Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) SEPTEMBA 2013

Omapulo a dja kovaleshi

Omapulo a dja kovaleshi

Omolwashike Jesus a li a lila fimbo ina nyumuna Lasarus, ngaashi sha popiwa muJohannes 11:35?

Oshi li paushitwe okulila ngeenge twa filwa omuholike wetu molwaashi ohatu kala twa pongola. Nonande Jesus okwa li e hole Lasarus, ka li a lila molwaye ndele omolwovapambele nookaume kaLasarus. Osho okwa li eshi ninga molwaashi okwa li e va uditile olukeno, ngaashi sha ulikwa membo laJohannes. — Joh. 11:36.

Eshi Jesus a uda kutya Lasarus ota vele, ina endelela okuya ko e ke mu velule. Ehokololo ola ti: “Eshi [Jesus] e mu uda ta vele, okwa kala ko natango omafiku avali konhele oko a li.” (Joh. 11:6) Omolwashike Jesus ina ya diva? Okwa li eshi ninga nelalakano. Okwa ti: “Oudu ou kau fi wokufya, ndelenee owokufimanekifa Kalunga, Omona waKalunga opo a fimanekifwe kuwo.” (Joh. 11:4) Oudu waLasarus kawa li wokufya meityo olo kutya Jesus okwa li ta ka ‘fimanekifa Kalunga’ okupitila mefyo laLasarus. Ngahelipi mbela? Jesus okwa li ta ka longa oshikumwifilonga shinene mokunyumuna kaume kaye mombila.

Eshi Jesus a li a kundafana novahongwa vaye pomhito oyo, okwa li a faafanifa efyo neemhofi. Nomolwaasho a li e va lombwela kutya ‘ota i ko a ka pendule’ Lasarus. (Joh. 11:11) Eshi Jesus a li ta nyumuna Lasarus okwa li ashike a fa omudali ta pendula okaana kaye ka kofa. Onghee hano, efyo laLasarus kala li tali dulu oku mu nyikifa oluhodi.

Oshike hano sha li she linyengifa Jesus a lile? Natango ehokololo lOmbibeli ole tu pa enyamukulo. Eshi Jesus a shakena nomumwainakadona waLasarus, Maria, nokwa mona nghee Maria nosho yo vamwe tava lili, okwa “tukuluka momhepo yaye ndee ta kwatwa kolukaka.” Jesus okwa li a yahama eshi a mona kutya ova nyika oluhodi ndele ta “tukuluka momhepo.” Nomolwaasho a li a “lila.” Osha li sha nyemateka Jesus okumona ookaume kaye ovaholike va wililwa po koluhodi. — Joh. 11:33, 35.

Ehokololo eli otali ulike kutya Jesus oku na eenghono nota dulu okwaalulila ovafi momwenyo nomoukolele mounyuni mupe tau uya. Osho otashi tu ulikile kutya Jesus oku u uditile oukwao wananghali ovo va filwa ovaholike vavo omolwaAdam. Oshilihongomwa vali shimwe osho hatu lihongo mehokololo olo oshosho kutya, otu na okuudila olukeno ovo ve li moluhodi molwaashi va filwa ovaholike vavo.

Jesus okwa li e shii kutya ota ka nyumuna Lasarus. Ndele nande ongaho, okwa li a lila omolwohole yaye yomoule nolukeno olo a li e uditile ookaume kaye. Sha faafana, olukeno letu otali dulu oku tu kwafela tu ‘lile naava hava lili.’ (Rom. 12:15) Okulila itaku ulike kutya omunhu ke na eitavelo menyumuko. Jesus ine tu tulila po tuu oshihopaenenwa shiwa shokuudila oukwao wananghali ovo tava lili omolwovaholike vavo ovo va fya eshi kwa li a lila nonande okwa li e shii kutya ota ka nyumuna Lasarus.