Inda koshikalimo

Inda kelandulafano etivali

Inda koshikalimo

Eendombwedi daJehova

Oshikwanyama

Oshungonangelo — Oshifo shokukonakonwa  |  Auguste 2013

Ovadali tekuleni ovana veni okudja kouhanana

Ovadali tekuleni ovana veni okudja kouhanana

OMBIBELI oya ti: “Heeno, ovana ovamati — ovo oshali yOmwene, nokumona oludalo — osho ondjabi iwa.” (Eps. 127:3) Onghee hano, itashi kumwifa eshi ovadali Ovakriste hava hambelele nehafo okahanana ngeenge ka dalwa.

Ndele nonande ohava kala va hafa, okaana oha ke va etele yo oinakuwanifwa ya kwata moiti. Opo okaana ka kule noka kale ke na oukolele, oka pumbwa alushe oikulya ina oitungifi. Ashike opo okaana ka twikile okukala melongelokalunga lashili, oka pumbwa oikulya yopamhepo nosho yo ewiliko lovadali eshi tava kendabala okufindila muko omafinamhango aKalunga. (Omayel. 1:8) Ndele mbela edeulo olo oli na okuhovela naini, noli na okukala la kwatela mo shike?

 OVADALI OVA PUMBWA OMAYELE

Ombibeli oya popya shi na sha nomulumenhu umwe womepata laDan wedina Manoah, oo a li ha di modoolopa yedina Sorea muIsrael shonale. Omweengeli waJehova okwa li a lombwela omukulukadi waManoah oo a li ongadji kutya ota ka dala okamati. (Ovatok. 13:2, 3) Ndele nonande Manoah nomukulukadi waye ova li va hafifwa konghundana oyo, ova li yo tave lipula shi na sha nanghee tava ka tekula okaana kavo. Nomolwaasho Manoah okwa li a ilikana ta ti: “Akutu Omwene, omulumenhu waKalunga, ou we mu tuma, ne uye vali lumwe kufye, opo ye e tu longe nhumbi tu nokuninga nokaana okamati aka taka ka dalwa.” (Ovatok. 13:8) Manoah nomukulukadi waye ova li va honga okaana kavo Simson omhango yaKalunga notashi ulike kutya oka li ka tambula ko osho ka hongwa. Ombibeli oya ti: ‘Omhepo yOmwene ya hovela okuendifa’ Simson. Oshidjemo, Simson okwa ka longa oilonga yeenghono ihapu e li umwe womovatokolipangeli vaIsrael. — Ovatok. 13:25; 14:5, 6; 15:14, 15.

Manoah okwa li a ilikana shi na sha nanghee ve na okutekula okaana kavo oko ka li taka ka dalwa

Mbela okaana oke na okutekulwa okudja eshi ke fike peni? Timoteus okwa li a hongwa ‘omishangwa diyapuki [okudja kouhanana, NW]’ kuina Eunike nokuinakulu Loide. (2 Tim. 1:5; 3:15) Osha yela kutya, Timoteus okwa li a tekulwa nOmishangwa okudja kouhanana waye.

Oshi li pandunge kovadali Ovakriste ngeenge tava pula ewiliko meilikano nokulilongekida komesho yefimbo okudeula okaana kavo “okudja kouhanana.” Omayeletumbulo 21:5 okwa ti: “Eemhangela dovadiinini tadi eta ouwa auke.” Fimbo va teelela okaana ka dalwe, nopehe na omalimbililo ovadali ove na okuninga omalongekido a pumbiwa. Otashi dulika nokuli va ninge elandulafano loinima oyo okaana taka ka pumbwa. Ndele osha fimana yo va ninge elongekido li na sha nokuhonga okaana oinima yopamhepo. Ashike ove na okulalakanena okuhonga okaana kavo okudja kouhanana wako.

Embo limwe li na sha nokukula kwounona ola ti kutya eemwedi dopehovelo okudja eshi okaana opo ka dalwa, ouluvi wako ohau kwata oinima neendelelo. Onghee hano, osha fimanenena kovadali okulongifa okafimbo oko opo va honge okaana kavo kombinga yaJehova nomifikamhango daye.

Omumwameme umwe omukokolindjila wondjikilile okwa popya shi na sha nokamonakadona kaye kashona a ti: “Onda kala handi i nako moukalele okudja ashike eshi ke na omwedi umwe. Nonande ka ka li ke udite ko osho tashi ningwa po, ondi shi shii kutya oshe ka etela ouwa. Eshi ka ka wanifa omido mbali, oka li haka yandje oufo kwaavo hatu shakeneke moukalele kehe na oumbada.”

Okutekula okaana okudja kouhanana ohashi imike oiimati iwa. Ashike, ovadali ohave shi mono mo kutya okutekula ovana vavo oshi na omashongo.

“LONGIFENI NAWA EFIMBO”

Molwaashi ounona ihava yandje lela elitulemo koshinima shimwe ashike efimbo lile, otashi dulu okukala shidjuu kovadali oku va honga. Ounona ove na okatalekonawa nohava kala ve na ohokwe mukeshe shimwe she va dingilila. Mbela ovadali ove na okuninga po shike opo ve va kwafele va yandje elitulemo kwaasho tave va hongo.

Diladila kwaasho sha popiwa kuMoses muDeuteronomion 6:6, 7, okwa ti: ‘Eendjovo edi ame handi ku lombwele nena, nadi kale momutima woye, ndele ove u noku i findila movana voye noku i tonga fimbo u li omutumba meumbo loye ile fimbo u li mondjila nongenge to ka nangala nongenge to penduka.’ Oshitya “findila” otashi yandje ediladilo lokuhonga to endulula oshinima lwoikando. Okaana kashona oka fa okameno kanini oko ka pumbwa okutekelwa alushe. Molwaashi okweendulula ohaku kwafele ovakulunhu va dimbuluke oinima ya fimana, otaku dulu yo okukwafela ounona.

Opo ovadali va honge ounona vavo oshili yOmbibeli, ova pumbwa okukala hava kala navo efimbo la wana. Ndele molwaashi onghalamwenyo oye lipyakidila, otashi dulu okukala shidjuu okutula po efimbo lokukala nounona vavo. Omuyapostoli Paulus okwa ladipika Ovakriste va kale hava ‘longifa nawa efimbo’ opo va mone omhito yokuninga oinima oyo ya fimanenena. (Ef. 5:15, 16) Mbela osho ove na oku shi ninga ngahelipi? Omumwatate umwe omukulunhuongalo oo e na omukulukadi waye ha kala e lipyakidila noukokolindjila okwa li ha unganeke nawa oinima yaye opo a dule okumona efimbo la wana lokukala nokudeula okaana kavo, nokwa li yo ha tula po efimbo lokukwafela eongalo nokuya  koilonga yokulikongela omboloto. Okwa ti: “Ongula keshe fimbo inandi ya koilonga, ame nomukulukadi wange ohatu ka leshele mEmbo lange lomahokololo Ombibeli ile mokambo Konakona Omishangwa keshe efiku. Komatango, ohatu shilipaleke kutya otwe ka leshela fimbo inaka ka nangala, nongeenge hatu i moukalele ohatu i nako. Inatu hala okuxutwifa omhito yoku ka deula fimbo kanini.”

‘OVANA OVAMATI OVA FA OIKUTI’

Otwa hala ounona vetu eshi tava kulu, va ka kale ovanaendunge. Onghee hano, elalakano letu loku va tekula olo okufindila muvo ohole yokuhola Kalunga. — Mark. 12:28-30.

Epsalme 127:4 ola ti: “Ngaashi oikuti i li meke lofule, ovana ovamati osho tava kala mounyasha wavo.” Ounona otava faafanifwa noikuti oyo ya pumbwa okulukilwa nawa opo omuumbi a yashe oshishonekwa shaye. Omuumbi oha kala e na efimbo lixupi lokulukila oshikuti shaye nongeenge osha di mo meke laye, ita dulu vali oku shi alula. Sha faafana, ounona ihava kalele po okukula, ndele tava ka kala kuvo vene. Nomolwaasho osha fimana kovadali okulongifa efimbo olo lixupi va honge ovana vavo va kale ve hole eemhango daKalunga nova dulike kudo.

Omuyapostoli Johannes okwa shanga shi na sha novana vaye vopamhepo a ti: “Ame kandi nehafo limwe, li dule eli, eshi handi udu ovamwange hava ende moshili.” (3 Joh. 4) Ovadali Ovakriste navo otava dulu okupandula ovana vavo ngeenge otava “ende moshili.”