa kutya Sanherib okwa li a hanauna po oilando yOvajuda 46 aishe kumwe. Diladila nee kutya ngeno owa kala u udite ngahelipi ngeno owa li ho kala muJerusalem pefimbo opo. Omatangakwaita Ovaassiria okwa kala taa hanauna po oilando yaJuda ya shikulafana. — 2 Eeh. 18:13.   

10. Omolwashike Hiskia tashi dulika a li a tuwa omukumo kuMika 5:4, 5?

10 Hiskia okwa li e wete oupyakadi oo u li poku va hanga, ndele ponhele yokungwangwana noku ka konga ekwafo koshiwana shonhumba shovapaani ngaashi xe omushunimonima, Ahas, a li a ninga, Hiskia okwa kala e lineekela Jehova. (2 Omaf. 28:20, 21) Otashi dulika a li e shii eendjovo domuprofeti wopefimbo laye Mika oo a li a xunganeka kombinga yaAssiria ta ti: “Fye ohatu tula po ovafita va-7 novakulunhu va-8 vomovanhu. Ndele edu laAssur [Assiria] vo otave li lifa neongamukonda.” (Mika 5:4, 5) Eendjovo odo da nwefwa mo odi na okukala da li da twa Hiskia omukumo, molwaashi otadi ulike kutya otapa ka holoka etangakwaita inali monika nande onale li kondjife Assiria, nonokutya ovakwanyanya ovo lwanima otava ka findwa.

11. Onaini exunganeko li na sha novafita va-7 novakulunhu va-8 tali ka wanifwa ewanifo la tongomana?

11 Exunganeko li na sha novafita va-7 novakulunhu va-8 (“omalenga,” pa-The New English  Bible) ola li tali ka wanifwa monghedi ya tongomana konima yomido dihapu okudja pokudalwa kwaJesus, ‘omupangeli waIsrael, oo ehovelo laye loshitonale.’ (Lesha Mika 4:14; 5:1.) Osha yela kutya osho otashi ka ningwa pefimbo eshi Assiria shokunena tashi ka ponokela ovapiya vaJehova. Ndele mbela etangakwaita lilipi Jehova ta ka longifa okupitila mOmona waye oo ta pangele, opo li hanaune po omutondi oo mutilifa? Enyamukulo ohatu ke li mona nale moshitukulwa eshi. Ndele tete natu ka konakoneni osho hatu lihongo meenghatu odo Hiskia a li a katuka eshi va li pokuponokelwa ketangakwaita laAssiria.

HISKIA OKWA LI A KATUKA EENGHATU DOPANDUNGE

12. Eenghatu dilipi Hiskia navakwao vamwe va li va katuka opo va amene oshiwana shaKalunga?

12 Ngeenge tu na oupyakadi, Jehova oha kala alushe a hala oku tu ningila osho itatu dulu okuninga fye vene, ashike okwa teelela tu ninge ngaashi hatu dulu. Hiskia okwa li a kundafana ‘novakulunhu novaladi vaye’ nova li va udafana va ‘fitike eefifiya odo di li pondje yoshilando. Nokwe linyatipaleka nokwa tungulula ohotekuma ya li ya ngumaunwa po, ndee ta tungu kuyo eeshungongulu. Nokwa tunga yo ohotekuma onhivali pondje. Ndele ta hambulifa omaonga noikelelifo.’ (2 Omaf. 32:3-5) Opo Jehova a amene noku file oshisho oshiwana shaye shopefimbo opo, okwa li a longifa ovalumenhu ovaladi ngaashi, Hiskia nomalenga aye nosho yo ovaprofeti ovo va li ve na oupamhepo wa kola.

13. Onghatu ya fimanenena ilipi Hiskia a li a katuka opo a kwafele oshiwana shi lilongekidile eponokelo olo sha li sha taalela? Shi yelifa.

13 Oshinima shimwe vali osho Hiskia a li a ninga osha li nokuli sha fimanenena shi dulife okufitika eefifiya domeva ile okupameka ekuma loshilando. Molwaashi Hiskia okwa li omufita muwa, okwa li a ongela oshiwana nokwe shi twa omukumo pamhepo neendjovo edi tadi ti: “Inamu tila ndele inamu haluka molwohamba yaAssiria . . . , osheshi ava ve li pufye ovahapu, ve dule venya ve li puyo. Puyo ope nokwooko kwombelela, ndelenee pufye ope nOmwene Kalunga ketu te tu kwafa mokulwa moita yetu.” Kasha li tuu sha pameka eitavelo loshiwana eshi Hiskia a li e shi dimbulukifa kutya Jehova ote ke shi kondjela! Eshi Ovajuda ve shi uda, ‘ove lineekela eendjovo daHiskia, ohamba yaJuda.’ Didilika kutya “eendjovo daHiskia” odo da li da kwafela oshiwana shiha teke omukumo. Hiskia nomalenga aye novalumenhu ovaladi nosho yo omuprofeti Mika naJesaja, ova li va ulika kutya ove li ovafita vawa ngaashi Jehova a li a xunganeka okupitila momuprofeti waye. — 2 Omaf. 32:7, 8; lesha Mika 5:4, 5.

Eendjovo daHiskia oda li da kwafela oshiwana shiha teke omukumo (Tala okatendo 12, 13)

14. Rabsake okwa li a popya shike, noshiwana osha li she linyenga ngahelipi?

14 Ohamba yaAssiria oya li ya onga onhanda puLakis, osho sha li kouningininolukadi waJerusalem. Oya li ya tuma ovatumwa vatatu okudja konhanda oyo va ye kuJerusalem va ka lombwele oshiwana shi liyandje. Omupopikalelipo wayo oo a li ha ifanwa edinafimaneko Rabsake okwa li ta longifa eenghedi domonanguwi di lili noku lili. Okwa li a popya mOshiheberi ta ladipike oshiwana shi kengelele ohamba yasho noshi liyandje kOvaassiria, noku va udanekela kutya ote ke va twala kedu oko tava ka hafela onghalamwenyo. (Lesha 2 Eehamba 18:31, 32.) Rabsake okwa ti yo vali kutya oikalunga yoiwana kaya li ya dula okwaamena ovalongeli vayo, nonokutya Jehova naye ita dulu okuxupifa Ovajuda momake Ovaassiria. Ashike ova li va katuka pandunge mokuhanyamukula omitotolombo odo, naasho osho hashi ningwa luhapu kovapiya vaJehova vokunena. — Lesha 2 Eehamba 18:35, 36.

15. Ovakalimo vomuJerusalem ova li va teelelwa va ninge shike, nongahelipi Jehova a li e va xupifa?

15 Oshi shii okuudiwa ko eshi Hiskia a li a handuka, ndele ponhele yoku ka konga ekwafo kepangelo lonhumba, okwa li a pula ekwafo kuJehova okupitila momuprofeti Jesaja. Jesaja okwa  lombwela Hiskia ta ti: “Yo [ohamba Sanherib] itai uya mo moshilando eshi, ndele itai umbile mo oshikuti.” (2 Eeh. 19:32) Ovakalimo vomuJerusalem ova li ashike va pumbwa okukala va nyatipala. Jehova oye a li ta ka kondjela Ovajuda, naasho osho a li a ninga. Ombibeli oya ti: “Ndele oufiku tuu winya omwengeli wOmwene e uya nokwa dipaa monhanda yOvaassiria ovalumenhu 185,000.” (2 Eeh. 19:35) Ovajuda kava li va xupifwa molwaashi Hiskia a fitika eefifiya domeva domoshilando ile molwaashi a tunga ekuma lasho, ndele Kalunga oye a li e va xupifa.

OILIHONGOMWA YOKUNENA

16. Oolyelye kunena tava fanekwa (a) kovakalimo vomuJerusalem (b) kuAssiria (c) kovafita va-7 nokovakulunhu va-8?

16 Ewanifo la tongomana lexunganeko li na sha novafita va-7 novakulunhu va-8 otali ka ningwa pefimbo letu. Ovakalimo vomuJerusalem shonale ova li va ponokelwa kOvaassiria. Mafiku, oshiwana shaJehova osho tashi monika sha fa shihe li meameno otashi ka ponokelwa kuAssiria shokunena, nelalakano opo e shi xulife po. Omishangwa oda popya shi na sha neponokelo olo nosho yo eponokelo ‘laGog yaMagog,’ eponokelo ‘lohamba yokonoorde’ nosho yo ‘leehamba dopedu.’ (Hes. 38:2, 10-13; Dan. 11:40, 44, 45; Eh. 17:14; 19:19) Mbela osho otashi ulike komaponokelo a yoolokafana? Hasho lela. Ombibeli otai dulu okulongifa omautumbulilo a yoolokafana okuulika keponokelo limwe. Ngaashi Mika a xunganeka, mbela Jehova ota ka longifa etangakwaita lilipi opo a lwife omutondi oo omukwanyanya, Assiria? Ololo itatu fekele noupu, “ovafita va-7 novakulunhu va-8.” (Mika 5:4) Ovafita novakulunhu (ile “omalenga,” NEB) ovo ve li metangakwaita olo otava ulike kovakulunhuongalo. (1 Pet. 5:2) Kunena, Jehova okwa nangeka po ovalumenhu vahapu ovadiinini va life eedi daye di na ondilo, nova pameke oshiwana shaye eshi sha teelela eponokelo laAssiria shokunena. * Exunganeko laMika ola ti kutya “edu laAssur vo otave li lifa neongamukonda.” (Mika 5:5) Onghee hano, shimwe ‘shomoilwifo yavo’ osho ‘eongamukonda lomhepo,’ Eendjovo daKalunga. — 2 Kor. 10:4; Ef. 6:17.

17. Oilihongomwa ine ilipi ovakulunhuongalo tave lihongo mehokololo olo twa dja nokukundafana?

17 Ovakulunhuongalo ovo tava lesha oshitukulwa eshi otave lihongo oilihongomwa ya fimana okudja mehokololo olo twa kundafana metetekelo, ngaashi: (1) Onghatu ya fimanenena oyo tamu dulu okukatuka opo mu lilongekidile eponokelo laAssiria shokunena oyo okupameka eitavelo leni muKalunga nokukwafela ovamwaxo navo va ninge sha faafana. (2) Eshi Assiria shokunena ta ka ponoka, ovakulunhuongalo ove na okukala va tomhwa filufilu kutya Jehova ote ke tu xupifa. (3) Pefimbo opo, elombwelo tali xupifa eemwenyo olo hatu ka pewa kehangano laJehova otashi dulika pataleko lopanhu li monike la fa itali longo. Atusheni otu na okukala twe lilongekida okudulika kelombwelo keshe olo hatu pewa, kutya nee ohatu tu kumwe nalo ile hasho. (4) Ngeenge ope na oo e lineekela mehongo lomounyuni, momaliko ile momahangano opanhu, paife olo efimbo lokulundulula omadiladilo aye. Ovakulunhuongalo ove na okukala ve lilongekida okukwafela keshe oo e na eitavelo tali tengaunga.

18. Ongahelipi okudilonga kehokololo olo twa kundafana metetekelo otaku dulu oku ke tu kwafela monakwiiwa?

18 Efimbo otali ke uya eshi ovapiya vaKalunga vokunena tava ka monika va fa vehe nekwafo lasha ngaashi Ovajuda ovo va li va kondekelwa muJerusalem pefimbo laHiskia. Pefimbo opo, eendjovo daHiskia otadi dulu oku ke tu pameka atusheni. Natu dimbuluke kutya, povatondi vetu ope “nokwooko kwombelela, ndelenee pufye ope nOmwene Kalunga ketu te tu kwafa mokulwa moita yetu”! — 2 Omaf. 32:8.

^ okat. 4 Oshitya shOshiheberi osho sha tolokwa “okakadona” muJesaja 7:14 otashi dulu okuyukifwa komukainhu a hombolwa ile kokakadona ko venevene. Onghee hano, oshitya osho osha li sha longifwa okuulika komukulukadi waJesaja nosho yo kokakadona Okajuda Maria.

^ okat. 16 Onomola onhi-7 ohai longifwa luhapu mOmishangwa okuulika koshinima she lixwa po. Onomola onhi-8 (oyo i dule 7 naimwe) omafimbo amwe ohai faneke oshinima sha henena.