Inda koshikalimo

Inda kelandulafano etivali

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) OKTOBA 2013

Osho hatu lihongo meilikano la longekidwa nawa

Osho hatu lihongo meilikano la longekidwa nawa

“Edina loye la fimana nali hambelelwe.” — NEH. 9:5.

1. Ohatu ka kundafana kombinga yokwoongala kulipi kwoshiwana shaKalunga, nomapulo elipi tu na okulipula?

“KALENI ofika! Hambeleleni Omwene Kalunga keni alushe fiyo [alushe, NW]!” Neendjovo odo tadi kumu omutima, oshiwana shaKalunga shonale osha li sha shivwa shi ongale opo shi ilikane pamwe. Eilikano olo olo limwe lomwaao malemale oo a shangwa mOmbibeli. (Neh. 9:4, 5) Okwoongala oko okwa li kwa ningilwa muJerusalem, mo 24 omwedi omutiheyali wOshijuda, Tishri, momudo 455 K.O.P. Eshi hatu konakona oiningwanima oyo ya tetekela efiku olo le likalekelwa, lipula kutya: ‘Ovalevi ova li hava ningi shike pandjikilile osho sha li sha ningifa okwoongala oko ku pondole? Oilihongomwa imwe ilipi hatu dulu okulihonga meilikano olo la longekidwa nawa?’ — Eps. 141:2NW.

OMWEDI WE LIKALEKELWA

2. Ovaisrael ove tu tulila po oshihopaenenwa shiwa shilipi pokwoongala oko va li va ninga konima yokutungulula ekuma laJerusalem?

2 Ovajuda ova li va mana okutungulula ekuma laJerusalem momwedi wa tetekela oo mwa li mwa ningwa okwoongala oko kwa tumbulwa metetekelo. (Neh. 6:15) Oshiwana shaKalunga osha li sha manifa oilonga oyo moule ashike womafiku 52, nopo nee osha li sha twikila okuyandja elitulemo keemhumbwe dasho dopamhepo. Onghee hano, mefiku lotete lomwedi wa ka landula ko, Tishri, osha li sha ongala ponhele ya andjuka opo shi pwilikine kuEsra nosho yo kOvalevi vakwao, eshi tava lesha mokule Omhango yaKalunga noku i yelifa. Omaukwaneumbo aeshe, mwa kwatelwa aveshe ovo ve “neendunge” dokupwilikina, okwa li a fikama nokupwilikina okudja ‘ketendo leluwa fiyo opokati komutenya.’ Inave tu tulila po tuu oshihopaenenwa shiwa fyeni ovo hatu ongalele mOmalupale Ouhamba taa tulumukifa! Ndele nande ngaho, mbela oho lihange peemhito dimwe to twalwaatwalwa fimbo u li pokwoongala nokuhovela okudiladila kombinga yoinima inai  fimana? Ngeenge osho, diladila vali koshihopaenenwa shOvaisrael vonale. Kava li ashike va pwilikina ndele ova li yo va diladila moule kwaasho va uda nova li va hovela okulila molwaashi kava li va dulika kOmhango yaKalunga. — Neh. 8:1-9.

3. Ovaisrael ova li va dulika kelombwelo lilipi?

3 Ovaisrael kava li va ongala nelalakano lokuhepaulula omanyono avo moipafi. Ola li efiku loshivilo, efimbo lokuhafela pamwe eshi tava longele Jehova. (Num. 29:1) Onghee hano, Nehemia okwa li a lombwela oshiwana ta ti: “Indeni mu ka lye eendya dinyenye ndee mu ka nwe oikunwa inyenye, ndele tumeni eendya kuava inava telekelwa sha. Osheshi efiku eli la yapulilwa Omwene wetu; onghee hano inamu nyik’oluhodi, osheshi ehafo mOmwene olo eenghono deni.” Oshi shii okupandulwa molwaashi oshiwana osha li sha dulika nefiku olo ola ka ninga efiku ‘loshivilo shehafo.’ — Neh. 8:10-12.

4. Omitwe domaukwaneumbo Ovaisrael oda li da ninga shike, noshinima sha fimana shilipi sha li sha ningwa pefimbo lOshivilo shOmatwali?

4 Mefiku la ka landula ko, omitwe domaukwaneumbo oda li da ongala di tale ngeenge oshiwana shavo otashi dulika ngoo filufilu kOmhango. Eshi da konakona Omishangwa, oda li da mona kutya momwedi omuti-7 omwa li yo mu na okudanwa Oshivilo shOmatwali okudja mo 15 fiyo omo 22 omwedi Tishri, nosha li shi na okuxulifwa noshoongalele shiyapuki, nomolwaasho oda li da hovela okuninga omalongekido e na sha naasho. Oshivilo osho osha ka kala Oshivilo shOmatwali sha denga mbada shi dule ikwao aishe oyo ya danwa okudja pefimbo laJosua nosha etifa “ehafo linene.” Okulesha Omhango yaKalunga moipafi ‘efiku keshe, okudja kefiku lotete fiyo kefiku laxuuninwa,’ oko kwa li oshinima sha fimana osho sha li sha ningwa poshivilo osho. — Neh. 8:13-18.

EFIKU LOKUHEPAULULA OMANYONO

5. Oshiwana shaKalunga osha li sha ninga po shike ofimbo Ovalevi inava hovela okwiilikana?

5 Konima yomafiku avali, efimbo ola li la fika opo Ovaisrael va hepaulule omanyono avo moipafi eshi inava dulika kOmhango yaKalunga. Omhito oyo kaya li efimbo lokutyapula. Ndele ponhele yaasho, oshiwana shaKalunga osha li she lidilika oikulya nosha djala eeshako, shi li euliko kutya osha nyika oluhodi. Natango, ovanhu ova li va leshelwa Omhango yaKalunga efimbo longula oule weevili 3 lwaapo. Efimbo lomutenya, ova li va “hepaulula omatimba nokwiilikana Omwene Kalunga kavo.” Opo nee, Ovalevi ova li va ilikana eilikano la longekidwa nawa ponhele yoshiwana ashishe. — Neh. 9:1-4.

6. Oshike sha li sha kwafela Ovalevi va ilikane eilikano tali ti sha, naasho otashi tu hongo shike?

6 Nopehe na omalimbililo, okulesha Omhango yaKalunga pandjikilile oko kwa li kwa kwafela Ovalevi va longekide eilikano olo tali ti sha. Eevelishe dotete omulongo omo mu na eilikano  olo otadi yandje unene elitulemo koilonga nomaukwatya aJehova. Oshitukulwa shikwao sheilikano osha divilika ‘efilonghenda linene’ laKalunga nosha yelifa nawa kutya Ovaisrael kava li va wana okuungaungwa navo nawa ngaho. (Neh. 9:19, 27, 28, 31) Ngaashi Ovalevi, omailikano etu otaa ka kala taa di komutima notaa ti sha, ngeenge otwa kala hatu dilonga kEendjovo daJehova efiku keshe, nokungaho ohatu mu pitike a popye nafye nohatu ka kala tu na shihapu okutya meilikano. — Eps. 1:1, 2.

7. Ovalevi ova li va pula Kalunga shike, noshike hatu lihongo moshihopaenenwa shavo?

7 Ovalevi ova li ashike va pula oshinima shanafangwa meilikano lavo. Oshinima osho oshi li moshitukulwa shaxuuninwa shovelishe 32 oyo tai ti: “Paife Kalunga ketu, munene, omunamapangelo, Kalunga onakutilika, ou ho diinine ehangano loye nouwanghenda woye: oupyakadi owo aushe, u he u tale owo ounini, we tu hanga ko neehamba detu novakulunhu vetu novapristeri vetu novaprofeti vetu, ootate vetu novanhu voye aveshe, okudja komafimbo eehamba daAssiria fiyo kefiku eli.” Onghee hano, Ovalevi ove tu tulila po oshihopaenenwa shiwa shokutanga nokupandula tete Jehova meilikano fimbo inatu pula oinima yopaumwene.

TANGA EDINA LAKALUNGA LA TUMBALA

8, 9. (a) Ovalevi ova li va hovela ngahelipi eilikano lavo? (b) Ovalevi ova li va popya kombinga yomatangakwaita omeulu avali elipi?

8 Nonande Ovalevi ova li va ilikana eilikano la longekidwa nawa, ova li ovalininipiki nova li ve udite kutya oitya oyo va longifa itai holola lela efimano olo Jehova e na okupewa. Nomolwaasho, ova li va hovela eilikano lavo tava indile nelininipiko ta ti: “Edina loye la fimana nali hambelelwe, lo ola yeluka kombada [yomapandulo] nomahambelelo aeshe!” — Neh. 9:5.

9 Eilikano ola twikila tali ti: “Oove auke Omwene, Ove wa ninga eulu, eulu lopombadelela neengudu dalo adishe, nedu naaishe i li ko, nefuta naaishe i li mo, naaishe oyo Ove to i diinine i kale nomwenyo, nomatanga omeulu tae linyongamene koshipala shoye.” (Neh. 9:6) Jehova Kalunga oye shili a shita eulu alishe, oko ku na omihalavili dihapu deenyofi. Otashi tu kumwifa yo eshi a shita keshe shimwe osho shi li kopulaneta iwa oku tu li, nokwe shi ninga tashi shiiva opo oinima i na omwenyo i lili naku lili oyo i li ko i dule okukala tai dalafana pamaludi ayo. Ovaengeli ovayapuki vaKalunga, ovo tava ifanwa yo ‘ovakwaita vomeulu,’ ova mona eshi ta shiti oinima aishe oyo. (1 Eeh. 22:19; Job 38:4, 7) Shimwe vali, ovaengeli ohava longo nelininipiko ehalo laKalunga mokuyakula ovanhu ovalunde ovo “tava ka fyuulula exupifo.” (Heb. 1:14) Ovaengeli inave tu tulila po tuu oshihopaenenwa sha denga mbada eshi hatu longele Jehova moukumwe twa fa etangakwaita la deulikika! — 1 Kor. 14:33, 40.

10. Oshike hatu lihongo monghedi omo Kalunga a li a ungaunga naAbraham?

10 Lwanima, Ovalevi ova li va yandja elitulemo  konghedi omo Kalunga a li a ungaunga naAbram, oo fiyo opomido 99 kwa li ehe na nande okaana nomukulukadi waye Sarai, oo a li ongadji. Jehova okwa li a lundulula edina laAbram li ninge Abraham, olo tali ti “xe yoiwana ihapu.” (Gen. 17:1-6, 15, 16) Okwa li yo a udanekela Abraham kutya oludalo laye otali ka fyuulula edu laKanaan. Luhapu ovanhu ohava dimbwa osho va udaneka, ashike Jehova iha dimbwa. Oushili oo ou liwetikile meilikano lOvalevi eshi va ti: “Oove Omwene Kalunga, wa hoolola Abram ndele we mu kufa mo muUr shomuKaldea ndele we mu lukulula Abraham. Ndele wa mona omutima waye wa li omudiinini koshipala shoye, ndele wa ninga naye ehangano, nokutya u pe oludalo laye edu lOvakanaan . . . ndele wa wanifa eendjovo doye, osheshi Oove omuyuki.” (Neh. 9:7, 8) Nafye natu hopaeneneni Kalunga ketu omuyuki mokukendabala alushe tu kale hatu wanifa po osho twa udaneka. — Mat. 5:37.

DIMBULUKA OINENELONGA YAJEHOVA

11, 12. Yelifa kutya edina Jehova otali ti shike, neityo olo ola li le limonikila mo ngahelipi monghedi omo a ungaunga noludalo laAbraham?

11 Edina Jehova olo tali ti “Oha ningifa” otali ulike kutya Kalunga oha katuka eenghatu tadi twikile opo a wanife po omalalakano aye. Osho oshi liwetikile nawa monghedi omo Kalunga a li a ungaunga noludalo laAbraham eshi la li moupika muEgipti. Pefimbo opo, osha li tashi monika sha fa itashi shiiva okumangulula oshiwana ashishe moupika noku ka kala mEdu lEudaneko. Ndele Kalunga okwa li a wanifa po eudaneko laye mokukatuka eenghatu da shikulafana tadi twikile, nokungaho okwa ulika kutya edina olo le likalekelwa Jehova ole mu yeleka shili.

12 Ovalevi ova popya kombinga yaJehova meilikano olo la shangwa kuNehemia tava ti: “[Owa] mona oluhepo lootate muEgipti ndele wa uda onghuwo yavo pEfuta lomanenge, ndele Farao novapiya vaye aveshe novanhu aveshe vomoshilongo shaye we va ningila omadidiliko noikumifalonga. Osheshi wa li u shi shii, nokutya vo ove va hepeka nokulinenepeka, ndele Ove we liningila edina ngaashi li li nena eli. Ndele wa tukula efuta komesho yavo, onghee va tauluka efuta va enda poukukutu. Ndelenee ovataatai vavo we va ekela moule mwii, ngaashi emanya momeva manene.” Opo nee, ova twikila okwiilikana shi na sha noinima imwe vali oyo Jehova a ningila oshiwana shaye, tava ti: ‘Noonakukalamo moshilongo, Ovakaanan, we va taataa komesho yavo. Ndele va nangala oilando i neehotekuma nedu liwa, ndele va tinha eengulu di yadi oinima iwa i lili nai lili, eendungu da pandwa memanya, oikokola yomiviinyu nomiti domalumono nomiti dihapu doiimati. Ndele va lya ndele va kuta ndele va ondoka ndele va kala ve noshishipo omolwouwa woye munene.’ — Neh. 9:9-11, 24, 25.

13. Jehova okwa li a wanifa po ngahelipi eemhumbwe dopamhepo dOvaisrael, nova li ve linyenga ngahelipi?

13 Kalunga okwa li a katuka eenghatu dimwe vali dihapu tadi twikile opo a wanife po elalakano laye. Pashihopaenenwa, diva konima eshi Ovaisrael va dja muEgipti, Jehova okwa li e va wanifila po eemhumbwe davo dopamhepo. Ovalevi ova ilikana kuKalunga tava ti: “Ove wa londoloka komhunda yaSinai ndele we va popifa meulu ndele we va pa omalombwelo a yuka neemhango di shii kulineekelwa, eenghedimango diwa noipango.” (Neh. 9:13) Jehova okwa li ta kendabala okuhonga oshiwana shaye opo shi dule okukala ovahumbati vedina laye liyapuki shi li ovafyuululi vEdu lEudaneko, ashike osha li sha ekelashi oinima iwa oyo she lihonga. — Lesha Nehemia 9:16-18.

OVA LI VA PUMBWA OKUPEWA OUTEKUDULIKO

14, 15. (a) Ongahelipi Jehova a li a fila onghenda oshiwana shaye shaIsrael? (b) Oshike hatu lihongo konghedi omo Kalunga a li a ungaunga noshiwana shaye oshihoololwa?

14 Ovalevi ova tumbula meilikano lavo omanyono avali okondadalunde oo Ovaisrael va li va nyona diva konima eshi va udaneka pOmhunda yaSinai kutya otava ka diinina Omhango yaKalunga. Omolwomanyono oo, Ovaisrael ova  li va wana ngeno okweefiwa va file mombuwa. Ndele Ovalevi ova tanga Jehova meilikano tava ti: “Omolwefilonghenda loye linene ino va efa mombuwa. . . . Nomido 40 we va kalela noshisho. . . . Vo inava hepa sha. Noikutu yavo inai kulupa neemhadi davo inadi dinda.” (Neh. 9:19, 21) Kunena, Jehova ohe tu longekidile yo keshe osho twa pumbwa opo tu dule oku mu longela noudiinini. Inatu kala nande twa fa Ovaisrael omayovi ovo va li va fila mombuwa omolwokuhadulika nokuhe na eitavelo kwavo. Osha yela kutya oinima oyo oya “shangwa oku tu kumaida, [fyeni] ava twa hangika komaxulilo omafimbo ounyuni.” — 1 Kor. 10:1-11.

15 Shinyikifa oluhodi, konima eshi Ovaisrael va fyuulula Edu lEudaneko, ova li va hovela okulongela oikalunga yOvakaanan, naasho osha kwatela mo okuninga oinima inai koshoka nokuyamba po ovana vavo. Onghee hano, Jehova okwa li a efa oiwana yopoushiinda i hepekwe oshiwana shaye oshihoololwa. Eshi ve livela ombedi, Jehova okwe va fila onghenda ndele te va dimine po nokwe va xupifa momake ovatondi vavo. Jehova okwa kala te va dimine po “luhapu.” (Lesha Nehemia 9:26-28, 31.) Ovalevi ova ti: “Nomido dihapu wa li u nolukeno navo ndele we va londola nOmhepo yoye nomakanya ovaprofeti. Ndelenee vo va li inava hala okuuda. Onghee hano we va yandja momake oiwana yoilongo.” — Neh. 9:30.

16, 17. (a) Onghalo yOvaisrael eshi va dja moukwatwa oya li ya yooloka ko ngahelipi kwaayo yooxekulululwa eshi opo va i mEdu lEudaneko? (b) Ovaisrael ova li va dimina oushili ulipi, nova li va udaneka okuninga shike?

16 Nokuli nokonima eshi Ovaisrael va dja moukwatwa waBabilon, ova li va hovela okukala ihava dulika kuJehova. Oshike sha li sha ningwa po? Ovalevi ova twikila okwiilikana tava ti: “Paife ofye ovapika. Moshilongo tuu osho we shi pele ootate vetu vo va lye oiimati noipewa yasho, moshilongo tuu osho tu nokukala fye ovapika. Oshishipo shasho tashi pewa eehamba odo we di tula po di tu pangele omolwomatimba etu, . . . ndele fye otu li moudjuu munene.” — Neh. 9:36, 37.

17 Mbela Ovalevi ova li va hala okutya Kalunga okwa efela oshiwana shaye moudjuu shihe li pauyuki? Hasho nandenande! Ova dimina tava ti: “Oove omuyuki muashishe she tu hanga, osheshi Ove wa li [omudiinini] moilonga yoye, ndelenee fye twa li ovahenakalunga.” (Neh. 9:33) Opo nee, ova xulifa eilikano lavo lokuheliholamwene neudaneko la kwata moiti olo kutya oshiwana otashi ka dulika kOmhango yaKalunga. (Lesha Nehemia 9:38; 10:29) Eudaneko olo ove li shanga momukanda nowa li wa hakwa noihakifo yOvawiliki vOvajuda ve li 84. — Neh. 10:1-27.

18, 19. (a) Oshike twa pumbwa okuninga opo tu dule okuya mounyuni mupe waKalunga? (b) Otu na okutwikila okwiilikana kombinga yashike, nomolwashike?

18 Otwa pumbwa okupewa outekuduliko kuJehova opo tu kale twa wana oku ka xupifwa nokuya mounyuni waye mupe wouyuki. Omuyapostoli Paulus okwa pula ta ti: “Okaana olyelye ihaka dengwa kuxe?” (Heb. 12:7) Ohatu ka ulika kutya otwa tambula ko ewiliko laKalunga mokukalamwenyo kwetu ngeenge otwa kala ovadiinini moilonga yaye nokweefa omhepo yaye i tu vyule. Nongeenge otwa nyono enyono la kwata moiti, ohatu dulu okukala noushili kutya Jehova ote ke tu dimina po ngeenge otwe livele ombedi shili nokutambula ko nelininipiko outekuduliko waye.

19 Mafiku, Jehova ota ka tumbalekifa edina laye monghedi ya tongomana shi dulife eshi a li a mangulula Ovaisrael muEgipti. (Hes. 38:23) Ndele ngaashi ashike oshiwana shaye shonale sha li sha fyuulula shili Edu lEudaneko, Ovakriste aveshe ovo tava twikile okulongela Jehova noudiinini navo otava ka fyuulula omwenyo mounyuni waye mupe wouyuki. (2 Pet. 3:13) Molwaashi otu na etimaumbwile litunhula la tya ngaho, inatu efa nande okwiilikana kutya edina laJehova la tumbala nali yapulwe. Oshitukulwa sha landula ko otashi ka kundafana kombinga yeilikano limwe vali olo tu na okukatuka metwokumwe nalo opo tu hafele omanangeko noupuna aKalunga paife nofiyo alushe.