Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) OKTOBA 2013

“Kaleleni Omwene”

“Kaleleni Omwene”

“Mokulalakana kweni inamu fya ounye. . . kaleleni Omwene.” — ROM. 12:11.

1. Ovanhu ohava diladila shike shi na sha nomupiya, nongahelipi omupiya oo a popiwa mOvaroma 12:11 a yooloka ko kwaao?

OKUKALA omupiya waKalunga osha yooloka ko filufilu kwaasho ovanhu hava diladila shi na sha nomupiya. Ohava diladila kutya, omupiya ile omupika omunhu oo e na okupangelwa nonyanya, okufininikwa nokuungaungwa naye nopehe na ouyuki. Ndele Eendjovo daKalunga da nwefwa mo oda popya kombinga yomupiya oo ta longele omwene waye omunahole nehalo liwa. Onghee hano, eshi omuyapostoli Paulus a li ta kumaida Ovakriste vomefelemudo lotete va ‘kalele Omwene,’ okwa li te va ladipike va longe oshilonga shiyapuki tave linyengifwa kohole yoku mu hola. (Rom. 12:11) Ndele mbela okukala omupiya waJehova osha kwatela mo shike? Ongahelipi hatu dulu okuhenuka okukala ovapiya vaSatana nounyuni waye? Mbela omupiya waJehova oo ha longo noudiinini ota ka mona ondjabi yashike?

‘AME ONDI HOLE OMWENE WANGE’

2. (a) Omolwashike omupiya Omuisrael tashi dulika a tokole okutwikila okulongela omwene waye? (b) Okulityuulifa kokutwi kwomupiya otaku ulike shike?

2 Otwe lihonga mOmhango oyo Kalunga a li a pa Ovaisrael kutya okwa teelela ovapiya vaye va kale va tya ngahelipi. Omupiya Omuheberi okwa li e na okumangululwa momudo omutiheyali woupika waye. (Ex. 21:2) Ashike Jehova okwa li a ninga po elongekido le likalekelwa li na sha nomupiya oo e hole shili omwene waye nokwa hala okutwikila oku mu longela. Mwene womupiya okwa li e na okutwala omupiya waye koshivelo ile polumhango loshivelo, ndele te mu tyuula kokutwi nonhisho. (Ex. 21:5, 6) Oshididilikwedi eshi elongekido olo la kwatela mo okutwi. Melaka lOshiheberi, okudulika okwa kwatakanifwa nokuuda nokupwilikina. Onghee hano, ngeenge omupiya okwa tyuulwa, otashi ulike kutya okwa hala okutwikila okuyakula omwene waye meduliko. Osho otashi tu kwafele tu ude ko kutya okuliyapulila kwetu Jehova okwa kwatela mo okudulika nehalo liwa omolwohole yetu yoku mu hola.

3. Omolwashike twe liyapulila Kalunga?

3 Fimbo inatu ninginifwa, ohatu ningi etokolo lokulongela  Jehova nokukala ovapiya vaye. Eshi twe mu liyapulila, otwe mu udanekela kutya ohatu ka dulika kuye nokuninga osho a hala tu ninge. Kape na oo e tu fininika tu ninge etokolo olo. Nokuli novanyasha ovo hava ninginifwa, ohave shi ningi konima eshi ovo vene ve liyapulila Jehova ndele hasheshi va hala ashike okuhafifa ovadali vavo. Eliyapulo letu ola kanghamena kohole yokuhola Omwene wetu womeulu, Jehova. Omuyapostoli Johannes okwa shanga ta ti: “Ohole yokuhola Kalunga oyo tuu ei nokutya, tu diinine oipango yaye.” — 1 Joh. 5:3.

NONANDE OTU LI OVAPIYA, OTWA MANGULUKA

4. Oshike tu na okuninga opo tu ninge “ovapiya vouyuki”?

4 Inatu pandula tuu eshi Jehova e shi ninga tashi shiiva opo tu ninge ovapiya vaye! Eitavelo letu mekuliloyambo laKristus ole shi ninga tashi shiiva opo tuha kale ovapika voulunde. Nonande inatu wanenena, ohatu dulika nehalo liwa kuJehova naJesus. Paulus okwa li a popya shi na sha naasho monhumwafo yaye ya nwefwa mo, eshi a ti: “Litaleni, onye mwa fya mo moulunde, ndele omu nomwenyo okukalela Kalunga muJesus Kristus Omwene wetu.” Opo nee okwa li a londwela a ti: “Kamu shi shii, kutya ngenge nye tamu liyandje komunhu mu ninge ovapiya vaye vokudulika kuye, onye ovapiya vaau tamu dulika kuye, ngenge ovapiya voulunde tau twala mefyo ile ovapiya veduliko tali twala mouyuki? Ndelenee Kalunga na pandulwe, shaashi nye ava mwa li ovapiya voulunde, mwa dulika momitima deni okolupe lelongo eli mwa twalwa mulo, eshi mwa mangululwa moulunde, omwa ninga nee ovapiya vouyuki.” (Rom. 6:11, 16-18) Didilika kutya omuyapostoli Paulus okwa popya shi na sha ‘nokudulika momitima.’ Onghee hano, eshi twe liyapulila Jehova, otwa ninga “ovapiya vouyuki.”

5. Olwoodi lilipi tu na okukondja atushe, nomolwashike?

5 Tu li ovapiya vaKalunga ve mu liyapulila, ohatu lu omalwoodi opavali. Lotete, okuhawanenena kwetu. Paulus naye okwa li ta lu olwoodi la tya ngaho. Okwa ti: “Kombinga yomunhu ou womeni onda dimina nehafo omhango yaKalunga, ndele moinhimbu yange ondi wete omhango ikwao tai kondjifa omhango yomadiladilo ange, ndele otai pikile nge momhango youlunde i li moinhimbu yange.” (Rom. 7:22, 23) Molwaashi inatu wanenena, otu na okutwikila okukondjifa omahalo etu opambelela. Omuyapostoli Petrus okwe tu ladipika a ti: ‘Kaleni ngaashi ovamangululwa, ndelenee hamanguluko lokulituvika nalo oulunde, ndelenee ongaashi ovapiya vaKalunga.’ — 1 Pet. 2:16.

6, 7. Ongahelipi Satana ha ningifa ounyuni u kale tau monika wa fa uhokwifa?

6 Olwoodi olutivali olo tu na okulwa olo okukondjifa ounyuni ou u li koshi yenwefemo leendemoni. Satana oo e li omupangeli wounyuni ou ota longifa oilwifo yaye nelalakano opo a nyone po oudiinini wetu kuJehova nosho yo kuJesus. Oha kendabala oku tu pika moku tu yeleka tu kale koshi yenwefemo lounyuni waye wa nyonouka. (Lesha Ovaefeso 6:11, 12.) Onghedi imwe omo Satana he tu yeleke omokuningifa ounyuni waye u kale tau monika wa fa muhokwifa notau nane. Omuyapostoli Johannes okwa londwela ta ti: “Ngenge pe na ou e hole ounyuni, ohole yaTate kai mo muye. Osheshi keshe eshi shi li mounyuni, ngaashi okahalu kombelela nokahalu komesho noifulalala yokukalamwenyo, inai dja muTate, ndelenee oya dja mounyuni.” — 1 Joh. 2:15, 16.

7 Ovanhu mounyuni aushe ova hala okukala ve na ofulundudu yoinima yopamaliko. Satana ota ningifa ovanhu va itavele kutya oimaliwa oyo tai va etele ehafo. Kunena eefitola odi li keshe pamwe. Omashiivifo opaipindi ohaa heke ovanhu va itavele kutya, okukala nofulundudu yoinima yopamaliko nokulihafifa osho sha fimanenena monghalamwenyo. Omahangano e na sha nomalweendo ohaa ladipike ovanhu va ye keenhele odo dihokwifa, naluhapu ohava i ko naavo ve na etaleko la fa lounyuni. Onghee hano, ovanhu ovo ve tu dingilila ohave tu ladipike tu lundulule onghedi yetu yokukalamwenyo monghedi oyo ounyuni wa hala.

8, 9. Oshinima shilipi sha nyika oshiponga, nomolwashike?

 8 Petrus okwa li a popya shi na sha nOvakriste vamwe vomeongalo lomefelemudo lotete ovo va li va hovela okudiladila ngaashi ounyuni, eshi a londwela ta ti: “Ove udite ounyenye mokukala moumbwada efiku alishe, ovo omalopyolopyo ohoni nomadiko ekako; ove udite ounyenye momakoto avo eshi hava kala moivilo pamwe nanye. Osheshi hava popi eendjovo da nyika elinenepeko noushima mokukala mouhalu wombelela ohava hongaula noilonga yoihole ovo va dja konyala onhapo ovo va puma mondjila, ndele have va udanekele emanguluko, nande ovo vene ovapika venyonauko, osheshi keshe ou a findwa kusha, oye yo omupika washo.” — 2 Pet. 2:13, 18, 19.

9 Okuwanifa po ‘okahalu komesho’ ihaku kwafele omunhu a kale a manguluka. Ponhele yaasho, oha ningi omupika wamwene wounyuni ou iha monika, Satana Ondiaboli. (1 Joh. 5:19) Okuninga omupika woinima yopamaliko okwa nyika shili oshiponga noshidjuu okumanguluka mo muo.

EIFANO OLO TALI TI SHA

10, 11. Oolyelye ve li unene oihakanwa yaSatana, nongahelipi ehongo lopombada li li omukundu kuvo?

10 Ovanhu ovo vehe na owino ovo unene ve li oihakanwa yaSatana nokunena, ngaashi a ningile moshikunino shaEden. Satana oku hole okuponokela unene ovanyasha. Iha kala a hafa ngeenge omunyasha, ile keshe tuu, te liyambe a ninge omupiya waJehova. Omutondi waKalunga a tya ngaho, oha kala a hala ngeno aveshe ovo ve liyapulila Jehova vaha kale metwokumwe neliyapulo lavo nosho yo ovadiinini.

11 Natu diladile vali shi na sha nomupiya oo a tyuulifa okutwi kwaye. Omupiya a tya ngaho oku na okukala a uda ouyahame oule wokafimbo, ndele ombululu oyo a tyuulwa otai ulikile keshe umwe kutya okwa tokola okukala nomwene waye. Okuhoolola onghedi yokukalamwenyo yonhumba ya yooloka ko kwaayo yovanhu ovo ve ku dingilila otashi dulu okukala shidjuu ile nokuli shiyahameka kovanyasha. Satana ota xumifa komesho ediladilo olo kutya okulalakanena eifano mounyuni waye otashi kwafele omunhu a kale a wanenwa, ashike Ovakriste ove na okudimbuluka kutya okuwanifa po omhumbwe yetu yopamhepo okwo kwa fimanenena. Jesus okwa ti: “Ovanelao ovovo ve shii omhumbwe yavo yopamhepo.” (Mat. 5:3, NW) Ovakriste ovo ve liyapulila Jehova ohava longo ehalo laye, ndele halaSatana. Ohava lesha Ombibeli noku i dilonga “omutenya noufiku.” (Lesha Epsalme 1:1-3.) Ashike, ehongo lopombada lokunena ihali pe ovapiya vaJehova omhito ya wana yokudilonga  kEendjovo daye nokuwanifa po omhumbwe yavo yopamhepo.

12. Ovanyasha vahapu ove na okuninga ehoololo lilipi kunena?

12 Omwene womounyuni ota dulu okudjuupaleka onghalamwenyo yomupiya waJehova. Monhumwafo oyo Paulus a shangela Ovakorinto, okwa li e va pa omayele a ti: “Ngenge wa hangika omupika eshi wa ifanwa, ino nyika oufiyee, ndele ngenge to mono omhito okupewa emanguluko, hixwe po to li tambula.” (1 Kor. 7:21) Ngeenge omupiya oku na omwene waye womounyuni nota djuupaleke onghalamwenyo yaye, osha li shi li xwepo komupiya a mangululwe. Moilongo ihapu kunena omu na omhango oyo tai ufa kutya ovahongwa ove na okufikola oule womido ngapi. Nokonima yaasho, ovanafikola ohava hoolola ngeenge ova hala ehongo la wedwa po ile hasho. Ngeenge Omukriste okwa hoolola okuya kehongo lopombada molwaashi a hala okulalakanena eifano mounyuni ou, ita ka kala vali e na emanguluko lokulongela Jehova moilonga yefimbo li yadi. — Lesha 1 Ovakorinto 7:23.

Owa hala okukala omupiya walyelye?

OTO LALAKANENE EHONGO LOPOMBADA ILE EHONGO LA DENGA MBADA?

13. Ehongo lilipi tali etele lela ovapiya vaJehova ouwa?

13 Paulus okwa li a londwela Ovakriste Ovakolossi a ti: “Lungameni, pa ha kale umwe te mu yuulifa ounongo wovanhu nomapukifo ongaho, te likwatelele meenghedinghulu nomoihovelanghono younyuni, hamuKristus.” (Kol. 2:8) Kunena, ovahongwanhu vahapu vomounyuni ohava xumifa komesho ‘ounongo wovanhu nomapukifo ongaho, e likwatelela keenghulunghedi.’ Ehongo lopombada, olo la kwatela mo unene okumona ashike eshiivo, luhapu ihali kwafele ovanafikola va kale ve na owino woilonga noihava kala ve shii nghee ve na okuungaunga neenghalo domokukalamwenyo. Mepingafano naasho, ovapiya vaJehova ohava hoolola ehongo olo tali va kwafele va kale ve na owino oo wa pumbiwa opo va kale nonghalamwenyo i li paunafangwa eshi tave mu longele. Ohava tula moilonga omayele oo Paulus a li a pa Timoteus, taa ti: “Etilokalunga olo eliko linene shili, shamha omunhu a wana naai yaye. Ndelenee ngenge tu na oipalwifa noikutu, osho tuu nashi tu wanenene.” (1 Tim. 6:6, 8) Ponhele yokulalakanena eedigili opo ve limonene omadinafimaneko, Ovakriste vashili ohava longo noudiinini opo ve li monene “eenhumwafo depopilo” mokukala tava longo moukalele ngaashi tava dulu. — Lesha 2 Ovakorinto 3:1-3.

14. PaVafilippi 3:8, Paulus okwa li a tala ko ngahelipi oufembanghenda wokukala e li omupiya waKalunga naKristus?

14 Diladila shi na sha nomuyapostoli Paulus.  Okwa li a hongwa peemhadi domuhongi wOmhango yOshijuda wedina Gamaliel. Ehongo olo Paulus a li a hongwa otali dulu okuyelekwa nehongo lokounivesiti kunena. Ndele mbela Paulus okwa li a tala ko ngahelipi ehongo olo eshi e li yelakanifa noufembanghenda wokukala e li omupiya waKalunga naKristus? Okwa shanga ta ti: “Oinima aishe, eshi nde i shaameka nokushiiva Kristus Jesus Omwene wange, handi i tale oyo oshiponga.” Opo nee okwa weda ko ta ti: “Omolwaye nda kanifa aishe nohandi i dini oyo oimbodi yongaho, ndi likole Kristus.” (Fil. 3:8) Etaleko laPaulus otali dulu okukwafela Ovakriste ovanyasha novadali vavo opo va ninge ehoololo li li pandunge li na sha nehongo. (Tala omafano.)

MONA OUWA MEHONGO OLO LA DENGA MBADA

15, 16. Ehangano laJehova ohali yandje ehongo la tya ngahelipi, nonelalakano lashike?

15 Mbela onghalo moiputudilo ihapu yehongo lopombada mounyuni oi li naanaa ngahelipi? Ovanhu vomeenhele da tya ngaho luhapu ohava kala va manguluka okutukulila omapangelo naavo ve na eenghopangelo oshibofa noku va ulikila kutya ova handuka. (Ef. 2:2) Mepingafano naasho, ehangano laJehova ohali yandje ehongo la denga mbada meongalo olo li li onhele ya amenwa. Keshe umwe womufye oku na omhito yokumona ouwa mOfikola yOkudeula Ovaudifi yokoshivike. Ope na yo ofikola ya nuninwa ovamwatate ovakokolindjila ovo inava hombola (Ofikola yOmbibeli yOkudeula Ovamwatate Inava Hombola) nosho yo yovalihomboli ovakokolindjila (Ofikola yOmbibeli yOkudeula Ovalihomboli Ovakriste). Ehongo la tya ngaho lopamhepo ohali tu kwafele tu dulike kuJehova, Omwene wetu womeulu.

16 Ohatu dulu okukonga omamona mahapu opamhepo mo-Watch Tower Publications Index ile mo-Watchtower Library mo-CD-ROM. Elalakano la fimanenena lehongo lOmbibeli la tya ngaho olo okulongela Jehova. Otali tu kwafele tu shiive nghee hatu dulu okukwafela vamwe va hanganifwe naKalunga. (2 Kor. 5:20) Osho otashi ke va kwafela navo va honge vamwe vali. — 2 Tim. 2:2.

ONDJABI YOMUPIYA

17. Okuhoolola ehongo la denga mbada ohaku etifa ouwa ulipi?

17 Mefaneko laJesus li na sha noitalenti, ovapiya vavali ovadiinini ova li va pandula nova hafela pamwe nomwene wavo mokulineekelelwa oilonga ihapu. (Lesha Mateus 25:21, 23.) Kunena, okuhoolola ehongo olo la denga mbada otaku tu etele ehafo nosho yo omanangeko noupuna. Natu ka taleni koshihopaenenwa shaMichael. Michael okwa li a pita nawa mofikola, novahongi vaye ova li ve mu pula a ka ongale navo opo va kundafane kombinga yokuya kounivesiti. Ashike ova ka kumwa molwaashi okwa li a hoolola okukufa okersesa yopakafimbo opo a mone owino woilonga oyo tai ke mu kwafele a wanife po eemhumbwe daye dopalutu fimbo ta kokola ondjila, ponhele yokuya kounivesiti. Ndele mbela Michael okwa li e udite kutya pamwe ina tala nawa eshi a ninga etokolo olo? Okwa ti: “Ehongo lopamhepo olo nda mona eshi ndi li omukokolindjila nosho yo olo nda mona paife eshi ndi li omukulunhuongalo ola fimanenena. Omanangeko noupuna nomaufembanghenda oo handi hafele itaa dulu nande okuyelekwa noimaliwa oyo tashi dulika ngeno nda ka likola. Onda hafa neenghono eshi inandi lalakanena ehongo lopombada.”

18. Oshike she ku linyengifa u hoolole ehongo la denga mbada?

18 Ehongo la denga mbada ohali tu kwafele tu shiive ehalo laKalunga notu kale ovapiya vaye. Otali tu pe yo etimaumbwile loku “ka mangululwa moupika wenyonauko” nolwanima ohatu kaya “memanguluko loshinge shovana vaKalunga.” (Rom. 8:21) Komesho yaaishe, ohali tu kwafele tu shiive onghedi ya denga mbada omo hatu dulu okuulika kutya otu hole shili Omwene wetu womeulu, Jehova. — Ex. 21:5.