Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) NOVEMBA 2013

Dulikeni kovafita ovo va tulwa po kuJehova

Dulikeni kovafita ovo va tulwa po kuJehova

“Shikuleni ovakwatelikomesho veni, nye mu dulike kuvo, osheshi ovo ohava pashukile eemwenyo deni.” — HEB. 13:17.

1, 2. Omolwashike shididilikwedi eshi Jehova e lifaafanifa nomufita?

JEHOVA okwe lifaafanifa nomufita. (Hes. 34:11-14) Osho oshididilikwedi molwaashi otashi tu kwafele tu ude ko kutya okwa tya ngahelipi. Omufita omunahole oha kala e udite e na oshinakuwanifwa shokuxupifa nokufila oshisho eedi daye. Ohe di twala oko ku na oulifilo muwa naako ku na omeva (Eps. 23:1, 2); ohe di pashukile omutenya noufiku (Luk. 2:8); ohe di amene koilyani (1 Sam. 17:34, 35); oha humbata oudjona vado; (Jes. 40:11); noha kongo odo da kana nokufila oshisho odo da mona oiponga. — Hes. 34:16.

2 Molwaashi oshiwana shaJehova shopefimbo lonale osha li hashi kala unene moitukulwa yomaulifilo noshi na omapya, osha li shi udite ko kutya omolwashike Jehova Kalunga e lifaafanifa nomufita omunahole. Osha li shi shii kutya opo eedi di xupe oda li da pumbwa okufilwa oshisho nokupewa elitulemo. Ovanhu navo ova pumbwa okuningilwa sha faafana, meityo lopamhepo. (Mark. 6:34) Ngeenge ovanhu itava filwa oshisho nawa pamhepo noitava wilikwa nawa ohava mono oixuna. Otava ka ninga oihakanwa yenwefemo lii notava ka kala ve li mehalakano, ngaashi ashike “eedi dihe na omufita” hadi kala mehalakano. (1 Eeh. 22:17) Ndele Jehova oha file oshisho oshiwana shaye.

3. Oshike hatu ka kundafana moshitukulwa eshi?

3 Okufaafanifwa kwaJehova nomufita oku na eityo fiyo okunena. Natango oha file oshisho oshiwana shaye osho sha fa eedi. Natu ka taleni kunghee ha wilike nokufila oshisho eedi daye kunena. Ohatu ka kundafana yo nghee eedi di na okutala ko efiloshisho nohole oyo Jehova he di ulikile.

OMUFITA MUWA OKWA NANGEKA PO OVAFITA VA YAKULE KOSHI YEWILIKO LAYE

4. Jesus ota dana onghandangala ilipi mokufila oshisho eedi daJehova?

4 Jehova okwa nangeka po Jesus e li Omutwe weongalo lopaKriste. (Ef. 1:22, 23) E li ‘omufita muwa,’ Jesus oha  ulike okunakonasha, omalalakano nosho yo omaukwatya a fa aXe. Nokuli ‘nomwenyo waye okwe u yandjela eedi.’ (Joh. 10:11, 15) Ekuliloyambo laKristus kali fi tuu enangeko noupuna kovanhu! (Mat. 20:28) Onghee hano, oshi li elalakano laJehova opo “keshe ou te mu itavele [Jesus] a ha kane, ndelenee a kale e nomwenyo waalushe.” — Joh. 3:16.

5, 6. (a) Jesus okwa nangeka po oolyelye va file oshisho eedi daye, noshike osho eedi di na okuninga opo di mone ouwa mefiloshisho laye? (b) Etomheno la fimanenena lilipi tu na lokukala twa halelela okudulika kovakulunhuongalo?

5 Eedi ohadi linyenge ngahelipi kewiliko lOmufita muwa, Jesus Kristus? Jesus okwa ti: “Eedi dange ohadi udu ondaka yange, naame ondi di shii, ndele odo tadi shikula nge.” (Joh. 10:27) Okuuda ile okupwilikina kondaka yOmufita muwa otashi ti okushikula ewiliko laye moinima aishe. Osho osha kwatela mo okulongela kumwe novafita vopamhepo ovo a nangeka po notava longo koshi yewiliko laye. Jesus okwa li a ulika kutya ovayapostoli novahongwa vaye otava ka twikila noshilonga osho a hovela. Ova li tava ka “longa” ‘nokulifa eedi’ daJesus. (Mat. 28:20; lesha Johannes 21:15-17.) Eshi onghundana iwa ya enda tai tandavele novahongwa tava hapupala, Jesus okwa li a ninga elongekido opo Ovakriste va pyokoka va life omaongalo. — Ef. 4:11, 12.

6 Eshi omuyapostoli Paulus a li ta popi novapashukili vomeongalo lomefelemudo lotete muEfeso, okwe va lombwela kutya omhepo iyapuki oye va nangeka po va ‘life eongalo laKalunga.’ (Oil. 20:28) Osho osha faafana novapashukili Ovakriste vokunena molwaashi navo ova nangekwa po eshi va wanifa po oiteelelwa yOmishangwa odo da nwefwa mo komhepo iyapuki. Onghee hano, okudulika kovapashukili Ovakriste otashi ulike kutya otwa fimaneka Jehova naJesus, ovo ve li Ovafita ovakulunhu. (Luk. 10:16) Nopehe na omalimbililo, olo olo etomheno la fimanenena lokukala twa halelela okudulika kovakulunhuongalo. Ashike ope na yo omatomheno amwe kutya omolwashike twa hala okudulika kewiliko lavo.

7. Ongahelipi ovakulunhuongalo tava dulu oku ku kwafela u kale u na ekwatafano liwa naJehova?

7 Eladipiko newiliko olo ovakulunhuongalo hava yandje kovamwaxe ohali kala alushe la kanghamena kwaasho Ombibeli tai ti. Osho ihave shi ningi opo ngeno va findile ovamwaxe omataleko avo e na sha nonghedi yokukalamwenyo oyo ve na okukala ve na. (2 Kor. 1:24) Ndele ponhele yaasho, ova hala okupa Ovakriste vakwao ewiliko lopamishangwa opo ve va kwafele va ninge omatokolo mawa nova xumife komesho ombili nelandulafano meongalo. (1 Kor. 14:33, 40) Ovakulunhuongalo “ohava pashukile eemwenyo” meityo olo kutya ova halelela okukwafela oshilyo keshe sheongalo shi kaleke po ekwatafano lasho naJehova. Onghee hano, ove na okukala hava yandje ekwafo meendelelo ngeenge ova didilike kutya omumwaxe oku li pokunyona ile a “nyona” nale nokuli. (Gal. 6:1, 2; Jud. 22) Mbela oo kae fi omatomheno mawa okukala hatu dulika ‘kovakwatelikomesho’? — Lesha Ovaheberi 13:17.

8. Ovakulunhuongalo ohava amene ngahelipi oufita waKalunga?

8 Omuyapostoli Paulus, oo naye a li omufita wopamhepo, okwa li a shangela ovamwaxe vomuKolossi ta ti: “Lungameni, pa ha kale umwe te mu yuulifa ounongo wovanhu nomapukifo ongaho, te likwatelele meenghedinghulu nomoihovelanghono younyuni, hamuKristus.” (Kol. 2:8) Elondwelo olo otali tu pe etomheno limwe vali kutya omolwashike tu na okudulika komayele opamishangwa oo hatu pewa kovakulunhuongalo. Ohava amene oufita mokukwafela ovamwaxe va henuke keshe oo ta kendabala okunyona po eitavelo lavo. Omuyapostoli Petrus okwa londwela shi na sha ‘novaprofeti ovanaipupulu’ nosho yo “ovalongi ovanaipupulu” ovo hava kendabala ‘okuhongaula eemwenyo dovatengauki’ opo va nyone. (2 Pet.  2:1, 14) Ovakulunhuongalo vokunena navo ove na okuyandja omalondwelo a faafana opo sha pumbiwa. Ove li ovalumenhu Ovakriste va pyokoka molwaashi ove na owino monghalamwenyo. Kakele kaasho, ofimbo inava nangekwa po, ohava ulike kutya ove na eudeko la yela lOmishangwa nonokutya ova wana okuhonga oinima oyo tai tungu. (1 Tim. 3:2; Tit. 1:9) Owino wavo, ondjele nosho yo ounongo wavo oo wa kanghamena kOmbibeli ohai va kwafele va wilike nawa oufita.

Ngaashi ashike omufita ha amene eedi daye, ovakulunhuongalo ohava amene eedi odo ve lineekelelwa (Tala okatendo 8)

OMUFITA MUWA OHA PALULA NOHA AMENE EEDI

9. Ongahelipi Jesus ha wilike nokupalula eongalo lopaKriste kunena?

9 Jehova oha longekidile oumwainafana womounyuni aushe eendja dihapu dopamhepo okupitila mehangano laye. Ohatu pewa yo omayele mahapu okupitila moishangomwa yetu. Kakele kaasho, omafimbo amwe ehangano ohali yandje omayele odikilila kovakulunhuongalo, kutya nee okupitila meenhumwafo ile omomalombwelo oo haa yandjwa kovapashukili ovaendi. Monghedi ya tya ngaho, eedi ohadi pewa omalombwelo a yela.

10. Ovafita vopamhepo ove na oshinakuwanifwa shilipi shi na sha naavo ve litongola ko koufita?

10 Ovapashukili ove na oshinakuwanifwa shokwaamena nokufila oshisho oukolele wopamhepo woilyo yeongalo, naunene tuu ovo ve liyahameka ile ovo tava vele pamhepo. (Lesha Jakob 5:14, 15.) Vamwe vomoohandimwe va tya ngaho otashi dulika ve litongola ko koufita nova efa okukufa ombinga momalipyakidilo  opaKriste. Ngeenge osho shi li ngaho, mbela omukulunhuongalo omunefiloshisho ita ka ninga ngaashi ta dulu opo a ka konge odi keshe oyo ya kana noku i ladipika i alukile koufita, sha hala okutya, keongalo? Osha yela kutya osho ta ka ninga. Jesus okwa yelifa ta ti: “Kashi fi ehalo laXo yeni meulu, pa kane nande okamwe komuava vanini.” — Mat. 18:12-14.

OTU NA OKUTALA KO NGAHELIPI OMAUNGHUNDI OVAKULUNHUONGALO?

11. Omolwashike vamwe tashi dulika va mone shidjuu okushikula ewiliko lovakulunhuongalo?

11 Jehova naJesus ove li Ovafita va wanenena. Ashike ovafita vopambelela ovo ve lineekelelwa oshinakuwanifwa shokufila oshisho omaongalo inava wanenena. Oushili wa tya ngaho otashi dulika u shi ninge shidjuu kuvamwe okushikula ewiliko lovakulunhuongalo. Oohandimwe va tya ngaho otashi dulika va tomhafane tava ti: ‘Ovakulunhuongalo navo inava wanenena ngaashi ashike fye. Omolwashike tu na okupwilikina komayele avo?’ Oshoshili kutya ovakulunhuongalo inava wanenena. Ashike otwa pumbwa okukala tu na etaleko la yuka li na sha nomapuko nomaunghundi avo.

12, 13. (a) Vamwe ovo Jehova a li a pa oinakuwanifwa monakudiwa ova li va ninga omapuko elipi? (b) Omolwashike omapuko ovalumenhu voinakuwanifwa a shangwa mOmbibeli?

12 Omishangwa oda popya paushili kombinga yomapuko ovalumenhu ovo Jehova a li a longifa va wilike oshiwana shaye monakudiwa. Pashihopaenenwa, David okwa li a nangekwa po e li ohamba nomupangeli waIsrael. Ashike nande ongaho, okwa li e liefela meyeleko ndele tai moluhaelo nokwa dipaa. (2 Sam. 12:7-9) Diladila yo shi na sha nomuyapostoli Petrus. Nonande Petrus okwa li e lineekelelwa oshinakuwanifwa shinene meongalo lopaKriste lomefelemudo lotete, okwa li a ninga epuko la kwata moiti. (Mat. 16:18, 19; Joh. 13:38; 18:27; Gal. 2:11-14) Okudja eshi Adam naEva va nyona, kombada yedu inaku kala vali ovanhu va wanenena, kakele kaJesus.

13 Omolwashike Jehova a efa ovashangi vOmbibeli va shange omahokololo e na sha nomapuko ovalumenhu ovo a li a pa oinakuwanifwa? Etomheno limwe ololo kutya, okwe shi ninga opo a ulike kutya ota dulu okulongifa ovanhu inava wanenena va wilike oshiwana shaye. Naasho osho a kala alushe ta ningi. Onghee hano, okuhawanenena kwaavo tava kwatele komesho hako ku kala omalipopilo etu oku va ngongotela ile okulipwililikila eenghonopangelo davo. Jehova okwa teelela tu kale twa fimaneka ovamwatate va tya ngaho nokudulika kuvo. — Lesha Exodus 16:2, 8.

14, 15. Oshike hatu lihongo monghedi “omo Jehova a kala ha yandje omalombwelo koshiwana shaye shonale?

14 Osha fimanenena okudulika kwaavo tava kwatele komesho kunena. Diladila kunghee Jehova a kala ha yandje omalombwelo koshiwana shaye shonale momafimbo madjuu. Eshi oshiwana shaIsrael sha dja muEgipti, Kalunga okwa kala he shi pe omalombwelo okupitila muMoses naAron. Osha li sha lombwelwa shi longekide eendja de likalekelwa, shi dipae odi nokuvaeka ohonde imwe yayo poikulo nopombada yoikulo yomivelo domaumbo asho opo shiha hangike kehandukilo etimulongo. Elombwelo olo kasha li she li pewa kondaka yandja meulu. Osha li she li lombwelwa kovakulunhu vaIsrael ovo navo va pewa omalombwelo okondadalunde kuMoses. (Ex. 12:1-7, 21-23, 29) Kungaho, Moses novakulunhu vaIsrael ova katuka ve li ovapopikalelipo vaJehova koshiwana shaye. Nokunena, Jehova oha longifa ovakulunhuongalo Ovakriste va ninge sha faafana.

15 MOmbibeli omu na omahokololo mahapu e na sha nanghee Jehova a longifa ovanhu ile ovaengeli va yandje omalombwelo koshiwana shaye opo shi xupe. Meenghalo adishe odo, Kalunga okwa li e wete sha yuka okupa vamwe  oshinakuwanifwa sha tya ngaho. Okwa li ha tumu ovatumwa va lombwele oshiwana shaye osho shi na okuninga opo shi xupe moshiponga shonhumba. Osho itashi tu pe mbela omatomheno okukala tu shii kutya Jehova otashi dulika ta ka ninga sha faafana puHarmagedon? Ashike ovakulunhuongalo ovo ve na oshinakuwanifwa shokukalela po Jehova nosho yo ehangano laye kunena, ove na okulungama vaha longife nai eenghonopangelo odo ve lineekelelwa.

“OSHIUNDA SHIMWE, NOMUFITA UMWE”

16. Otu na okukala hatu pwilikine ‘kondjovo’ ilipi?

16 Oshiwana shaJehova oshi li ‘moshiunda shimwe’ noshi na ‘omufita umwe,’ Jesus Kristus. (Joh. 10:16) Jesus okwa ulika kutya ota ka kala pamwe novahongwa vaye “omafiku aeshe fiyo okexulilo lefimbo lounyuni.” (Mat. 28:20) E li Ohamba yomeulu, ota pashukile oiningwanima aishe oyo tai twala fiyo opokuhanaunwa po kwounyuni waSatana. Opo tu kale moshiunda twa amenwa notwa hangana, otwa pumbwa okukala hatu pwilikine ‘kondjovo ei tai di konima yetu’ tai tu lombwele ondjila oyo tu na okweenda nayo. “Ondjovo” oyo oya kwatela mo osho Jehova e tu honga okupitila mOmbibeli naasho yo Ye naJesus have tu lombwele okupitila movafita ovo va nangeka po. — Lesha Jesaja 30:21; Ehololo 3:22.

Ovakulunhuongalo ohava amene omaukwaneumbo omo mu na omudali umwe kenwefemo lii (Tala okatendo 17, 18)

17, 18. (a) Oupyakadi ulipi oshiwana shaKalunga sha taalela, ndele ohatu dulu okukala nelineekelo lilipi? (b) Oshike hatu ka kundafana moshitukulwa tashi landula?

17 Satana okwa popiwa kutya ohe tu dingilile a fa “onghoshi hai kumbu, nota kongo ou te mu xwake po.” (1 Pet. 5:8) Ngaashi ashike oshilyani sha fya ondjala, oha kongo oufita opo a mone omhito yokuponokela odi oyo ya nghundipala ile ye litukula ko kudikwao. Olo olo limwe lomomatomheno molwaashi tu na okukala popepi neongalo nosho yo ‘nOmufita nOmutekuli weemwenyo’ detu. (1 Pet. 2:25) Ehololo 7:17 ola popya shi na sha naavo tava ka pita moudjuu munene la ti: “Odjona [Jesus] . . . otai va lifa ndee tai va twala keefifiya domeva di nomwenyo. Ndele Kalunga ta feta po omahodi aeshe momesho avo.” Olo kali fi tuu eudaneko likumwifi!

18 Paife eshi twa kundafana oshinakuwanifwa shovakulunhuongalo Ovakriste shokulifa eongalo osho sha fimana neenghono, oshiwa okulipula kutya, Ongahelipi ovalumenhu ovo va nangekwa po tava dulu okushilipaleka kutya ohava ungaunga needi daJesus nolukeno? Epulo olo otali ka nyamukulwa moshitukulwa tashi landula.