Inda koshikalimo

Inda kelandulafano etivali

Inda koshikalimo

Eendombwedi daJehova

Oshikwanyama

Oshungonangelo — Oshifo shokukonakonwa  |  Auguste 2013

Konakona kutya ove omunhu a tya ngahelipi

Konakona kutya ove omunhu a tya ngahelipi

‘Omu nokuhangika mwa tya ngahelipi moweenda uyapuki nometilokalunga?’ — 2 PET. 3:11.

1, 2. Otu na okukala ‘ovanhu va tya ngahelipi’ opo tu kale twa hokiwa kuKalunga?

OVANHU vahapu ohava kala ve na ohokwe mwaasho vakwao tava diladila. Ndele tu li Ovakriste, mbela katu na okukala hatu lipula unene naasho Jehova ta diladila shi na sha nafye? Kakele kaasho, Jehova oye a fimanenena meshito alishe noye ‘ofifiya yomwenyo.’ — Eps. 36:10.

2 Omuyapostoli Petrus okwa yelifa kutya ngeenge otwa hala okukala twa hokiwa kuJehova, otu na okukala “moweenda uyapuki nometilokalunga.” (Lesha 2 Petrus 3:11.) ‘Okweenda’ kwetu oku na okukala kuyapuki, sha hala okutya, otu na okukala twa koshoka paenghedi, pamadiladilo nosho yo pamhepo. Shimwe vali, otwa pumbwa okukala hatu longo oilonga ‘yometilokalunga’ hatu linyengifwa kohole yoku hola Kalunga noketilofimaneko. Ndele opo tu kale twa hokiwa kuKalunga, katu na ashike okudiladila shi na sha nelihumbato letu ndele nounhu yo wetu womeni. Molwaashi Jehova oha “panaapana omutima,” ota dulu okumona kutya elihumbato letu ola koshoka ile hasho nonokutya ohatu mu longele oye aeke. — 1 Omaf. 29:17.

3. Omapulo elipi tu na okulipula shi na sha nekwatafano letu naKalunga?

3 Satana Ondiaboli ina hala tu kale twa hokiwa kuKalunga. Ota kendabala ngaashi ta dulu opo a nyone po ekwatafano letu naJehova. Satana ota twikile oku tu pukifa opo tu efe po okulongela Kalunga. (Joh. 8:44; 2 Kor. 11:13-15) Onghee hano, oshi li pandunge okulipula kutya: ‘Satana oha pukifa ngahelipi ovanhu? Ongahelipi handi dulu okwaamena ekwatafano lange naJehova?’

SATANA OHA PUKIFA NGAHELIPI OVANHU?

4. Satana oha kendabala okunwefa mo shike opo a nyone po ekwatafano letu naKalunga, nomolwashike?

4 Omuhongwa Jakob okwa ti: “Keshe umwe ota hongaulwa  kokahalu kaye mwene, oko hake mu shili notake mu heke; nokahalu ngenge ka fimbapala, otaka dala oulunde, noulunde eshi [wa] wanifwa, otau dala efyo.” (Jak. 1:14, 15) Satana ota kendabala okunwefa mo omitima detu, odo di li odjo yomahalo etu, opo a nyone po ekwatafano letu naKalunga.

5, 6. (a) Satana oha kendabala ngahelipi oku tu nwefa mo? (b) Oinima ilipi Satana ha longifa opo a kulike omahalo a puka momitima detu, noku na owino u fike peni woku i longifa?

5 Satana oha kendabala ngahelipi okunwefa mo omitima detu? Ombibeli oya ti: ‘Ounyuni aushe ou li mepangelo lomunawii.’ (1 Joh. 5:19) Shimwe shomoilwifo oyo Satana ha longifa osho oinima ‘oyo i li mounyuni.’ (Lesha 1 Johannes 2:15, 16.) Oule womido omayovi, Ondiaboli oya kala tai ungauneke noukeka ounyuni wayo opo i kendabale oku tu nwefa mo. Onghee hano, molwaashi otu li mounyuni waSatana, otwa pumbwa okulungamena omakoto aye. — Joh. 17:15.

6 Satana oha kendabala okukulika omahalo mai momitima detu. Omuyapostoli Johannes okwa tumbula oinima itatu oyo Satana ha longifa: (1) “okahalu kombelela,” (2) ‘okahalu komesho’ (3) “noifulalala yokukalamwenyo.” Satana okwa li a longifa oinima oyo opo a yeleke Jesus eshi a li mombuwa. Kunena, Satana okwa pyokoka mokulongifa oinima oyo molwaashi okwa kala te i longifa oule womido, noku shii kutya shilipi po ta dulu okulongifa ngeenge ta yeleke omunhu keshe. Fimbo inatu ka kundafana nghee hatu dulu okuliamena kenwefemo lOndiaboli, natu ka taleni kunghee ya li ya pondola okupukifa Eva ndele kaya li ya dula okupukifa Omona waKalunga.

“OKAHALU KOMBELELA”

Satana okwa li a longifa “okahalu kombelela” opo a pukife Eva (Tala okatendo 7)

7. Satana okwa li a longifa ngahelipi “okahalu kombelela” opo a pukife Eva?

7 Ovanhu ove shii kutya ova pumbwa oikulya opo va kale nomwenyo. Omushiti wetu okwa shita edu monghedi omo hali dulu okumenifa oikulya ihapu. Satana otashi dulika a kendabale okulongifa omahalo etu opaushitwe oikulya opo e tu imbe tu longe ehalo laKalunga. Natu ka taleni nghee a li a ningila Eva oshinima osho. (Lesha Genesis 3:1-6.) Satana okwa li a lombwela Eva kutya ota dulu okulya oshiimati ‘shomuti wokushiiva ouwa nowii’ ndele ita fi, nonokutya shimha a li ko komuti oo ota kala a fa Kalunga. (Gen. 2:9) Paulelalela, Ondiaboli oya li tai ti kutya Eva ina pumbwa okudulika kuKalunga opo a kale nomwenyo. Oyo kai fi tuu oipupulu inyanyalifa! Eva okwa li e na omahoololo opavali eshi a lombwelwa ediladilo la tya ngaho: Okwa li ta dulu oku li ekelashi ile a kale ta diladila kulo nokweefa omahalo okulya oshiimati osho a kule muye. Nonande Eva okwa li a manguluka okulya komiti dikwao domoshikunino, okwa li a hoolola okukala ta diladila kwaasho Satana e mu lombwela shi na sha nomuti  wopokati koshikunino, ndele ta “kufa oiimati yao nokwa lya.” Kungaho, Satana okwa ningifa Eva a kulike ehalo loshinima osho a dilikwa kOmushiti waye.

Jesus okwa kala e shii kutya oshike sha fimanenena (Tala okatendo 8)

8. Ongahelipi Satana a li ta kendabala okuyeleka Jesus ta longifa “okahalu kombelela,” nomolwashike ina pondola?

8 Satana okwa li a longifa omwiyo wa faafana naao a yula nao Eva opo a yeleke Jesus mombuwa. Konima eshi Jesus a kala e lidilika oikulya omitenya 40 nomaufiku 40, Satana okwa li ta kendabala okulongifa ehalo laJesus loikulya opo e mu yule. Satana okwa ti: “Oove ngenge Omona waKalunga, lombwela hano emanya eli li shituke omungome.” (Luk. 4:1-3) Jesus okwa li e na omahoololo opavali: Okwa li ta dulu okulongifa eenghono daye dopashikumwifilonga opo a wanife po omhumbwe yaye yoikulya ile okuhe di longifa. Ndele Jesus okwa li e shii kutya ita dulu okulongifa eenghono da tya ngaho omolwomalalakano okuliholamwene. Nonande okwa li a fya ondjala, okulipalula hako kwa li kwa fimanenena kuye ku dule okukaleka po ekwatafano laye naJehova. Nomolwaasho okwa nyamukula Satana ta ti: “Hakomungome auke omunhu ta kala e nomwenyo, ndelenee okondjovo keshe tai di mokanya kaKalunga.” — Mat. 4:4.

‘OKAHALU KOMESHO’

9. Outumbulilo ‘okahalu komesho’ owa hala okutya shike, nongahelipi Satana a li a longifa okahalu oko opo a pukife Eva?

9 Johannes okwa tumbula yo ‘okahalu komesho’ oko Satana ha longifa opo e tu yule. Outumbulilo oo otau ulike kutya omunhu ota dulu okuhovela okukala a hala oshinima molwaashi ashike a kala te shi tale. Satana okwa li a longifa okahalu komesho opo a pukife Eva, eshi e mu lombwela ta ti: “Omesho eni [otaa] pashuka.” Molwaashi Eva okwa kala ta konenene oshiimati osho a li a dilikwa, kwa ka kala a halelela oku shi lya. Eva okwa mona kutya omuti otau “hafifa omesho.”

10. Omonghedi ilipi Satana a li a longifa ‘okahalu komesho’ opo a yeleke Jesus, na Jesus okwa li e linyenga ngahelipi?

10 Satana okwa li a longifa ngahelipi okahalu komesho opo a kendabale okupukifa Jesus? Satana okwa li “e mu ulikila oilongo aishe yomounyuni mepakumo limwe alike ndee ta ti kuye: Epangelo laaishe eli nefimano lalo ohandi li ku pe.” (Luk. 4:5, 6) Jesus ka li a mona lelalela oilongo aishe mepakumo leisho, ndele Satana okwa li e mu ulikila memoniko oshinge shoilongo aishe oyo opo ngeno Jesus a kale e i hokwa. Satana okwa lombwela Jesus ta ti: “Ove ngenge to twile nge eengolo, aishe ei otai ningi yoye.” (Luk. 4:7) Jesus ka li nande a hala okukala a tumbala ngaashi Satana a li e mu halela. Nomolwaasho okwa li a nyamukula meendelelo ta ti: “[Opa] shangwa: Omwene Kalunga koye u noku mu twila eengolo noye aeke u noku mu kalela.” — Luk. 4:8.

 ‘OIFULALALA YOKUKALAMWENYO’

11. Ongahelipi Eva a li a pukifwa kuSatana?

11 Xuuninwa, Johannes okwa li a tumbula ‘oifulalala yokukalamwenyo.’ Eshi Adam naEva va li ovo aveke kombada yedu, kava li tava dulu okuliulika omolwoiniwe yavo. Ashike ova li va kwatwa kounhwa. Eshi Satana a li ta yeleke Eva, okwa li e mu lombwela kutya Kalunga ote mu ngungunine oshinima shonhumba shiwa. Ondiaboli oya lombwela Eva kutya efiku tuu olo ta li “komuti wokushiiva ouwa nowii,” ota ka ‘shiiva ngaashi Kalunga ouwa nowii.’ (Gen. 2:17; 3:5) Kungaho, Satana okwa li ta ti kutya, Eva ota dulu okukala a manguluka ko kuJehova. Osha yela kutya ounhwa oo wa li wa ningifa Eva a itavele oipupulu yaSatana. Eva okwa li a lya oshiimati osho a li a dilikwa, ta diladila kutya ita ka fya shili. Ka li tuu a puka!

12. Omonghedi imwe ilipi Satana a li ta kendabala okuyeleka Jesus, na Jesus okwa li e linyenga ngahelipi?

12 Mepingafano naEva, Jesus okwe tu tulila po oshihopaenenwa shiwa shelininipiko. Satana okwa li ta kendabala okuyeleka Jesus monghedi imwe vali, ndele Jesus okwa li a anya nokuli okuliulika molwaashi ka li a hala okuyeleka Kalunga. Ngeno okwa ningile ngaho, ngeno okwa ulika kutya oku na ounhwa. Ndele ponhele yaasho, Jesus okwa nyamukula monghedi ya yela noya yukilila ta ti: “Okwa tiwa: Ino shinda Omwene Kalunga koye.” — Lesha Lukas 4:9-12.

ONGAHELIPI HATU DULU OKWAAMENA EKWATAFANO LETU NAJEHOVA?

13, 14. Yelifa nghee Satana ha kendabala oku tu pukifa kunena.

13 Kunena, Satana oha kendabala oku tu yeleka monghedi ya faafana naayo a li a yeleka Eva naJesus. Ondiaboli ohai longifa “okahalu kombelela” opo i yeleke ovanhu va ninge oinima inai koshoka ile va lye nova nwe sha pitilila. Ohai longifa yo ‘okahalu komesho’ opo i yeleke ovanhu va tale omafano oipala, naunene tuu kointaneta. Ondiaboli ohai longifa ‘oifulalala yokukalamwenyo’ opo i ningife ovanhu va kwatwe kounhwa, va kale va hala eenghonopangelo, etumbalo nova kale va hala oiniwe ihapu.

Omafinamhango Ombibeli elipi tae ke ku kwafela ngeenge owe lihange meenghalo edi? (Tala okatendo 13, 14)

14 Oinima oyo i li mounyuni oya fa oukulya ovo hava longifwa komukwati weeshi. Oshi ohai mono okakulya ka fa taka monika nawa, ndele pokati ka ko ope na ondjolo. Satana oha longifa oinima oyo tu wete twa fa twe i pumbwa opo e tu ningife tu nyone eemhango daKalunga. Ndele omayeleko a tya ngaho omonanguwi okwa nuninwa okunwefa  mo omahalo etu nokunyateka omitima detu. Ohae tu ningifa tu diladile kutya okuwanifa po eemhumbwe detu nokukala tu na onghalamwenyo youdjeko oko kwa fimanenena ku dule okulonga ehalo laKalunga. Ndele mbela oto ka efa Satana e ku nwefe mo?

15. Ongahelipi hatu dulu okuhopaenena Jesus eshi hatu kondjifa omayeleko aSatana?

15 Nonande Eva okwa li a findwa komayeleko aSatana, Jesus okwa li e a kondjifa nomupondo. Pomhito keshe, okwa li a nyamukula Satana ta tofa mOmishangwa, ta ti: ‘Opa shangwa’ ile “Okwa tiwa.” Ngeenge ohatu konakona Ombibeli noukeka, ohatu ka shiiva nawa Omishangwa nohatu ka dimbuluka eevelishe odo tadi dulu oku tu kwafela tu diladile pandunge ngeenge hatu yelekwa. (Eps. 1:1, 2) Ngeenge otwa dimbuluka oihopaenenwa yopamishangwa yovapiya vaKalunga ovadiinini otashi ke tu kwafela tu va hopaenene. (Rom. 15:4) Jehova ote ke tu amena ngeenge otwe mu fimaneka nefimaneko lomoule, tu hole osho e hole notu tonde osho e tonde. — Eps. 97:10.

16, 17. Ongahelipi ‘eenghono detu dokudiladila’ tadi dulu okuholola kutya fye ovanhu va tya ngahelipi?

16 Omuyapostoli Paulus okwe tu ladipika tu longife ‘eenghono detu dokudiladila’ opo tu kale hatu diladila ngaashi Kalunga, ndele hangaashi ounyuni. (Rom. 12:1, 2, yelekanifa no-NW.) Paulus okwe tu dimbulukifa kutya otu na okulungamena osho hatu diladila eshi a ti: “Ohatu hanauna po omapopilongulu, nelinenepekifo keshe tali nenepekele okushiiva kwaKalunga, nakeshe ediladilo ohatu li tula meti li dulike kuKristus.” (2 Kor. 10:5) Omadiladilo etu ohaa holola kutya fye ovanhu va tya ngahelipi, nomolwaasho otwa pumbwa okukala hatu ‘diladila’ oinima ei tai tungu. — Fil. 4:8.

17 Itatu dulu okukala ovayapuki ngeenge ohatu diladila oinima inai koshoka notu na omahalo a puka. Otu na okukala tu hole Jehova ‘nomutima wa yela.’ (1 Tim. 1:5) Ndele omutima ou na omakoto, notashi dulika nokuli tuha mone kutya oinima yomounyuni oye tu nwefa mo shi fike peni. (Jer. 17:9) Onghee hano, mbela katu na okukala hatu ‘liyeleke fye vene, tu tale ngeenge otu li meitavelo; nokulipulaapula’ mokulikonakona paumwene tu tale ngeenge otu li metwokumwe naasho twe lihonga mOmbibeli? — 2 Kor. 13:5.

18, 19. Omolwashike tu na okukala twa tokola toko okukala ovanhu voludi olo Jehova a hokwa?

18 Shimwe vali osho tashi dulu oku tu kwafela tu henuke oinima yomounyuni osho okukaleka momadiladilo eendjovo daJohannes da nwefwa mo odo tadi ti: “Ounyuni otau xulu po pamwe nokahalu kao; ndelenee ou ta longo ehalo laKalunga, oye ta kala alushe.” (1 Joh. 2:17) Ounyuni waSatana otau monika wa fa oshinima tashi kalelele. Ndele fikulimwe onau ka xule po. Mounyuni waSatana kamu na oshinima tashi kalelele. Okudimbuluka oushili oo otaku ke tu kwafela tuha yulwe kOndiaboli.

19 Omuyapostoli Petrus okwe tu kumaida tu kale ovanhu ovo va hokiwa kuKalunga ofimbo twa ‘teelela nokweendelelifa euyo lefiku laKalunga, efiku tuu olo tali lungwinifa po eulu ndee tali hengumukifa oihovelitungifo komundjene woupyu.’ (2 Pet. 3:12) Efiku olo oli li poduka, na Jehova ota ka hanauna po keshe osho shi li oshitukulwa shounyuni waSatana. Ndele fimbo twa teelela osho shi ningwe, Satana ota twikile okulongifa oinima yomounyuni waye opo e tu yeleke, ngaashi a li a yeleka Eva naJesus. Inatu hopaenena nande Eva, mokukendabala okuwanifa po omahalo etu vene. Ngeenge otwa ningi ngaho, ohatu ulike kutya Satana oye kalunga ketu. Otwa pumbwa okuhopaenena Jesus mokukondjifa omayeleko, kutya nee oinima oyo Satana te tu yeleke nayo nai kale tai monika i hokwifa shi fike peni. Keshe umwe womufye na kale a tokola toko okukala omunhu woludi olo Jehova a hokwa.