Inda koshikalimo

Inda kelandulafano etivali

Inda koshikalimo

Eendombwedi daJehova

Oshikwanyama

Oshungonangelo — Oshifo shokukonakonwa  |  Septemba 2013

Owa ninga ngoo omalunduluko?

Owa ninga ngoo omalunduluko?

“Shitukeni vape momadiladilo eni.” — ROM. 12:2.

1, 2. Ongahelipi onghedi omo twa tekulwa nosho yo omudingonoko omo tu li tai dulu oku tu nwefa mo?

ATUSHENI otwa nwefwa mo konghedi omo twa tekulwa nosho yo komudingonoko wetu. Ohatu djala monghedi yonhumba, otu hole oikulya yonhumba nohatu lihumbata monghedi yonhumba. Omolwashike mbela? Omolwaashi otwa nwefwa mo kovanhu ovo ve tu dingilila nosho yo keenghalo odo twa pita mudo.

2 Ashike ope na oinima imwe ya fimanenena i dulife onghedi yetu yokudjala nosho yo oikulya oyo tu hole. Pashihopaenenwa, eshi twa li ounona, otwa hongwa kutya oinima yonhumba oi li mondjila noya tambulwa ko ofimbo imwe ya puka noinai tambulwa ko. Ashike ovanhu ove na omataleko a yoolokafana e na sha naasho shi li mondjila naasho sha puka. Omahoololo oo hatu ningi otashi dulika a nwefwa mo keliudo letu. Ombibeli oya ti kutya luhapu ‘ovapaani ava vehe nomhango, ohava longo pashitwe eshi tashi pulwa komhango.’ (Rom. 2:14) Ndele mbela osho osha hala kutya ngeenge kape na omhango yokondadalunde ya dja kuKalunga, otu na ashike okushikula onghedi omo twa tekulwa nomifikamhango odo ovanhu va lenga moshitukulwa shetu?

3. Omolwomatomheno avali elipi Ovakriste vehe na ashike okushikula eenghedi nomifikamhango odo ovanhu va lenga?

3 Ope na omatomheno a fimana avali lwaapo kutya omolwashike Ovakriste vehe na ashike okushikula onghedi omo va tekulwa nomifikamhango odo ovanhu va lenga moitukulwa yavo. Lotete, Ombibeli oye tu dimbulukifa tai ti: “Ope nondjila tai talwa komunhu [ya] yuka; ndelenee exulilo layo eendjila defyo.” (Omayel. 16:25) Omolwokuhawanenena kwetu, itatu dulu lela okuyukifa eenghatu detu monghedi ya wanenena. (Omayel. 28:26; Jer. 10:23) Etivali, Ombibeli otai ulike kutya eenghedi nomifikamhango dounyuni oda nwefwa mo notadi wilikwa kuSatana oo eli ‘kalunga kefimbo lounyuni eli.’ (2 Kor. 4:4; 1 Joh. 5:19) Onghee hano, ngeenge otwa hala Jehova e tu nangeke noupuna  noku kale e tu hokwa, otu na okudulika kekumaido olo li li mOvaroma 12:2. — Lesha.

4. Oshike hatu ka kundafana moshitukulwa eshi?

4 Ope na oitwa yonhumba ya fimana oyo i li mOvaroma 12:2 oyo twa pumbwa okuyandja elitulemo le likalekelwa kuyo. (1) Omolwashike twa pumbwa ‘okushituka vape,’ ile tu tye, okuninga omalunduluko? (2) Okuninga omalunduluko okwa kwatela mo shike? nosho yo (3) Ongahelipi hatu dulu okuninga omalunduluko? Natu ka kundafaneni omapulo oo moshitukulwa eshi.

OMOLWASHIKE TWA PUMBWA OKUNINGA OMALUNDULUKO?

5. Paulus okwa li a shangela oolyelye eendjovo odo di li mOvaroma 12:2?

5 Eshi omuyapostoli Paulus a shangela Ovaroma, ka li a shangela ovo vehe fi ovaitaveli ile ovanhu vakwalukeshe, ndele okwa li a shangela Ovakriste vakwao ovavaekwa. (Rom. 1:7) Okwa li e va ladipika va ninge omalunduluko novaha ‘faafane nounyuni ou.’ Mo 56 O.P. lwaapo, oinima oyo Ovakriste vomuRoma va li ve na okuhenuka oya kwatela mo omifikamhango, eenghedindjikilile, omikalo nosho yo eenghedi dokudjala dOvaroma. Eshi Paulus a longifa oshitya “inamu” otashi ulike kutya vamwe vomuvo ova li va nwefwa mo kounyuni. Ndele mbela ovamwatate novamwameme vopefimbo opo ova li va nwefwa mo ngahelipi?

6, 7. Omolwashike sha li shidjuu okukala Omukriste pefimbo laPaulus?

6 Kunena, ovanhu ovo hava ka talela po koRoma ohava mono oikulukuma yeetembeli, eembila, omadimbulukifofano, oupale, omalupale omaudano nosho tuu. Imwe yomoinima oyo oya tungilwe mefelemudo lotete. Oinima oyo yomonakudiwa otai tu pe ouyelele u na sha nonghedi yokukalamwenyo nelongelokalunga lOvaroma vopefimbo lonale. Momambo ondjokonona omwa popiwa omaudano okulidenga Ovaroma, omafiyafanepo omatemba, oinyandwa nosho yo eemusika di na oikundafanwa i lili noku lili, oyo imwe yomuyo inai koshoka. Roma osha li oshilando sha punapala, novanhu ova li ve na eemhito dokulikola oiniwe ihapu. — Rom. 6:21; 1 Pet. 4:3, 4.

7 Nonande Ovaroma ova li ve na eetembeli dihapu nohava longele oikalunga ihapu, kava li ve na ekwatafano lopofingo noikalunga yavo. Elongelokalunga lavo ola li la kwatela mo unene oivilo ngaashi omadalo, omahombolo nosho yo omapako, noya li hai ningwa efiku keshe. Diladila ashike kutya osho osha li eshongo li fike peni kOvakriste vomuRoma. Vamwe vomuvo ova dja meputuko olo, nosha yela kutya ova li va ninga po omalunduluko opo va dule okuninga Ovakriste vashili, naasho ova li ve na okutwikila oku shi ninga nokuli nokonima eshi va ninginifwa.

8. Omolwashike ounyuni u li onhele ya nyika oshiponga kOvakriste?

8 Ngaashi muRoma shonale, nokunena ounyuni ou li onhele ya nyika oshiponga kOvakriste ovo ve liyapulila Jehova. Omolwashike mbela? Omolwaashi omhepo younyuni ohai ulikwa meenghedi dihapu. (Lesha Ovaefeso 2:2, 3; 1 Johannes 2:16.) Ounyuni ou tu li muo otau dulu oku tu ningifa tu nwefwe mo komahalo,  kokudiladila kwao, komifikamhango nosho yo keenghedi dao opo tu ninge oshitukulwa shao. Onghee hano, otu na omatomheno mahapu okudulika kekumaido la nwefwa mo olo kutya, ‘inamu faafana nounyuni ou, ndelenee shitukeni vape.’ Oshike tu na okuninga po opo tu shituke vape?

OMALUNDULUKO ELIPI TWA PUMBWA OKUNINGA?

9. Omalunduluko elipi vahapu va ninga fimbo inava ninginifwa?

9 Ngeenge omunhu okwa konakona Ombibeli ndele ta tula moilonga osho e lihonga mo, kungaho okwa hovela okweehena popepi naJehova. Omalunduluko oo ta ningi monghalamwenyo yaye omolwoinima oyo e lihonga otaa ulike kutya ota ningi exumokomesho. Oha efa po eenghedindjikilile domalongelokalunga oipupulu nosho yo onghedi ii yokukalamwenyo kwaye kwonale noha kulike omaukwatya a fa aKristus. (Ef. 4:22-24) Ohatu kala twa hafa okumona ovanhu omayovi omafele tava ningi exumokomesho la tya ngaho omudo keshe nohave liyapulile Jehova Kalunga nokuninginifwa. Osha yela kutya osho hashi hafifa omutima waJehova. (Omayel. 27:11) Ndele mbela omalunduluko oo oo ashike twa pumbwa okuninga?

Ovanhu vahapu ova pumbwa okudja mo mounyuni waSatana nokuninga omalunduluko (Tala okatendo 9)

10. Omolwashike okuninga omalunduluko kwa kwatela mo shihapu shihe fi oshike okuxwepopala?

10 Oshoshili kutya okuninga omalunduluko okwa kwatela mo shihapu shihe fi ashike okuninga exumokomesho. Emboitya limwe lOmbibeli ola ti kutya outumbulilo ‘shitukeni vape’ oo u li mOvaroma 12:2 otau ulike kokupepaleka ile okulundulula omadiladilo etu kekwafo lomhepo iyapuki. Onghee hano, eshi Omukriste ta ningi omalunduluko, ke na ashike okweefa po eenghedindjikilile daye dii, okupopya inaku koshoka ile elihumbato lii. Ovanhu vamwe ovo vehe shii osho Ombibeli otai hongo navo ohava kendabala okuhenuka oinima ii ya tya ngaho. Ndele mbela tu li Ovakriste oshike tu na okuninga po opo tu lundulule onghedi yetu yokudiladila nosho yo onghedi omo hatu kala tu uditile oinima?

11. Paulus okwa ulika kutya omunhu oku na okuninga omalunduluko monghedi ilipi?

11 Paulus okwa ti: “Shitukeni vape momadiladilo eni.” ‘Omadiladilo’ otaa ulike koukwatya wetu wokudula okudiladila. Ndele paMbibeli, omadiladilo okwa kwatela mo osho tu hole okudiladila kusho, oikala nosho yo okudula kwetu okutomhafana. Metukulwa lotete lOvaroma, Paulus okwa popya kombinga yovanhu ovo ve na ‘eendunge dii.’ Ovanhu va tya ngaho ova li ve hole ‘okuhenouyuki, oluhaelo, owii, olwisho, oumbudi, ve yadi efupandubo, edipao, omakoto’ nosho yo oinima ikwao ii. (Rom. 1:28-31) Onghee hano, oshi shii okuudiwa ko eshi Paulus a li a kumaida ovo va kulila momudingonoko wa tya ngaho nova ninga ovapiya vaKalunga va ‘shituke vape momadiladilo avo.’

12. Ovanhu vahapu mounyuni ove na oikala yopamadiladilo ya tya ngahelipi, nomolwashike ya nyika oshiponga kOvakriste?

12 Shinyikifa oluhodi, mounyuni omu otwa dingililwa kovanhu ovo ve na oikala yopamadiladilo ya fa oyo ya hokololwa kuPaulus. Otashi dulika hava diladila kutya okukala metwokumwe  nomifikamhango nosho yo nomafinamhango oshinima shonghuluyonale ile kutya kape oo e na okukondjifa mukwao a dulike kuo. Ovahongi novadali vahapu ohava efa ounona va ninge ngaashi va hala. Ohave va hongo nokuli kutya keshe umwe oku na oufemba wokutokola kuye mwene osho shi li mondjila naasho sha puka. Ova itavela kutya ito dulu lela okushiiva osho shi li mondjila naasho sha puka. Nokuli novanhu vahapu ovo have liti kutya ohava longele Kalunga ohava kala ve udite kutya ove na emanguluko lokuninga osho sha yuka pataleko lavo, nopehe na okudulika kuKalunga nokoipango yaye. (Eps. 14:1) Oikala ya tya ngaho oya nyika oshiponga kOvakriste vashili. Ngeenge inatu lungama, otashi dulika nafye tu kulike etaleko la tya ngaho ngeenge tashi uya pomalongekido ehangano. Otashi dulika tuha kale twa hala okushikula omilandu deongalo ile nokuli tu kale hatu ngongota shi na sha nakeshe shimwe osho tuhe hole. Ile otashi dulika itatu tu kumwe nomayele Ombibeli e na sha nomalihafifo, okulongifa ointaneta nosho yo e na sha nehongo lopombada.

‘Onya keshe, ekeshuko nehandu, efulakato netukano nai kale kokule nanye.’ — Ef. 4:31

13. Omolwashike tu na okudiladila moule shi na sha nounhu wetu womeni?

13 Ngeenge inatu hala okufaafana nounyuni ile okuvyulwa kuo, otwa pumbwa okudiladila moule kombinga yoikala yetu yomomutima, omaliudo etu, omalalakano nosho yo oinima oyo twa lenga. Vamwe otashi dulika ve tu lombwele kutya ohatu shi endifa nawa molwaashi kave shii ounhu wetu womeni. Ndele ofye ashike vene tu shii lelalela kutya otwa efa osho twe lihonga mOmbibeli shi tu kwafele tu ninge omalunduluko nosho yo kutya ohatu twikile okuninga omalunduluko ile hasho. — Lesha Jakob 1:23-25.

NGHEE HATU DULU OKUNINGA OMALUNDULUKO

14. Oshike tashi dulu oku tu kwafela tu mone kutya omalunduluko elipi twa pumbwa okuninga?

14 Opo tu ninge omalunduluko, otwa pumbwa okulundulula osho shi li moule womitima detu, sha hala kutya, ounhu wetu womeni. Ndele mbela oshike tashi dulu oku tu kwafela tu ninge ngaho? Ngeenge otwe lihongo osho Jehova a hala tu ninge, osho shi li metwokumwe nelalakano laye olo li li mOmbibeli, onghedi omo hatu ke linyenga kwaasho twa lesha oyo tai ka holola osho shi li momitima detu nonokutya omalunduluko elipi twa pumbwa okuninga opo tu katuke metwokumwe ‘nehalo laKalunga.’ — Rom. 12:2; Heb. 4:12.

15. Omalunduluko elipi hatu ningi ngeenge otwa mewa kuJehova?

15 Lesha Jesaja 64:8. Efaneko olo omuprofeti Jesaja a longifa otali tu hongo oshilihongomwa sha fimana. Ongahelipi Jehova oo eli Omumi wetu he tu me ngaashi elova? Jehova iha lundulula eholokepo letu lokombada, ngaashi nande omoku tu ningifa tu kale hatu monika nawa ile tu na olupe lokombada lihokwifa. Iha yandje edeulo lopalutu ndele olopamhepo. Ngeenge otwe mu pitike e tu me, ohatu ka ninga omalunduluko meni letu, ile tu tye, opamhepo, naasho osho twa pumbwa opo tu dule okukondjifa enwefemo lounyuni. Ndele mbela ongahelipi Jehova he tu me?

16, 17. (a) Yelifa kutya omuhongi woiyuma oha ningi ngahelipi edu opo a honge oshiyuma shiwa. (b) Ongahelipi Eendjovo daKalunga hadi tu kwafele tu lunduluke notu kale tu na ongushu momesho aJehova?

16 Opo omumi a me oiyuma yongushu, oku na okulongifa edu olo liwa elela. Ashike ope na oinima ivali oyo a pumbwa okuninga. Tete oku na okuwapeka edu mokukufa mo oimbodi ndele te li tu tike. Opo nee, ta tile mo omeva oshiyeleke noku li lunga opo li dule okumewa.

17 Didilika kutya omumi oha tutike manga edu, noha tile mo vali omeva opo a dule oku li lunga, opo nee, ta me oshiyuma osho a hala, nokuli naashi shiwa elela. Ngaashi ashike omeva haa lundulula edu, eendjovo daKalunga nado otadi dulu okulundulula okukalamwenyo kwetu. Ohadi tu kwafele tu efe po onghedi yetu yokudiladila yonale fimbo inatu shiiva Kalunga nokuninga omalunduluko ndele hatu kala tu  na ongushu momesho aye. (Ef. 5:26) Diladila ashike kutya olungapi twa kala hatu ladipikwa tu leshe Ombibeli efiku keshe nokukala hatu i alushe kokwoongala kwopaKriste oko haku kundafanwa alushe Eendjovo daKalunga. Omolwashike mbela hatu ladipikwa tu ninge oinima oyo? Omolwaashi ngeenge otwe shi ningi, ohatu pitike Jehova e tu me. — Eps. 1:2; Oil. 17:11; Heb. 10:24, 25.

Okuninga omalunduluko otaku ku kwafele u shiive nghee u na okuungaunga nomaupyakadi shi dulife nale (Tala okatendo 18)

18. (a) Omolwashike twa pumbwa okudilonga ngeenge otwa hala Eendjovo daKalunga di tu nwefe mo nodi tu lundulule? (b) Omapulo elipi taa dulu oku tu kwafela?

18 Opo Eendjovo daKalunga di tu lundulule, otwa pumbwa okuninga shihapu shihe fi ashike oku di lesha nokulihonga mo sha. Ovanhu vahapu ohava lesha Ombibeli lwoikando nohava kala ve shii osho tai ti. Otashi dulika wa shakeneka oohandimwe moukalele ovo hava ningi ngaho. Vamwe nokuli ove lihonga eevelishe donhumba momutwe. * Ndele otashi dulika inai lundulula lela onghedi yavo yokudiladila noyokukalamwenyo. Omolwashike mbela? Opo omunhu a nwefwe mo noku lundululwe kEendjovo daKalunga, oku na oku di pitika di ye moule womutima waye. Onghee hano, otu na okukala hatu kongo efimbo lokudilonga kwaasho twe lihonga. Oshiwa okulipula kutya: ‘Onda tomhwa ngoo kutya eendjovo edi oda kwatela mo shihapu shihe fi ashike ehongo lelongelokalunga? Onda mona ngoo oumbangi oo tau ulike kutya ei oyo oshili? Ongahelipi handi dulu okutula moilonga mokukalamwenyo kwange osho nde lihonga, ponhele yoku shi honga ashike vamwe? Onda itavela ngoo kutya osho handi lihongo osha dja kuJehova, a fa ta popi naame pauhandimwe?’ Okudiladila nokudilonga komapulo a tya ngaho otaku dulu oku tu kwafela tu ehene popepi elela naJehova. Ohole yetu yoku mu hola otai ka kala yomoule. Ngeenge osho twe lihonga osha kumu omitima detu monghedi ya tya ngaho, otashi ke tu linyengifa tu ninge omalunduluko oo taa hafifa Kalunga. — Omayel. 4:23; Luk. 6:45.

19, 20. Omayele opaMbibeli elipi taa dulu oku tu etela ouwa ngeenge otwe a tula moilonga?

19 Okulesha Eendjovo daKalunga pandjikilile nokudilonga kudo otashi ke tu linyengifa tu twikile ‘okulidula omunhu mukulu pamwe noilonga yaye, nokudjala omunhu mupe.’ (Kol. 3:9, 10) Ohatu ka pondola mokuninga ngaho ngeenge otwa udu ko nawa Eendjovo daKalunga nokutula moilonga osho twe lihonga. Ngeenge otwa djala omunhu mupe otashi ke tu amena keemwiyo daSatana.

20 Omuyapostoli Petrus okwe tu dimbulukifa ta ti: ‘Ngaashi ovana hava dulika, mokukala kweni inamu shikula vali omauhalu mwe a wanifa nale. Nye mu ninge yo ovayapuki mokukala kweni akushe.’ (1 Pet. 1:14, 15) Ngeenge otwa ningi keshe osho hatu dulu opo tu efe po okudiladila noikala yetu yonale nosho yo okuninga omalunduluko, otashi ke tu pefa omanangeko noupuna, ngaashi hatu ke shi mona moshitukulwa tashi shikula.

^ okat. 18 Tala oshihopaenenwa osho shi li mOshungonangelo ye 1 Februali 1994, epandja 9, okatendo 7.