Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) AUGUSTE 2013

Ino ‘handukila Jehova’

Ino ‘handukila Jehova’

“Oulai womunhu tau nyono po ondjila yaye, ndelenee omutima waye tau handukile [Jehova, NW].” — OMAYEL. 19:3.

1, 2. Omolwashike tuhe na okupa Jehova oushima omolwomaupyakadi oo e li mounyuni? Shi yelifa to yandje efaneko.

NATU tye nee ou li omulumenhu oo a kala ta hafele ohombo yaye oule womido dihapu. Ndele efiku limwe eshi wa ka alukila keumbo, owa hanga oinima aishe meumbo loye i li mehalakano. Oikwaipundi yoye oya teyauka, oikwatelwa oya tatauka nemate ola nyonaunwa noitali dulu vali okulongifwa. Eumbo loye olo wa kala u hole kali fi vali okutalwa. Mbela oto fikile ashike to ti, “Omolwashike omukulukadi wange a ningila ngaha?” Ito ka tya mbela, “Olyelye a ninga ngaha?” Nopehe na omalimbililo, epulo etivali olo tali ke uya tete momadiladilo oye. Omolwashike mbela? Omolwaashi ou shii kutya omukulukadi woye omuholike ita longo oushada wa tya ngaho owina.

2 Kunena, eduumbo letu ola nyatekwa, oku yadi elongifo leenghono nosho yo okuhenoukoshoki wopaenghedi. Ashike otwe lihonga mOmbibeli kutya Jehova haye omweetifi womaupyakadi aeshe oo. Okwa li a shita edu eli li kale oparadisa iwa. (Gen. 2:8, 15) Jehova oku li yo Kalunga omunahole. (1 Joh. 4:8) Okukonakona Omishangwa okwe tu kwafela tu mone kutya Satana Ondiaboli, oo e li “omupangeli wounyuni” ou, oye lela omweetifi womaupyakadi mahapu oo e li mounyuni. — Joh. 14:30; 2 Kor. 4:4.

3. Oshike tashi dulu oku tu ningifa tu kale tu na etaleko lii li na sha nomaupyakadi etu?

3 Ashike Satana haye tu na okupa oushima omolwomaupyakadi etu aeshe. Omolwashike mbela? Omolwaashi omaupyakadi etu amwe ohaa etifwa komapuko etu. (Lesha Deuteronomion 32:4-6.) Ndele nonande otashi dulika twa dimina oshinima osho, okuhawanenena kwetu otaku dulu oku tu ningifa tu kale tu na etaleko lii li na sha nomaupyakadi etu, naasho otashi dulu oku tu twala moupyakadi. (Omayel. 14:12) Ngahelipi mbela? Ponhele yokulipa fye vene oushima ile oku u pa Satana omolwomaupyakadi etu, otashi dulika  tu hovele okuvela Jehova eembedi. Otashi dulika nokuli tu mu “handukile.” — Omayel. 19:3.   

4, 5. Oshike hashi ulike kutya Omukriste okwa ‘handukila Jehova’?

4 Ohatu dulu ngoo shili ‘okuhandukila Jehova’? Oushili oyoo kutya okuninga ngaho itashi kwafa sha. (Jes. 41:11) Nande natu mu handukile itatu ka pondola sha. Omutoti woitevo umwe okwa ti: “Ito dulu okulwa naKalunga molwaashi omaoko oye omaxupi noito dulu oku mu hanga.” Otashi dulika katu na efiku twa popile kutya otwa handukila Jehova. Ndele Omayeletumbulo 19:3 otaa ti kutya oulai womunhu otau “nyono po ondjila yaye ndelenee omutima waye tau handukile Omwene.” Onghee hano, omunhu ota dulu okukala a handukila Kalunga momutima waye. Oikala ya tya ngaho otai dulu okulimonikila mwaasho omunhu ta ningi. Omunhu otashi dulika a kale a fula onya, ndele ta fiye po eongalo ile a kale ita yambidida vali omalongekido ehangano laJehova.

5 Oshike tashi dulu oku tu ningifa tu “handukile Jehova”? Ongahelipi hatu dulu okuhenuka omwiyo wa tya ngaho? Osha fimanenena okushiiva omanyamukulo omapulo oo molwaashi otashi ke tu kwafela tu amene ekwatafano letu naJehova.

OSHIKE TASHI DULU OKU TU NINGIFA TU KALE TWA ‘HANDUKILA JEHOVA’?

6, 7. Omolwashike Ovaisrael vopefimbo laMoses va li va hovela okungongotela Jehova?

6 Oshike tashi dulu okuningifa omupiya waJehova omudiinini a hovele oku mu ngongotela momutima waye? Natu ka kundafaneni oinima itano nosho yo oihopaenenwa yOmbibeli oyo tai ulike nghee vamwe monakudiwa va li va wila momwiyo oo. — 1 Kor. 10:11, 12.

Okupwilikina komapopyo mai avamwe otaku dulu oku tu nwefa mo (Tala okatendo 7)

7 Omapopyo mai avamwe otaa dulu oku tu nwefa mo. (Lesha Deuteronomion 1:26-28.) Diladila kwaasho Jehova a li a ningila Ovaisrael opo e va mangulule moupika muEgipti. Jehova okwa li a etela Ovaegipti omahandukilo 10 nokwa hanauna po Farao netangakwaita laye mEfuta Litilyana. (Ex. 12:29-32, 51; 14:29-31; Eps. 136:15) Oshiwana shaKalunga osha li she lilongekida okuya mEdu lEudaneko. Ndele pefimbo olo la fimana, Ovaisrael ova li va hovela okungongotela Jehova. Oshike sha li she va ningifa va kale vehe na eitavelo? Ova li va teka omukumo nova tila omolwonghundana ii oyo va li va lombwelwa keendadi dimwe domwaado da li da ka lava edu leudaneko. (Num. 14:1-4) Oshidjemo, Jehova ka li e va pitika va ye “medu olo liwa.” (Deut. 1:34, 35) Mbela nafye omafimbo amwe ohatu efa omapopyo mai avamwe a nghundipaleke eitavelo letu noku tu ningife tu ngongote shi na sha nonghedi omo Jehova he tu wilike?

8. Oshike sha li sha ningifa oshiwana shaKalunga shopefimbo laJesaja shi pe Jehova oushima omolwomaupyakadi asho?

8 Omaupyakadi nomaudjuu otaa dulu oku tu teya omukumo. (Lesha Jesaja 8:21, 22.) Pefimbo laJesaja, Ovajuda ova li ve lihanga meenghalo didjuu. Ova li va dingililwa kovatondi. Vahapu vomuvo ova li va fya ondjala omolwomhumbwe yoikulya. Ashike ondjala yopamhepo oyo unene ya li oupyakadi munene. (Amos 8:11) Ponhele yokukonga ekwafo kuJehova eshi tava ungaunga nomaupyakadi avo, ova li tava pe Jehova nohamba yavo oushima. Nafye ngeenge otwa efa eenghalo dinyikifa oluhodi ile omaupyakadi e tu teye omukumo, otashi dulika tu pe Jehova oushima nokukala tu udite kutya ine tu pa ekwafo olo twa li twa pumbwa.

9. Omolwashike Ovaisrael vopefimbo laHesekiel va li ve na etaleko la puka?

9 Ihatu kala tu shii ouyelele aushe oo wa kwatelwa mo. Ovaisrael vopefimbo laHesekiel ova li tava diladila kutya ondjila yaJehova “inai yuka,” molwaashi kava li ve shii ouyelele aushe u na sha neenghalo omo va li. (Hes. 18:29) Nonande kava li ve udite ko omatomheno aKalunga aeshe, ova li va fa ngeno ve na oufemba woku mu tokola nowokuufa kutya ota ningi oinima monghedi ya yuka ile hasho. Ngeenge omafimbo  amwe otwe lihange tuhe udite ko omahokololo onhumba Ombibeli ile kutya omolwashike oshinima shonhumba shetu ningilwa, mbela ohatu ka kala hatu diladila momitima detu kutya ondjila yaJehova “inai yuka”? — Job 35:2.

10. Ongahelipi omunhu tashi dulika a landule oshihopaenenwa shii shaAdam?

10 Okuhadimina omanyono nomapuko etu. Pehovelo londjokonona yovanhu, Adam okwa li a pa Jehova oushima ponhele yokudimina enyono laye. (Gen. 3:12) Adam okwa nyonena owina nokwa li e shii oilanduliko oyo ta ka mona ngeenge okwa nyono omhango yaKalunga. Ndele nande ongaho, okwa li a pa Jehova oushima, sha fa ngeno kutya okwa nyona molwaashi Jehova oye e mu pa omukulukadi e na oikala ii. Okudja opo, ovanhu vamwe navo ova shikula oshihopaenenwa shii shaAdam shokupa Kalunga oushima omolwomapuko avo. Otu na okulipula kutya, ‘Mbela ohandi kala nda nyemata nonda kenyananekwa komapuko ange ndele handi hovele okudiladila kutya omifikamhango daJehova odidjuu unene?’

11. Oshike hatu lihongo moshihopaenenwa shaJona?

11 Okukulika oikala yokuliholamwene. Omuprofeti Jona okwa li a handuka eshi Jehova a li a fila onghenda Ovaninive. (Jona 4:1-3) Omolwashike mbela? Okwa li a tila Ovaninive va diladile kutya ye omuprofeti omunaipupulu molwaashi oshilando inashi hanaunwa po ngaashi a li a xunganeka. Jona okwa li te lipula unene shi na sha nokuliningila edina liwa ponhele yokukala e uditile onghenda Ovaninive ovo va li ve livela ombedi. Mbela nafye oshi na oupu tu kwatwe koikala yokuliholamwene ndele hatu “handukile Jehova” eshi ina xulifa po natango ounyuni ou? Ngeenge otwa kala hatu udifa oule womido omilongo kutya efiku laJehova oli li popepi, mbela ohatu ka kala twa handukila Jehova ngeenge vamwe ova kala tave tu kembaula eshi efiku olo inali uya natango? — 2 Pet. 3:3, 4, 9.

NGHEE HATU DULU OKUHENUKA OKUKALA TWA ‘HANDUKILA JEHOVA’

12, 13. Oshike tu na okuninga po ngeenge otwa limbililwa momitima detu osho Jehova a ninga ile osho a pitika shi ningwe?

12 Ohatu ka ninga po shike ngeenge otwa limbililwa momitima detu osho Jehova a ninga ile osho a pitika shi ningwe? Dimbuluka kutya kashi li pandunge okuninga ngaho. Omayeletumbulo  19:3 okwa tolokwa mOmbibeli yoByington taku ti: “Okuhashiiva sha kwomunhu otaku tumhakanifa oinima yaye ndele ye ta handukile Jehova.” Tu na oshinima osho momadiladilo, natu ka kundafaneni oinima itano oyo tai ke tu kwafela tuha pe Jehova oushima omolwomaupyakadi etu.

13 Kaleka ekwatafano loye naJehova la kola. Ngeenge otu na ekwatafano lopofingo naKalunga, itatu ka efa oikala yokuhawanenena i tu ningife tu mu handukile. (Lesha Omayeletumbulo 3:5, 6.) Otwa pumbwa okukala twe lineekela muJehova. Natu henukeni yo okudiladila kutya otu shii shihapu tu dule Jehova ile kutya eemhumbwe detu odo unene da fimanenena. (Omayel. 3:7; Omuud. 7:16) Osho otashi ke tu kwafela tuha pe Jehova oushima omolwoinima ii oyo tai ningwa.

14, 15. Oshike tashi ke tu kwafela tuha nwefwe mo komapopyo mai avamwe?

14 Ino efa omapopyo mai avamwe e ku nwefe mo. Ovaisrael vopefimbo laMoses ova li ve na omatomheno mahapu okukala nelineekelo kutya Jehova ote ke va kwafela va ye mEdu lEudaneko. (Eps. 78:43-53) Ndele eshi va lombwelwa onghundana ii keendadi 10 dihe fi didiinini, inava “dimbulukwa eke laye.” (Eps. 78:42) Ngeenge otwa dilonga koilonga yaJehova, nokudimbuluka oinima aishe iwa oyo e tu ningila, ohatu ka pameka ekwatafano letu naye. Oshidjemo, itatu ka efa omadiladilo mai avamwe e tu ehenife kokule naJehova. — Eps. 77:12, 13.

15 Ngahelipi ngeenge ihatu ungaunga nawa novaitaveli vakwetu? Osho otashi dulu okukuma ekwatafano letu naJehova. (1 Joh. 4:20) Eshi Ovaisrael va li inava hafela okunangekwa po kwaAron e li omupristeri omukulunhu, Jehova okwa li e wete va fa oye tava ngongotele. (Num. 17:10) Sha faafana, ngeenge ohatu ngongota shi na sha naavo Jehova ta longifa okukwatela komesho oshitukulwa shehangano laye shokombada yedu, ohatu ka kala ashike twa fa oye hatu ngongotele. — Heb. 13:7, 17.

16, 17. Oshike tu na okudimbuluka ngeenge tu na omapyakadi?

16 Dimbuluka kutya Jehova haye he tu etele omaupyakadi. Nonande Ovaisrael vopefimbo laJesaja ova li ve liteeka Jehova, natango okwa li a hala oku va kwafela. (Jes. 1:16-19) Kashi na nee mbudi kutya ohatu ka shakeneka omaupyakadi e fike peni, otashi tu hekeleke okushiiva kutya Jehova oku na ko nasha nafye nokwa hala oku tu kwafela. (1 Pet. 5:7) Okwe tu udanekela nale kutya ote ke tu pa eenghono odo twa pumbwa opo tu lididimikile omaupyakadi. — 1 Kor. 10:13.

17 Ngeenge ohatu mono oixuna omolwokuhe na ouyuki kwonhumba ngaashi omulumenhu omuyuki Job, otu na okudimbuluka kutya Jehova haye ha etifa okuhe na ouyuki. Jehova oku tonde okuhe na ouyuki ndele okuhole ouyuki. (Eps. 33:5) Natu kale twa fa kaume kaJob, Elihu, oo a ti: “Kalunga oku li kokule nouhenakalunga, nOmunamapangelo aeshe [oku] li kokule nowii.” (Job 34:10) Ponhele yoku tu etela omaupyakadi, Jehova ohe tu pe “keshe oshipewa shiwa, nokeshe oshali sha wanenena.” — Jak. 1:13, 17.

18, 19. Omolwashike tuhe na nande okukala twa limbililwa Jehova? Yelifa to yandje efaneko.

18 Ino limbililwa nande Jehova. Kalunga okwa wanenena, nomadiladilo aye oku dule etu. (Jes. 55:8, 9) Onghee hano, elininipiko nokukala tu shii kutya otwa ngabekwa oi na oku tu linyengifa tu dimine kutya itatu dulu okuuda ko oinima aishe. (Rom. 9:20) Haalushe hatu kala tu shii ashishe osho sha kwatelwa monghalo yonhumba. Nopehe na omalimbililo, owa mona oushili weyeletumbulo eli: “Nakutulifa mo oshibofa oha monika a fa oye e li mondjila fiyo osheshi mukwao e uya ndele te mu hokololifa.” — Omayel. 18:17, New International Version.

19 Natu tye nee ngeno ou na kaume omulineekelwa oo a ninga oshinima osho uhe udite ko ile u wete ina wana oku shi ninga. Mbela oto ka endelela ashike okufika pexulifodiladilo kutya okwa ninga epuko? Ile oto ka dimina  kutya otashi dulika e li mondjila molwaashi ku shii ashishe osho sha kwatelwa mo, naunene tuu ngeenge omunhu oo owa kala u mu shii oule womido dihapu? Ngeenge ohatu ungaunga pahole nookaume ketu ovo inava wanenena, mbela itatu ka kala twe lineekela Tate yetu womeulu oo eendjila daye nomadiladilo aye e dule etu?

20, 21. Omolwashike tuhe na okupa Jehova oushima omolwomaupyakadi etu?

20 Dimbuluka kutya omaupyakadi etu ohaa etifwa kushike. Otwa pumbwa okudimbuluka kutya omaupyakadi amwe ofye vene hatu e lietele. (Gal. 6:7) Inatu kendabala okupa Jehova oushima omolwomaupyakadi etu. Omolwashike itashi ka kala pandunge okuninga ngaho? Diladila koshihopaenenwa eshi: Ohauto otai dulu okutondoka ya mana mo. Ndele mbela ngeenge omushingi eshi ta i mondalaye okwa shingi ponhapo i dulife pwaayo a ufilwa ndele ta kondama, mbela omulongi wohauto oye e na okupewa ondjo? Hasho nandenande! Sha faafana, Jehova okwe tu shita tu na emanguluko lokuninga omatokolo. Ashike okwe tu honga yo nghee tu na okuninga omatokolo opandunge. Onghee hano, katu na okupa oushima Omushiti wetu omolwomapuko etu.

21 Ashike omaupyakadi etu amwe ihaa etifwa komapuko etu ile omolwokukatuka eenghatu da puka. Omaupyakadi amwe ohaa holoka po ‘omolwefimbo nombaadilila.’ (Omuud. 9:11, NW) Ndele inatu dimbwa yo kutya Satana Ondiaboli oye omweetifi woukolokoshi. (1 Joh. 5:19; Eh. 12:9) Satana oye omutondi, ndele haJehova! — 1 Pet. 5:8.

KALA WA LENGA EKWATAFANO LOYE NAJEHOVA

Josua naKaleb ova li va nangekwa noupuna molwaashi ova li ve lineekela muJehova (Tala okatendo 22)

22, 23. Otu na okudimbuluka shike ngeenge otwa teka omukumo omolwomaupyakadi etu?

22 Ngeenge ou na omaupyakadi manene, dimbuluka oshihopaenenwa shaJosua naKaleb. Mepingafano neendaadi dikwao 10, ovalumenhu ovo ovadiinini vavali ova li va etelela onghundana iwa. (Num. 14:6-9) Ova li yo va ulika kutya ova itavela muJehova. Ndele nande ongaho, navo ova li ve na okweelaela mombuwa oule womido 40 pamwe nOvaisrael vakwao. Mbela Josua naKaleb ova li tava ngongota ile va handuka, ve udite kutya ova ningilwa oshinima shihe li pauyuki? Ahowe. Ova kala ve lineekela muJehova. Ova li ngoo va nangekwa noupuna? Heeno! Ovalumenhu ovo vavali ova ka ya mEdu lEudaneko, ofimbo epupi lavo alishe la fila mombuwa. (Num. 14:30) Sha faafana, nafye Jehova ote ke tu nangeka noupuna ngeenge “itatu loloka” okulonga ehalo laye. — Gal. 6:9; Heb. 6:10.

23 Ou na okuninga po shike ngeenge owa teka omukumo omolwomaupyakadi oye ile omolwokuhawanenena kwavamwe ile kwoye mwene? Kala to yandje elitulemo komaukwatya aJehova makumwifi. Kala wa fa u wete oinima iwa oyo Jehova e ku udanekela. Lipula yo kutya ngeno onghalamwenyo yoye oya fa peni ngeno kwa li u na ekwatafano lopofingo naJehova. Kala alushe popepi naye, noino kala nande we mu handukila momutima woye.